བོད་དུ་ཇ་དང་དཀར་ཡོལ་བྱུང་བའི་ལོ་རྒྱུས།

རྒྱལ་པོ་འདུས་སྲོང་མང་པོ་རྗེའི་དུས་སུ།  བོད་ན།     སྨན་སྤྱད་གཞུང་བཞིན་ཤེས་པ་ནི་མེད། ཟས་དང་། སྤྱོད་ལམ། རིག་བཟོ་ལ་བརྟེན་པ་ཙམ་ཡོད་པས། སྐུ་འཚམས་བར་བཞུགས་ཡོད་པའི་ནང་ནས། ཕོ་བྲང་གི་པུ་ཤུ་ཟུར་ན། བྱ་ཡིད་དུ་འོང་བ། སྔར་མ་མཐོང་པ་གཅིག་གི་ཁ་ན། ཤིང་བུ་ལོ་འདབས་དང་ཉུང་ཤས་ཤིག་ཁྱེར་ནས། སྐད་སྙན་པར་སྒྲོག་གི་འདུག་པ། རྒྱལ་པོས་གཟིགས་ནའང་། སྔན་མ་ཕྱེད་གཉེར་མ་མཛད། སང་སྣངས་ཀྱང་། ཉི་མ་ཤར་མཚམས་སུ། དེ་བཞིན་ཀ་བྱེད་ཀྱི་འདུག་པ་དང་། རྒྱལ་པོའང་ཐེ་ཚོམ་སྐྱེས་ཏེ། ལྟས་ནས། ཤིང་དེ་རྣམས་ལ། བཞིག་མལ་བཅུག་པས། སྔར་མེད་ཀྱི་ཤིང་དུ་འདུག་ཅིང་། ཤིང་དེ་ཡི་སྣ་མོ་གཅིག་ཞལ་དུ་བཅུག་ནས། བྲོ་བ་མྱངས་པས། ཞལ་སྐྱེམས་པ་སོས། བཏུང་བའི་མཆོག་ཏུ་མངོན་ནས། ད་ཁྱེད་བློན་འབངས་རྣམས་ཉོན་ཅིག  ང་ན་བའི་སྐབས་འདིར་། གཞན་གྱི་བཟའ་བཏུང་ནི་གང་ཡང་མི་འདོད་། བྱས་ཁྱེར་བའི་ཤིང་བུ་འདི་ནི། བཏུང་བའི་མཆོག་ལུས་ཀྱིས་གསོས། ནད་ཀྱི་སྨན་དུ་འདུག་པས། ང་ལ་གློ་བ་ཉེ་བ་རྣམས་ཀྱིས། ཤིང་འདི་ལྟ་བུ་གར་འདུག་ཀྱང་ཚོལ་བྱོན་ཅིག   བྱ་དགའ་ཆེན་པོ་བྱེད་དོ་གསུངས་པ་དང་།བློན་འབངས་བྱིན་པོས། བོད་ཡུལ་གྱི་ས་ཆ་སྟོད་སྨད་ཐམས་ཅད་རྩལ་ཡང་མ་རྙེད། བློན་པོ། རྒྱལ་པོ་ལས་བསམ་རུ་མེད་པའི། གློ་བ་ཉེ་བཤོས་ཅིག་གིས། བོད་ཀྱི་ས་མཐའ་འཁྱམས་འཁྱམས་པས། རྒྱ་ནགས་འཐུབ་པོ། སྨུག་ལིང་ངེ་བ་མཐོང་པ་གཅིག་ཏུ་སླེབ་སྟེ། ཕ་ཀི་འདྲ་བའི་གསེབ་ན། ཤིང་དེ་ངེས་པར་ཡོད་དམ་སྙམ་ནས། གཏད་ཕྱིན་པས། ནགས་དེའི་ཚུར་རོལ་ན། ཆུ་ཆེན་པོ་གཅིག་འདུག་པས། ཆུ་ལ་ནི་འགྲོ་མ་ནུས། ཤིང་དེ་ནི་ནགས་གསེབ་ན་ཡོད་པར་ངེས་རིག་སྟེ། རྒྱལ་པོ་ཡིད་ལ་སེམས་ཀྱིན་སྡད་ཙ་ན། དར་ཅིག་ནས་ཉ་ཆེན་པོ་ཅིག་ཁོའི་ཐད་དེ་ནས་ཆུ་དེ་ལ་ཞུགས་སོང་པ་དང་། ཆུ་ཁ་ཞེང་ཆེ་བ་མ་གཏོགས། གཏིང་ལ་མི་ནུབ་པར་འདུག་པས། སེམས་དགའ་སྟེ། དེའི་རྗེས་ལ་རྒལ་ཕྱིན་ནས། ནགས་གསེབ་ཏུ་སླེབ་པ་དང་། ནགས་མ་ནི་ཕལ་ཆེ་བ། བྱས་ཁྱེར་བའི་ཤིང་དེ་རྐྱང་དུ་འདུག་པས། ད་ནི་བདག་གི་རྗེ་བོ་ངེས་པར་སྐུ་ལྟས་པར་འགྱུར་རོ་སྙམ་པའི་དགའ་སྤྲོ་དང་བཅས་ནས། ཤིང་དེ་འདྲ་བ་རྒྱབ་གཅིག་རྔས། ཡང་བསམ་མནོ་ཕྱི་མ་ལ། རྒྱལ་པོ་སྙུང་བ་དྭངས་པ་ལ་ནི། འདི་ཕན་ངེས། ས་ཐག་རིང་བར་འདུག་པས། ད་ལན། འཁུར་བའི་གྲོགས་སམ། ཁལ་པ་གཅིག་ཡོད་ན་བསམ། འདོད་པ་སྐྱེས་པའི་དུས་དེར། ད་ཀི་མེད་པའི་ཤྭ་བ་མོ་གཅིག་མི་འཛེམ་པར་རྩ་རུ་སླེབ་བྱུང་པས། འདི་འདྲ་ལ་ཁལ་བཀོལ་རུང་པའང་སྲིད་དམ་སྙམ་ནས་གྲབས་བྱས་པས། ཇི་ལྟར་འདོད་པ་བཞིན་བྱར་བྱུང་ནས། ཤིང་དེ་ནས། ཤ་བའི་ཁལ་རྒྱབ་ཅིག་དང་།ཁོ་རང་གི་རྒྱབ་གཅིག་ཁུར་ཡོང་པས། ལམ་ཞག་ཟླ་བའི་བར་ལ་སོང་ནའང་། ཤྭ་བས་ཀྱང་ཁུར་ནས་བོད་རྒྱལ་པོའི་ཕོ་བྲང་མཐོང་སར་བསྐྱལ་ལོ།། 

དེ་ནས་གྲོགས་བཀུག་སྟེ། རྒྱལ་པོའི་སྤྱན་སྔར་ཕུལ་བས། ཤིན་ཏུ་དགྱེས་དགའ་ནས།བྱ་དགའ་ཆེན་པོའང་བྱས། བསྙུང་སོས་པ་ལ་ཡང་ཕན་པོ་བྱུང་སྐད། དེ་རྟིང་། རྒྱལ་པོའི་ཞལ་ནས། འདི་ནི་བཏུང་བའི་མཆོག་ཏུ་འདུག་པས། འདི་འཐུང་བའི་སྣོད། སྔར་ཡོད་པའི་གཟི་འཆོང་། གསེར་དངུལ་ལ་སོགས་རིན་པོའི་ཆེའི་ཞལ་སྐྱོགས་འདི་རྣམས་ཀྱང་མ་ཡིན་པའི་སྔར་མེད་ཀྱི་སྣོད་ཅིག་ཚོལ་དགོས་པར་འདུག་པ། དེའང་། རྒྱ་ནག་པོའི་རྒྱལ་པོ་ལ། དཀར་ཡོལ་ཟེར་བ་ཅིག་ཡོད་འདུག་པ། སློངས་ལ་ཤོག་ཅིག་གསུངས་པ་བྱུང་ནས། གསེར་ཡིག་པ་བཏང་པས། རྒྱ་ནག་རྒྱལ་པོ་ན་རེ། རང་རེད། རྒྱ་བོད་གཉིས་འཐབ་མཐུན་ལན་མང་། བོད་ལ་ཕན་གདགས་པའི་ཕྱིར་དུ། ངེད་ཀྱིས། སྨན་རྩིས་བཟོ་གནས། རོལ་མོ་མཁན་རིམ་པར་བཏང་ནའང་། བོད་ཀྱིས་བསམ་དུ་མ་འདོད་པས།དཀར་ཡོལ་མི་བསྐུར་། བོད་རང་ལ་བཟོ་རྒྱུ་ཡོད་ན། བཟོ་མཁན་ཅིག་བཏང་དགོས་པ་ཡིན་ཡོངས་གསུངས་པ་བྱུང་ན། རྒྱའི་དཀར་ཡོལ་བཟོ་མཁན་ཁྲིད་ཡོང་སྟེ། བོད་རྒྱལ་པོའི་མདུན་དུ། རྒྱུ་མཚན་རྙད༼བསྙད༽པས། དེས་ན། རང་རེད། བཟོ་བར་རིགས་པས། སྔ་སོར། རྒྱུ་དང་ཆས་རྐྱེན་ཅི་འདྲ་དགོས་པ་བསོགས་ཤིག་གསུངས་པ་ལ། ཁོ་ན་རེ། རྒྱུའི་རབ་ནི་རིན་པོ་ཆེའི་འཆིང་བུ། འབྲིང་ནི་འཛེང་། ཐ་མ་རྡོ་དཀར་པོ་ལ་ཡང་རུང་ངོ་ཟེར་བས། གན་མཛོད་ནས་རྒྱུ་གསུམ་པོ་གང་དགོས་པ་སྤྲད། དཀར་ཡོལ་ལ་རིགས་རྣམ་པ་མང་བས། ཇི་ལྟར་བཟོ་ཟེར་བ་ལ། བཟོ་གནས་ཀྱི་རིགས་ནི། སྔར་རྒྱ་ནག་དུའང་མ་དར་ཅིག་བཟོ་དགོས་པ། གཟུགས་ནི། ཁ་གཡེལ་བ། སྲབ་པ། རྐང་པ་ཐུང་པ། མདོག་དཀར་འཇམ། སྔོ་མདངས་ལྡན་པ་ཞིག་དགོས། མིང་ནི། བོད་ན་སྔར་མེད་པ་དར་བས་དར། སྣོད་དེ་བསྟེན་པ་ཚེ་དང་དཔལ་འབྱོར་འཕེལ་བར་བྱེད་པ་ན། དར་ཚེ་ཞེས་པར་ཐོགས་ཤིག  དེ་དང་རི་མོའི་རྣམ་པ་ནི། དང་པོ་འདབ་ཆགས་བྱས།ཤིང་ཁྱེར་བྱུང་པ་ལ་རྐྱེན་པ་ཡིན་པས། རབ་དེའི་ནང་དུ། བྱ་ཁ་ན་ཤིང་ཁྱེར་བ་རེ་བྲིས། འབྲིང་ལ། མཚོ་ཉ་དང་བཅས་པ་རེ་གྱིས། ཐ་མ་རྣམས་ལ་སྤང་རི་ཤྭ་བ་དང་བཅས་པ་རེ་གྱིས། དེ་རྣམས་ལས་ཞན་པ་བྱུང་ན། རི་མོ་དང་། རྣམ་གྲངས་གང་འོས་བཟོ་བོས་བློས་བཅོལ་ལ་གྱིས་ཤིག་གསུངས། དེར་བཟོ་བོས། རྒྱུ་བཟང་ངན། དྭངས་སྙིགས་ལས་སེས་ནས། དར་རྩེ་ལ་རིགས་རྣམ་པ་དྲུག་ཏུ་གྱེས་ཏེ།རྒྱལ་པོའི་བཀའ་གནང་བ་གསུམ་པོ་ལ། ཤབ་ཚེ། ལན་ཚེ། བྱ་བར་མིང་བཏགས། ཕལ་པ་གསུམ་པོ་ལ། ཐེག་རྩེ། ངེས་ཚེ། བརྡོ་ཚེ་ཞེས་པར་བཏགས་ཏེ། བོད་དཀར་དར་ཚེའི་རིགས་རྣམས་འདི་རྣམས་ནི། དེ་གོང་རྒྱ་ནག་ནའང་མེད་པར་བྱེད་ཅིང་། བོད་དུ། ཇ་དང་དཀར་ཡོལ་བྱུང་བའི་སྔན་མ་འདི་ཡིན་པར་འདོད་དོ།།