ཀླུ་ཚང་རྟ་མགྲིན་ཐར་གྱི་སྙན་དེབ《ང་ཡི་ཕ་ས། ང་ཡི་གཙང་ཆུ།》དང་མཇལ་བ།

    ཉེ་ཆར།    བོད་ཀྱི་སྙན་ངག་པ་གྲགས་ཆེན་ཀླུ་ཚང་རྟ་མགྲིན་ཐར་ལགས་ཀྱིས་གསར་རྩོམ་གནང་བའི་ང་ཡི་ཕ་ས།  ང་ཡི་གཙང་ཆུ་ཞེས་པའི་སྙན་རྩོམ་ཕྱོགས་བསྒྲིགས་ཀྱི་དཔེ་དེབ་དེ་མི་རིགས་དཔེ་སྐྲུན་ཁང་གིས་པར་དུ་བསྐྲུན་ཞིང་དངོས་སུ་ཚོང་རར་འགྲེམས་སྤེལ་བྱས་ཡོད།  ཀླུ་ཚང་རྟ་མགྲིན་ཐར་གྱི་སྙན་རྩོམ་ནང་དུ་ཕྱོགས་མང་པོ་ཞིག་ནི་ཁོང་ལ་ཤེས་རིག་གི་འདབ་མ་སྩོལ་སའི་ཕ་ཡུལ་གྱི་རང་བྱུང་ཁམས་ལ་བཅངས་པའི་བརྩེ་བ་དང་།རང་གི་སྲོལ་རྒྱུན་རིག་གནས་ལ་བཅངས་པའི་དུང་ཞེན། བརྩེ་དུང་གི་བརྒྱུད་རིམ། ས་གནས་ལོ་རྒྱུས་ལ་ཞིབ་འཇུག་བྱས་པ་སོགས་ལས་ཐོབ་པའི་མྱོང་ཚོར་གྱི་སྐོར་བྲིས་ཡོད་ཅིང་།   གསོན་ཉམས་ལྡན་པའི་ཚིག་ངོས་རེ་རེ་ན་གཏིང་ཟབ་པའི་བརྗོད་སྙིང་རེ་རེ་གྲུབ་ཡོད་པས་ཀློག་པ་པོའི་སེམས་ལ་ཡིད་དབང་ཅིག་ཅར་དུ་འགུག་པའི་བག་ཆགས་ཟབ་མོ་ཞིག་བཞག་འདུག    ཀླུ་ཚང་རྟ་མགྲིན་ཐར་ནི་ཡུན་ནན་བདེ་ཆེན་བོད་རིག་པ་ཞིབ་འཇུག་གླིང་གི་ལས་བྱེད་མི་སྣ་ཞིག་ཡིན་ཞིང་། ལོ་ངོ་དུ་མའི་རིང་ལ་བརྟག་དཔྱད་ཞིབ་འཇུག་གི་ལས་ཀ་རྒྱུན་བསྐྱངས་ནས་ཡུལ་ལུང་མང་པོ་འགྲིམས་ཡོད་པས་འཚོ་བའི་ཉམས་མྱོང་ཕུན་སུམ་ཚོགས་ཤིང་། སྙན་ངག་གི་རྣམ་པ་མངོན་ཚུལ་གྱི་ཐད་ལ་ཡང་བོད་གནའ་རབས་ཀྱི་དམངས་ཁྲོད་གླུ་གཞས་དང་།  གཏམ་དཔེ།  སྒྲུང་སོགས་ཀྱི་བྲོ་བས་རབ་ཏུ་ཕྱུག་ཡོད་པས་གཞན་དང་མ་མཚུངས་པའི་ཁྱད་ཆོས་མངོན་པར་ལྡན་པ་རེད། དཔེ་དེབ་འདི་ནི་ནས་འབྲུའི་ལོ་ཟླ་དང་།  ང་ཡི་ཕ་ས། ང་ཡི་གཙང་ཆུ།   ལོ་ངོ་སྟོང་གི་དྲན་པ་བཅས་ཚན་པ་གསུམ་རུ་བགར་ཡོད་ཅིང་། སྙན་ངག་ཚན་པ80བསྡུ་ཉར་བྱས་ཡོད། 

དཀར་ཆག

རྩོམ་པ་པོ་ངོ་སྤྲོད་མདོར་བསྡུས།

      ཀླུ་ཚང་རྟ་མགྲིན་ཐར།  ཞིབ་འཇུག་པ་གཞོན་པ།  མཚོ་སྔོན་མང་རྫོང་གི་མི་ཡིན།   བོད་རྒྱ་སྐད་གཉིས་ཀྱི་སྙན་ངག་པ་དང་གཞས་ཚིག་རྩོམ་པ་པོ།  བོད་རིག་པའི་ཞིབ་འཇུག་པ་བཅས་ཡིན། 1997ལོར་མཚོ་ལྷོ་ཁུལ་མི་རིགས་དགེ་ཐོན་སློབ་གྲྭ་ནས་མཐར་ཕྱིན་ཅིང་། 2001ལོར་ལྷོ་ནུབ་མི་རིགས་སློབ་གྲྭ་ཆེན་མོའི་བོད་སྐད་ཡིག་སྡེ་ཁག་ནས་མཐར་ཕྱིན། 1997ལོ་ནས་གསར་རྩོམ་གྱི་ལས་ལ་ཞུགས་ཤིང་ད་ལྟའི་བར་དུ་སྦྲང་ཆར་དང་གངས་རྒྱན་མེ་ཏོག   མཚོ་སྔོན་མང་ཚོགས་སྒྱུ་རྩལ།  བོད་ལྗོངས་རྩོམ་རིག  གངས་དཀར་རི་བོ།  ཁམས་པའི་རྩོམ་རིག་སོགས་ཀྱི་དུས་དེབ་སྟེང་བོད་རྒྱ་སྐད་གཉིས་ཀྱི་བརྩམས་ཆོས་འབོར་ཆེན་ཞིག་བཀོད་ཡོད།སྔ་ཕྱིར་དུ་དུས་རབས་གསར་བའི་རྩོམ་རིག་སྐར་གསར་བྱ་དགའ་དང་།  གངས་དཀར་རི་བོའི་རྩོམ་རིག་བྱ་དགའ།  ཡུན་ནན་ནུབ་རྒྱུད་རྩོམ་རིག་བྱ་དགའ་སོགས་ཐོབ་མྱོང་།  དེང་རབས་ཡུན་ནན་བོད་རིགས་ཀྱི་ལོ་རྒྱུས་དང་། བདེ་ཆེན་ཁུལ་གྱི་ཁུལ་སྟོན་སློབ་གསོའི་ཀློག་དེབ་གསར་རྩོམ་བྱེད་པའི་ལས་ཀའི་ནང་ཞུགས་ཡོད། བརྩམས་ཆོས་ཀྱི་སྐོར་ལ་ཡུན་ནན་བོད་བརྒྱུད་ནང་བསྟན་གྱི་བྱུང་འཕེལ་མདོར་བསྡུས་དང་།  གར་སྟབས་ཁྲོད་ཀྱི་མཐའ་ཆུ།  བོད་ཡིག་གསུང་རབ་ནང་གི་སེམས་ཀྱི་ཉི་ཟླ། ཀྲུང་གོའི་གྲངས་ཉུང་མི་རིགས་ཀྱི་གནའ་དཔེའི་དཀར་ཆག་ལས་ཡུན་ནན་བོད་རིགས་ཀྱི་ཚན་པ་སོགས་རྩོམ་སྒྲིག་བྱས་ཡོད། 2015ལོའི་ཟླ3པར་རྒྱལ་ཡོངས་ཚོགས་ཆེན་གཉིས་ཀྱི་ལོ་ཙཱའི་ལས་ཀའི་ཁྲོད་ཞུགས་ཡོད།  2016ལོར་ཀྲུང་དབྱང་རྩ་འཛུགས་པུའུ་ཡི་ནུབ་རྒྱུད་ཀྱི་འོད་སྣང་ཞེས་པའི་ཆེད་མཁས་པའི་མིང་ཐོག་ནས་པེ་ཅིང་དུ་ལོ་གཅིག་རིང་སློབ་གཉེར་གནང་། ད་ལྟ་བདེ་ཆེན་ཁུལ་བོད་རིག་པ་ཞིབ་འཇུག་གླིང་དུ་ཡུན་ནན་བོད་ཁུལ་གྱི་མི་རིགས་སྣ་མང་དང་།ཆོས་ལུགས་སྣ་མང་གི་ལོ་རྒྱུས་རིག་གནས་སོགས་ལ་བརྟག་དཔྱད་ཞིབ་འཇུག་བྱེད་པའི་ལས་ཀ་གཉེར་མུས་སུ་མཆིས།

རྩོམ་པ་པོའི་ཕྱག་བྲིས།