བོད་ཅེས་པའི་མིང་ཐོགས་ཚུལ།

        གནའ་ནས་ད་ལྟའི་བར་རང་ཅག་ཚོའི་ཡུལ་དང་མི་རིགས་དག་གི་མིང་ལ་བོད་ཡུལ་དང་བོད་པ་ཞེས་གྲགས་ཤིང་གྲུབ་ལ།   བོད་ཡུལ་ནི་ལྷ་ཡུལ་བཞིན་སྐྱིད་ཟེར་བ་དང་། བོད་མི་ནི་ལྷ་ཚོགས་བཞིན་བཟང་ཟེར་བ་སོགས་ཡུལ་ལུང་རང་མཚན་ཙམ་མིན་པར་འཛམ་གླིང་ཡུལ་གྲུ་མང་པོས་བརྗོད་པར་བྱེད། དེ་ལྟར་བསྟོད་པ་འཐེན་པ་ནི་རང་གར་ངོ་བསྟོད་ཙམ་མིན་པར་བོད་ཡུལ་ནི་ས་སྐྱིད་ལ་ཆུ་གཙང་བ། གནམ་དྭངས་ལ་སྤྲིན་མཛེས་པ། ནོར་མང་ལ་ས་རྒྱ་ཡངས་པ། མདོར་ན་ཡུལ་ལུང་ལ་འཛོམས་དགོས་པའི་དཔལ་རྣམས་མ་སྒྲུབ་རང་ཆས་སུ་ཡོད་པ་དེས་དང་། མི་རྣམས་བློ་གྲོས་ཆེ་ཞིང་དཔའ་མཛངས་ལྡན་པ། གཞུང་གཤིས་དྲང་ཞིང་མི་རྒྱུད་ལེགས་པ། བྱམས་བརྩེ་ཟབ་ལ་ཁོག་རྒྱ་ཡངས་པ་བཅས་བཟང་ཆ་ཀུན་འདུས་ཀྱི་མི་རིགས་ཁྱད་འཕགས་ཅན་ཞིག་ཡིན་པའི་དབང་གིས་དབང་མེད་ངང་གིས་བསྟོད་པའི་རྒྱལ་མཚན་སྒྲེང་བར་བྱེད་པ་འདྲའོ། ། 

        གསུམ་པ། 

        མ་ཟད་འབོད་པ་གསལ་བྱེད་ཀྱི་སྒྲ་ནི་གདོད་མའི་སྤྱི་ཚོགས་ལ་རིམ་བཞིན་བསམ་བློའི་འཕེལ་རྒྱས་ཕྱིན་ཞིང་སྐད་ཆ་བཤད་པའི་དུས་གསར་བྱུང་བ་ལ་བརྟེན་ནས་འབོད་པ་གསལ་བྱེད་ཀྱི་སྒྲ་ཡང་དེ་དང་མཉམ་དུ་དར་ཁྱབ་བྱུང་བ་ཡིན་ལ། བོད་ཅེས་པའི་མིང་ཡང་གནའ་བོའི་དུས་རབས་རྙིང་པ་དེ་ཙ་ནས་བྱུང་བར་སྙམ་སྟེ། མཚོ་བོད་མཐོ་སྒང་འདིར་དུས་རབས་རིམ་བྱུང་གི་ལོ་རྒྱུས་ནི་རྒྱ་ཆེ་ཞིང་གྲངས་མང་བ་ཡོད་པ་དེ་རྣམས་ལ་བརྟག་ན། དེ་ཡང་སྤུ་རྒྱལ་བཙན་པོའི་རྒྱལ་རབས་མ་ཚུགས་གོང་གི་ལོ་ངོ་ཁྲི་སྟོང་མང་པོའི་སྔོན་ནས་མི་ཁྲིམས་དང་ཆོས་ཁྲིམས་ཀྱི་ལོ་རྒྱུས་མང་དུ་བྱུང་ཞིང་གདོད་མའི་སྤྱི་ཚོགས་མཇུག་རྫོགས་རྗེས་སུ། ཐོག་མར་མིའི་རིགས་ཀྱི་ཕན་ཚུན་བསྒྱུར་བཀོད་ཀྱི་ལམ་ལུགས་སམ་དབང་བསྒྱུར་བྲན་གཡོག་གི་སྤྱི་ཚོགས་ཤིག་ཚ་ཚ་འུར་འུར་དུ་བྱུང་བ་དང་། སྤྱི་ཚོགས་ཀྱི་དུས་བབ་དེའི་སྐབས་སུ་རིམ་མཐུད་བཞིན་མངའ་མཛད་དྲུག་གམ་བཅུ་གཉིས་ཞེས་བྱུང་བའི་ལོ་རྒྱུས་རྣམས་སུ་བལྟས་ན། དེ་ལ་དང་པོ་«ཆོས་འབྱུང་མཁས་པའི་དགའ་སྟོན་»ལས། བདུན་པ་མ་སངས་རུས་དགུས་དབང་བྱས་ཏེ། །ཡུལ་གྱི་མིང་ལ་བོད་ཁ་ཉ་དྲུག་ཟེར། །བརྒྱད་པ་ཀླུས་བཟུང་བོད་ཁམས་གླིང་དགུ་བཏགས། ། ཞེས་དང་། «ལྡེའུ་ཆོས་འབྱུང་»ལས། བདུན་པ་མ་སངས་རུས་དགུས་དབང་བྱས་ཏེ། །ཡུལ་གྱི་མིང་ལ་བོད་ཁམས་གཡང་དྲུག་ཟེར། །བརྒྱད་པ་ཀླུ་ཡིས་དབང་བྱས་བོད་ཁམས་གླིང་དགུར་བཏགས། ། ཞེས་སོགས་བྱུང་བ་དང་། «བཀའ་ཐང་སྡེ་ལྔ་ལས་»དེ་ནས་ཀླུ་དང་བཙན་གྱིས་དབང་བྱས་ཏེ། །ཡུལ་གྱི་མིང་ལ་བོད་ཁམས་གླིང་དགུར་བཏགས། །དེ་ནས་མ་སངས་སྤུན་དགུས་དབང་བྱས་ཏེ། །ཡུལ་མིང་བོད་ཁམས་གཡའ་དྲུག་བྱ་བར་བཏགས། །ཞེས་སོགས་ཡིག་ཆ་དེ་དག་ཏུ་ཚིག་གི་བརྗོད་ཚུལ་མི་འདྲ་བ་ཅུང་ཟད་བྱུང་བ་ཙམ་ལས་ཐམས་ཅད་དུ་མངའ་མཛད་རྣམས་ཀྱི་དུས་སྐབས་དེ་ཚོད་ནས་བོད་ཅེས་པའི་མིང་འདི་ས་ཁྱབ་རྡོ་ཁྱབ་ཏུ་གྱུར་པ་གསལ་འདུག་པས། དེའི་ཕྱིས་སུ་བྱུང་བའི་བོན་ཞེས་པའི་ཐ་སྙད་ལས་བོད་ཅེས་ཟུར་ཆག་པའམ་ཡིག་བརྗེ་ཡི་སྲོལ་ཅིག་འབྱུང་ཚུལ་མེད་པ་ཤེས་ནུས་ལ། ལྷག་པར་དུ་«གཡུང་དྲུང་བོན་གྱི་བསྟན་འབྱུང་ཕྱོགས་བསྡུས་»ལས། དེ་ལྟར་ཁ་བ་ཅན་གྱི་བོད་ཁམས་འདི། །སྲིད་པ་དང་པོ་ནམ་མཁའི་ལྷས་བཟུངས་ཏེ། །ཐུགས་དཀར་གེ་ཁོད་གཙང་མའི་ལྷ་རིགས་རྣམས། །གཡའ་རི་གངས་དཀར་རྩེ་ལ་གནས་བཅས་ཤིང་། །སྨྲ་དང་མི་ཡི་མགོན་བྱེད་བོན་བསྟན་སྲུང་། །ཅེས་བོད་དང་བོན་ཞེས་པ་གཉིས་ཆ་མི་གཅིག་པ་དང་དུས་མི་མཚུངས་པ་སོ་སོར་བཀར་ནས་གསུངས་འདུག་པས་བོན་ཞེས་པ་ལས་བོད་ཅེས་ཐོགས་པ་ཡིན་ནོ་བསམ་ཞིང་ལབ་པ་ནི་རྒྱུ་མཚན་དང་རྒྱབ་ལྗོངས་ཀྱིས་སྟོང་པའི་སྟོང་གཏམ་ཉག་གཅིག་ཏུ་ལགས་འདུག་སྙམ་མོ། ། དེས་ན་བོད་ཅེས་པའི་མིང་ནི་གོང་ཞུས་ལྟར་འབོད་པ་གསལ་བྱེད་ཀྱི་སྒྲ་ལ་བརྟེན་ནས་བོད་ཡུལ་དང་བོད་མི་ཞེས་བཏགས་པ་དང་། བོན་ཆོས་དང་སྤུར་རྒྱལ་བཙན་པོའི་རྒྱ་རབས་མ་ཚུགས་གོང་ནས་བོད་ཅེས་པའི་བརྡ་ཆད་ཀྱི་མིང་འདི་གྲ་མ་ཆག་ཟུར་མ་ཉམས་པ་ཞིག་བྱུང་ཡོད་པར་རྒྱུ་མཚན་མང་པོས་གྲུབ་འདུག་སྙམ་མོ། ། མནྜལ་གྱིས་བྲིས།