ཉི་ཟླ་ཉག་ག་ཞེས་པའི་མིང་ཇི་ལྟར་ཐོགས་པ་ཡིན།

    མཚོ་སྔོན་ཞིང་ཆེན་གུང་ཧོ་རྫོང་དང་སྟོང་སྐོར་རྫོང་གཉིས་ཀྱི་མཚམས་ཏེ་ཟོར་དགུ་རི་བོ་དང་རི་དཀར་ལྡང་གཉིས་ཀྱི་བར་དུ་ཡོད་པའི་ཉག་ཆེན་དེ་ལ་ཉི་ཟླ་ཉག་གའམ་རྡོ་ཉི་ཟླ་ཟེར། ས་མིང་དེ་ཇི་ལྟར་ཐོགས་པ་རེད་ཅེ་ན།  རྒན་པོ་ལོ་ལོན་རྣམ་པས་ནམ་ཡིན་ཡང་བཤད་ཀྱིན་ཡོད་པ་འདི་ལྟ་སྟེ།

    སྔོན་རྒྱ་ནག་རྒྱལ་བོ་ཐང་ཐའེ་ཙུང་གི་སྲས་མོ་ལྷ་གཅིག་ཀོང་ཇོ་དེ་བོད་ལ་ཕེབས་སྐབས།  ཀོང་ཇོ་འཁོར་དང་བཅས་པ་རྣམས་སྔོན་ལ་སོང་བ་དང་བློན་པོ་མགར་གཞུག་ན་ཡོད།  བློན་པོ་མགར་གྱི་བསམ་པར་རྒྱ་ནག་རྒྱལ་བོ་ལ་ནོར་ལོངས་སྤྱོད་དང་སྟོབས་འབྱོར་མངའ་ཐང་ལྡན་པ་དང་།  བོད་ལ་དེ་འདྲ་མེད་པས་ཀོང་ཇོ་བོད་ལ་བསླེབས་རྗེས་ཕྱིར་རང་ཡུལ་ལོག་འགྲོ་བར་དོགས་པ་སྐྱེས།  བློན་པོས་ཐབས་ཤིག་རྙེད།  མཆིག་གུ་ལྟ་བའི་རྡོ་ལེབ་གོར་མོ་འདྲ་མཚུངས་གཉིས་བཙལ་ནས་གཅིག་ལ་གསེར་རྩི་བྱུགས་པ་དང་གཅིག་ལ་དངུལ་རྩི་བྱུགས་ནས་སྣོད་རྩུབ་པོ་ཞིག་གི་ནང་དུ་བཅུག་སྟེ་རྟ་ལ་བཀལ་ནས་སོང་།  བློན་པོས་སྒོ་དོང་སྒོ་མོའི་འགག་ནས་ཀོང་ཇོའི་རྗེས་ཟིན་པ་རེད།  (ངག་རྒྱུན་དུ་བཤད་སྲོལ་ལྟར་ན་སྒོ་དོང་སྒོ་མོའི་འགག་ཅེས་པ་དེ་ད་ལྟའི་ཧོང་ཀྲུང་རྫོང་གི་ཨ་འབྲུག་རྒྱ་ཡག་གི་སྟོད་ཀྱི་ལུང་བ་དེ་ཡིན་ཟེར།  སྔོན་ནས་ད་ལྟའི་བར་ལུང་བ་དེ་མིང་ལ་སྒོ་མོ་ནང་ངམ་སྒོ་མོའི་འགག་ཀྱང་ཟེར།)  བློན་པོ་མགར་གྱིས་ཀོང་ཇོ་ལ་སྨྲས་པ།  ལྷ་གཅིག་ཁྱེད་ཀྱི་ཡབ་རྒྱལ་བོ་ཁྱེད་ལ་བརྩེ་དུང་ཆེ་ཞིང་འདུག  ད་རེབ་ང་རང་ཡོང་དུས་སུ་ཡང་ཡབ་རྒྱལ་བོས་ཁྱེད་ཅག་གི་བང་མཛོད་ཀྱི་ཕུ་ན་རིན་ཐང་གཞལ་དུ་མེད་པའི་གསེར་གྱི་ཉི་མ་ཞིག་དང་དངུལ་གྱི་ཟླ་བ་ཞིག་ཡོད་པ་དེ་ཡང་ཁྱེད་ལ་རྫོངས་པ་བྱིན་ནས་བདག་གིས་འཁྱེར་ཡོང་ཡོད།  ཅེས་བཤད་ཀྱིན་བཤད་ཀྱིན་ཟོར་དགུ་རི་བོའི་གཡས་དང་དཀར་ལྡང་རི་བོའི་གཡོན་གྱི་ཉག་ཆེན་དེར་བསླེབས་ནས་ཁོ་ཚོ་ཚང་མ་ངལ་གསོ་བྱས།  སྐབས་དེར་ཀོང་ཇོས་བློན་པོ་མགར་ལ།  ངའི་ཡབ་ཀྱིས་གནང་བའི་གསེར་དངུལ་གྱི་ཉི་ཟླ་དེར་ངས་བལྟ་ཇི་འདྲ་འདུག་ཅེས་ཟེར།  བློན་པོ་མགར་གྱིས་སྣོད་ཀྱི་ནང་ནས་ཉི་ཟླ་ཕྱིར་བླངས་ཚེ།  རྡོ་ལེབ་གོར་མོ་སྟེང་གི་གསེར་རྩི་དང་དངུལ་རྩི་ནག་ནོག་ཏུ་གྱུར་ནས་རྡོ་ཕྱི་ལ་མངོན་པ་རེད།  དེ་མ་ཐག་བློན་པོ་མགར་ན་རེ།  ལྟོས་དང་། ཁྱེད་ཀྱི་ཡབ་རྒྱལ་བོ་འདི་འདྲ་འདུག  རྡོ་ལེབ་གོར་མོ་གཉིས་ལ་གསེར་རྩི་དང་དངུལ་རྩི་བྱུགས་ནས་གསེར་གྱི་ཉི་མ་དང་དངུལ་གྱི་ཟླ་བ་ཟེར་ནས་ཁྱེད་ལ་མགོ་གཡོག་མགོ་སྐོར་བཏང་བ་རེད་ཅེས་བཤད་པས།  ཀོང་ཇོའི་ཞལ་རས་དམར་མདངས་སུ་གྱུར་པ་དང་ངོ་ཚ་བས།  མིག་ནས་མཆི་མ་བཞུར་བཞིན་ཁོང་ཁྲོའི་ངང་ནས་རྡོ་གོར་མོ་གཅིག་ཉག་ཆེན་དེའི་རྒྱབ་ཕྱོགས་སུ་གཡུགས།  གཅིག་ཉག་ཆེན་དེའི་མདུན་ཕྱོགས་སུ་གཡུགས།  ལྷ་གཅིག་ཀོང་ཇོ་ན་རེ།  རྡོ་ལེབ་གོར་མོ་འདི་གཉིས་རང་འགུལ་གྱིས་འཁོར་ཏེ་ལྷན་གཅིག་ཏུ་མ་སླེབས་པའི་བར།  བུ་མོ་ང་རང་ཡུལ་དུ་མི་ལོག་པ་ཐག་བཅད་པ་ཡིན་ཞེས་དམ་བཅའ་བྱས་སོ།  དེའི་ཕྱིར་ཉག་ཆེན་དེ་ལ་ཉི་ཟླ་ཉག་གའམ་རྡོ་ཉི་ཟླ་ཞེས་མིང་ཐོགས་པ་ཡིན།།