སེམས་ཀྱི་ཉི་ཟླའི་ཡུལ་མི་རྣམས་ཀྱིས་དགའ་སྤྲོའི་ངང་ཟླ་མཆོད་དུས་ཆེན་བསུ་བ།

   ཟླ་མཆོད་དུས་ཆེན་ནི་རང་རྒྱལ་གྱི་སྲོལ་རྒྱུན་དུས་ཆེན་གཙོ་བོ་ཞིག་ཡིན་ལ།ཉིན་འདི་ནི་ནང་མི་ལྷན་འཛོམས་བྱུང་བའི་དུས་ཆེན་ཞིག་ཀྱང་ཡིན་པ་རེད།

   དེ་རིང་སྔ་དྲོར་གསར་འགོད་པ་སེམས་ཀྱི་ཉི་ཟླའི་ཉི་གཏད་ཞིང་ཟོག་ཁྲོམ་རར་སོང་བ་ན།གནས་དེར་མི་ཚོགས་ཀྱིས་ཁེངས་ནས་ཧ་ཅང་འདུ་འཛི་ཆེ།ཁྲོམ་རའི་ག་ས་གང་དུ་ཤ་རིགས་དང་།སྔོ་ཚལ།སིལ་ཏོག་སོགས་སྤུངས་ཡོད་ལ།ས་གནས་མང་ཚོགས་ཀྱང་དགའ་དགའ་སྤྲོ་སྤྲོའི་སྒོ་ནས་དུས་ཆེན་གྱི་ཞལ་ཟས་ལ་གྲ་སྒྲིག་བྱེད་བཞིན་ཡོད་པ་རེད།

ཉིན་འདིར་ཁྲོམ་རའི་ནང་ཆེས་དགའ་བསུ་ཐོབ་པའི་ཞལ་ཟས་ནི་ཟླ་མཆོད་དུས་ཆེན་གྱི་བག་ལེབ་ཡིན་ཏེ།ཚོང་ཁང་མང་པོར་བྲོ་བ་མི་འདྲ་བ་དང་དབྱིབས་མི་འདྲ་བའི་བག་ལེབ་སྣ་ཚོགས་བཤམས་ཡོད་ལ།མི་རྣམས་ཀྱིས་རང་གི་དགའ་ས་ལྟར་བག་ལེབ་ཉོ་བཞིན་ཡོད་པ་རེད།གཞན་ས་གནས་རང་ནས་བཟོས་པའི་བག་ལེབ་སྟེ་ནས་ཀྱི་ཟླ་མཆོད་བག་ལེབ་དང་།ཐུད་ཀྱི་བག་ལེབ་སོགས་ལ་དེ་བས་དགའ་བསུ་ཐོབ་བཞིན་ཡོད།ཕ་ཡུལ་ཉི་ཤར་ཐང་སྨད་གྲོང་སྡེ་ནས་ཡིན་པའི་ཨ་ཅེ་གཡང་མཚོས་བཤད་ན་ཡག་པོ་ཞིམ་ཟས་ཚོང་ཁང་ཚང་གི་ཐུད་ཀྱི་བག་ལེབ་དེ་ཧ་ཅང་ཞིམ།མོ་ཁ་སང་དེར་སོང་བ་ན་ཐུད་ཀྱི་བག་ལེབ་དེ་སྔར་ནས་བཙོང་ཚར་འདུག་ཟེར།

གཞན་ཁྲོམ་རའི་ནང་སིལ་ཏོག་དང་ཚལ་རིགས་སྣ་ཚོགས་བྲིན་རྒྱུགས་བྱུང་བཞིན་ཡོད་ལ།ས་གནས་རང་གི་སིལ་ཏོག་སྟེ་ཉི་ཤར་གྱི་ཀུ་ཤུ་དང་ཉི་འབྲུ། ཀོང་རྩེད་རའི་རྒུན་འབྲུམ། ཚེར་ལུ་སོགས་ལའང་མི་རྣམས་ཀྱི་དགའ་བསུ་ཐོབ་བཞིན་ཡོད་པ་རེད།