དཔེ་ཀློག་ནི་མི་ཚེའི་མཐོང་རྒྱ་འབྱེད་པའི་ལྡེ་མིག་ཡིན།

        སྤྱིར་ན་མི་སུ་ཡིན་ཡང་འཇིག་རྟེན་གྱི་བྱ་གཞག་གང་ལ་འཇུག་ནའང་དཔེ་ཀློག་ནི་ཧ་ཅང་གལ་ཆེན་པོ་རེད། དཔེ་ཀློག་ནི་མི་ཚེའི་མཐོང་རྒྱ་འབྱེད་པའི་ལྡེ་མིག་ལྟ་བུ་ཡིན་ལ་རྒྱལ་ཁམས་མཐོང་བའི་མེ་ལོང་ཡང་ཡིན།    དཔེ་ཀློག་གི་དགེ་མཚན་ཆེན་པོ་རེ་གཉིས་རང་གི་ཤེས་ཚོད་ཀྱིས་བགྲད་ན།

        དང་པོ། དཔེ་ཀློག་གི་དགོས་པ་དང་ཕན་ནུས།

        རང་རེའི་ཆོས་གཞུང་དུའང་འདི་ལྟར་གསུང་ཡོད་པ་རེད། ཐོས་པས་ཆོས་རྣམས་ཤེས་པར་འགྱུར།། ཐོས་པས་དོན་མ་ཡིན་པ་སྤོང་།། ཐོས་པས་སྡིག་ལས་ལྡོག་པར་འགྱུར།། ཐོས་པས་མྱ་ངན་ལས་འདས་པ་ཐོབ།། ཅེས་པའང་དོན་ལ་ཐོས་པ་མེད་ན་ཤེས་རབ་མེད་པ་དང་། ཤེས་རབ་མེད་ན་ཡོན་ཏན་མེད་པའི་དོན་རེད། འདིའི་སྐབས་ཀྱི་ཐོས་པ་ནི་དཔེ་ཀློག་དང་སློབ་གཉེར་ལ་གོ་དགོས་པ་རེད། ཡང་ན་ཐོས་པ་ཆུང་བའི་སྐྱེས་བུ་ནི།། བ་རྒང་བཞིན་དུ་རྒས་འགྱུར་ཏེ།། དེ་ཡི་ཤ་རྣམས་འཕེལ་འགྱུར་ཡང་།། དེ་ཡི་ཤེས་རབ་འཕེལ་མི་འགྱུར།། ཞེས་འདིས་ཀྱང་དཔེ་ཀློག་དང་སློབ་གཉེར་ལ་བརྟེན་ནས་ཡང་དག་པའི་ཤེས་རབ་བསྐྱེད་དགོས་པ་གདམས་ཡོད། དེ་མིན་ས་པཎ་གྱིས་རིག་པ་ནངས་པར་འཆི་ཡང་སློབ།། ཚེ་འདིར་མཁས་པར་མ་གྱུར་ཡང་།། སྐྱེ་བ་ཕྱི་མར་བཅོལ་བ་ཡིས།། ནོར་ལ་རང་ཉིད་ལེན་པ་འདྲ།། ཞེས་གསུང་བ་ནང་བཞིན་དཔེ་ཀློག་བྱེད་རྒྱུ་ནི་ཚེ་འདི་ཕྱི་ཀུན་གྱི་བདེ་ལེགས་ཕུན་ཚོགས་ཐམས་ཅད་ཀྱི་རྩ་བ་ཡིན་པར་བསྟན་ཡོད།

        མདོར་ན་ཕྱོགས་རེ་འགའ་ནས་དཔེ་ཀློག་གི་བྱ་བ་འདི་ལ་བལྟས་ཡོང་ན།

        ༡  བསྟན་བཅོས་སམ་དཔེ་ཆ་ནི་འགྲོ་བ་མིའི་འཕེལ་རྒྱས་ཀྱི་ལམ་སྟོན་སྒྲོན་མེ་ལྟ་བུ་ཡིན།              

        ༢  དཔེ་ཀློག་ལ་བརྟེན་ནས་རང་རྒྱུད་ཀྱི་རྨོངས་པ་སེལ་ཏེ་རང་ཉིད་ཀྱི་ཡང་དག་པའི་རིན་ཐང་ལྟ་བ་དང་མི་ཚེའི་ལྟ་བ། འཇིག་རྟེན་ལྟ་བ་སོགས་ཀྱང་ཆགས་པར་བྱ་རྒྱུ།

        ༣  དཔེ་ཀློག་ལ་བརྟེན་ནས་འཇིག་རྟེན་གྱི་ཤེས་བྱ་སྣ་ཚོགས་ལ་བྱང་གོམས་སུ་འགྲོ་རྒྱུ་དང་རང་གི་ཡོན་ཚད་མཐོར་འདེགས་བྱེད་པ།

        ༤  དཔེ་ཀློག་ལ་བརྟེན་ནས་དོན་སྙིང་ལྡན་པའི་བྱ་བ་མང་དུ་བསྒྲུབ་རྒྱུ་དང་གཞན་ཕན་གྱི་དགེ་རྩ་བསྐྱེད་ཆོག་པ།

        ༥  དཔེ་ཀློག་ལ་བརྟེན་ནས་རང་ཉིད་ཀྱི་མི་ཚེའི་ལས་དབང་བསྒྱུར་ཐུབ་ཅིང་གཞན་གྱི་བློ་གྲོས་ཀྱི་ཉིང་བཅུད་ཚུར་བསྡུ་བ།

        ༦  དཔེ་ཀློག་ལ་བརྟེན་ནས་མིག་རྒྱང་ཇེ་རིང་དང་བློ་ཁོག་ཇེ་ཡང་དུ་གཏོང་དགོས་པ་སོགས་དགེ་མཚན་ཤིན་ཏུ་མང་ངོ་།།

        གཉིས་པ།  དཔེ་ཀློག་གི་ཁ་ཕྱོགས་དང་དམིགས་ཡུལ།

        དེ་ལའང་ལོ་རིམ་དང་ལས་རིགས། དགའ་ཕྱོགས་དང་འདུན་པ་མ་གཅིག་ཚེ་དཔེ་ཀློག་གི་ཁ་ཕྱོགས་ཀྱང་མི་འདྲ་མོད། བོད་རང་གི་རིག་གནས་ལ་བབ་ཆགས་ཡག་པོ་ཞིག་འཇོག་དགོས་ན་སུམ་རྟགས་གསུམ་སོགས་ཀྱི་རྨང་གཞིའི་སྟེང་ནས། གེ་སར་སྒྲུང་གི་སྐོར་དང་ཟློས་གར་གྱི་སྐོར། སྐྱེས་ཆེན་དམ་པའི་རྣམ་ཐར།  རྣམ་མགུར་གྱི་སྐོར། དམངས་ཁྲོད་རྩོམ་རིག་གི་སྐོར།  མི་སྣ་གྲགས་ཅན་གྱི་ལོ་རྒྱུས་ཀྱི་སྐོར་སོགས་བལྟ་རྒྱུ་དང་། དེ་ནས་མི་རིགས་གཞན་གྱི་དེབ་ཀློག་ཐུབ་ན་ཡག་ཐོག་རྒྱན་ཡིན་པས་དཔེ་ཀློག་གི་ཁ་ཕྱོགས་ནི་ཁྱེད་ཀྱི་བསམ་པའི་འཁྱེར་སོ་དང་འབྲེལ་བ་གཏིང་ཟབ་ཡོད་པས་ཤིན་ཏུ་གལ་ཆེའོ། དེ་མིན་དཔེ་ཀློག་གི་དམིགས་ཡུལ་ཟེར་ན་མིའི་རིགས་ཀྱི་ཤེས་རིག་གི་རྒྱུན་འཛིན་དང་དར་སྤེལ་གཏོང་བའི་ཆེད་དུ་ཡིན་པས་སྙན་གྲགས་དང་ཁེ་ཕན་ཁོ་ན་བསམ་པ་ནི་དཔེ་ཀློག་ཡང་ངག་པའི་དམིགས་མ་ཡིན་ནོ།།

        གསུམ་པ།  དཔེ་ཀློག་གི་གོམས་གཤིས་དང་ཐབས་ལམ།

        འདི་ལའང་མང་པོ་བཤད་རྒྱུ་ཡོད་མོད། མདོར་ན་དཔེ་ཀློག་ནི་འཚོ་བའི་གོམས་གཤིས་ཤིག་ཏུ་འགྱུར་དགོས། ཟས་དང་གཉིད་ཀྱི་དུས་ཚོད་དགོས་པ་བཞིན་དུ་ཁྱོད་ལ་དཔེ་ཀློག་གི་གོམས་གཤིས་ཀྱང་ཆད་མི་རུང་། ཟས་དང་གཉིད་ནི་ལུས་ཁམས་གསོ་བྱེད་ཀྱི་སྨན་ལྟ་བུ་ཡིན་ན་དཔེ་ཀློག་ནི་ནང་སེམས་གསོ་བྱེད་ཀྱི་སྨན་མཆོག་ལྟ་བུ་ཡིན། ཐབས་ལམ་ལའང་རགས་ལྟ། ཞིབ་ལྟ། རྒྱས་ལྟ། མ་རྩོམ་ཞིབ་འབྲི། མཆན་རྟགས་འདེབས་པ། ཟིན་ཐོ་འགོད་པའི་གོམས་གཤིས་ཀྱང་གལ་ཆེ་བར་འདོད།

        བཞི་བ། དཔེ་ཆ་བདམ་གསེས་དང་བསམ་བློ་བརྗེ་རེས།

        དཔེ་ཆའི་རིགས་ཤིན་ཏུ་མང་པར་མ་ཟད། དེ་དག་ཡོངས་སུ་བཀླག་ཚར་བའི་ངེས་པའང་ཡོད་མི་སྲིད། དེ་ནས་རང་གི་སེམས་ཁམས་དང་བློ་ཁར་འཚམས་པ། དགའ་ཕྱོགས་དང་མཐུན་པའི་དེབ་བཀླག་རྒྱུ་གཙོ་བོ་རེད། དེབ་ལ་དབྱེ་བ་མེད་པར་ཀློག་པ་ནི་དཔེ་ཀློག་ཐད་ཀྱི་ནོར་འཁྲུལ་ཆེ་ཤོས་ཤིག་རེད།  དེབ་ཅིག་བཀླགས་ཚར་ནས་འོས་འགན་འགྲུབ་སོང་བ་ལྟ་བུ་ཞིག་ཏུ་རྩིས་ཏེ་རང་དགར་མི་གཡུག་པར་གྲོགས་པོ་དང་གྲོགས་པོའི་བར་ནས་བསམ་བློ་བརྗེ་རེས་བྱེད་ཐུབ་ན་ཧ་ཅང་ཡག་པོ་རེད་བསམ་མོ།