མ་ཡུམ་སློབ་གྲྭ།

    སློབ་གྲྭ་ནི་ང་ཚོ་སློབ་མའི་ཡི་གེ་སྦྱོང་ས་དང་།   རིག་གནས་སྦྱོང་སའི་དགའ་ཚལ་ཡང་ཡིན།   སློབ་གྲྭའི་ཁོར་ཡུག་ཀུན་ཏུ་སྔོ་ལྗང་ལྗང་གི་སྤང་ཐང་གིས་མཛེས་པ་དང་། དཀར་ནག་སྦྲེལ་མའི་གཞུང་ལམ་དེ་ཀྱག་ཀྱོག་ཏུ་སྣང་ལ།  དགེ་རྒན་དམ་པས་སློབ་ཁྲིད་བྱེད་པའི་མན་ངག་དང་།  སློབ་བུ་ཚོས་དཔེ་ཆ་ཀློག་པའི་སྙན་དབྱངས་ག་སར་ཁྱབ་འདུག  འདི་ནི་ང་ཚོའི་མཛེས་སྡུག་ལྡན་པའི་སློབ་གྲྭ་ཡིན།   ཕྱི་ནས་བལྟས་ན་སློབ་གྲྭ་དེ་ཡིད་དུ་འོང་ལ།  ནང་དུ་སོང་ན་སློབ་གྲྭ་ནི་སྔར་ལས་མཛེས་སྡུག་ལྡན།    སློབ་གྲྭ་ནི་ང་ཚོ་སློབ་མའི་ཁྱིམ་ཚང་ཡིན་པ་དང་།  ང་ཚོའི་བྱམས་བརྩེ་དང་བརྩེ་སེམས་ཟབ་མོ་ཡང་གནས་དེ་རུ་ཆགས་ཡོད།   ང་རང་སློབ་གྲྭ་ལ་དགའ།  སློབ་གྲྭའི་སྐྱེད་ཚལ་ནས་ང་ཚོའི་དྭངས་གཙང་གི་བསམ་བློའི་རྒྱུད་ལ།  ཤེས་རིག་གི་མྱུ་གུ་འབུས་བྱུང་།   མཛེས་སྡུག་ལྡན་པའི་སློབ་གྲྭ་ནི་ནམ་ཡང་བརྗེད་ཐབས་མེད།