གོམས་སྲོལ་ངན་པ་འདི་དག་གིས་ལུས་ཕུང་ལ་གནོད་འཚེ་ཚབས་ཆེན་ཐེབས་ཀྱིན་ཡོད།

        གཅིག ཞོགས་ཟས་མི་བཟའ་བ།
        ཞིབ་འཇུག་ལས་མངོན་པ་ལྟར་ན།ཞོགས་ཟས་མ་ཟོས་ན་མིའི་ཚེ་ཐག་ཆ་སྙོམས་ཀྱིས་ལོ2.5ཡིས་ཇེ་ཐུང་དུ་འགྲོ་བཞིན་ཡོད།ཞོགས་ཟས་མ་ཟོས་ན་ཀླད་པས་ཚ་དྲོད་མཐོ་བའི་ཟས་རིགས་ཀྱི་དགོས་མཁོ་ཡོད་པའི་བརྡ་རྟགས་བཏང་སྟེ།དྲོས་ཇ་དང་ནུབ་འཚལ་འཐུང་བའི་སྐབས་སུ“བཅུད་མེད་ཟས་རིགས”བཟའ་བའི་ཚད་ཇེ་མཐོར་འགྲོ་བ་རེད།དེ་ལྟར་དུས་ཡུན་རིང་ན་ལུས་ལ་ཚོ་རྒྱས་པ་དང་ཁྲག་ཤེད་ཇེ་མཐོར་སོང་ནས།ཁྲག་ཚིལ་མཐོ་བའི་ནད་དང་གཅིན་སྙི་ཟ་ཁུའི་ནད་འབྱུང་བའི་ཉེན་ཁ་ཇེ་མཐོར་འགྲོ་སྲིད།
        སྔོན་འགོག་བྱེད་ཐབས། ཞོགས་ཟས་ནི་ཉིན་གཅིག་གི་ཆེས་གལ་ཆེ་བའི་ཟས་ཐུན་ཞིག་ཡིན་པས།ཞོགས་ཟས་ལ་འཚོ་བཅུད་ལྡན་པའི་ཟས་རིགས་བཟའ་དགོས་ལ།བྱ་སྒོང་ནི་ཆེས་ལེགས་པའི་གདམ་གསེས་ཤིག་ཡིན་ཏེ།“ཞོགས་པར་བྱ་སྒོང་གཅིག་ཟོས་ན། །ལུས་ཚོ་བྱང་ལ་ཀླད་པར་ཕན། །”ཟེར་སྲོལ་ཡོད་དོ། །
        གཉིས། གློག་ཀླད་ལ་ལྟ་ཡུན་རིང་བ།
        ཡུན་རིང་བོར་གློག་ཀླད་ཀྱི་མདུན་དུ་ཙོག་སྟེ་མ་འགུལ་ན།ཁྲག་རྒྱུན་འབྱར་བག་ཅན་དུ་འགྱུར་བ་དང་།ཁོག་སྨད་ཀྱི་སྡོད་རྩར་ཁྲག་དཀག་འབྱུང་བའི་ཉེན་ཁ་ཆེ་ལ། འགུལ་སྐྱོད་བྱེད་པའི་སྐབས་སུ་ཁྲག་དཀག་གློ་བུར་མར་ལྷུང་སྟེ།གློ་བར་གནོད་པ་བཟོ་བ་དང་།ཚབས་ཆེན་ཡིན་ན་གློ་བུར་ཤི་བའི་ཉེན་ཁའང་ཡོད།
        སྔོན་འགོག་བྱེད་ཐབས།དུས་ཚོད་གཅིག་རེའི་ནང་དུ་ཡར་ལངས་ནས་སྐར་མ5རིང་ལ་འགུལ་སྐྱོད་བྱས་ན།ཙོག་ཡུན་རིང་བའི་གནོད་པ་སེལ་ཐུབ།
        གསུམ། ཟ་མ་ཟོས་རྗེས་མྱུར་དུ་ཐ་མག་འཐེན་པ།
        “ཟོས་རྗེས་ཐ་མག་རྐང་གཅིག་འཐེན་ན། །འཚོ་བ་ལྷ་ཡུལ་ལས་ཀྱང་སྐྱིད། །”ཅེས་པའི་བཤད་སྲོལ་ཡོད་མོད།འོན་ཀྱང་ཐ་མག་རྐང་གཅིག་གིས་ཁྱེད་རང“གློ་ཡུའི་གཉན་ཚད་དང་གློ་སྙིང་ནད་དང་གློ་འབྲས”སོགས་ཀྱི་ཤི་རྐྱེན་ཆེན་པོ་གསུམ་དང་ཐག་ཇེ་ཉེར་སོང་ཡོད། ཞིབ་འཇུག་ལས་མངོན་པ་ལྟར་ན།ཚེ་གང་པོར་ཐ་མག་འཐེན་མཁན་ནི་ཐ་མག་མི་འཐེན་པའི་མི་ལས་ལོ20ནས25ཡིས་ཚེ་ཐག་ཇེ་ཐུང་དུ་སོང་ཡོད་པ་དང་།ཐ་མག་རྐང་གཅིག་འཐེན་ན་ཚེ་ཐག་སྐར་མ11གིས་ཇེ་ཐུང་དུ་སོང་ཡོད།
        སྔོན་འགོག་བྱེད་ཐབས།ཟ་མ་མ་ཟོས་པའི་སྔོན་དང་ཡང་ན་ཟོས་རྗེས་གང་ཞིག་ཡིན་རུང་ངེས་པར་དུ་ཐ་མག་དང་རིང་དུ་གྱེས་དགོས།
        བཞི།གཅིན་བསྲན་པ།
        བྱ་བར་བྲེལ་བ་ཆེ་བ་དང་སློབ་སྦྱོང་ལ་བྲེལ་བ་ཆེ་བ།རོལ་རྩེད་ལ་གཡེང་བ་བཅས་ཀྱི་དབང་གིས།སྐོམ་སྣང་སྐྱེས་ནའང་ཆུ་མི་འཐུང་བ་དང་།གཅིན་ཤོར་ནའང་བཟོད་བསྲན་བྱེད་པ་སོགས་ཀྱིས་མཚང་ཁོག་གི་དོན་སྣོད་ཀྱི་བྱེད་ནུས་འཁྲིགས་ཏེ།རིམས་འགོག་ནུས་པ་ཇེ་དམའ་རུ་གཏོང་བ་རེད།མི་ལ་སྐོམ་སྣང་སྐྱེས་པའི་སྐབས་སུ་ལུས་སྟེང་གི་ཆུ1%ཤོར་ཟིན་པ་དང་།དུས་ཡུན་རིང་པོར་ཆུ་ཤོར་ན་ཁྲག་རྒྱུན་འབྱར་བག་ཅན་དུ་གྱུར་ཏེ་ཀླད་སྙིང་ཁྲག་རྩའི་ནད་འབྱུང་སླ།
        སྔོན་འགོག་བྱེད་ཐབས།ཆུ་འཐུང་སྐབས་ཚད་ཉུང་མང་འཐུང་བྱེད་དགོས།དེ་ལྟར་བྱས་ན་ལུས་སྟེང་གི་ཆུ་དོ་མཉམ་ཡོང་བར་མ་ཟད།སྙིང་དང་ཕོ་བའི་ཁུར་བོ་ཇེ་ལྗིད་དུའང་གཏོང་མི་སྲིད་པ་རེད།སྐོམ་སྣང་སྐྱེས་པ་ནི་ལུས་སྟེང་གི་ཆུ་ཤོར་བའི་རྟགས་ཤིག་ཡིན་པས།སྐོམ་སྣང་སྐྱེས་རག་བར་དུ་མི་སྒུག་པར་དུས་ངེས་མེད་དུ་ཆུ་འཐུང་དགོས།དེ་ལས་ཀྱང་ཡིད་ལ་འཛིན་དགོས་པ་ཞིག་ནི།གཅིན་གཏན་ནས་བསྲན་མི་རུང་།ཆེས་བཟང་ན་དུས་ཚོད་གཅིག་གི་ནང་དུ་གཅིན་ཐེངས་གཅིག་རེར་གཏོང་དགོས།
        ལྔ་པ།རྒྱས་བཟའ་རྒྱས་འཐུང་བྱེད་པ།
        གསོལ་ཅོག་སྟེང་དུ་བྱ་བར་གྲོས་མོལ་བྱེད་སྐབས།རྒྱས་བཟའ་རྒྱས་འཐུང་བྱེད་སླ།གསོལ་ཅོག་སྟེང་དུ་གོ་མེད་ཚོར་མེད་ངང་ཆང་དང་ཐ་མག་ལ་བག་མེད་དུ་རོལ་ཏེ།ཕོ་རྒྱུ་ལ་གནོད་འཚེ་མང་པོ་གཏོང་བཞིན་ཡོད་པར་མ་ཟད།ལུས་པོའི་ལྗིད་ཚད་ཇེ་ལྗིད་དུ་སོང་ནས།འབྲས་སྐྲན་སློང་བའི་ཉེན་ཁ་ཆེ།
        སྔོན་འགོག་བྱེད་ཐབས།“ནངས་ཇ་བཟང་དགོས།དྲོས་ཇ་མང་དགོས།དགོང་ཇ་ཉུང་དགོས”ཞེས་པའི་སྐད་ཆ་འདི་ཡིད་ལ་དམ་པོར་འཛིན་དགོས།
        དྲུག་པ།ཉལ་ཁར་ཟ་མ་བཟའ་བ།
        ཉལ་ཁར་ཟ་མ་ཟོས་ན་ཕོ་བའི་འབྲས་སྐྲན་འབྱུང་བའི་ཉེན་ཁ་ཇེ་མཐོར་འགྲོ་བ་རེད།དེ་ནི་ཕོ་བའི་འབྱར་བག་གི་སྐྱི་ངོས་ཕྲ་ཕུང་གི་ཚེ་ཚད་ཐུང་བ་དང་།སྤྱིར་བཏང་གིས་ཉིན་གཉིས་ནས་གསུམ་གྱི་ནང་དུ་བསྐྱར་འབྱུང་ཐེངས་གཅིག་བྱེད་ཀྱིན་ཡོད་པར་མ་ཟད།ཏག་ཏག་དགོང་མོ་གཉིད་ཡོད་པའི་སྐབས་སུ་བསྐྱར་འབྱུང་བྱེད་ཀྱིན་ཡོད་པས་རེད།གལ་ཏེ་རྒྱུན་དུ་དགོང་མོ་ཉལ་ཁར་ཟ་མ་ཟོས་ན།ཕོ་བའི་འབྱར་བག་ཉམས་གསོ་བྱེད་མི་ཐུབ་པས།ཉལ་ཁར་ཟོས་པའི་ཟ་མ་དེ་ཕོ་བའི་ནང་བསོགས་ཏེ་ཕོ་བའི་གཤེར་ཁུ་མང་པོ་ཟགས་ཐོན་འབྱུང་བ་དང་།ཕོ་བའི་འབྱར་བག་ལ་ཕོག་ཐུག་གཏོང་བ་རེད།
        སྔོན་འགོག་བྱེད་ཐབས།རང་ཉིད་ཀྱི་བདེ་ཐང་གི་ཆེད་དུ།དགོང་མོ་ཉལ་ཁར་ཅི་ནུས་ཀྱིས་ཟ་མ་མི་བཟའ་བའམ་ཡང་ན་ཉུང་བཟའ་བྱེད་དགོས།ངེས་པར་དུ་བཟའ་དགོས་པ་བྱུང་ན།འཚོ་བཅུད་བཟང་ལ་འཇུ་སླ་བའི་ཟས་རིགས་ཉུང་ཙམ་བཟའ་དགོས།
        བདུན།འབོལ་ཁྲིའི་སྟེང་དུ་ལོག་ནས་འདུག་པ།
        ལུས་པོའི་རང་འདེགས་གང་ཡང་མི་བྱེད་པར་འབོལ་ཁྲིའི་སྟེང་དུ་ལོག་ནས་བསྡད་ན།སྒལ་ཚིགས་ལ་གནོད་འཚེ་ཆེན་པོ་ཐེབས་པ་རེད།དེ་ལྟར་འདུག་ཡུན་རིང་ན་སྒལ་ཚིགས་ལ་གནོན་ཤུགས་ཐེབས་ཏེ།སྒལ་རུས་ཕྱིར་འབུར་པ་དང་སྒལ་ཚིགས་ཀྱི་དབྱིབས་འགྱུར་བའི་ཉེན་ཁ་ཆེ།
        སྔོན་འགོག་བྱེད་ཐབས། སྒལ་བར་རྒྱབ་འབོལ་ཞིག་བཞག་ནས་ལུས་པོ་ཡར་འདེགས་དགོས།གལ་ཏེ་བརྟེན་སའི་རྒྱབ་འབོལ་མེད་ན།རྐུབ་སྟེགས་སྟེང་དུ་ཙོག་ནས་ལུས་པོའི་རང་འདེགས་བྱེད་དགོས།
        བརྒྱད།ལག་ཁྱེར་ཁ་པར་དང་མི་འབྲལ་བ།
        མལ་ཁྲིའི་སྟེང་དུ་ལག་ཁྱེར་ཁ་པར་བརྩེས་ནས་དུས་ཚོད་གཅིག་གི་ཡན་འགོར་ན།དེ་ལས་བྱུང་བའི་འགྱེད་འཕྲོ་ཡིས་མིའི་ལུས་སྟེང་གི་མདོག་རྒྱུ་ནག་པོའི་འབྱུང་ཚད22%ཇེ་ཉུང་དུ་གཏོང་བ་རེད།
        སྔོན་འགོག་བྱེད་ཐབས། མལ་ཁྲིའི་སྟེང་དུ་ལག་ཁྱེར་ཁ་པར་རྩེ་བའི་སྲོལ་ངན་དོར་ནས།ཆོས་ཉིད་ལྡན་པའི་ངལ་གསོའི་གོམས་སྲོལ་བཟང་པོ་ཞིག་ཆགས་སུ་འཇུག་དགོས།ཉིན་རེར་གང་ནུས་ཀྱིས་གཅིག་གྱུར་གྱི་དུས་ཚོད་སྟེང་གཉིད་དགོས།
        དགུ།གཉིད་ཀྱིས་མི་འདང་བ།
        སུའུ་ཙེར་རྒྱལ་ཁབ་ཀྱི་དུས་ཡུན་ལོ15རིང་གི་རྗེས་འདེད་ཞིབ་འཇུག་ཅིག་ལས་མངོན་པ་ལྟར་ན།གཉིད་ཡུན་དུས་ཚོད7ལོངས་པའི་མི་ནི་གཉིད་ཡུན་དུས་ཚོད8བརྒལ་བའམ་ཡང་ན་དུས་ཚོད6མི་ལོངས་པའི་མི་ལས་ཚེ་ཐག་རིང་བ་དང་།ཉིན་རེའི་གཉིད་ཡུན་དུས་ཚོད7མི་ལོངས་པའི་མིའི་ཚེ་ཐག་རྒྱུན་ལྡན་གྱི་མི་ལས་ཅུང་ཐུང་བ་རེད།
        སྔོན་འགོག་བྱེད་ཐབས།ཉིན་རེར་གཉིད་ཡུན་དུས་ཚོད6ནས8ལོངས་པར་ཁག་ཐེག་བྱེད་དགོས་པར་མ་ཟད།སྔ་མོར་ཉལ་ཏེ་སྔ་མོར་ལངས་པའི་གོམས་སྲོལ་ཆགས་སུ་འཇུག་དགོས་སོ། །