ལེ་དབར་ཁྲི་ཡི་བོད་ཁམས་སུ་སྐྱོད་པ་ཞེས་པ་སི་ཁྲོན་ཁྲེང་ཏུའུ་གྲོང་ཁྱེར་དུ་སྤེལ་འགོ་བརྩམས་པ།

        མི་དམངས་དྲ་བའི་འཕྲིན། ཏང་གི་ཚོགས་ཆེན་བཅུ་དགུ་པ་སྤྲོ་བས་བསུ་བ་དང་། བོད་ཁུལ་གྱི་ལས་བྱེད་མང་ཚོགས་ཀྱིས་ཏང་ཀྲུང་དབྱང་གི་འགོ་འཁྲིད་བརྟན་པོའི་འོག་ཏུ། ཏང་གི་བོད་སྐྱོར་སྲིད་ཇུས་སྣ་ཚོགས་ལག་བསྟར་དོན་འཁྱོལ་བྱས་ནས་བོད་ཁུལ་གྱི་དཔལ་འབྱོར་སྤྱི་ཚོགས་གོང་སྤེལ་དང་། དམངས་འཚོ་ལེགས་བཅོས། མི་རིགས་མཐུན་སྒྲིལ་བཅས་ཀྱི་རྣམ་པ་བཟང་པོ་ཕྱི་རུ་ངོམ་ཆེད། སི་ཁྲོན་མི་དམངས་རླུང་འཕྲིན་ལས་ཁུངས་ཀྱིས་བོད་ལྗོངས་དང་མཚོ་སྔོན། ཡུན་ནན། ཀན་སུའུ་བཅས་ཀྱི་རླུང་འཕྲིན་ལས་ཁུངས་ལ་མཉམ་འབྲེལ་བྱས་ཏེ། གསར་འགྱུར་བཅར་འདྲིའི་བྱེད་སྒོ་ཆེན་མོ་ལེ་དབར་ཁྲི་ཡི་བོད་ཁམས་སུ་སྐྱོད་པ་ཞེས་པ་སྒྲིག་འཛུགས་བྱས་པ་དང་། ཟླ་8ཚེས་28ཉིན་གྱི་ཆུ་ཚོད་9:00ཐོག བྱེད་སྒོ་ཆེན་པོ་འདི་ལྷོ་ནུབ་ཕྱོགས་ནས་ལྡང་བའི་བསིལ་རླུང་འཇམ་པོ་ཞིག་གིས་ཚ་དུབ་ཀྱི་གདུང་བ་རབ་ཏུ་བཅོམ་ནས་སྐྱེ་དགུའི་ལུས་ལ་བདེ་བ་དཔག་ཏུ་མེད་པ་ཞིག་སྦྱིན་པའི་དུས་བཟང་སླེབས་པ་དང་བསྟུན་ནས་ཁྲེང་ཏུའུ་གྲོང་ཁྱེར་གྱི་སི་ཁྲོན་མི་དམངས་ཀུན་ཁྱབ་རླུང་འཕྲིན་ལས་ཁུངས་ནས་དངོས་སུ་སྤེལ་འགོ་རྩོམ་པའི་མཛད་སྒོ་འཚོགས་པ་རེད།
         ཏང་གི་ཚོགས་ཆེན་བཅུ་དགུ་པ་སྤྲོ་བས་བསུ་བའི་གསར་འགྱུར་བཅར་འདྲིའི་བྱེད་སྒོ་ཆེན་མོ་ལེ་དབར་ཁྲི་ཡི་བོད་ཁམས་སུ་སྐྱོད་པ་ཞེས་པ་འདི་ནི། ཟླ་8ཚེས་28ཉིན་སི་ཁྲོན་ཞིང་ཆེན་ཁྲེང་ཏུའུ་གྲོང་ཁྱེར་ནས་འགོ་བརྩམས་ཏེ། ཟླ་9པའི་ཟླ་མཇུག་ལ་བོད་ལྗོངས་ལྷ་ས་གྲོང་ཁྱེར་དུ་མཇུག་བསྒྲིལ་རྒྱུའི་འཆར་གཞི་བཀོད་ཡོད་ལ། བཅར་འདྲིའི་ཚོགས་པ་ནི་སི་ཁྲོན་བརྒྱུད་ནས་བོད་ལྗོངས་སུ་བསྐྱོད་པའི་ལམ་ཐིག་དང་མཚོ་སྔོན་བརྒྱུད་ནས་བོད་ལྗོངས་སུ་བསྐྱོད་པའི་ལམ་ཐིག་གཉིས་སུ་བགོས་ནས་ལྗོངས་ཞིང་ལྔའི་བོད་ཁུལ་ཡོངས་སུ་རིམ་པ་བཞིན་དུ་བསྐྱོད་ནས་ས་གནས་སོ་སོའི་འཕེལ་རྒྱས་ཀྱི་གནས་ཚུལ་གསར་པ་དང་མི་རིགས་འཆམ་མཐུན་གྱི་གནས་སྟངས་བཟང་པོ་ཅི་འདྲ་ཡོད་པ་རྣམས་ཆེད་དུ་སྒྲོག་གཏོང་བྱ་རྒྱུ་ཡིན་པར་མ་ཟད། ལྗོངས་ཞིང་ལྔའི་གསར་འགྱུར་སྨྱན་བྱེད་ཁག་གིས་ཆེད་སྒྲིག་ལེ་ཚན་བཀོད་སྒྲིག་བྱས་ནས་རླུང་འཕྲིན་ཐད་གཏོང་དང་རིམ་གཏོང་བྱ་རྒྱུ་དང་།  སི་ཁྲོན་བརྙན་འཕྲིན་ཁང་སོགས་ཀྱིས་མཚོན་པའི་གསར་འགྱུར་སྨྱན་བྱེད་བཅུ་ལྷག་གི་གསར་འགོད་པ་དང་། ཐེངས་འདིའི་བྱེད་སྒོ་ཆེན་པོར་ཞུགས་པའི་ལྗོངས་ཞིང་ལྔའི་རླུང་འཕྲིན་ལས་ཁུངས་ཀྱི་གསར་འགོད་པ། སི་ཁྲོན་མི་དམངས་ཀུན་ཁྱབ་རླུང་འཕྲིན་ལས་ཁུངས་ཀྱི་ལས་བཟོ་བ་ཡོངས་བཅས་ཐེངས་འདིའི་བྱེད་སྒོ་ཆེན་པོ་སྤེལ་འགོ་རྩོམ་པའི་མཛད་སྒོར་ཞུགས་པ་རེད།