མངའ་མཛད་བྱུང་བའི་དུས་རབས།

         དེང་དུས་བོད་མི་རྣམས་ཀྱི་བློ་ངོ་ན་ཡོད་པའི་ལྷ་འདྲེ་དེ་དག་གི་སོ་སོའི་ཁྱད་ཆོས་ནི།   དེ་ཡང་གནོད་སྦྱིན་ཞེས་པ་ནི།    ནོར་དང་ལོངས་སྤྱོད་དཔལ་དང་འབྱོར་པ་ཐམས་ཅད་ཀྱི་གཏེར་བདག་  མཆོད་ན་སྐྱོབ་ཅིང་བརྟེན་ན་སྡོང་གྲོགས་བྱེད་དེ།    གཞན་དུ་ན་སེམས་ཅན་ལ་གནོད་པ་སྣ་ཚོགས་བྱེད་པའི་ནོར་ལྷ་ཞིག་ལ་ཟེར།    དེར་བརྟེན་གདོད་མའི་སྤྱི་ཚོགས་ཀྱི་མཇུག་རྫོགས་ནས་མངའ་མཛད་ཀྱི་གྲལ་རིམ་བྱུང་བ་དང༌།     དེའི་ཚེ་ན་ཡུལ་སྤྱི་པའི་མངའ་བདག་ནི་གཞན་དང་མི་འདྲ་བར་ཐོན་སྐྱེད་ཀྱི་ལྷག་མ་རྒྱ་ཆེན་གསོག་འཇོག་བྱེད་ཅིང༌།     ནམ་དགོས་ཀྱི་དུས་སུ་བེད་སྤྱོད་བྱེད་རྒྱུ་ཡོད་པ་དང༌།    ས་ཞིང་དང༌།   སྒོ་ཕྱུགས།   བྲན་འཁོར་སོགས་རྒྱ་ཆེན་པོར་ཡོད་པ་སྔར་གྱི་དུས་རབས་རྣམས་སུ་བྱུང་མ་མྱོང་བའི་འཚོ་བའི་ཆུ་ཚད་དང་ལྡན་པ་ཞིག་ཡིན་པར་ཤེས་ཐུབ།     
        བདུད་ཞེས་པ་ནི།   མི་ནག་རྟ་ནག་ཅན་འཁོར་བདུད་དམག་བྱེ་བ་དུང་ཕྱུར་གྱིས་བསྐོར་བ་ཞིག་རྟག་ཏུ་སེམས་ཅན་རྣམས་ལ་གནོད་འཚེ་བྱེད་པའི་མི་མ་ཡིན་པའི་འབྱུང་པོ་ཞིག་ཡོད་པར་སེམས་ཀྱི་ཡོད་ཅིང༌།   སྐབས་དེའི་དབང་བསྒྱུར་བྱེད་སྟངས་ནི།       ཇག་དམག་ཚོ་ཆེན་པོར་བསགས་ཏེ་ཡུལ་ག་ས་ག་ལ།     དུས་མ་ངེས་པ་གློ་བུར་དུ་ཡོང་ནས་བཅོམ་འཕྲོག་བྱེད་ཅིང་མི་རྣམས་འཛིན་བཟུང་བྱས་ཏེ་རང་གི་བྲན་ཏུ་བཀོལ་བ་སོགས་བོད་འབངས་ཡོངས་ལ་དངངས་སྐྲག་དང་སྡུག་བསྔལ་གྱིས་ཁེངས་པའི་སྤྱི་ཚོགས་ཀྱི་དུས་རབས་ཤིག་བྱུང་ཡོད་པར་ཤེས་ཐུབ། 
        སྲིན་པོ་ཟེར་བ་དེ།    མི་ཤ་དང་རྟ་ཤ་ལ་སོགས་པ་ཤ་རིགས་གང་མཐོང་ཐམས་ཅད་ཟ་མཁན།      ངོ་གདོང་དམར་པོ་ཅན།    སྐྲ་ཁམས་ནག་རལ་པ་ཅན་གདུག་པ་ཅན་གྱི་གདོན་འདྲེའི་རིགས་ཤིག་ཡོད་པར་བཤད།      སྔོན་རྒྱ་གར་མཁས་པ་རྣམས་ཀྱིས་བོད་མི་ལ་བོད་གདོང་དམར་ཤ་གཟན་སྲིན་པོའི་རིགས་ཅེས་དམའ་འབེབས་བྱས་པ་དེ་དགཕྱིས་བོད་ཀྱི་མཁས་པ་ཚོས་ཀྱང་དེའི་ལད་ཟློས་བྱས་དང་བྱེད་བཞིན་པ་རེད།     
བཙན་ཟེར་བ་དེ།   ཧ་ཅང་གི་གདུག་རྩུབ་དང་ཕྲག་དོག་ཆེན་པོ་ཅུང་ཟད་མི་དགའ་བ་བྱུང་ན་ལམ་སང་གནོད་པར་བྱེད་མཁན།     མི་དམར་པོ་རྟ་དམར་པོ་ཆིབས་པ།  རྟ་དམར་པོ་དང་ཁྱི་དམར་པོ་རོལ་དུ་ཁྲིད་པའི་འདྲེ་རིགས་ཤིག་ཡོད་པར་ངོས་འཛིན་བྱེད་ཀྱིན་ཡོད།   
        ཀླུ་ཞེས་པ་དེ།   ཞེ་བརྣག་པོ་འཁོན་སེམས་བཅངས་མཁན།   ཀླུ་དང་འགྲས་ན་མི་རབས་ནས་མི་རབས་བརྒྱུད་དེ་གནོད་པ་སྐྱེལ་མཁན་ཞིག་ཡིན་པར་ངོས་འཛིན། 
འགོང་པོ་ཞེས་པ་རྒྱལ་པོ་དང་འགོང་པོ་ཞེས་རིགས་གཅིག་པ་ལ།  གདུག་རྩུབ་ཅན་གྱི་གདོན་འདྲེ་འགྲོ་བ་མིའི་རིགས་ལ་བཀྲ་མ་ཤིས་པ་དང༌།    སེམས་མི་བདེ་བའི་ཐབས་སྣ་ཚོགས་དང༌།   འཁྲུག་པ་སྣ་ཚོགས་སློང་མཁན་ཞིག་ཡིན་པར་ངོས་འཛིན།   

        ལྷ་དང༌།   ཟ་རམས་དང༌།   མ་སངས་དང༌།    རྨུ་ལ་སོགས་པ་འདི་དག་ནི་ལྟོས་བཅས་ཀྱི་སྒོ་ནས་གོང་གསལ་ལྷ་འདྲེ་དེ་དག་ལས་རྒྱུད་འཇམ་ལ།       གནོད་པ་ཉུང་བ་ཞིག་ཡིན་པར་ངོས་འཛིན་བྱེད་སྲོལ་ཡོད་པ་རེད།     དེ་ཡང་དུས་རབས་སོ་སོའི་སྐབས་སུ་དབང་བསྒྱུར་བྱེད་པ་པོ་དང་བྱས་དུས་སྐོར་ལ་བཀའ་ཐང་སྡེ་ལྔ་དང༌།     མཁས་པའི་དགའ་སྟོན།     བོན་གྱི་བསྟན་འབྱུང་སོགས་ལོ་རྒྱུས་ཡིག་ཆ་རྣམས་བཞེད་ཚུལ་མི་འདྲ་བ་ཁ་ཤས་འདུག་ཀྱང༌།   འགྲོ་བ་མིའི་རིགས་ཀྱི་ཤེས་རིག་དང་སྤྱི་ཚོགས་འཕེལ་རྒྱས་ཀྱི་ཆོས་ཉིད་དང་བསྟུན་ན་བོན་གྱི་བསྟན་འབྱུང་ལས་བྱུང་བར་ལྟར་ན་བཤད་ན་ཚན་རིག་དང་མཐུན་ཆེ་བར་སེམས།   དེ་ལྟ་ན་བོད་ཡུལ་བསྐལ་པ་ཡ་ཐོག་གི་མཇུག་ཏུ་ཐོག་མར་དབང་བསྒྱུར་བྱ་མཁན་དེ་དམར་འཇམ་ཡིན་པར་བཤད།     དུས་རབས་དང་པོ།    དམར་འཇམ་ལྷའི་དུས་ཡིན་ཞིང༌།   ཡིན་ནའང་སྐབས་དེར་མི་དང་དུད་འགྲོའི་འཚོ་བའི་བར་ཧེ་བག་ཆེར་མེད་པ་ཕན་ཚུན་འདྲ་མཉམ་དུ་གནས་པ་དང༌།     མི་ལོ་འབུམ་ཕྲག་མང་པོར་དེ་ལྟར་གནས་པ་བཤད་པ་ལྟར་ན།   འདི་ཕལ་ཆེར་བསྐལ་པ་ཡ་ཐོག་གམ་གདོད་མའི་སྤྱི་ཚོགས་ཀྱི་འཚོ་བ་གཙོ་བོར་བསྟན་ཡོད་པར་འདྲ།     སྐབས་འདིར་ཡུལ་གྱི་མིང་ལ་ལྷ་ཡུལ་གུང་ཐང་ཟེར་བ་དང༌།    མི་རྣམས་གཡའ་རི་དང་གངས་རིའི་རྩེ་གནས་བཅས་ཡོད་པར་བཤད།           དུས་རབས་གཉིས་པ།    སྐབས་དེར་མ་སངས་གཉན་གྱི་དུས་ཡིན་ལ་དུས་དེར་མིའི་བསམ་བློ་དང་ཐབས་ཤེས་གང་ཅིའི་ཐད་དུད་འགྲོ་གཞན་ལས་སྟོབས་ཆེ་བར་ཆགས་ཡོད་པ་དང༌།    གནས་ཡུལ་ཀྱང་རྫ་རི་དང༌།    ཤིང་ནགས།   སྤང་ལྗང་སོགས་ག་ས་ག་ལ་གནས་ཡོད་པ་དང༌།   ཡུལ་གྱི་མིང་ལ་གཉན་ཡུལ་གསེར་སྟེང་ཟེར་བར་བཤད།    དུས་ཚོད་ནི་མི་ལོ་འབུམ་ཕྲག་མང་པོ་དེ་ལྟར་བྱུང་ཞེས་བཤད།     དུས་རབས་གསུམ་པ།    འཕྱེ་བོ་ཀླུ་ཡི་དུས་ཞེས་ཟེར་ཞིང་སྐབས་དེར་མིའི་ཤེས་རིག་ལ་སྔ་དང་མི་འདྲ་བའི་ཡར་རྒྱས་ཆེན་པོར་བྱུང་ཡོད་པར་གསལ་སྟེ།  ལྷ་ཡིས་ཕན་པ་དང་འདྲེ་ཡིས་གནོད་པའི་བསམ་བློ།     ཀླུ་མཆོད་དང་ཀླུ་བསངས་སོགས་ཆོས་ལུགས་ཀྱི་བསམ་བློ་དང་ཆོ་ག་བྱེད་ཤེས་པ།    རྟ་དང་ནོར་སོགས་བདག་ཏུ་བཟུང་ནས་བེད་སྤྱོད་ཤེས་པ་བཅས་བྱུང་ཡོད་པར་གསལ།     ཡུལ་གྱི་མིང་ལ་ཀླུ་ཡུལ་ན་ར་སེང་སྔོན་ཞེས་ཟེར།     བཀའ་ཐང་སྡེ་ལྔ་ལས།   ཀླུ་ཡི་སྐབས་སུ།     སྔ་རྟགས་རྐ་བུ་ཆུ་ལ་སྤྱོད་པར་བྱུང༌།    ཞེས་པ་ཆུ་རྐ་བཟོས་ཏེ་ཆུ་ཡུར་དུ་དྲངས་ནས་ཆུའི་ནུས་པ་བེད་སྤྱོད་བྱས་པའི་དོན་ཡིན་པར་སེམས།      དུས་རབས་བཞི་པ།    གནོད་སྦྱིན་བཙན་གྱི་དུས་ཟེར་ཞིང༌།    སྐབས་དེར་འགྲོ་བ་མིའི་བར་ཕན་ཚུན་རོགས་རམ་དང༌།    གནོད་པ་བྱེད་རེས་བྱ་ཞིང་ཡོད་པ་དང༌།   ཡུལ་ལྷ་མཆོད་པ་དང་བཙན་མདོས་བཏང་བ་སོགས་ཆོས་ལུགས་ཀྱི་ཤེས་རིག་དང་ཆོ་ག་མང་པོ་བྱུང་ཡོད་པ་དང༌།     མཚོན་ཆ་མདའ་གཞུ་སོགས་བཟོ་ཤེས་པའི་ཤེས་རིག་དང་ལག་རྩལ་དར་ཡོད་པར་བཤད།     སྔ་རྟགས་གཉན་པོ་བཙན་པ་དེ་ནས་བྱུང༌།   ཞེས་པའི་དོན་ལ་བརྟགས་ན།    ལྷག་པར་དུ་བཙན་པོ་དང་གཡོག་པོ་ཞེས་དཔོན་གཡོག་བར་གྱི་དབྱེ་བ་ཆེན་པོར་བྱུང་ཡོད་པ་གསལ།  ཡུལ་གྱི་མིང་ལ་གདོང་དམར་བཙན་ཡུལ་ཞེས་ཟེར།      མཁས་པའི་དགའ་སྟོན་སོགས་ལས་བཟང་ཡུལ་རྒྱན་མེད་ཅེས་ཟེར།     དུས་རབས་ལྔ་པ།   སྲིན་པོས་དབང་བསྒྱུར་བྱས་པའི་དུས་ཟེར།    དུས་དེར་འཁྲུག་རྩོད་དང་རྐུན་ཇག་མང་སྟབས་མི་རྣམས་བྲག་རི་དང༌།     ནགས་ཁྲོད་སོགས་བཙན་ས་བཟུང་ནས་བསྡད་ཡོད་པ་དང༌།    མི་ཚོས་འཚོ་བ་གཙོ་བོ་སེམས་ཅན་བསད་པའི་ཤ་ཁྲག་ལ་ལོངས་སྤྱོད་ཅིང་ཡོད་པས་མི་ཐམས་ཅད་ངོ་གདོང་དམར་པོ་ཡོད་པ།     མི་བདེ་བ་དང་གནོད་པ་སོགས་བྱུང་ན་ཡུལ་ལྷ་ལ་ཤ་ཁྲག་གིས་མཆོད་པ་བཅས་ཀྱི་སྲོལ་བྱུང་ཡོད་པ་དང༌།      འུར་རྡོ་དང་མདུང་སོགས་བཟོ་རྒྱུའི་ལག་རྩལ་བྱུང་ཡོད་པར་བཤད།    ཡུལ་གྱི་མིང་ལ་སྲིན་པོ་ནག་པོའི་ཡུལ་དགུ་ཞེས་ཟེར།      དུས་རབས་དྲུག་པ།    བདུད་ཀྱིས་དབང་བསྒྱུར་བའི་དུས་ཟེར།    སྐབས་དེར་རྩྭ་ཁང་དང༌།   ཤིང་ཁང༌།   རྡོ་ཁང་བཅས་མི་སྡོད་གནས་ཀྱི་ཁང་པ་རིགས་སྣ་ཚོགས་བཟོ་ཐུབ་པར་བྱུང་བ་དང༌།    བོད་ཀྱི་ཆུ་བོ་བཞི་འདུས་འགོ་མཇུག་བར་ཏེ་དེང་དུས་མངའ་རིས་ཡུལ་གྱི་གངས་ཏི་སིའི་ཉེ་སྐོར་བར་དམག་དྲངས་ནས་གཤེན་ལ་དོ་བརྡོ་ཞིང༌།   དགྲ་སྟ་བཟོས་ཤིང་གཞན་སྡེ་བཅོམ་པར་བཤད།   ཡུལ་གྱི་མིང་ལ་བདུད་ཡུལ་ཁ་རགས་རོང་དགུ་ཟེར།  དེང་དུས་ཀོང་པོའི་ཡུལ་འདི་ཡིན་པར་སེམས་ཏེ།    འདི་ཡན་བསྐལ་པའི་དུས་རབས་ཆེན་པོ་དྲུག་ལ་མི་ལོ་འབུམ་ཕྲག་མང་པོའི་ཡུན་དུ་གནས་ཞེས་བོན་གྱི་བསྟན་འབྱུང་ལས་གསུངས།    ཡུལ་གྱི་མིང་ལ་བདུད་ཡུལ་ཁ་རག་རོང་དགུ་ཞེས་ཟེར་བ་ནི་དབང་བསྒྱུར་བྱེད་པའི་དཔོན་པོ་དེའི་རུས་མིང་ཡུལ་ལ་བཏགས་པར་ངེས་ལ།     ཆབ་སྲིད་ཀྱི་ལྟེ་གནས་དེ་དེང་དུས་ཀྱི་སྤོ་བོ་སྦྲ་རྨོག་དང༌།    རྫ་ཡུལ།   མེ་ཏོག་བཅས་ཀྱི་ས་ཕྱོགས་གང་རུང་ཞིག་ཡིན་པར་ངེས་ཏེ།  བོན་གྱི་ལོ་རྒྱུས་རྣམས་ལས།   བདུད་དམག་གིས་སྟོན་པ་གཤེན་རབ་ཚང་གི་རྟ་དེད་སོང་བ་ལ།    གཤེན་རབ་ར་མདའ་རྗེས་དེད་ཕེབས་པའི་ལམ་བར་ཀོང་པོར་སླེབས་པ་དང༌།    བདུད་ཀྱིས་བདུད་རི་ནག་པོས་ལམ་བཅད་པར་སྟོན་པས་མཐེ་ཆུང་གཡོན་པས་བླངས་ཏེ་སྒང་ཀ་སུམ་མདོར་བཞགམདུང་རྩེ་འདྲ་བའི་སྤྲུལ་པའི་རི་ཞིག་སྤྲུལ་ནས་ལྷ་རི་གྱང་ཐོའི་ཟུར་ལ་བཞག་པའི་མཚན་ཡང་བོན་རི་ཆེན་པོར་བཏགས་ཞེས་དེང་སང་གི་ཀོང་བོན་རི་འདི་ཡིན་པར་གསལ་བ་དང་ཡང་མར་བྱོན་པ་ལ་བདུད་མོའི་རིགས་བུད་མེད་གཞོན་ནུ་མཛེས་མ་མང་པོས་གསོལ་ཆས་ལ་དུག་སྦྱར་ཏེ་དྲངས་པ་ལ།   སྟོན་པས་ཐལ་མོ་བརྡབ་པས་བདུད་མོ་རྣམས་མི་སྡུག་པའི་རྒན་མོ་སེ་མོ་བརྒྱ་རུ་སོང་བ་ལ་དེང་སང་ཀྱང་སེ་མོ་བོན་ཐང་དུ་གྲགས་པ་སོགས་གསལ་བ་ལྟར་ན།     བདུད་ཡུལ་དེ་ཀོང་བོན་རིའི་ཕྱི་ལོགས་སུ་ཡོད་དགོས།      སྐབས་དེར་ཐོན་སྐྱེད་ཀྱི་ལག་ཆ་བེད་སྤྱོད་བྱེད་རྒྱུ་དེ་ཕོན་ཆེ་ཤོས་སྟ་རེ་རྡོ་ཡི་སྟ་རེ་ཡིན་པར་གསལ།    དུས་རབས་བདུན་པ།     འགོང་པོ་སྤུན་དགུས་དབང་བསྒྱུར་བའི་དུས་ཡིན་ཟེར།  བོན་གྱི་བསྟན་འབྱུང་ལས་འགོང་པོ་སྤུན་དགུས་དབང་བསྒྱུར་བྱས་པ་དང༌།  རྨུ་རྒྱལ་ཁོ་རྗེས་དབང་བསྒྱུར་བྱས་པའི་ལོ་རྒྱུས་མི་གསལ་ཡང༌།  འདི་གཉིས་བདུད་རིགས་ཀྱི་ཁོངས་སུ་གཏོགས་པ་ཡིན་པར་སེམས།  དུས་རབས་བརྒྱད་པ།   རྨུ་རྒྱལ་ཁོ་རྗེའི་དུས་ཡིན།   དུས་དེར་རི་དྭགས་སེམས་ཅན་འཛིན་པ་མ་ཟད།     དམག་འཐབ་པའི་སྐབས་སུ་དགྲ་བོ་ཞགས་པས་འཛིན་པ་དང༌།    མདུང་ཞགས་འཕེན་སྲོལ་ཡང་དུས་འདི་ཙམ་ནས་དར་ཡོད་པར་སེམས།     བོན་གྱི་སྟོན་པ་གཤེན་རབ་ཡང་རྨུའི་གདུང་རབས་ཡིན་པར་ཞང་བོད་ལོ་རྒྱུས་ཏི་སེའི་འོད་ལས་གསལ།   དུས་རབས་དགུ་པ།   མ་སངས་རུས་དགུའི་ཡུལ་འདིར་དབང་བྱས་པའི་དུས་ལ་ཟེར། 
མ་སངས་རུས་དགུ་ནི  །  《ཆོས་འབྱུང་མཁས་པའི་དགའ་སྟོན་》ལས།   1གཉའ་གཡའ་སྤང་སྐྱེས།    2 གར་ཏིང་ནམ་ཚ།     3གླེ་ངན་ནམ་ཙང་སྐྱེས།      4རུ་ཐོ་གར་སྐྱེས།     5ཤེ་དོ་ཀེར་ཏིང་ནས།       6 མེ་པད་སྐྱེས།      7གསད་གེ་འཕྲུལ་བོ་ཆེ།      8དྲང་བ་དྲངས་མ་མགུར།      9བཀོད་སྟོར་ནམ་ཚ་བཅས་བྲིས་འདུག  རྩིས་ཀྱི་བསྟན་བཅོས་བཻ་དཀར་དུ་དྲངས་པའི་བོན་གྱི་དཔེ་རྙིང་རྩིས་ཀྱི་འབྱུང་ཁུངས་སྐོར་ལས་གསལ་བ་ལྟར་ན།     ཀོང་ཙེ་འཕྲུལ་རྒྱལ་མ་བྱོན་གོང་གི་ལོ་ངོ་གཉིས་སྟོང་ལྷག་ཙམ་ན།     མ་སངས་རུས་དགུ་བྱུང་ཡོད་པར་གསལ་བས་དེ་ལྟར་ན་ཧ་ལམ་སྤྱི་ལོའི་སྔོན་གྱི་དུས་རབས་སོ་ལྔའམ་སོ་དྲུག་ཡས་མས་ཙམ་ནས་མ་སངས་རུས་དགུས་ཡུལ་འདིར་དབང་བསྒྱུར་བྱས་ཤིང༌།     བོད་འདིར་ཡོངས་གྲགས་ལ་མ་སངས་སྤུན་དགུའམ་ཐེ་རངས་སྤུན་དགུས་ཤྭོ་བཟོས་པར་བཤད་པ་བཞིན།    དུས་འདིར་ལྕགས་རིགས་རྙེད་ཅིང་ལྕགས་ཆས་བེད་སྤྱོད་དར་བ་དང༌།     དངོས་རྫས་བགོ་བཤའི་ཆེད་དུ་ཤྭོ་རྒྱན་འདེབས་པ་དང༌།     བྲེ་དང་སྲང་བཅོས་ནས་དངོས་པོ་ཉོ་ཚོང་གི་ལས་ལ་དར་རྒྱས་བྱུང་བ་དང༌།    མཚོན་འགོག་གི་ཆེད་དུ་གོ་ཆ་དང་ཕུབ་ཆུང་བཟོས་ནས་སྤྱོད་སྲོལ་དར་བ་དང༌།    རྟ་ཞོན་ཞིང་རྣ་རྒྱན་འདོགས་པ་སོགས་འཚོ་བའི་སྤྱོད་ཚུལ་ལ་སྔ་ལས་སྤྲོས་པ་ཇེ་ཆེ་ཕྱིན་ཚུལ་ཆོས་བོན་གཉིས་ཀའི་ལོ་རྒྱུས་ལས་གསལ་བ་ལྟར་རོ།     དེང་དུས་གནའ་ཤུལ་ཞིབ་འཇུག་དང་བསྡུར་ན་སྐབས་འདི་ཕལ་ཆེར་ཆབ་མདོའི་ཁ་རོའི་གནའ་ཤུལ་གྱི་དུས་ཙམ་ཡིན་པར་གསལ།    སྐབས་འདིར་ཡུལ་གྱི་མིང་ལ་བོད་ཁམས་གཡའ་དྲུག་ཟེར།     བོད་ཅེས་པའི་ཡུལ་མིང་ཐོག་མར་བྱུང་བའི་དུས་ནི་མ་སངས་རུས་དགུ་ནས་ཡིན།      དེས་ན་བོད་ཅེས་པའི་ཡུལ་མིང་འདི་ལ་རྗེས་གྲུབ་ཀྱི་མིང་གི་འགྲེལ་བཤད་གནང་བ་ནི་སྙིང་པོ་ཅི་ཡང་མེད་པར་མཐོང༌།   དུས་རབས་བཅུ་པ།   ཟ་རམས་སྐྱེས་དྲུག་གི་དུས་ལ་ཟེར།   འབྱུང་རྩིས་ཀྱི་ལོ་རྒྱུས་ལྟར་ན།      ཧ་ལམ་སྤྱི་ལོའི་སྔོན་གྱི་དུས་རབས་ཉི་ཤུ་པའི་སྟོད་སྨད་ཐམས་ཅད་ལ་ཟ་རམས་སྐྱེས་དྲུག་གི་དུས་ཡིན་པར་འདྲ་སྟེ།  སྤྱི་ལོའི་སྔོན་གྱི་2317པའི་ཤིང་སྤྲེལ་ལོར་རྩིས་ཀྱི་སློབ་དཔོན་ས་བདག་རླུང་རྒྱལ་ཞེས་པར་འཁྲུངས་ཤིང་དེས་ལོ་སྐོར་བཅུ་གཉིས་དང༌།   འབྱུང་བ་ལྔ་སྦྱར་ནས་ལོ་རྒན་དྲུག་བཅུའི་བརྩི་སྲོལ་བསྟན་ཡོད་པ་དང༌།     སྐབས་དེའི་དུས་ན་རྡོ་བཟོ་དང་ཤིང་བཟོའི་ལག་རྩལ་བཟང་པོར་བྱུང་ཞིང༌།     མི་རྣམས་གླུ་གར་རོལ་མོ་ལ་དགའ་བར་བཤད་པ་དང༌།     ཟ་རམས་སྐྱེས་དྲུག་སྐབས་སུ་མགོ་རྒྱན་དང༌།   རྣ་རྒྱན་ལེགས་པོར་འདོགས་ཤིང༌།   གླུ་གར་རོལ་མོ་སོགས་ལ་དགའ་སྟོན་ལ་དགྱེས་པར་བཤད་པ་གཅིག་གྱུར་བྱུང༌།   ཡུལ་གྱི་མིང་ལ་བོད་ཡུལ་སྟོང་སྡེ་བཅོ་བརྒྱད་ཅེས་ཟེར།   དུས་རབས་བཅུ་གཅིག་པ་རྒྱལ་ཕྲན་སིལ་མ་བཅུ་གཉིས་ནི།     དེ་ལྟར་སྤྱི་ཚོགས་འཕེལ་རྒྱས་ཀྱི་དུས་རིམ་ནང་དུ་ཡུལ་གྲུ་སོ་སོར་ཚོ་པ་དང་དཔོན་ཁག་ཤུགས་ཆེན་པོར་ཆགས་ཏེ།     གཅིག་གིས་གཅིག་ལ་དབང་སྒྱུར་བྱེད་དཀའ་བའི་དུས་རིམ་ཞིག་ཏུ་སླེབས་པ་དང༌།      ཟ་རམས་སྐྱེས་དྲུག་གིས་ཁྱོན་ཡོངས་ལ་དབང་སྒྱུར་བྱེད་རྒྱུའི་ནུས་ཤུགས་ཉམས་ཏེ།  མཐར་རྒྱལ་ཕྲན་སིལ་མ་བཅུ་གཉིས་སུ་གྱུར་ཅིང་དེ་དག་གིས་སོ་སོའི་ལུང་པ་ན་དབང་སྒྱུར་བྱེད་ཀྱིན་ཡོད།      རྒྱལ་ཕྲན་སིལ་མ་བཅུ་གཉིས་ནི།    《ཆོས་འབྱུང་མཁས་པའི་དགའ་སྟོན་》ལས།   1མཆིམས་ཡུལ་གྲུ་ཤུལ་ན།     མཆིམས་རྗེ་ནི་གུ་ཡོད།     བློན་པོ་སྣང་དང་དེང༌།    2ཞང་ཞུང་ཡུལ་ན།   རྒྱལ་པོ་ལེགས་སྙ་ཤུར།     རྨ་དང་ར་སངས་བློན།    3མྱང་རོ་ཕྱོང་དཀར་ན།    གཙང་རྗེ་ཐོང་དཀར།   བློན་པོ་གནང༌།    4 གནུབས་ཡུལ་གླིང་དགུ་ན།    སྣུབས་རྗེ་དམིགས་པ།   བློན་པོ་རྨེ་དང་འབྲོ།    5ཉང་རོ་ཤམ་པོར།    ལོ་རྔམ་རྗེ་འབྲོམ།   བློན་པོ་ཤེ་སུང་གཉིས།     6ཀྱི་རི་ལྗོན་སྔོན་ན།     རྗེ་རྨད་པོ།   བློན་པོ་ངམ་དང་འབྲོ།     7ངམ་ཤོད་ཁྲ་སྣར།   ཟིངས་རྗེ་ཁྲི་འཕྲང་གསུམ།   བློན་མགར་དང་གཉན།     8འོལ་ཕུ་སྤང་མཁར་དུ།     ཟིང་རྗེ་ཐོན་ཕྲེང༌།   བློན་པོ་རྔོག་དང་སྦས།     9སྲིབས་ཡུལ་གྱི་རལ་གོང་དུ།  བྲང་རྗེ་གོང་ནམ།   བློན་པོ་སྤྲད་དང་ཞུགས།    10ཀོང་ཡུལ་བྲེ་སྣར།   ཀོང་རྗེ་དཀར་པོ།   ཏུག་དང་མཁར་པ་བློན་པོ།    11ཉང་ཡུལ་རྣམ་གསུམ་ན།   ཉང་བཙུན་གླང་རྒྱལ།   བློན་པོ་ཕུག་དང་ངོ་རྗེ།    12དྭགས་ཡུལ་གྲུ་བཞི་ན།   དྭགས་རྗེ་མང་པོ་རྒྱལ།    བློན་པོ་རླངས་སྐམ་གཉིས་བཅས་ཡུལ་གང་དུ་རྒྱལ་པོ་གང་ལ་བློན་པོ་གང་ཡོད་གསལ་པོར་བཀོད་ཡོད་པ་འདི་དག་རེད།  《བཀའ་ཐང་སྡེ་ལྔ་》ལས།     སྔ་རྟགས་ཕྱག་དང་ཞེ་ས་དེ་ནས་བྱུང༌།     །  ཞེས་སྐབས་དེའི་ཁྱད་ཆོས་ཐུན་མོང་མ་ཡིན་པར་གསུངས་འདུག་པ་ནི།    དུས་དེ་ཙམ་དུ་བོན་གྱི་སྟོན་པ་གཤེན་རབ་མི་བོ་ཆེ་ཞེས་པ་མངའ་རིས་པུ་ཧྲེང་གི་ཕྱོགས་དེར་འཁྲུངས་ནས་བོན་དང་ཤེས་རིག་མང་པོ་ཞིག་གསར་གཏོད་གནང༌།     སྐྱེ་བ་སྔ་ཕྱི་དང༌།     ལས་འབྲས་ཀྱི་རྣམ་གཞག  ས་ལམ་གྱི་རིམ་པ་སོགས་མང་པོ་ཞིག་གསུངས་ཡོད་པ་གོང་འོག་བར་གསུམ་དུ་ཕྱག་དང་ཞེ་སའི་སྲོལ་དར་ཆེ་ཤོས་སུ་བྱུང་ཡོད་པ་ནི་བཤད་མ་དགོས་པ་རེད། 
        དུས་རབས་བཅུ་གཉིས་པ་རྒྱལ་ཕྲན་སིལ་མ་བཞི་བཅུ་ནི།      རྒྱལ་ཕྲན་སིལ་མ་བཅུ་གཉིས་པོ་དེ་དག་རྟག་པར་ཕན་ཚུན་དམག་ཇག་འཁྲུག་རྩོད་ཀྱི་ལས་ལ་རྔམ་དྲགས་པས་སྟོབས་ཤུགས་ཇེ་ཞན་དུ་སོང༌།    དེ་དག་གི་ཁོངས་སུ་གཏོགས་པའི་ཚོ་པ་མང་པོ་ཞིག་རང་རྐྱ་ཐུབ་པའི་སྡེ་ཤོག་ཏུ་གྱེས་ནས་མཐར་རྒྱལ་ཕྲན་སིལ་མ་བཞི་བཅུ་ཟེར་བ་ཞིག་བྱུང་ཡོད་ཀྱང༌།    དེ་དག་རེ་རེ་བཞིན་བྲིས་པ་ཞིག་མ་མཐོང༌།    ཕྱོགས་ཙམ་ཞིག་ཏུང་ཧོང་ནས་ཐོན་པའི་ཡིག་ཆ་རུ་བཀོད་པ་ལས།    རྒྱལ་ཕྲན་ཡུལ་ཡུལ་ན།    མཁར་བུ་རེ་རེ་ན་གན་སྟེ།    རྒྱལ་ཕྲན་བགྱིད་པ་དང༌།    རྒྱལ་ཕྲན་གྱི་བློན་པོ་བགྱིད་པའི་རབས་ལས།    1ཞང་ཞུང་ངར་པའི་རྗེ་བོ་ལིག་སྙ་ཤུར།     བློན་པོ་ཁྱུང་པོ་ར་སངས་རྗེ་དང༌།   སྟོང་ལོམ་ཙེ་གཉིས།     2མྱང་རོའི་ཕྱེད་ཀར་ན།    རྗེ་རྩང་རྗེའི་ཐོད་ཀར།   བློན་པོ་སུ་རུ་དང་གནང་གཉིས།      3ཡུལ་གནུབས་ཀྱི་གླིང་དགུ་ན།    རྗེ་གནུབས་རྗེའི་སྲིད་པ།   བློན་པོ་རྨེ་དང་གྲོ་གཉིས།         4ཡུལ་མྱང་པོའི་ཤམས་པོ་ན།    རྗེ་ལོ་ངམ་གྱི་བྲོམ་ཚ།    བློན་པོ་མྱ་དང་བྲེ་གཉིས།     5ཡུལ་ཀྱི་རོའི་ལྗང་སྔོན་ན།   རྗེ་ཀྱི་རྗེའི་མང་པོ།   བློན་པོ་ཤེ་དང་སུག་གཉིས།     6ཡུལ་ངས་པོའི་ཁྲ་གསུམ་ན།   རྗེ་དགུག་གྲིའི་ཟིང་པོ་རྗེ།    བློན་པོ་མགར་དང་གཉན་གཉིས།      7ཡུལ་དབྱེ་རོ་ཡུལ་བཞི་ན།    རྗེ་དབྱེ་རྗེའི་མཁར་པ།     བློན་པོ་དབོ་དང་རྡུག་གཉིས།      8ཡུལ་འོ་ཡུལ་གྱི་སྤང་ཀར་ན།      རྗེ་འོ་རྗེའི་ཟིན་བྲང་ཚ།     བློན་པོ་རྔོ་དང་དབའས་གཉིས།      9 ཡུལ་རྔོག་ཡུལ་གྱི་གྲུ་བཞི་ན།     རྗེ་རྔོག་རྗེའི་ལ་བྲང༌།    བློན་པོ་སས་པ་དང་མྱང་ནད་གཉིས།      10ཡུལ་ཀླུམ་རོའི་ཡ་སུམ་ན།     རྗེ་ནམ་པའི་བུ་གསེང་ཏི།    བློན་པོ་མྱང་དང་སྦྲང་གཉིས།        11ཡུལ་སྲིབས་ཡུལ་གྱི་རལ་མོ་གོང་ན།    རྗེ་དྲང་རྗེའི་རྣོལ་ནམ།    བློན་པོ་ཞུགས་ཚམས་དང་དབྲད་གཉིས།      12  ཡུལ་རྐོང་ལ་བྲེ་སྣར་ན།    རྗེ་རྐོང་རྗེའི་ཀར་པོ།    བློན་པོ་མཁར་པ་དང་ཕ་དྲུག་གཉིས།       13  ཡུལ་མྱང་ཡུལ་གྱི་རྟ་གསུམ་ན།   རྗེ་མྱང་ཙུང་སླང་རྒྱལ།    བློན་པོ་འོ་རུ་དང་སྦྲགས་གཉིས།       14  ཡུལ་དྭགས་ཀྱི་གྲུ་བཞི་ན།   རྗེ་དྭགས་རྒྱལ་གྱི་སྤྲོག་ཟིན།     བློན་པོ་ཕོ་གུ་དང་པོག་རོལ་གཉིས།       15  ཡུལ་མཆིམས་ཡུལ་གྱི་དགུའ་ཡུལ་ནའ།     རྗེ་མཆིམས་རྗེའི་ནེ།   བློན་པོ་དང་དང་དིང་དི་གཉིས།       16  ཡུལ་སུམ་ཡུལ་གྱི་ཡ་སུམ་ནའ།   རྗེ་འབས་ལྗི་མང་རུ་ཏི།      བློན་པོ་རླང་དང་ཀམ་གཉིས།       17 ཡུལ་འབྲོག་མོ་སྣམ་གསུམ་ནའ།      རྗེ་སེ་རི་ཁྲི།     བློན་པོ་སྐྱང་རེ་གནག  ཅེས་སོ།   ། 
        དེ་ལྟར་རྒྱལ་ཕྲན་སིལ་མ་བཅུ་གཉིས་དང༌།    སིལ་མ་བཞི་བཅུ་བཅས་ཀྱི་སྐབས་སུ་བྱུང་བའི་ཡུལ་གྱི་མིང་དང་རྒྱལ་བློན་གྱི་མཚན་རྣམས་གསལ་པོར་འཁོད་ཡོད་པའི་ཡིག་ཆ་འདི་དག་དེང་དུས་ཀྱང་མཁྱེན་ལྡན་རྣམས་ཀྱི་དཔྱད་ཡུལ་དུ་བཞུགས་ཡོད་པ་འདི་ཡིས།    བོད་དུ་ཡི་གེ་འབྲི་བའི་སྲོལ་དེ་ཆོས་རྒྱལ་སྲོང་བཙན་སྐབས་སུ་གཞི་ནས་གསར་གཏོད་བྱས་ཞེས་པའི་བཤད་སྲོལ་དེ་ལ་དེ་བས་ཀྱང་ཁུངས་མེད་པའི་བདེན་དཔང་ཞིག་བྱས་འདུག   དེ་ལྟར་བོད་ཀྱི་ཡུལ་འདིར་དབང་སྒྱུར་བྱེད་པའི་མངའ་མཛད་ཀྱི་དུས་རབས་མི་འདྲ་བ་དེ་དག་དུས་ནམ་ཞིག་ཙམ་ནས་བྱུང་ཞེ་ན།     དེང་སྐབས་ས་འོག་ནས་ཐོན་པའི་གནའ་རྫས་རྙིང་པ་འདི་དག་དང༌།    སོ་སོའི་རིག་པ་གཉིས་ཕན་ཚུན་ཟུང་འབྲེལ་ཞིག་བྱས་ན་ཕྱོགས་ཙམ་ཞིག་ཤེས་ཐུབ་སྟེ།      བོད་ཡུལ་སྟོད་སྨད་བར་གསུམ་གྱི་ཡུལ་གྲུ་རྣམས་ནས་གནའ་རྫས་ཀྱི་ཤུལ་རྙིང་པ་མང་པོ་ཞིག་གསར་རྙེད་བྱུང་ཡོད་པ་ནི།    ཉིང་ཁྲི་དང༌།   དིང་རི།   ཤན་ཚ།   མེ་ཏོགཔུ་ཧྲེང༌།   སུམ་མདོ།     རྣམ་གླིང༌།   ཆབ་མདོ།   ཏྲེ་ཧོར་བྲག་མགོ ཨ་མདོའི་རུ་སྔོན་ས་ཆ་རྣམས་སུ་རྡོ་ཆས་དང༌།    རྫ་མ།    རུས་ཆས།    མཁར་ཤུལ།    མེ་ཤུལ།    ཟངས་ཆས།   གཡང་ཊི།    འགྲོན་བུ་སོགས་དངོས་རྫས་འབོར་ཆེན་ཞིག་རྙེད་པ་དེ་དག་ལ་རྒྱལ་ཁབ་ཀྱི་ཆེད་རམས་པ་རྣམས་ཀྱིས་མཐའ་དཔྱད་གནང་ཞིང་གཏན་ལ་ཕབ་པའི་དཔྱད་རྩོམ་ཁག་ལས་གསལ་བ་ལྟར་ན།    ད་ཕན་ལོ་ངོ་བརྒྱད་སྟོང་ཡས་མས་ཙམ་གྱི་དུས་སུ་བྱུང་བའི་དངོས་པོ་ཡིན་པ་ཐག་གཅོད་གནང་འདུག   དེས་ན་ལོ་ངོ་བརྒྱད་སྟོང་ལྷག་གི་སྔོན་གྱི་བོད་མི་དེ་དག་ལ་སྟ་རེ་དང༌།    མདའ།    མདུང༌།   འཇོར།   གཤོལ།    ཁབ།     རྫ་མ་སོགས་འཚོ་བའི་ཉེར་སྤྱོད་དང་ལག་ཆ་རྣམས་བཟོ་ཐུབ་པའི་ཤེས་རིག་དང༌།    ལག་རྩལ་གྱི་ཆུ་ཚད་མཐོན་པོར་བྱུང་ཡོད་པ་དེ་ག་རང་ནས་བདེན་དཔང་བྱུང་ཡོད།    བོད་ཀྱི་ས་འོག་ནས་ཐོན་པའི་རྡོ་ཆས་རྙིང་པ་དེ་དག་ལ་བརྟགས་ན་ཨེ་ལྗིབ་ཕུ་ཐིའི་ལུང་པ་ནས་ཐོན་པའི་ལོ་ངོ་འབུམ་གཉིས་གསུམ་ཙམ་གྱི་ལོ་རྒྱུས་ཡོད་པའི་རྡོ་ཆས་རྙིང་པ་དེ་དག་དང་ཁྱད་ཆོས་རྣམ་པ་ཀུན་ཏུ་མཚུངས་པས་ང་ཚོས་དེ་ལ་ཞིབ་ཏུ་བརྟག་དཔྱད་བྱེད་འོས་པ་ཞིག་རེད།   དེས་ན་མངའ་མཛད་ཐོག་མར་བྱུང་བ་གསལ་བའི་གནོད་སྦྱིན་ནག་པོ་ཞེས་པ་དེ་བྱུང་བའི་དུས་ཚོད་ཀྱང་དེ་དང་འབྲེལ་ནས་ཞིབ་འཇུག་བྱེད་འོས་པ་ཞིག་རེད། 
        ས་བཅད་གཉིས་པ།   མངའ་མཛད་བཅུ་གཉིས་སྐབས་ཀྱི་སྤྱི་ཚོགས་ཀྱི་རྣམ་པ། 
         གཅིག  དུས་རབས་ཀྱི་ལམ་ལུགས། 
        བོད་ཀྱི་ཡུལ་འདིར་དབུལ་ཕྱུག་གི་ཁྱད་པར་བྱུང་བ་ལ་བརྟེན་ནས་རྗེ་འབངས་ཀྱི་རྣམ་པ་བྱུང་བའི་ཐོག་མ་མངའ་མཛད་གནོད་སྦྱིན་ནག་པོ་ནས།   རྒྱལ་ཕྲན་སིལ་མ་བཞི་བཅུའི་བར་ལོ་གྲངས་ཁྲི་ཕྲག་མང་པོའི་རིང་གི་སྤྱི་ཚོགས་ཀྱི་རྣམ་པ་དེ་གང་འདྲ་ཞིག་ཡིན་གསལ་པོར་བཤད་དཀའ་ནའང༌།    གནའ་རབས་མཁས་པ་རྣམས་ཀྱིས་ལོ་རྒྱུས་ལ་ཞིབ་འཇུག་གནང་བའི་སྡོམ་ཚིག་དག་ལ་ཞིབ་ཏུ་དཔྱད་ན་ཕྱོགས་ཙམ་ཤེས་ཐུབ་སྟེ།    དཔའ་བོ་གཙུག་ལག་ཕྲེང་བའི་《ཆོས་འབྱུང་མཁས་པའི་དགའ་སྟོན་》ལས།   
རྒྱལ་ཕྲན་དེ་རྣམས་འཐབ་རྩོད་གསོད་གཅོད་དགའ།   ། 
ལེགས་ཉེས་མི་རྩི་བཀྱོན་འབེབས་བཙོན་རར་འཛུད།   ། 
མཐའ་བཞིའི་རྒྱལ་པོས་རྟག་ཏུ་མནར་ཞིང་གཙེ།   ། 
རྒྱ་ནག་རྒྱལ་པོ་ཤིང་ལ་སྦྲུལ་ལྟར་འཁྲི།   ། 
རྒྱ་གར་རྒྱལ་པོ་ལུག་ལ་སྤྱང་ལྟར་འཇབ།    ། 
སྟག་གཟིག་རྒྱལ་པོ་བྱ་ཁྱུར་ཁྲ་ལྟར་རྒྱུག ། 
གེ་སར་རྒྱལ་པོ་ཤིང་ལ་སྟ་ལྟར་འཚབ།    ། 
ཅེས་སྐད་དོ།   ། 
འཐབ་ཏུ་མི་ཐུབ་བོད་ལ་དམག་གྲངས་ཉུང༌།    ། 
ཡུལ་གཞན་འགྲོ་རུ་རྒྱལ་ཕྲན་གྱིས་མི་སྟེར།    ། 
ཐང་ལ་མི་ཆགས་བྲག་རི་བཙན་པོ་འཛིན།   ། 
བཟའ་བཏུང་མི་རྙེད་བཀྲེས་སྐོམ་སྡུག་བསྔལ་ཆེ།   ། 
བོད་ཡུལ་མི་རྣམས་རབ་ཏུ་སྡུག་བསྔལ་ཆེ།    ། 
འཕགས་པའི་ཐུགས་རྗེས་བྱིན་གྱིས་བརླབས་པ་ཡིས།    ། 
གཉའ་ཁྲི་བཙན་པོ་བོད་ཡུལ་རྗེར་གཤེགས་ནས།   ། 
བོད་འབངས་བདེ་ཞིང་སྐྱིད་པར་མཛད་པ་ཡིན།    ། 
        ཞེས་སོགས་ལ་བརྟགས་ན།     སྐབས་དེར་ཕྱི་ནང་གི་འཁྲུག་རྩོད་མང་པོ་ཞིག་བར་མེད་དུ་བྱུང་བ་དེ་དག་འགོག་པའི་སླད་དུ་ཐུན་མོང་གི་སྟོབས་ཤུགས་ལ་བརྟེན་ནས་རིམ་བཞིན་རྡོ་དང༌།   རུས་པ།    ཟངས།   ལྕགས་བཅས་ཀྱི་ཡོ་བྱད་དམ་མཚོན་ཆ་བཟོ་བའི་ལག་རྩལ་འཕེལ་རྒྱས་འགྲོ་བའི་མགོ་བརྩམས་ཏེ།      མདའ་གཞུ་དང༌།   སྟ་རེ།   མདུང༌།   སྒྱོགས།    ཆུ་གྲི།    ཞགས་པ།    འུར་རྡོ།   དོང་རལ།    ཕུབ་སོགས་དམག་འཁྲུག་གི་མཚོན་ཆ་དང་ཡོ་བྱད་མང་པོ་བཟོས་ཡོད་པ་ཡིག་ཆ་རྣམས་སུ་གསལ་བ་ཙམ་མ་ཡིན་པར།    བོད་ཡུལ་སྟོད་སྨད་བར་གསུམ་གྱི་ཡུལ་གྲུ་རྣམས་སུ་རྙེད་དང་རྙེད་མུས་ཀྱི་གནའ་རྫས་རྙིང་པ་རྣམས་ལས་གསལ།     དེ་ལྟར་རྩོད་ལྡན་སྙིགས་མ་ལྔ་བདོ་བའི་དུས་སུ་བྱུང་བའི་མངའ་མཛད་ཀྱི་དཔོན་པོ་དེ་དག་ལ་ཕྱི་བློན་དང༌།   ནང་བློན།   དམག་མི།   བྲན་གཡོག་སོགས་ཀྱི་གྲལ་རིམ་གྱི་རྣམ་པ་བྱུང་བ་དང༌།   ས་ཞིང༌།     ནོར་ཕྱུགས་སོགས་ལོངས་སྤྱོད་རྒྱ་ཆེན་པོར་བསགས་པའི་ཆེད་དུ་འབངས་མི་རྣམས་ལ་སྙིང་རྗེ་མེད་པར་ཡ་ང་བའི་སྡུག་བསྔལ་མང་པོ་མྱོང་དུ་འཇུག་པ་དང༌།   དུས་རྟག་ཏུ་དགྲ་ཇག་དམག་འཁྲུག་གི་ལས་བྱེད་ཅིང༌།   རྒྱལ་ཕྲན་གཞན་གྱི་འབངས་དང་དམག་རྣམས་ལག་ཏུ་ཟིན་ཚེ་བྲན་གཡོག་བྱེད་དུ་འཇུག  དེ་ལྟར་བྲན་གཡོག་གི་མི་འབོར་ཆེས་ཆེར་སོང་བ་དང༌།   རྗེ་བོ་དང་རྒྱལ་ཕྲན་དག་གིས་སོ་སོའི་ཐོབ་ཐང་དང་བསྟུན་པའི་བྲན་དུ་བཀོལ་བ་དང༌།       འབངས་མི་རྣམས་བཙན་ཤེད་ཀྱིས་བྲན་ཏུ་བཀོལ་ཏེ་གྱེན་ལྡོག་བྱེད་མཁན་བྱུང་ན་སྲོག་ཆད་གཅོད་པ་སོགས་འབངས་མི་རྣམས་ལ་རང་དབང་ཏིལ་འབྲུ་ཙམ་ཡང་མེད་པའི་འཚོ་བ་སྤྱོད་པའི་དུས་དེར།     མཐའ་འཁོར་གྱི་ཕྱོགས་བཞི་ན་ཤར་དུ་རྒྱ་ནག་རྒྱལ་པོ།   ལྷོར་རྒྱ་གར་རྒྱལ་པོ།      ནུབ་ཏུ་སྟག་གཟིག་ནོར་གྱི་རྒྱལ་པོ་སྟེ་དེང་སང་པར་སིག་ཀྱི་ཡུལ་འདི་དང༌།      བྱང་དུ་ཁྲོམ་གེ་སར་དམག་གི་རྒྱལ་པོ་སྟེ་དེང་སང་ལི་ཡུལ་གྱི་ཡུ་གུར་རིགས་ཀྱི་ལུང་པ་འདི་དག་ནས་རྒྱལ་ཕྲན་སིལ་བུར་འཐོར་བའི་སྐབས་དང་བསྟུན་ནས་རང་གི་ས་མཚམས་ཀྱི་རྒྱལ་ཕྲན་དེ་དག་གིས་རྟག་པར་བཙན་འཛུལ་བྱས་ཏེ་འཕྲོག་བཅོམ་བྱས་ནའང༌།    རང་ལ་དམག་གྲངས་ཤིན་ཏུ་ཉུང་ཞིང་ཉེ་འཁོར་གྱི་རྒྱལ་ཕྲན་རྣམས་དང་ཕན་ཚུན་མཐུན་སྒྲིལ་མེད་སྟབས་ཀྱིས་དེ་དག་ལ་འཐབ་ཏུ་མི་ཐུབ་པ་དང༌།        འོག་གི་འབངས་མི་རྣམས་ས་གནས་གཞན་དུ་བྲོས་བྱོལ་བྱེད་སྙམ་ན་ཡང་རང་གི་དཔོན་གྱི་རྒྱལ་ཕྲན་དེ་དག་གིས་བདག་ཏུ་བཟུང་ནས་འགྲོ་རུ་མི་སྟེར།            ཞིང་འབྲོག་གི་ལས་ཀ་བྱེད་ཅིང་ཡུལ་དུ་བསྡད་ན་རྟག་པར་ཕྱི་ཡི་དགྲ་ཇག་གིས་བཙེས་ཏེ་རི་བྲག་སོགས་སུ་བཙན་ས་བཟུང་ནས་སྡོད་དགོས་པ་བྱུང་སྟབས།        བཟའ་བཏུང་གི་རིགས་ཆད་དེ་བཀྲེས་སྐོམ་གྱི་སྡུག་བསྔལ་ཚད་མེད་པ་ཞིག་མྱོང་དགོས་པ་བྱུང་བའི་སྐབས་དེར།      བོད་ཀྱི་རྒྱལ་པོའི་སྔ་བ་གཉའ་ཁྲི་བཙན་པོ་བྱོན་ནས་དེ་དག་ཕལ་ཆེར་གཅིག་གྱུར་བྱས་ཚུལ་བཤད་ཡོད་པ་འདིས་ནི་སྤུ་རྒྱལ་གྱི་གོང་དུ་བྱུང་བའི་སྤྱི་ཚོགས་ཀྱི་ལམ་ལུགས་དང༌།        འབངས་མིའི་འཚོ་བའི་གནས་ཚུལ་རགས་རིམ་ཙམ་ཞིག་སྟོན་ཐུབ།