ཀླད་པའི་རྒས་ཚད་ཇེ་དལ་དུ་གཏོང་བའི་ཐབས་ལམ།

རྩོམ་པ་པོ།     ཡིག་བསྒྱུར།       དུས་ཚོད།   2019-12-25   རྩོམ་ཁུངས།    མཚོ་སྔོན་གསར་འགྱུར་དྲ་བ།

        ཉེ་ཆར།《ཨ་མེ་རི་ཁའི་གསར་འགྱུར་དང་འཛམ་གླིང་གི་གནས་འཕྲིན》དྲ་ཚིགས་སྟེང་ཀླད་པའི་རྒས་ཚད་ཇེ་དལ་དུ་གཏོང་བའི་ཐབས་ལམ་སྟབས་བདེ་འགའ་སྤྱི་སྡོམ་བྱས་ཡོད།གཅིག ལུས་སྦྱོང་སྟབས་བདེ་བྱེད་པ།ལྕགས་རྟར་ཞོན་པ་དང་འཆམ་འཆམ་དུ་འགྲོ་བ། ཐ་ན་མེ་ཏོག་ལྡུམ་རའི་ནང་དུ་མེ་ཏོག་ལ་བདག་སྐྱོང་བྱེད་པ་བཅས་ཀྱིས། ཀླད་པར་ཁྲག་རྒྱུན་འདོན་སྤྲོད་བྱེད་ཚད་ཇེ་མང་དུ་གྱུར་ཏེ། རྒན་པའི་ངོས་ཟིན་ནུས་པ་ཇེ་མཐོར་གཏོང་བ་དང་ལུས་ཕུང་བདེ་ཐང་ཡོང་བར་ཕན་པ་ཡོད།

        གཉིས། སྙིང་ཁམས་ཁྲག་རྩའི་ནད་ཀྱི་ཉེན་ཁ་ཇེ་ཆུང་དུ་གཏོང་བ།
        ཁྲག་ཤེད་མཐོ་བ་དང་གཅིན་སྙི་ཟ་ཁུའི་ནད། ཐ་མག་འཐེན་པ་སོགས་སྙིང་ཁམས་ཁྲག་རྩའི་ནད་འབྱུང་བའི་རྒྱུ་རྐྱེན་གྱིས་ཀླད་པའི་ཁྲག་རྩ་ཕྲ་མོར་གནོད་འཚེ་ཐེབས་པས། ཀླད་པའི་རྒས་ཚད་ཇེ་མགྱོགས་སུ་གཏོང་བ་རེད། དེ་བས་རྒན་པ་རྣམས་ཀྱིས་ཐ་མག་བཅད་དེ་ལུས་པོའི་ལྗིད་ཚད་དང་ཁྲག་ཤེད་ལ་ཚོད་འཛིན་བྱེད་དགོས་པར་མ་ཟད། སྨན་པའི་མཛུབ་སྟོན་འོག་མཁྲིས་རྒྱུ་གཤེར་རྩི་ཇེ་དམའ་རུ་བཏང་ནས། བདེ་ཐང་གི་འཚོ་བ་རོལ་སྟངས་ཆགས་སུ་འཇུག་དགོས།
        གསུམ། སྨན་འཐུང་བར་ཚོད་འཛིན་བྱེད་པ།
        རྒན་པ་རྣམས་ལ་དལ་གཤིས་ནད་རིགས་མང་པོ་བྱུང་ཡོད་པའི་དབང་གིས་རྒྱུན་དུ་སྨན་རྫས་མང་པོ་མཉམ་དུ་འཐུང་བཞིན་ཡོད། སྨན་རྫས་ཁ་ཤས་ཤིག་གི་ཞོར་སྐྱོན་གྱིས་མིའི་རིག་སྟོབས་ལ་གནོད་འཚེ་ཐེབས་པ་སྟེ། དཔེར་ན་གཉིད་སྨན་ལྟ་བུ། རྒན་པ་རྣམས་ཀྱིས་རང་ཉིད་ཀྱིས་འཐུང་བཞིན་པའི་སྨན་རྫས་དེ་དག་ལ་ཞོར་སྐྱོན་ཡོད་མེད་ཀྱི་གནས་ཚུལ་སྨན་པར་དྲིས་རྗེས་ད་གཟོད་སྨན་པའི་མཛུབ་སྟོན་ལྟར་འཐུང་དགོས།
        བཞི། གཉིད་པའི་དུས་ཚོད་གཏན་འཁེལ་བྱེད་པ།
        གལ་ཏེ་རྒན་པའི་གཉིད་པའི་དུས་ཚོད་ངེས་གཏན་མིན་པར། ཉིན་མོར་གཉིད་དེ་མཚན་མོར་མི་གཉིད་པ་སོགས་ཀྱི་གནས་ཚུལ་ཡོད་ན། ཞོགས་པར་མལ་ལས་ལངས་པའི་སྐབས་སུ་ཀླད་པ་དེ་འདྲའི་དྭངས་མོ་མིན་པས། རྒན་པ་རྣམས་ཀྱིས་ངེས་པར་དུ་མཚན་མོའི་གཉིད་བཟང་པོར་ལྡོག་པར་ཁག་ཐེག་བྱེད་དགོས་ལ། གཏན་འཁེལ་གྱི་དུས་ཚོད་ནང་དུ་གཉིད་པ་དང་ཡང་ན་མལ་ལས་ལངས་དགོས།
        ལྔ། ཀླད་པར་ཕོག་ཐུག་འོས་འཚམ་གཏོང་བ།
        རིག་ནུས་བྱ་འགུལ་གྱིས་ཀླད་པར་སྲུང་སྐྱོབ་བྱེད་པའི་ཐད་ནུས་པ་གལ་ཆེན་འདོན་ཐུབ་པས། རྒན་པ་རྣམས་ཀྱིས་ཀློག་འདོན་བྱེད་པ་དང་ཡང་ན་རིག་ནུས་རོལ་རྩེད་རྩེ་ནས་ཀླད་པའི་གསོན་ཤུགས་སློང་བར་འབད་དགོས།
        དྲུག སྤྱི་ཚོགས་དང་འབྲེལ་འདྲིས་མང་དུ་བྱེད་དགོས།
        སྤྱི་ཚོགས་དང་འབྲེལ་འདྲིས་མང་དུ་བྱེད་ཀྱིན་པའི་རྒན་པ་རྣམས་ཀྱི་འཚོ་བའི་སྤུས་ཀ་ནི་གྲོགས་མེད་ཁེར་རྐྱང་དུ་སྡོད་པའི་རྒན་པ་རྣམས་ལས་ལྡབ་འགྱུར་གྱིས་མཐོ་བ་རེད། བྱིས་པ་རྣམས་ལ་སློབ་ཕྱིའི་བྱ་འགུལ་སྤེལ་རོགས་བྱེད་པ་དང་སྤྱི་ཚོགས་ཀྱི་སྤྱི་ཕན་ལས་དོན་ནང་ཞུགས་པ། སྡེ་ཁུལ་གྱིས་རྩ་འཛུགས་བྱས་པའི་བྱ་འགུལ་སྣ་ཚོགས་ལ་ཞུགས་ན་ཀླད་པའི་བྱེད་ནུས་ཇེ་མཐོར་བཏང་སྟེ་ཀླད་པའི་རྒས་ཚད་ཇེ་དལ་དུ་གཏོང་ཐུབ་བོ། །




分享到：QQ空间新浪微博腾讯微博人人网微信