མ་ཕམ་གཡུ་མཚོ།

        མ་དྲོས་མཚོའམ་མ་ཕམ་གཡུ་མཚོ་རུ་གྲགས་པ་ནི།བོད་ལྗོངས་སྤུ་ཧྲེང་རྫོང་གི་བྱང་རྒྱུད་དུ་ཆགས་ཡོད།   མཚོ་འདིའི་ཕྱོགས་བཞིའི་ཉེ་འཁོར་དུ་འབྲི་གུང་བཀའ་བརྒྱུད་ཀྱི་སྒྲུབ་གནས་སེ་བ་ལུང་དང་།ས་སྐྱའི་ལུགས་འཛིན་མཉེས་མགོ་དགོན།དགེ་ལུགས་པའི་ཆོས་སྡེ་ཁྲུས་སྒོ་དགོན།རྗེ་རྒོད་ཚང་བའི་སྒྲུབ་གནས་མགོ་ཚུགས་དགོན་སོགས་དགོན་པ་བརྒྱད་ཡོད་པ་དང་།དེ་རེ་རེ་ན་རྟེན་བྱིན་ཅན་མང་དུ་བཞུགས་པས།འདི་ལ་ཁྲུས་དང་ཕྱག་སྐོར་བྱས་ན་ཕན་ཡོན་རྒྱ་ཆེ་བར་གྲགས།

        མཚོ་དེ་ཇི་ལྟར་བྱུང་ཚུལ་ནི།དེ་ཡང་བཤད་རྒྱུན་ལ།བསྐལ་བ་ཆགས་དུས་མཚོ་འདི་མེད་པ་ལས།རྗེས་སུ་འཁོར་བསྒྱུར་རྒྱལ་པོ་སྨྱུག་སྦམ་བྱ་བ་ཞིག་བྱུང་།དེས་གཏན་པ་མེད་པའི་སྦྱིན་གཏོང་གིས་ཚོགས་རླབས་པོ་ཆེ་བསགས་པའི་ཚེ་ས་ལ་དོང་ཆེན་པོ་བྲུས་ནས་དེར་འབྲས་བཙོས་པའི་ཁུ་བ་རྣམས་འཕོ་བ་ལས།ལོ་བཅུ་གཉིས་ལོན་པ་ན་དོང་གང་ནས་མཚོ་ཆེན་པོར་གྱུར་ཅིང་།དེ་ཡང་དང་པོར་འབྲས་ཁུ་དྲོན་མོ་བླུགས་ཀྱང་མཐར་ཤིན་ཏུ་བསིལ་བར་གྱུར་པ་ལས་མཚོ་འདིའི་མིང་ལ་མ་དྲོས་པ་ཞེས་ཐོགས་པ་དང་།འབྲས་ཁུས་མཚོ་ལུད་ནས་འབབ་ཆུ་བྱུང་བ་ལ་འབྲས་ཁུའི་ཆུའམ་ཆུ་བོ་གངྒཱ་ཞེས་པ་བྱུང་ཞེས་འདུལ་བ་ལུང་གཞི་ནས་གསུངས།འདི་ལ་མཚོ་མ་ཕམ་པར་འབོད་པ་ནི།མཚོ་འདི་ཉིད་ཀྱི་ཆུ་ཡན་ལག་བརྒྱད་ལྡན་ཁོ་ན་ཡིན་ཞིང་ཡོན་ཏན་གྱིས་མ་ཕམ་པས་ན་མ་ཕམ་ཞེས་འབོད་པར་གསུངས་སོ།།