པོ་ཏ་མཚོ་རྒྱལ་ཁབ་སྤྱི་གླིང་དུ་སྐྱེ་ཁམས་ཁྲིམས་ར་ཞིག་བཙུགས་པ།

རྩོམ་པ་པོ།     ཡིག་བསྒྱུར།       དུས་ཚོད།   2020-06-04   རྩོམ་ཁུངས།    སེམས་ཀྱི་ཉི་ཟླ་བོད་ཡིག་དྲ་བ།

    སེམས་ཀྱི་ཉི་ཟླ་བོད་ཡིག་དྲ་བའི་འཕྲིན། ཟླ6པའི་ཚེས2ཉིན་གྱི་ཕྱི་དྲོར། བདེ་ཆེན་ཁུལ་འབྲིང་རིམ་མི་དམངས་ཁྲིམས་ཁང་པོ་ཏ་མཚོ་རྒྱལ་ཁབ་སྤྱི་གླིང་གི་ཁྲིམས་རའི་སྒོ་བྱང་འགེལ་བའི་མཛད་སྒོ་དང་ཁོར་ཡུག་ཐོན་ཁུངས་འདྲི་གཅོད་གསབ་འཛུགས་ལྗང་མདོག་དཔེ་སྟོན་རྟེན་གཞི་འཛུགས་པའི་མཛད་སྒོ་དེ་པོ་ཏ་མཚོ་རྒྱལ་ཁབ་སྤྱི་གླིང་དང་ཉི་ཤར་གྲོང་སྡེའི་རྟ་ར་གྲོང་མིའི་ཚོ་ཆུང་དུ་སྤེལ་བ་རེད།

    པོ་ཏ་མཚོ་རྒྱལ་ཁབ་སྤྱི་གླིང་ཁྲིམས་ར་བཙུགས་པ་དེ་བདེ་ཆེན་འབྲིང་རིམ་མི་དམངས་ཁྲིམས་ཁང་གིས་སྤྱི་ཚོགས་ཡོངས་སུ་ཁྲིམས་སྐྱོང་འདུ་ཤེས་འཛུགས་པར་སྐུལ་འདེད་དང་དམངས་ཡོངས་ཀྱི་ཁྲིམས་སྐྱོང་འདུ་ཤེས་ཇེ་དྲག་ཏུ་གཏོང་བའི་བྱེད་ཐབས་གལ་ཆེན་ཞིག་ཡིན་ལ།རང་ཁུལ་གྱི་རིམ་པ་གཉིས་ཀྱི་མི་དམངས་ཁྲིམས་ཁང་གིས་ཁུལ་ཨུ་དང་ཁུལ་སྲིད་གཞུང་གི་སྐྱེ་ཁམས་ལ་བརྟེན་ནས་ཁུལ་འཛུགས་པའི་གལ་ཆེན་འཐབ་ཇུས་ལ་དམིགས་པའི་གསོན་ཉམས་དོད་པའི་ལག་ལེན་ཞིག་ཀྱང་རེད།

    རྒྱུས་ལོན་བྱུང་བ་ལྟར་ན། པོ་ཏ་མཚོ་རྒྱལ་ཁབ་སྤྱི་གླིང་ཁྲིམས་རས་གཙོ་བོ་བདེ་ཆེན་ཁུལ་འབྲིང་རིམ་མི་དམངས་ཁྲིམས་ཁང་གིས་བདག་སྤྲོད་བྱས་པའི་ཁོར་ཡུག་སྲུང་སྐྱོང་དང་རང་བྱུང་ཐོན་ཁུངས་དང་འབྲེལ་བའི་གྱོད་གཞི་དང་། ཁོར་ཡུག་སྦགས་བཙོག་སྣ་ཚོགས་འགོག་བཅོས་དང་སྐྱེ་ཁམས་སྲུང་སྐྱོང་གི་གྱོད་དོན།གནམ་གཤིས་འགྱུར་ལྡོག་ལས་བྱུང་བའི་གྱོད་དོན། སྐྱེ་ཁམས་ཐོན་ཁུངས་སྣ་ཚོགས་ཀྱི་གནོད་སྐྱོན་གུན་ཚབ་གཏུག་བཤེར་དང་འབྲེལ་བ་ཡོད་པའི་གྱོད་དོན་བཅས་ཚུད་ཡོད། དེ་མིན། གཞི་རིམ་མི་དམངས་ཁྲིམས་ཁང་གིས་དང་ལེན་བྱས་པའི་ཁོར་ཡུག་སྲིད་འཛིན་སྤྱི་ཕན་གཏུག་བཤེར་དང་། ཉེས་དོན་ཞོར་གཏོགས་དམངས་དོན་སྤྱི་ཕན་གཏུག་བཤེར། ཡང་ན་ཁུལ་ཡོངས་ཀྱི་ཁྱབ་ཁོངས་སུ་ཤུགས་རྐྱེན་ཆེན་པོ་ཡོད་ཅིང་། དཔེ་མཚོན་སློབ་གསོའི་དོན་སྙིང་ལྡན་པའི་གྱོད་དོན་ཡིན་ན། རིམ་སྤོར་ཞིབ་གཅོད་ཀྱི་རྣམ་པ་སྤྱད་དེ་ཞིབ་གཅོད་ཁྱབ་ཁོངས་སུ་འཇུག་དགོས། གཞན་ཡང་། 《ཡུན་ནན་ཞིང་ཆེན་བདེ་ཆེན་བོད་རིགས་རང་སྐྱོང་ཁུལ་སེམས་ཀྱི་ཉི་ཟླ་པོ་ཏ་མཚོ་རྒྱལ་ཁབ་སྤྱི་གླིང་དོ་དམ་སྲོལ་ཡིག》དང་འབྲེལ་བ་ཡོད་པའི་གྱོད་གཞི་ཚང་མ་ཞིབ་གཅོད་ཁྱབ་ཁོངས་ནང་བཅུག་ཡོད་པ་རེད།

    བདེ་ཆེན་ཁུལ་འབྲིང་རིམ་མི་དམངས་ཁྲིམས་ཁང་གིས་སེམས་ཀྱི་ཉི་ཟླ་གྲོང་ཁྱེར་རྒྱལ་ཐང་གྲོང་རྡལ་ཉི་ཤར་གྲོང་ཚོར་ཁོར་ཡུག་ཐོན་ཁུངས་འདྲི་གཅོད་གསབ་འཛུགས་ལྗང་མདོག་དཔེ་སྟོན་རྟེན་གཞི་བཙུགས་ནས། དུས་བཀག་ལྟར་འདྲི་གཅོད་འགན་ནུས་འདོན་སྤེལ་གང་ལེགས་བྱས་པ་དང་།ཕྱོགས་མང་མཉམ་འགུལ་བྱས་ནས་སྲོལ་རྒྱུན་གྱི་སྐྱེ་ཁམས་ཁྲིམས་འཛིན་རྣམ་པའི་འོག་མི་སྒོ་བརྒྱབ་པ་དང་རི་ཡང་ས་རྒོད་དུ་གྱུར་པ་ལས་བྱུང་བའི་ངན་འཁོར་ལ་འགྱུར་ལྡོག་ནུས་ལྡན་བྱུང་ཡོད། ཁོར་ཡུག་ཐོན་ཁུངས་འདྲི་གཅོད་གསབ་འཛུགས་ལྗང་མདོག་དཔེ་སྟོན་རྟེན་གཞི་བཙུགས་རྗེས།བདེ་ཆེན་ཁུལ་འབྲིང་རིམ་མི་དམངས་ཁྲིམས་ཁང་གིས་མགྱོགས་མྱུར་གྱིས་ཆེད་ལས་བཅའ་ཁྲིམས་ཆད་གཅོད་དང་།སྐྱེ་ཁམས་གསབ་འཛུགས་ཉམས་གསོ། སྤྱི་ཚོགས་ཕྱོགས་བསྡུས་ལྟ་སྐུལ་བཅས་ཟུང་དུ་འབྲེལ་བའི་མི་དམངས་ཁྲིམས་ཁང་གི་ཁོར་ཡུག་སྲུང་སྐྱོང་མ་རྩ་འདྲི་གཅོད་བྱེད་སྟངས་གསར་པ་འཚོལ་ཞིབ་བྱས་ནས།སྤྱི་ཕན་གཏུག་བཤེར་གྱི་དཔྱད་མཚམས་བཅད་འབྲས་དོན་ཐོག་ཏུ་འཁྱོལ་རྒྱུ་དང་།རང་ཁུལ་གྱི་ཁོར་ཡུག་སྲུང་སྐྱོང་ལ་ཁྲིམས་འཛིན་གྱི་འགན་ལེན་འདོན་པར་འགན་ལེན་བྱས་པ་རེད།


分享到：QQ空间新浪微博腾讯微博人人网微信