ཐང་ལ་གྲོང་སྡེའི་ཡུལ་སྲོལ་འགའ།

        ཐང་ལ་གྲོང་སྡེ་ནི་བདེ་ཆེན་རྫོང་ཡན་མིན་ཤང་གི་རྫ་ཆུའི་ཤར་རྒྱུད་ཀྱི་རི་ཁུལ་དུ་གནས་པའི་ཞིང་མ་འབྲོག་གི་བོད་རིགས་གྲོང་སྡེ་ཆེས་ཐུན་མོང་བ་ཞིག་ཡིན་ཞིང་།འོག་གྲོང་དང་གཉའ་གྲོང་སྟེ་རང་བྱུང་གྲོང་སྡེ་གཉིས་སུ་བགོས་ཡོད་དེ།འོག་གྲོང་ལ་དུད་ཚང་དྲུག་ཅུ་ལྷག་ཡོད་ལ།མི་གྲངས་སུམ་བརྒྱ་ཙམ་ཡོད།གཉའ་གྲོང་ལ་དུད་ཚང་སུམ་ཅུ་ལྷག་ཡོད་ལ།མི་གྲངས་བརྒྱ་དང་ལྔ་བཅུ་ལྷག་ཡོད།བཤད་རྒྱུན་དུ།ཐང་ལ་བའི་ཆེས་གདོད་མའི་ཡུལ་མིའི་ཡོང་ཁུངས་ནི་ཡན་མིང་ཤང་གི་རྫ་ཆུའི་ཤར་རྒྱུད་དུ་ཆགས་པའི་ཞི་བདེ་གྲོང་སྡེ་དང་གཡག་རྐང་གྲོང་སྡེ།ནགས་ལམ་ཁ་གྲོང་སྡེ་སྟེ་འཕྲེད་རྒྱུག་རི་རྒྱུད་ཀྱི་རི་ལྡེབས་སུ་ཆགས་པའི་གྲོང་སྡེ་འདི་དག་གི་ཆེས་གདོད་མའི་ཡུལ་མིའི་ཡོང་ཁུངས་དང་འདྲ་བར་རྒྱལ་མོ་ཚ་བ་རོང་ནས་ཡིན་ཞིང་།ཐང་ལ་གྲོང་སྡེ་དང་གོང་གསལ་གྱི་གྲོང་སྡེའི་སྤྱི་མིང་དུ་རྒྱལ་རོང་ཤོག་ལྔ་ཞེས་པའི་འབོད་སྲོལ་ཡོད།ལྷག་པར་དུ་ཞི་བདེ་དང་གཡག་རྐང་།ཐང་ལ་བཅས་གྲོང་སྡེའི་ཆེས་གདོད་མའི་ཡུལ་མི་ནི་སྤུན་མཆེད་གསུམ་ཡིན་པར་གྲགས་ཏེ།དང་ཐོག་སྤུན་མཆེད་གསུམ་པོ་རྒྱལ་མོ་ཚ་བ་རོང་གི་རི་ཀླུང་བརྒལ་ནས་འབྲི་ཆུའི་རྒྱུད་དུ་གནས་སྤོས་ཤིང་།དེ་ནས་རྫ་ཆུའི་རྒྱུད་ཀྱི་འབའ་ལུང་རྫོང་གི་དགྲ་ཡུལ་ཞེས་པའི་ས་ཆར་སླེབས་ནས་དེར་གཞིས་ཆགས་ཤིང་།དེ་རྗེས་རིམ་བཞིན་རྫ་ཆུའི་སྟོད་རྒྱུད་ཕྱོགས་སུ་གནས་སྤོས་པ་རེད།མཐར་སྤུན་མཆེད་གསུམ་པོ་སོ་སོར་ཐང་ལ་དང་གཡག་རྐང་།ཞི་བདེ་སོགས་ཡུལ་གྲུར་གཞིས་ཆགས་ཏེ།ཕུ་བོ་ཆེ་བ་ནི་གཡག་རྐང་དུ་གཞིས་ཆགས་ཤིང་མནའ་མ་འབྲི་ཆུའི་རྒྱུད་དུ་ཆགས་པའི་ཤར་པ་བའི་བོད་རིགས་བུ་མོ་ཞིག་ལེན་པ་དང་།ཞི་བདེར་གཞིས་ཆགས་པའི་ཕུ་བོ་ཆུང་བ་ཡིས་མནའ་མ་ནུའུ་རིགས་བུ་མོ་ཞིག་ལེན་པ།ཐང་ལར་གཞིས་ཆགས་པའི་ནུ་བོ་ཡིས་མནའ་མ་ལི་སུའུ་རིགས་ཀྱི་བུ་མོ་ཞིག་ལེན་པའི་བཤད་སྲོལ་ཡང་ཡོད།སྤྱི་ལོའི་དུས་རབས་20པའི་ལོ་རབས་70ཡི་སྐབས་སུ།ཞི་བདེ་རུ་ཆེན་གྱིས་ཀྱང་ཡན་མིང་ཤང་གི་རུ་ཆེན་གཞན་དང་འདྲ་བར་ཞིང་ལས་ཐད་ཏ་ཀྲི་ལ་སློབ་སྦྱོང་བྱེད་པའི་ལས་འགུལ་བསླངས་ཏེ།ཞི་བདེ་གྲོང་སྡེའི་ཐོན་སྐྱེད་འཕྲལ་སྒྲུབ་ན་གཞོན་རུ་ཁག་གིས་ཐོན་སྐྱེད་རུ་ཆེན་གྱི་བཀོད་སྒྲིག་ལྟར་གྲོང་སྡེའི་སྟོད་ཀྱི་རི་བོ་དེའུ་འབུར་ཞིག་བརྐོས་ནས་སྐས་རིམ་ཞིང་ཁར་བཟོ་དུས།ས་འོག་ནས་གནའ་མིའི་རྡོའི་དུར་སྒམ་འགའ་རྙེད་ཅིང་།རྡོའི་དུར་སྒམ་ནང་དུ་གནའ་མིའི་རྐང་ལག་གི་རུས་པ་དང་མགོ་རུས།ད་དུང་རྩ་ཆེའི་ལིའི་ཡོ་བྱད་སོགས་ཀྱི་ཞོར་སྦས་དངོས་རྫས་རྙེད་པ་རེད།སྐབས་དེར།ཞི་བདེ་གྲོང་སྡེར་རྡོའི་དུར་སྒམ་རྙེད་པ་ནི་གནའ་རྫས་དཔྱད་ཞིབ་ལས་རིགས་ཐད་ཐོབ་པའི་གལ་ཆེའི་གྲུབ་འབྲས་ཤིག་ཡིན་སྟབས།དུས་མཚུངས་སུ་བདེ་ཆེན་རྫོང་ཡུན་ལིན་ཤང་གི་གླང་འགྱིལ་གྲོང་སྡེ་དང་ཧྥུ་ཧྲན་ཤང་གི་ནག་པོ་གྲོང་སྡེ།སེམས་ཀྱི་ཉི་ཟླ་རྫོང་ཉི་ཤར་ཤང་གི་ཐང་སྨད་གྲོང་སྡེར་རྙེད་པའི་རྡོའི་དུར་སྒམ་ལྟར་འབྲེལ་ཡོད་གནའ་རྫས་དཔྱད་ཞིབ་སྡེ་ཁག་གིས་མཐོང་ཆེན་བྱས་ཏེ་གནའ་རྫས་དཔྱད་ཞིབ་རུ་ཁག་མངགས་ནས་དེར་དཔྱད་ཞིབ་བྱེད་དུ་བཅུག་པས།གནའ་རྫས་དཔྱད་ཞིབ་རུ་ཁག་གིས་དཔྱད་ཞིབ་བྱས་རྗེས།རྡོའི་དུར་སྒམ་དེ་དག་མ་མཐའ་ཡང་ལོ་ངོ་ཉིས་སྟོང་ལྷག་གི་ལོ་རྒྱུས་ལྡན་པའི་ཁ་ཚོན་བཅད་པ་རེད།དེ་བཞིན་ཐང་ལ་གྲོང་སྡེ་འདི་ཆགས་པའི་ལོ་རྒྱུས་ཀྱང་དེ་དང་འདྲ་མཚུངས་ཡིན་ཏེ་ད་བར་ལོ་ངོ་ཉིས་སྟོང་ལྷག་ཡོད་པ་རེད།
        གནའ་སྔ་མོ་ནས་བཟུང་ཐང་ལ་གྲོང་སྡེའི་ཡུལ་མི་ཚོས་ལས་ལ་བརྩོན་ཞིང་དཔའ་ངར་ལྡན་པའི་ངང་རང་བྱུང་ཁམས་ཀྱི་ཆ་རྐྱེན་དེ་འདྲ་མི་ཡག་པའི་རི་ཁུལ་དེར་ཐོན་སྐྱེད་འཚོ་གནས་བྱེད་ཀྱི་ཡོད།ཡུལ་མི་ཚོའི་ཐོན་སྐྱེད་འཚོ་བ་ཇེ་ཡག་ཏུ་ཞིག་འགྱུར་ཆེད།ཡུལ་མི་ཚོས་བོད་རིགས་ཐུན་མོང་གི་ཡུལ་སྲོལ་གོམས་འདྲིས་རྒྱུན་འཁྱོངས་བྱེད་པའི་ལྷན་དུ་རང་ས་གནས་ཀྱི་རང་བྱུང་གི་གནས་ཚུལ་དང་བསྟུན་ཏེ་དམིགས་བསལ་གྱི་ཁྱད་ཆོས་ལྡན་པའི་ཡུལ་སྲོལ་གོམས་འདྲིས་ཀྱང་ཆགས་ཀྱི་ཡོད་ལ།ཡུལ་སྲོལ་གོམས་འདྲིས་དེ་དག་ད་ལྟའང་འགྱུར་བ་དེ་ཙམ་མེད།གཤམ་ལ་ཐང་ལ་གྲོང་སྡེའི་ཐུན་མིན་གྱི་ཡུལ་སྲོལ་གོམས་འདྲིས་འགའ་ཅུང་ཙམ་འགོད་རྒྱུ་ཡིན།
        གཅིག   ཞོགས་པར་ཟས་ཐེངས་གཉིས་ཟ་བའི་སྲོལ་ཡོད།
　　    ཞོགས་ཟས་ནི་མི་ཞིག་གི་ཉིན་གཅིག་ཟས་ཐེངས་གསུམ་པོའི་ཆེས་གལ་ཆེའི་ཟས་ཐེངས་ཤིག་ཡིན་ཞིང་།མི་ཞིག་གི་ཉིན་གཅིག་གི་ཟས་བཅུད་གཙོ་བོ་དེ་ཞོགས་ཟས་ལ་རག་ལས་དགོས་ཀྱི་རེད།གལ་ཏེ་ཞོགས་ཟས་ཡག་པོ་དང་འདང་བ་ཞིག་ཟོས་མ་ཐུབ་ན།མི་དེའི་ཉིན་གཅིག་གི་ལུས་ཁམས་བདེ་ཐང་དང་།ཐོན་སྐྱེད་འཚོ་བ།འགྲོ་སྐྱོད་དང་སློབ་སྦྱོང་སོགས་ཀྱི་ལས་ཀར་ཤུགས་རྐྱེན་ཆེན་པོ་ཐེབས་རྒྱུ་རེད།དེའི་ཕྱིར།གནའ་སྔ་མོ་ནས་བཟུང་ས་ཆ་གང་གའི་ཡུལ་མི་ཚོས་ཞོགས་ཟས་ལ་ཧ་ཅང་གིས་མཐོང་ཆེན་བྱེད་པའི་སྲོལ་ཡོད།ཐང་ལ་གྲོང་སྡེའི་ཡུལ་མི་ཚོས་ཀྱང་ཞོགས་ཟས་ལ་ཧ་ཅང་གིས་མཐོང་ཆེན་བྱས་པ་མ་ཟད།ད་དུང་གནའ་སྔ་མོ་ནས་བཟུང་ཞོགས་པར་ཟས་ཐེངས་གཉིས་ཟ་བའི་སྲོལ་ཡོད་དེ།དེ་ནི་ཡན་མིང་ཤང་གི་རྫ་ཆུའི་རྒྱུད་ཀྱི་བོད་རིགས་ས་ཁུལ་གྱི་གྲོང་སྡེ་གཞན་དང་མི་འདྲ་བའི་གནས་ཤིག་རེད།
　　    ཞོགས་ཟས་ཐེངས་དང་པོ།ཞོགས་པ་སྔ་མོ་ཡར་ལངས་མ་ཐག   ཁྱིམ་བདག་མ་ཡིས་ལམ་སང་མེ་ཐབ་ཏུ་མེ་སྤར་ནས་ཞོགས་ཇ་བསྐོལ་ཏེ་མར་ཇ་སྲུབ་དགོས།མར་ཇ་སྲུབ་རྗེས་ཁྱིམ་མི་ཚོས་ཐབ་ཚང་ལ་བསྐོར་ནས་འབྲུག་རིས་དཀར་ཡོལ་ནང་དུ་མར་ཇ་སྲུབ་མ་བླུགས་ཏེ་འཐུང་བ་དང་།འབྲུག་རིས་རྩམ་ཕོར་དུ་བླུགས་པའི་ནས་ཀྱི་རྩམ་པ་དང་མ་རྨོས་ལོ་ཏོག་གི་རྩམ་པ་འགམ་པ་དང་རྩམ་ལོག་བརྫིས་ནས་བཟའ་རྒྱུ་རེད།གལ་ཏེ་ཐུད་དང་ཆུར་བ།ཟ་ཤུར་ཡོད་ན་མར་ཇ་སྲུབ་མ་ལ་ཐུད་དང་ཆུར་བ།ཟ་ཤུར་སྦངས་ན་བྲོ་བ་དང་བཅུད་ཇེ་ལེགས་སུ་འགྱུར་ཐུབ་པ་རེད།དེའི་ཕྱིར་ས་གནས་གཞན་གྱི་བོད་རིགས་མང་ཚོགས་དང་འདྲ་བར་ཐང་ལ་གྲོང་སྡེའི་ཡུལ་མི་ཚོས་ཀྱང་བོད་རིགས་ཀྱི་སྲོལ་རྒྱུན་དཀར་ཟས་ཐུད་དང་ཆུར་བ།ཟ་ཤུར་བཟའ་རྒྱུ་ལ་ཧང་ཅང་དགའ་པོ་ཡོད།
　　    ཞོགས་ཟས་ཐེངས་དང་པོ་ཟོས་རྗེས།ཁྱིམ་ཚང་གཅིག་གི་ཁོངས་མིས་རང་རང་སོ་སོའི་ཞོགས་པའི་ཁྱིམ་ལས་བྱེད་དགོས་ཀྱི་རེད་དེ།དཔེར་ན།ཁྱིམ་ཚང་གི་ཨ་ཕ་ཡིས་ཕྱུགས་རའི་ཕྱུགས་རྟ་ལ་རྩྭ་རྒྱག་པ་དང་ཆུ་ཚ་བླུད་པ།གཞོན་མའི་འོ་མ་འཇོ་བ་སོགས་བྱེད་དགོས་ཤིང་།ཁྱིམ་ཚང་གི་བུ་མོ་ཡིས་ཕྱུགས་རར་བཀག་པའི་ཕག་པ་ལ་ལྟོ་བླུད་པ།ཁྱིམ་ཚང་གི་བུ་ཕྲུག་གིས་ཉེ་སའི་རགས་ཤིང་དུ་ཉར་བའི་སོག་མ་དང་རྩྭ་སྐམ།སྔོ་རྩྭ་དབོར་བ་སོགས་ཀྱི་བྱ་བ་སྒྲུབ་དགོས།དེ་དུས།ཁྱིམ་བདག་མ་ཡིས་ཞོགས་ཟས་ཐེངས་གཉིས་པ་གྲ་སྒྲིག་བྱེད་དགོས་ཀྱི་རེད།
　　    ཞོགས་ཟས་ཐེངས་གཉིས་པ་ནི་ཐེངས་དང་པོ་དང་མི་འདྲ་བ་སྟེ།དེ་ནི་ཞོགས་པའི་དངོས་གཞིའི་ཟས་ཐེངས་ཤིག་ཡིན་ཞིང་།ཡུལ་མི་ཚོས་དེ་ལ་ཟ་མ་ཞེས་པའི་འབོད་སྲོལ་ཡོད།བཅོས་བསྒྱུར་སྒོ་འབྱེད་མ་བྱས་སྔོན་གྱི་ཟ་མ་ལ་གཙོ་བོར་མ་རྨོས་ལོ་ཏོག་གི་གོ་རེ་རླངས་བཙོས་མ་དང་མེས་བསྲོས་མ།ནས་ཀྱི་གོ་རེ་མེས་བསྲོས་མ་དང་ནས་ཀྱི་གོ་རེ་རླངས་བཙོས་མ།བྲ་བོའི་གོ་རེ་མེས་བསྲོས་མ།ཞོགས་ཁོག་རླངས་བཙོས་མ།ནན་ཀྭ་རླངས་བཙོས་མ།སྲན་མ་ཆུ་བཙོས་མ་སོགས་ཡོད་ལ།ཁུ་བ་ནི་ཤ་ཁུ་དང་ཡུང་མའི་ཁུ་བ།སྒོ་ངའི་ཁུ་བ་སོགས་ཡོད།ཤ་ཟས་ནི་གཙོ་བོ་ཕག་པའི་ཤ་བཙོས་མ་དང་ལུག་ཤ་བཙོས་མ།ཚག་ཤ་བཙོས་མ།ར་ཤ་བཙོས་མ་སོགས་ཡོད་དེ།གལ་ཏེ་ཕག་པའི་ཤ་དཀར་བཙོས་མ་ཡིན་ན།མཐུག་ཚད་སོར་གང་ཙམ་ཡོད་པའི་ཤ་ལྕེ་བྲེགས་ནས་མི་རེར་ཤ་ལྕེ་གཅིག་དང་གཉིས་བྱས་ཏེ་སྐལ་བ་བགོས་ནས་རང་སོའི་ཕོར་པར་འཇོག་སྟེ་བཟའ་བ་དང་།གོ་རེ་ཡང་མི་རེར་སྐལ་རེར་བགོས་ནས་རང་སོའི་ཕོར་པར་འཇོག་སྟེ་བཟའ་བའི་སྲོལ་ཡོད།གལ་ཏེ་བཟའ་མ་རྫོགས་པའི་གོ་རེ་དང་ཤ་དཀར་ལུས་ཡོད་ན།རང་སོས་ཉར་ཏེ་ལྟོགས་ཟས་སུ་བྱེད་པའི་སྲོལ་ཡོད་དེ།ང་རང་ཆུང་དུས་སུའང་རྒྱུན་པར་དེ་ལྟར་བྱས་པ་ཡིན།ཟས་ལྷག་ལྟོགས་ཟས་སུ་བྱེད་པ་དེ་ཞོགས་པའི་ཟ་མ་ཏག་ཏག་མ་ཡིན་པར།ཉིན་གུང་དང་མཚན་མོའི་ཟས་ཐེངས་སུའང་དེ་ལྟར་བྱེད་རྒྱུ་རེད།ལྷག་པར་དུ་དགུང་ཚིགས་ཀྱི་ཟས་ལྷག་ནི་དེ་བས་མཁོ་ཆེ་བ་རེད་དེ།ཡུལ་མི་ཚོས་དགུང་ཚིགས་ཟ་དུས་ངེས་པར་དུ་ཟས་ལྷག་ཅུང་ཙམ་ལུས་ཐབས་བྱེད་དགོས་ཤིང་།དེ་ལྟར་བྱས་པའི་རྒྱུ་མཚན་ནི་ཅི་ཡིན་ཞེ་ན།དེ་གཙོ་བོ་ནི་གནའ་དུས་དང་བསྒྱུར་བཅོས་སྒོ་འབྱེད་སྔོན་གྱི་འཚོ་བའི་ཆ་རྐྱེན་ཞན་པས།ཡུལ་མི་ཚོས་ཉིན་རེའི་བཟའ་བཅའི་ཐད་ལ་འཆར་གཞི་ཞིབ་ཕྲ་བཀོད་ནས་ཉིན་རེའི་རྒྱགས་འབྲུ་དང་ཟ་སྣུམ་སོགས་འདང་ཐབས་བྱེད་དགོས་པས།གལ་ཏེ་རྒྱགས་འབྲུ་དང་ཤ་ཟས་དང་ཟ་སྣུམ་སོགས་འཆར་གཞི་མེད་པར་གང་བྱུང་གིས་ཟོས་ན།ཁྱིམ་ཚང་དེའི་རྒྱགས་འབྲུ་དང་ཟ་སྣུམ།ཤ་ཟས་སོགས་ནི་ལོ་གཅིག་ཞག་མ་སུམ་བརྒྱ་དྲུག་ཅུ་ཡོངས་སུ་འདང་མི་ཐུབ་པ་རེད།དེའི་ཕྱིར།ཡུལ་མི་ཚོས་ཉིན་གཅིག་གི་དགུང་ཚིགས་དང་དགོང་ཟས་སོགས་ཟ་དུས་ཐབས་བརྒྱ་ཇུས་སྟོང་གིས་གོ་རེ་སོགས་ཀྱི་ཟས་ལྷག་ལུས་ཐབས་བྱེད་རྒྱུ་རེད།གལ་ཏེ་ཉིན་དེར་རང་ཉིད་ལ་གོ་རེ་སོགས་ཀྱི་ཟས་ལྷག་ཅིའང་ལུས་མེད་ན།དེ་མིན་གྱི་ལྟོགས་ཟས་གྲ་སྒྲིག་བྱས་ཀྱི་མེད་པས།ཉིན་དེར་ཕོ་བ་ལྟོགས་ཐག་ཆོད་རེད།
　　    བསྒྱུར་བཅོས་སྒོ་འབྱེད་བྱས་ཚུན།ལྷག་པར་དུ་ཉེ་བའི་ལོ་འགའི་རིང་ལ།ཏང་དང་རྒྱལ་ཁབ་ཀྱི་ཞིང་ཕན་ཞིང་དར་སྲིད་ཇུས་རབ་དང་རིམ་པ་ལག་བསྟར་བྱས་པའི་རྐྱེན་གྱིས་ཡུལ་མི་ཚོའི་བཟའ་བཏུང་ཡང་ཕུན་སུམ་ཇེ་ཚོགས་སུ་གྱུར་ཡོད་དེ།ཡུལ་མི་ཚོས་རྒྱུན་པར་འབྲས་ཟས་དང་ཤ་རིགས་སྣ་ཚོགས་ཟ་ཆོག་ལ།ཚོད་མའང་དེ་སྔ་ལས་དེ་བས་ཕུན་སུམ་ཚོགས་པོར་གྱུར་ཡོད་པ་དང་ཟས་བཅུད་དེ་བས་འཛོམས་པོར་གྱུར་ཡོད་དེ།དེ་སྔའི་ཉིན་གཅིག་གི་རྒྱགས་འབྲུ་དང་ཟ་སྣུམ།ཤ་ཟས་སོགས་འཆར་གཞི་ཞིབ་ཕྲ་བཀོད་ནས་ཟ་མཁས་འཐུང་མཁས་ངང་འཚོ་བ་སྐྱེལ་མི་དགོས་སྟབས།དེ་སྔའི་ཟས་ལྷག་ལུས་ཐབས་བྱས་ནས་ལྟོགས་ཟས་གྲ་སྒྲིག་བྱེད་པའི་སྲོལ་དེ་དེང་སང་དེ་འདྲ་གལ་མི་ཆེ་བར་གྱུར་ཡོད།
　　    འོ་ན།ང་ཚོས་འདིར་ཐང་ལ་གྲོང་སྡེའི་ཡུལ་མི་ཚོས་ཉེ་འཁོར་གྱི་གྲོང་སྡེའི་ཡུལ་མི་དང་མི་འདྲ་བའི་ཞོགས་ཟས་ཐེངས་གཉིས་ཟ་བའི་སྲོལ་དེ་ཆགས་པའི་དགོས་རྐྱེན་ཅི་ཡིན་ཞེ་ན།དེ་ནི་གཙོ་བོར་ཐང་ལ་གྲོང་སྡེའི་ཆགས་ཡུལ་གྱི་རང་བྱུང་ཁོར་ཡུག་གི་ཆ་རྐྱེན་ཞན་པའི་དབང་གིས་ཡུལ་སྲོལ་དེ་འདྲ་ཆགས་པ་རེད་དེ།ཐང་ལ་གྲོང་སྡེ་ནི་རྫ་ཆུའི་ཤར་རྒྱུད་ཀྱི་རི་བོའི་སྐེད་ཀྱི་རི་ལྡེབས་སུ་ཆགས་ཡོད་པས།རི་བོ་གཡང་གཟར་ཆེ་ཞིང་ཆུ་འདྲེན་ཆོག་པའི་གཞི་རྩའི་ཆུ་མ་ཉུང་བ་མ་ཟད།འབྲུ་རིགས་ཀྱི་ཡོང་འབབ་གཙོ་བོ་ནི་གང་སར་བཀྲམ་པའི་སྐམ་ཞིང་དང་རི་ཞིང་ལ་བརྟེན་དགོས་པ་དང་།ཞིང་ལས་གཉེར་བའི་ཞོར་དུ་ད་དུང་འབྲོག་ལས་ཀྱང་གཉེར་ཡོད་དེ།གྲོང་སྡེ་གཅིག་གི་དུད་ཚང་ཕལ་ཆེར་བ་གླང་དང་།འབྲི་གཡག  མཛོ་དང་མཛོ་མོ།རྟ་སོགས་ཀྱི་ཕྱུགས་རིགས་གསོ་བའི་ལྷན་དུ་ཕག་པ་དང་བྱ་སོགས་ཀྱང་གསོ་ཡོད་དེ།ཉིན་ལྟར་ཡུལ་མི་ཚོས་ཁྱིམ་ཚང་གི་ལས་ཀ་ཙག་ཙིག་ཧ་ཅང་མང་པོ་བྱེད་དགོས་ཀྱི་རེད།གཞན་ཡང་།ཡུལ་མི་ཚོས་ད་དུང་ཉིན་ལྟར་གནས་སྡོད་ས་ཆ་ནས་བར་ཐག་ལེ་དབར་བཅུ་དང་ཉི་ཤུ་ལྷག་ཡོད་པའི་མཐོ་རི་དང་ནགས་རིའི་ཁྲོད་དུ་ཡོད་པའི་སྐམ་ཞིང་དང་རི་ཞིང་དུ་ཞིང་ལས་དང་འབྲོག་ལས་བྱེད་དགོས་པས།ཞོགས་པ་སྔ་མོ་ཡར་ལངས་ནས་ཁྱིམ་ཚང་གི་ལས་ཀ་ཙག་ཙིག་བྱས་ཚར་རྗེས་གཞི་ནས་མཐོ་རིའི་སྐམ་ཞིང་དང་རྒྱང་རིང་གི་ལས་ཡུལ་དུ་བསྐྱོད་ནས་ཉིན་གཅིག་གི་ཞིང་ལས་གཙོ་བོ་བྱེད་དགོས་པ་དང་བ་གླང་དང་གཡག་འབྲི།རྟ་སོགས་ནགས་ཁྲོད་དུ་འཚོ་འགྲོ་དགོས་ཀྱི་རེད།དེའི་ཕྱིར།ཡུལ་མི་ཚོས་ཞོགས་ཇ་འཐུང་རྗེས་དལ་ཁོམ་མེད་པར་ལམ་སང་ཁྱིམ་ལས་ཙག་ཙིག་བྱས་ནས།ཞོགས་པའི་ཆུ་ཚོད་9པ་ཡན་མན་ཙམ་སླེབས་པ་ན།ཞོགས་པའི་ཟ་མ་ཟོས་ཏེ་ལུས་པོའི་ནུས་རྒྱུ་འདང་ངེས་སུ་བཏང་རྗེས་གཞི་ནས་མཐོ་རི་དང་ནགས་ཁྲོད་དུ་བསྐྱོད་དེ་ཉིན་གཅིག་གི་ཞིང་ལས་དང་འབྲོག་ལས་གཙོ་བོ་བྱེད་དགོས་སོ།།