ཀྲུང་གུང་ཀྲུང་དབྱང་ཆབ་སྲིད་ཅུས་རྒྱུན་ལས་ཨུ་ཡོན་ལྷན་ཁང་གིས་ཚོགས་འདུ་འཚོགས་ནས། སི་ཁྲོན་ལུའུ་ཧྲན་གྱི་ཡོམ་འགོག་གེགས་སེལ་ལས་དོན་ཐད་སྔར་བས་བཀོད་སྒྲིག་བྱས་པ།

        ཤིན་ཧྭ་གསར་འགྱུར་ཁང་པེ་ཅིང་ནས་ཟླ་4ཚེས་23ཉིན་གློག་འཕྲིན་འབྱོར་གསལ།ཟླ་4ཚེས་23ཉིན་གྱི་ཕྱི་དྲོ་ཀྲུང་གུང་ཀྲུང་དབྱང་ཆབ་སྲིད་ཅུས་རྒྱུན་ལས་ཨུ་ཡོན་ལྷན་ཁང་གིས་ཚོགས་འདུ་འཚོགས་ནས་སི་ཁྲོན་ལུའུ་ཧྲན་གྱི་ཡོམ་འགོག་གེགས་སེལ་ལས་དོན་ཐད་སྔར་བས་བཀོད་སྒྲིག་བྱས་པ་རེད།ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་ཞིས་ཅིན་ཕིང་གིས་ཚོགས་འདུ་གཙོ་སྐྱོང་གནང་བ་མ་ཟད་གསུང་བཤད་གལ་ཆེན་ཡང་གནང་བ་རེད།
        ཚོགས་འདུ་འགོ་ཚུགས་སྐབས་ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་དང་།རྒྱལ་ཁབ་ཀྱི་ཀྲུའུ་ཞི།ཀྲུང་དབྱང་དམག་ཨུད་ཀྱི་ཀྲུའུ་ཞི་བཅས་ཡིན་པའི་ཞིས་ཅིན་ཕིང་གིས་ཚོགས་འདུར་ཕེབས་པའི་ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ཨུ་ལི་ཁེ་ཆང་དང་།ཀྲང་ཏེ་ཅང་།ཡུས་ཀྲེང་ཧྲེང་།ལིའུ་ཡུན་ཧྲན།ཝང་ཆི་ཧྲན།ཀྲང་ཀའོ་ལི་སོགས་ཚང་མ་ཡར་བཞེངས་ནས་སི་ཁྲོན་ལུའུ་ཧྲན་གྱི་ས་ཡོམ་ཁྲོད་རྐྱེན་ལམ་དུ་ཤོར་བའི་སྤུན་ཟླ་དང་ཉེན་སེལ་རྒུད་སྐྱོབ་ཁྲོད་དཔའ་ངར་ཆེན་པོས་རང་སྲོག་བློས་བཏང་བའི་འཐབ་འཛིང་པར་ངག་བསྡམས་མྱ་ངན་ཞུ་རྒྱུའི་གྲོས་འགོ་བཏོན་གནང་བ་རེད།
        ཚོགས་འདུའི་ཐོག་སི་ཁྲོན་ལུའུ་ཧྲན་ས་ཡོམ་གྱི་གནོད་འཚེའི་གནས་ཚུལ་དང་ཡོམ་འགོག་གེགས་སེལ་ལས་ཀའི་གནས་ཚུལ་སྐོར་གྱི་རྒྱལ་སྲིད་སྤྱི་ཁྱབ་ཁང་ཡོམ་འགོག་གེགས་སེལ་བཀོད་འདོམས་པུའི་སྙན་ཞུ་གསན་པ་རེད།
        ཚོགས་འདུའི་ཐོག་ངོས་འཛིན་བྱས་དོན།སི་ཁྲོན་ལུའུ་ཧྲན་དུ་ས་ཡོམ་བརྒྱབ་རྗེས་ཏང་ཀྲུང་དབྱང་གིས་མཐོང་ཧ་ཅང་ཆེན་པོ་བྱས་པ་དང་མྱུར་དུ་ཡོམ་འགོག་གེགས་སེལ་ལས་དོན་ལ་སྒོ་ཀུན་ནས་བཀོད་སྒྲིག་དང་བླང་བྱ་ཁ་གསལ་བཏོན་པ་མ་ཟད།ཕྱོགས་ཁག་ལ་འགོ་ཁྲིད་དང་སྐུལ་སློང་བྱས་ནས་གཅིག་གྱུར་ཐོག་བྱ་སྤྱོད་སྤེལ་ཏེ་ཡོམ་འགོག་གེགས་སེལ་ལས་དོན་གྱི་རང་འགུལ་དབང་ཆ་སྟངས་འཛིན་ཐུབ་པ་བྱས་ཡོད།ཏང་ཀྲུང་དབྱང་གི་གཅིག་གྱུར་འགོ་ཁྲིད་དང་བཀོད་སྒྲིག་འོག་རྒྱལ་སྲིད་སྤྱི་ཁྱབ་ཁང་ཡོམ་འགོག་གེགས་སེལ་བཀོད་འདོམས་པུའི་ཐད་ཀའི་བཀོད་འདོམས་འོག་སི་ཁྲོན་ཞིང་ཆེན་རིམ་ཁག་ཏང་ཨུད་དང་སྲིད་གཞུང་དང་ཀྲུང་དབྱང་གི་འབྲེལ་ཡོད་སྡེ་ཚན་ཁག་གིས་འཕྲལ་མར་བྱ་སྤྱོད་སྤེལ་བ་དང་མི་དམངས་བཅིངས་འགྲོལ་དམག་དང་དྲག་ཆས་ཉེན་རྟོག་དཔུང་སྡེས་གདོང་མཆོང་བྱེད་པ་མ་ཟད།སྤྱི་ཚོགས་ལས་རིགས་ཁག་གིས“ཕྱོགས་གཅིག་ལ་དཀའ་ངལ་འཕྲད་སྐབས་ཕྱོགས་བཞི་མཚམས་བརྒྱད་ནས་རོགས་སྐྱོར་བྱེད་པའི”སྙིང་སྟོབས་དར་སྤེལ་ཤུགས་ཆེན་བཏང་སྟེ་ཡོམ་འགོག་གེགས་སེལ་ནུས་ལྡན་བྱས་ཡོད་པ་རེད།ཕྱོགས་ཁག་གིས་དཀའ་སྤྱད་འབད་འཐབ་བྱས་པ་བརྒྱུད་གེགས་ཁུལ་གྱི་ཉེན་སེལ་གནོད་སྐྱོབ་དང་།རྨས་མ་སྐྱོབ་བཅོས།འཕྲོད་བསྟེན་རིམས་འགོགམང་ཚོགས་ཀྱི་འཚོ་བ་བཀོད་སྒྲིགརྨང་གཞིའི་སྒྲིག་བཀོད་མྱུར་བཟོ།དངུལ་དང་དངོས་པོ་འགན་ལེན་སོགས་ཀྱི་ལས་དོན་ཁག་ཚང་མར་གྲུབ་འབྲས་ཆེན་པོ་ཐོབ་ཡོད་པ་རེད།
        ཚོགས་འདུའི་ཐོག་ནན་བཤད་བྱས་དོན།ད་ཆ་ཡོམ་འགོག་གེགས་སེལ་ལས་དོན་དེ་འགག་རྩའི་དུས་སྐབས་སུ་སླེབས་བཞིན་ཡོད་པས་ཡོམ་འགོག་གེགས་སེལ་དེ་མིག་སྔར་དགོས་གཏུག་དང་གལ་འགངས་ཤིན་ཏུ་ཆེ་བའི་ལས་དོན་ཞིག་ཏུ་བརྩིས་ནས་སྔར་བས་ནུས་ལྡན་གྱི་བྱ་ཐབས་དང་སྔར་བས་ཚན་རིག་དང་མཐུན་པའི་བྱ་ཐབས་ལ་བརྟེན་ནས་ཡོམ་འགོག་གེགས་སེལ་གྱི་ལས་འགན་གལ་ཆེན་དེ་ལེགས་སྒྲུབ་ཡག་པོ་མཐའ་གཅིག་ཏུ་བྱས་ཐོག་གནོད་འཚེའི་གྱོ ང་གུན་དེ་ཚད་གཞི་དམའ་ཤོས་སུ་ཆུང་དུ་གཏོང་དགོས།མིག་སྔར་གཙོ་གནད་གཤམ་གསལ་གྱི་ལས་དོན་ཁག་དམ་འཛིན་ཡག་པོ་བྱེད་དགོས་པ་སྟེ།
        གཅིག་ནི་ཞིག་རོའི་འོག་ཚུད་པའི་མང་ཚོགས་མུ་མཐུད་འཚོལ་སྐྱོབ་དང་རྨས་སྐྱོན་ཕོག་པའི་མི་སྣ་ནུས་ཤུགས་ཡོད་རྒུས་སྐྱོབ་བཅོས་བྱེད་དགོས།རྩ་ཆེ་ཤོས་ནི་ཚེ་སྲོག་ཡིན་པས་སྟོབས་ཤུགས་སྒྲིག་འཛུགས་ཀྱིས་ཁྱིམ་དུད་རེ་རེ་བཞིན་ལ་གྲལ་བཤེར་བྱས་ཏེ་ཁུག་ཀྱོག་མི་ལུས་པའི་འགན་ལེན་བྱེད་དགོས།རྨས་སྐྱོན་ཕོག་པའི་མང་ཚོགས་ནུས་ཤུགས་ཡོད་རྒུས་མྱུར་སྐྱོབ་དང་སྨན་བཅོས་བྱས་ཏེ་རྨས་མ་ཚབས་ཆེན་ཆ་རྐྱེན་ལེགས་པའི་སྨན་བཅོས་སྒྲིག་གཞིར་སྨན་བཅོས་བྱེད་པར་གང་མགྱོ གས་བསྐྱལ་ཏེ་རྨས་ནས་ཤི་བ་དང་དབང་སྐྱོན་དུ་འགྱུར་ཚད་ཐབས་བརྒྱ་ཇུས་སྟོང་ངང་ཉུང་དུ་གཏོང་དགོས།
        གཉིས་ནི་གེགས་ཁུལ་མང་ཚོགས་ཀྱི་གཞི་རྩའི་འཚོ་བ་བཀོད་སྒྲིག་འོས་འཚམ་བྱེད་དགོས།གེགས་ཁུལ་མང་ཚོགས་ལ་མཁོ་གལ་ཆེ་བའི་བཟའ་བཅའ་དང་།འཐུང་ཆུ།སྦྲ་གུར།སྟབས་བདེའི་ཁང་པ།གྱོ ན་ཆས།ཉལ་ཆས།ཆར་གོས་སོགས་འཚོ་བའི་མཁོ་ཆས་དུས་ཚོད་དམ་འཛིན་གྱིས་གཏོང་འདྲེན་སྒྲིག་འཛུགས་བྱས་ནས་གེགས་བར་བྱུང་བའི་མང་ཚོགས་ལ་ལྟོ་ཟ་རྒྱུ་ཡོད་པ་དང་།གོས་གྱོ ན་རྒྱུ་ཡོད་པ།ཆུ་གཙང་མ་འཐུང་རྒྱུ་ཡོད་པ།གནས་སྐབས་སྡོད་ས་ཡོད་པ།ནད་ཕོག་སྐབས་དུས་ཐོག་ཏུ་སྨན་བཅོས་ཐུབ་པ་བཅས་ཀྱི་འགན་ལེན་བྱེད་དགོས།འཕྲོད་བསྟེན་རིམས་འགོག་ལས་དོན་ནུས་ཤུགས་ཡོད་རྒུས་ཡག་པོ་སྒྲུབ་པ་དང་ལྷག་པར་དུ་འཐུང་ཆུ་དང་།བཟའ་བཅའི་བདེ་འཇགས།སྤྱི་པའི་འཕྲོད་བསྟེན་སྒྲིག་བཀོད་འཛུགས་སྐྲུན་དང་གད་སྙིགས་གཅིག་སྡུད་ཐག་གཅོད་ཀྱི་ལས་དོན་ལ་མཐོང་ཆེན་བྱས་ཏེ་གེགས་བར་ཚབས་ཆེན་བྱུང་རྗེས་ནད་ཡམས་ཆེན་པོ་མི་ཐོན་པ་བྱེད་དགོས།གེགས་ཁུལ་མང་ཚོགས་ལ་གེགས་བར་བྱུང་རྗེས་ཀྱི་སེམས་ཁམས་ལ་རོགས་སྐྱོར་བྱས་ནས་སེམས་གསོའི་ལས་དོན་ཡག་པོ་བསྒྲུབས་ཏེ་གེགས་ཁུལ་མང་ཚོགས་ཀྱི་མི་སེམས་ལྷིང་འཇགས་དང་སྤྱི་ཚོགས་བརྟན་ལྷིང་ཡོང་བའི་འགན་ལེན་བྱེད་དགོས།སློབ་གྲྭའི་ཁང་པར་གྲལ་བཤེར་དང་ཉམས་གསོ་ནན་ཏན་བྱེད་པའམ་ཡང་ན་སྐབས་འཕྲལ་གྱི་སློབ་གྲྭ་བཙུགས་ཏེ་བདེ་འཇགས་འགན་ལེན་བྱེད་པའི་སྔོན་འགྲོའི་ཆ་རྐྱེན་འོག་གེགས་ཁུལ་སློབ་མར་གང་མགྱོ གས་སློབ་ཁྲིད་སླར་གསོ་ཡོང་བའི་རོགས་རམ་བྱེད་དགོས།
        གསུམ་ནི་རྨང་གཞིའི་སྒྲིག་བཀོད་ཉམས་གསོ་དང་ཞིག་རོ་གཙང་བཤེར་ལས་དོན་དུས་ཚོད་དམ་འཛིན་ངང་ཡག་པོ་སྒྲུབ་དགོས།རྨང་གཞིའི་སྒྲིག་བཀོད་ཉམས་གསོའི་ལས་དོན་ཡག་པོ་བསྒྲུབས་ནས་གེགས་ཁུལ་གྱི་ཆུ་དང་།གློགསྣུམ།སོལ་རླངས་བཅས་མཁོ་འདོན་འགན་ལེན་དང་འཕྲིན་གཏོང་འབྲེལ་གཏུག་ཤར་བགྲོད་ཐུབ་པ་བྱེད་དགོས།ཞོར་ཐོན་ལྟ་ཞིབ་ཚད་ལེན་གྱི་ཉེན་ཟོན་སྔོན་བརྡ་གཏོང་བ་དང་འཕྲལ་སྡོམ་དོགས་ཟོན་ལ་ཤུགས་སྣོན་བརྒྱབ་སྟེ་མང་ཚོགས་ལ་བདེ་འཇགས་ལྡན་པའི་ངང་ཉེན་གཡོལ་དང་མི་སྣ་བསྐྱར་དུ་ཤི་རྨས་དང་རྒྱུ་ནོར་གྱི་གྱོ ང་གུན་གསར་པ་མི་ཕོག་པའི་ཁྲིད་སྟོན་བྱེད་དགོས།ཞིག་རོའི་གཙང་བཤེར་ལས་དོན་གཙོ་གནད་ཐོག་ཡག་པོ་བསྒྲུབ་ཏེ་སྤྱི་པའི་ཁོར་ཡུག་གཙང་སྦྲ་སྲུང་སྐྱོང་དང་།རྨང་གཞིའི་སྒྲིག་བཀོད་མྱུར་བཟོ།གེགས་བར་བྱུང་རྗེས་ཀྱི་སླར་གསོ་བསྐྱར་སྐྲུན་བཅས་ལ་ཆ་རྐྱེན་གཏོད་དགོས།
        བཞི་ནི་ཐོན་སྐྱེད་སླར་གསོ་དང་གེགས་རྗེས་བསྐྱར་སྐྲུན་གྱི་ལས་དོན་ཡག་པོ་སྒྲུབ་དགོས།བཟོ་ལས་དང་ཞིང་ལས་ཀྱི་ཐོན་སྐྱེད་ཐད་གེགས་བར་བྱུང་བའི་གནས་ཚུལ་ལ་དུས་ཐོག་ཏུ་བརྟག་དཔྱད་བྱས་ནས་ཐོན་སྐྱེད་སླར་གསོར་སྐུལ་མ་གཏོང་བའི་སྲིད་ཇུས་བྱེད་ཐབས་བཟོ་རྒྱུར་ཞིབ་འཇུག་བྱེད་པ་དང་ཆབས་ཅིག་གེགས་ཁུལ་མང་ཚོགས་ལ་རང་སྟོབས་རང་སྤེལ་དང་ཐོན་སྐྱེད་རང་སྐྱོབ་བྱ་རྒྱུར་སྣེ་ཁྲིད་བྱས་ནས་གྱོ ང་གུན་དམའ་རུ་གང་ཐུབ་གཏོང་དགོས།ཚན་རིག་དང་མཐུན་པའི་ངང་བསྐྱར་སྐྲུན་འཆར་འགོད་བཟོས་ནས་གེགས་བར་བྱུང་བའི་མང་ཚོགས་ལ་ཁྱིམ་གཞིས་བསྐྱར་སྐྲུན་གང་མྱུར་ཐུབ་པར་རོགས་རམ་བྱེད་དགོས།
        ལྔ་ནི་གླེང་ཕྱོགས་ཀྱི་ཁྲིད་སྟོན་ལ་ཤུགས་སྣོན་རྒྱག་དགོས།གསར་འགྱུར་དྲིལ་བསྒྲགས་དང་གནས་ཚུལ་སྤེལ་བའི་ལས་དོན་ལ་གཅིག་འདོམས་མཐུན་སྦྱོར་གང་ལེགས་བྱས་ཏེ་ས་ཡོམ་དང་གེགས་བར་གནས་ཚུལ་དང་ཡོམ་འགོག་གེགས་སེལ་ལས་དོན་གྱི་འཕེལ་རིམ་གནས་ཚུལ་དུས་ཐོག་དང་།ཡང་དགདངོས་ཡོད་དང་མཐུན་པ་བཅས་ཀྱི་སྒོ་ནས་ཡོངས་བསྒྲགས་བྱེད་དགོས་པ་དང་།གནོད་སྐྱོབ་རོགས་སྐྱོར་དང་།སྨན་བཅོས་སྐྱོབ་བཅོས།འཕྲོད་བསྟེན་རིམས་འགོག་སོགས་ཐད་ཀྱི་ཚན་རིག་ཤེས་བྱ་དྲིལ་བསྒྲགས་དང་ཁྱབ་གདལ་དུ་གཏོང་བ་དང་།གནམ་གཤིས་དང་ས་གཤིས་ཀྱི་གནོད་འཚེ་སྔོན་བརྡ་དུས་ཐོག་ཏུ་བཏང་ནས་མང་ཚོགས་ལ་བདེ་འཇགས་ལྡན་པའི་ངང་ཉེན་གཡོལ་བྱ་ཆེད་ཞབས་ཞུའི་ཆ་འཕྲིན་མཁོ་འདོན་བྱེད་དགོས།
        དྲུག་ནི་ཡོམ་འགོག་གེགས་སེལ་ལས་དོན་ལ་འགོ་ཁྲིད་རྒྱུར་ཤུགས་སྣོན་རྒྱག་དགོས།བཀོད་གཏོང་བཀོད་འདོམས་མ་ལག་སྟོབས་ཆེན་འཛུགས་པ་དང་འཐུས་ཚང་དུ་བཏང་ནས་སི་ཁྲོན་ཞིང་ཆེན་གྱིས་གཅིག་གྱུར་འགོ་ཁྲིད་དང་།ཚན་རིག་དང་མཐུན་པའི་བཀོད་གཏོང་།གཅིག་འདོམས་བཀོད་སྒྲིག་བཅས་བྱེད་དགོས་པ་དང་།རྒྱལ་སྲིད་སྤྱི་ཁྱབ་ཁང་གི་འབྲེལ་ཡོད་སྡེ་ཚན་ཁག་གིས་ལས་བགོས་འགན་འཁུར་དང་གཞོགས་འདེགས་དམ་ཟབ་བྱས་ནས་ནུས་ཆེ་མཐུན་སྡེབ་ཀྱི་ལས་ཀའི་ལམ་སྲོལ་དང་ལས་ཀའི་མཉམ་ཤུགས་ཤིག་ཆགས་པ་བྱ་དགོས།གེགས་བར་བྱུང་བའི་ས་ཁུལ་གྱི་རིམ་ཁག་ཏང་རྩ་འཛུགས་ཀྱིས་འགོ་ཁྲིད་ཀྱི་སྲོག་ཤིང་དང་དམག་འཐབ་མཁར་རྫོང་གི་ནུས་པ་འདོན་སྤེལ་གང་ལེགས་ཀྱིས་རྒྱ་ཆེའི་གུང་ཁྲན་ཏང་ཡོན་ཚོས་གདོང་ལེན་དཔེ་བཟང་གི་ནུས་པ་གང་ལེགས་འདོན་པ་དང་ལྷག་དོན་དུ་རིམ་ཁག་ཏང་སྲིད་འགོ་ཁྲིད་ཚན་ཁག་དང་འགོ་ཁྲིད་ལས་བྱེད་པས་ངེས་པར་དུ་མདུན་བཅར་བཀོད་འདོམས་དང་དམག་མི་སྔོན་མཆོང་བྱས་ནས་གེགས་བར་གནས་ཚུལ་ཚབས་ཆེ་ཤོས་དང་མང་ཚོགས་ཀྱི་དགོས་མཁོ་ཆེ་སར་བསྐྱོད་པ་དང་།འགག་རྩའི་དུས་སུ་མི་དམངས་མང་ཚོགས་དང་གཅིག་སེམས་གཅིག་སྦྲེལ་གྱིས་ཐུན་མོང་ཐོག་དཀའ་གནད་ལས་སྒྲོལ་བ་བྱེད་དགོས།གནོད་སྐྱོབ་རོགས་སྐྱོར་མི་སྣར་སེམས་ཁུར་དང་གཅེས་སྐྱོང་བྱ་རྒྱུར་དོ་སྣང་གིས་ཁོ་ཚོར་འགན་ལེན་སྣ་ཚོགས་ཧུར་ཐག་བྱེད་དགོས།གེགས་བར་བྱུང་ཡུལ་དུ་འཛུལ་བའི་གནོད་སྐྱོབ་འཁོར་རིགས་དང་མི་སྣར་གཅིག་འདོམས་བཀོད་གཏོང་བྱ་རྒྱུར་ཤུགས་སྣོན་བརྒྱབ་ཐོག་གེགས་སེལ་ལས་དོན་གྱི་དགོས་མཁོ་གཞིར་བཟུང་གོ་རིམ་ལྡན་པའི་ངང་གཏོང་ཐུབ་པ་བྱེད་དགོས།ཀྲུང་དབྱང་ཡོམ་འགོག་གེགས་སེལ་གྱི་ཇུས་འགོད་བཀོད་སྒྲིག་དོན་འཁྱོལ་བྱས་ཚུལ་ཐད་ཞིབ་བཤེར་བྱ་རྒྱུར་ཤུགས་སྣོན་བརྒྱབ་ནས་གེགས་སེལ་མ་དངུལ་དང་དངོས་པོའི་དོ་དམ་དང་ལྟ་སྐུལ་ཡག་པོ་བྱ་དགོས་པ་བཅས་རེད།
        ཚོགས་འདུའི་ཐོག་ནན་བཤད་བྱས་དོན།དམག་དཔུང་དང་དྲག་ཆས་ཉེན་རྟོག་དཔུང་སྡེས་རང་དམག་ངལ་དུབ་ལ་མི་སྐྲག་པ་དང་རྒྱུན་མཐུད་དམག་འཐབ་ཀྱི་དཔའ་ངར་ཞུམ་མེད་ཀྱི་སྤྱོད་ཚུལ་དར་སྤེལ་གྱིས་ངར་ཤུགས་ཆེན་པོ་དང་རྒྱུན་མཐུད་འཐབ་ནུས་རྒྱུན་འཁྱོངས་བྱེད་པ་དང་།ཀྲུང་དབྱང་གི་གཅིག་གྱུར་བཀོད་སྒྲིག་ལྟར་འཕྲལ་སྒྲུབ་རུ་ཁག་མུ་མཐུད་ཡག་པོ་བྱེད་པ་དང་ཞིག་རོའི་འོག་ཚུད་པའི་མང་ཚོགས་མུ་མཐུད་འཚོལ་སྐྱོབ་བྱས་ནས་དམག་དཔུང་གི་སྨན་བཅོས་ཆེད་ལས་སྟོབས་ཤུགས་ཀྱི་ནུས་པ་གང་ལེགས་འདོན་པ།མང་ཚོགས་བཀོད་སྒྲིག་ལ་གཞོགས་འདེགས་བྱེད་པ།འབྲེལ་ཡོད་ཆེད་ལས་ཀྱི་གནོད་སྐྱོབ་ཁྲོད་ཧུར་ཐག་ཞུགས་པ།འཕྲོད་བསྟེན་རིམས་འགོག་མཉམ་དུ་བྱེད་པ་བཅས་བྱེད་དགོས།
        ཚོགས་འདུའི་ཐོག་བསྟན་དོན།ང་ཚོའི་མདུན་སྐྱོད་ལམ་བུ་ནི་ལམ་ལྷོངས་བདེ་བླག་ཡིན་མི་སྲིད་པར་ཉེན་ཁ་དང་འགྲན་སློང་གང་རུང་འཕྲད་ངེས་ཡིན།ང་ཚོས་བདེ་སྡོད་ཉེན་བསམ་བྱེད་པ་དང་སེམས་ཁྲལ་གྱི་འདུ་ཤེས་ཆེ་རུ་བཏང་ནས་དཀའ་ངལ་དང་ཉེན་ཁ་སྣ་ཚོགས་ལ་ཁ་གཏད་གཅོག་རྒྱུར་ག་དུས་ཡིན་རུང་གྲ་སྒྲིག་བྱ་དགོས།ང་ཚོས་གྲ་སྒྲིག་ཡོད་པ་དང་མཐུན་སྒྲིལ་རྡོག་རྩ་གཅིག་སྒྲིལ་གྱིས་ཐུན་མོང་ཐོག་ཁ་གཏད་བཅག་ཚེ་རྒྱང་སྐྱོད་ལམ་བུའི་རྙོག་འཛིང་གི་རྣམ་པ་སྣ་ཚོགས་ལ་དཀྱེལ་ཡངས་ངང་རྦད་དེ་ཁ་གཏད་གཅོག་ཐུབ་པ་དང་ཐོན་སྲིད་པའི་དཀའ་ངལ་དང་འགོག་རྐྱེན་ལས་རྣམ་པར་རྒྱལ་ཐུབ་ངེས་ཡིན།
        ཚོགས་འདུའི་ཐོག་ནན་བཤད་བྱས་དོན།“གནོད་འཚེ་མང་པོ་ཕོག་པ་དེ་རྒྱལ་ཁབ་འཕེལ་རྒྱས་འགྲོ་བའི་རྒྱུ”དང“དཀའ་ཚེགས་ཆེན་པོའི་ནང་དུ་བརྡར་ནས་གྲུབ་འབྲས་འཐོབ”དཀའ་ངལ་ཇི་ཙམ་ཆེ་བའི་གནས་ཚུལ་འོག་ཏང་ཡོངས་དང་རྒྱལ་ཡོངས་མི་རིགས་ཁག་གི་མི་དམངས་ཚོའི་ཕྱར་བ་གྲུ་འདེགས་ཀྱི་གོང་བུ་འགྲིལ་ཤུགས་དེ་ཙམ་གྱིས་མཐོ་རུ་གཏོང་དགོས་པ་དང་།ཇི་ཙམ་གྱིས་དཀའ་ངལ་ཆེ་ན་དེ་ཙམ་གྱིས་མདུན་དུ་སྐྱོད་པའི་བློ་སྟོབས་དེ་བས་འཕེལ་བ་བྱེད་དགོས།ད་རེས་ཀྱི་ཡོམ་འགོག་གེགས་སེལ་གྱི་འཐབ་རྩོད་ཁྲོད་གཅིག་རྗེས་གཉིས་མཐུད་ངང་ཐོན་པའི་དཔེ་བཟང་མི་སྣ་དང་།བསམ་བློའི་ཁྱད་འཕགས།སྔོན་ཐོན་བྱས་རྗེས་བཅས་དྲིལ་བསྒྲགས་ཤུགས་ཆེན་བྱས་ཏེ་ཀྲུང་གོའི་སྙིང་སྟོབས་དང་ཀྲུང་གོའི་སྟོབས་ཤུགས་ཆེད་བཟང་ནུས་གསར་པ་སྣོན་པ་དང་།ཏང་ཡོངས་དང་རྒྱལ་ཡོངས་མི་རིགས་ཁག་གི་མི་དམངས་ལ་སྐུལ་ལྕག་དང་སྐུལ་སློང་བྱས་ཏེ་བློ་མཐུན་ཞིས་ཅིན་ཕིང་གིས་སྤྱི་ཁྱབ་ཧྲུའུ་ཅི་གནང་བའི་ཏང་ཀྲུང་དབྱང་གི་མཐའ་འཁོར་དུ་སྔར་བས་མཐུན་སྒྲིལ་དམ་ཟབ་བྱེད་པ་མ་ཟད།ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་འགྲོ་ལམ་ཐོག་ཀུན་སེམས་གཅིག་སྒྲིལ་གྱིས་ཏང་གི་ཚོགས་ཆེན་བཅོ་བརྒྱད་པའི་ནང་བཏོན་པའི་འཐབ་ཇུས་བཀོད་སྒྲིག་མངོན་འགྱུར་བྱ་ཆེད་མཐུན་སྒྲིལ་འབད་འཐབ་དང་།ཀྲུང་ཧྭ་མི་རིགས་རླབས་ཆེན་བསྐྱར་དར་གྱི་ཀྲུང་གོའི་ཕུགས་འདུན་མངོན་འགྱུར་ཆེད་འབད་བརྩོན་ལྷོད་མེད་བྱེད་དགོས།