ལུས་སྦྱོང་གི་ཕན་ཡོན།

    བང་རྒྱུག་བྱེད་པའམ་ཡང་ན་ཡོ་ག་སྦྱོང་བ་སོགས་ཀྱི་ལུས་སྦྱོང་བྱེད་མགོ་བརྩམས་པ་ནས་བཟུང་། ལུས་སྦྱོང་གི་ཕན་ཡོན་རིམ་གྱིས་ཁྱེད་ཀྱི་ལུས་སྟེང་དུ་འཆར་སྲིད་པས། དེས་ཁྱོད་རང་ལུས་སྦྱོང་ལ་སྔར་ལས་སྤྲོ་བ་སྐྱེ་རུ་འཇུག་སྲིད། ཨ་མེ་རི་ཁའི་ཧེང་ཐིང་ཏུན་སློབ་ཆེན་གྱི་ནད་ཐོག་འགུལ་སྤྱོད་ལུས་ཁམས་རིག་པའི་དགེ་རྒན་ཆེན་མོ་བ་སྨི་ཞེར•ཨོར་སེན་གྱིས་ཉེ་ཆར་ལུས་སྦྱོང་བྱེད་པའི་ཕན་ཡོན་མང་པོ་ཕྱོགས་སྡོམ་བྱས་ཡོད་པ་སྟེ།

    ཆེས་ཐོག་མར་ལུས་སྦྱོང་བྱེད་པ་ནས་བཟུང་། གློ་བའི་བྱེད་ནུས་ཇེ་དྲག་ཏུ་འགྲོ་བ་རེད། དབྱང་ལྡན་ལུས་སྦྱོང་བྱེད་པའི་གོ་རིམ་ཁྲོད། ཀླད་པས་གློ་བར་ཆ་འཕྲིན་སྐྱེལ་ཞིང་། དབུགས་འབྱིན་རྔུབ་བྱེད་པར་རོགས་རམ་བྱེད་པར་མ་ཟད། ཤ་གནད་ལ་དབྱང་རླུང་མང་པོ་སྦྱིན་པར་བྱེད། ནང་ཧྥོལ་ཐིད（内啡肽）མང་པོ་ཟགས་ཐོན་བྱེད་པའི་དབང་གིས་ལུས་སྦྱོང་བྱེད་མཁན་ལ་ངར་ལངས་ཤིང་ལུས་ཤུགས་རྒྱས་པའི་ཚོར་སྣང་འབྱུང་ལ།ལུས་སྦྱོང་བྱེད་འདོད་ཀྱི་འདུན་པ་ཇེ་དྲག་ནས་ཇེ་དྲག་ཏུ་འགྲོ་བ་རེད། དེ་ལས་གཞན་ད་རུང་དབྱང་ལྡན་ལུས་སྦྱོང་བྱེད་པའི་སྐབས་སུ། ལུས་སྟེང་གི་ཚིལ་ཞག་ཟད་ཚད་མཐོ་བས་ཚོ་བྱང་བའི་ནུས་པའང་ཡོད།

    དུས་ཚོད་གཅིག་ལ་ལུས་སྦྱོང་བྱས་རྗེས། ཆམ་རིམས་སོགས་འབྱུང་བའི་ཉེན་ཁ་ཇེ་ཆུང་དུ་འགྲོ་བ་དང་། དེ་ནི་ལུས་སྦྱོང་བྱེད་པའི་དབང་གིས་ལུས་སྟེང་གི་རིམས་འགོག་ནུས་པ་ཇེ་དྲག་ཏུ་སོང་བས་ཡིན་ལ། ལུས་སྦྱོང་བྱས་ན་ད་རུང་སེམས་ཁམས་ཇེ་སྐྱིད་དུ་འགྲོ་བ་དང་། ལུས་པོ་ཇེ་ཡང་དུ་སོང་བའི་ཚོར་སྣང་བྱུང་སྟེ། གནོན་ཤུགས་ཇེ་ཡང་དུ་གཏོང་ཐུབ།

    དེ་ལས་གཞན་ད་རུང་ལུས་སྦྱོང་བྱེད་མཁན་ངལ་གསོ་བྱས་ཡོད་པའི་སྐབས་སུའང་། ལུས་སྟེང་གི་ནུས་དྲོད་མང་པོ་མུ་མཐུད་དུ་ཟད་ངེས། དེ་ནི་རྗེས་འབར་ནུས་སྣང་ཞེས་པ་དེ་ཡིན་ཏེ། ལུས་སྦྱོང་བྱེད་པའི་གོ་རིམ་ཁྲོད་ནུས་དྲོད་སྟོང་ཁྭ100ཟད་པ་ཡིན་ན། ལུས་སྦྱོང་བྱས་རྗེས་ད་རུང་སྟོང་ཁྭ16ཟད་པ་དང་། དཔེར་ན་ཁྱེད་རང་སྤྱི་ལེ5ལ་བང་རྒྱུག་བྱས་པར། ལུས་སྟེང་གི་ནུས་དྲོད་སྟོང་ཁྭ300ཟད་པའི་དབང་དུ་བཏང་ན། ལུས་སྦྱོང་བྱས་ཚར་རྗེས་ད་རུང་མུ་མཐུད་དུ་ནུས་དྲོད་སྟོང་ཁྭ45ཟད་པར་མ་ཟད། ཁྲག་ཧྭགས་ཇེ་དམའ་རུ་འགྲོ་སྲིད།
    ཉིན་གཅིག་ལ་ལུས་སྦྱོང་བྱས་རྗེས།ཤ་གནད་ཀྱི་ལྗིད་ཚད་ཇེ་ལྕི་རུ་འགྲོ་བ་དང་། གལ་ཏེ་ནུས་ཤུགས་སྦྱོང་བརྡར་བྱས་ན། ཤ་གནད་བསྐྱར་འཛུགས་བྱས་ཏེ། སླར་གསོ་སྦྱོང་བརྡར་གྱི་སྐབས་སུ་ཤ་གནད་གས་པའི་སྣང་ཚུལ་འབྱུང་བ་དང་། སྙིང་ཡང་སྔར་ལས་བདེ་ཐང་ཡོང་ཞིང་། ལུས་སྦྱོང་བྱས་ཏེ་རྔུལ་ཆུ་བཞུར་དུ་བཅུག་ན། ཁྲག་ཤེད་ཇེ་དམའ་རུ་འགྲོ་བར་ཡང་ཕན་པ་ཆེན་པོ་ཡོད།
    དེ་ལས་གཞན་ད་རུང་ཀླད་པར་བཞུར་བའི་ཁྲག་རྒྱུན་དང་དབྱང་རླུང་ཇེ་མང་དུ་འགྲོ་བས།སློབ་སྦྱོང་གི་ནུས་པ་སྔར་ལས་ཇེ་མཐོ་དང་བློ་སེམས་གཅིག་ཏུ་སྒྲིམ་ཤུགས་སྔར་ལས་ཇེ་དྲག་ཏུ་འགྲོ་བ་རེད།
    གཟའ་འཁོར་གཅིག་ལ་ལུས་སྦྱོང་བྱས་རྗེས། ལུས་སྟེང་གི་གཤེར་མའི་ཕུང་རྩིའི་ཚོར་བ་ཇེ་དྲག་ཏུ་སོང་ནས། ཁྲག་ཧྭགས་ཇེ་དམའ་རུ་འགྲོ་བ་དང་། གཅིན་སྙི་ཟ་ཁུའི་ནད་འབྱུང་བའི་ཚད་ཇེ་ཉུང་དུ་འགྲོ་ལ། བསྲན་ཤུགས་ཇེ་ཆེར་འགྲོ་བས།དེའི་རྗེས་ཀྱི་ལུས་སྦྱོང་གི་ཚད་ཇེ་དྲག་ཏུ་བཏང་ཆོག ལུས་སྦྱོང་བྱེད་ན་ད་རུང་སྐྱེས་གཟུགས་ཇེ་ཡག་ཏུ་འགྲོ་མོད། འོན་ཀྱང་བཟའ་བཏུང་ལ་ཚོད་འཛིན་བྱེད་དགོས།

    རྒྱུན་འཁྱོངས་སྒོས་ལུས་སྦྱོང་བྱས་ནས་ཟླ་ངོ་གཅིག་འགོར་རྗེས། ལུས་སྟེང་དུ་སྔར་ལས་སྟོབས་ཤུགས་རྒྱས་པ་དང་། ཤ་གནད་ཀྱི་བསྲན་ཤུགས་སྔར་ལས་ཇེ་དྲག་ཏུ་སོང་ཡོད་པས། སྐབས་དེར་ལུས་སྦྱོང་བྱེད་ཚད་ཇེ་དྲག་དང་ལུས་སྦྱོང་བྱེད་གྲངས་ཇེ་མང་དུ་བཏང་ཆོག ལུས་སྟེང་གི་ཚིལ་ཞག་མངོན་གསལ་གྱིས་ཇེ་ཉུང་དུ་སོང་ཡོད་པར་མ་ཟད། ཀླད་ཁུངས་རང་བཞིན་གྱི་དབང་རྩར་ངར་བསླངས་ཏེ། ཀླད་པའི་ཕྲ་ཕུང་གསར་བ་འབྱུང་བ་དང་། ཀླད་པའི་བྱེད་ནུས་ཇེ་དྲག་ཏུ་གཏོང་ཐུབ།

    རྒྱུན་འཁྱོངས་སྒོས་ལོ་གཅིག་ལ་ལུས་སྦྱོང་བྱས་རྗེས། ལུས་པོའི་བསྲན་ཤུགས་དང་འཕྲོད་ཤུགས25﹪ཡིས་ཇེ་དྲག་ཏུ་འགྲོ་བ་དང་། ཚིལ་ཞག་ཟད་ཚད་ཇེ་མགྱོགས་སུ་འགྲོ་ལ། དུས་ཡུན་རིང་པོར་ལུས་སྦྱོང་བྱེད་པའི་དབང་གིས། སྙིང་གི་ཁྲག་འཕེན་ལས་ཕྱོད་ཇེ་དྲག་ཏུ་སོང་ནས། སྙིང་གི་ལྡིང་ཚད་རྒྱུན་ལྡན་དུ་འགྱུར་ཞིང་། ལུས་པོའི་རྒས་ཚད་ཇེ་དལ་དུ་འགྲོ་བ་དང་། འབྲས་སྐྲན་འབྱུང་ཚད་ཇེ་དམའ་རུ་གཏོང་བ་སོགས་མིའི་ཚེ་ཐག་ཇེ་རིང་དུ་འགྲོ་བར་ཕན་ནོ། །