བདེ་ཆེན་བོད་སྨན་ཁང་གིས་གྲོང་གསེབ་དུ་རིན་མེད་སྨན་བཅོས་བྱེད་པའི་བྱེད་སྒོ་ཞིག་རྩ་འཛུགས་བྱས།

        ཟླ་6ཚེས་9ཉིན་ནས་བཟུང་། སེམས་ཀྱི་ཉི་ཟླ་གྲོང་ཁྱེར་རྒྱལ་ཐང་གྲོང་རྡལ་གནམ་གསལ་གྲོང་ཚོའི་ཐང་སྐོར་གྲོང་མིའི་ཚོགས་ཆུང་གི་བྱེད་སྒོ་ཁང་དུ་ཧ་ཅང་འཁྲུག་ཆ་དོད་པོ་འདུག་སྟེ། སྨན་པར་སྟོན་དུ་ཡོང་བའི་གྲོང་མི་རྣམས་གྲལ་རིང་པོ་བསྒྲིགས་ནས་སྨན་བཅོས་བྱེད་པར་སྒུག་འདུག

    འོས་འགན་སྨན་བཅོས་ཀྱི་བྱེད་སྒོའི་ཡུལ་དངོས། 

        ཤེས་རྟོགས་བྱུང་བར་གཞིགས། མང་ཚོགས་ནད་གཞིའི་དབང་གིས་དབུལ་བོར་འགྱུར་བ་དང་།  ནད་གཞིའི་དབང་གིས་ཕྱིར་དབུལ་པོར་འགྱུར་བའི་སྣང་ཚུལ་སྔོན་འགོག་དང་། ནད་གཞི་ཆུང་གྲས་གྲོང་ཚོ་ནས་འབུད་མི་དགོས་པའི་བྱེད་པར་བདེ་ཆེན་ཁུལ་བོད་སྨན་ཁང་གི་ཏང་ཀྲི་པུའུ་ཡིས་ཡུན་ནན་ཞིང་ཆེན་ཀྲུང་ལུགས་སྨན་ཁང་དང་། ཏ་ལི་ཁུལ་ཀྲུང་ལུགས་སྨན་ཁང་། ཕུའུ་ཨར་གྲོང་ཁྱེར་ཀྲུང་ལུགས་སྨན་ཁང་གི་བོད་སྐྱོར་སྨན་བཅོས་ཀྱི་ཆེད་མཁས་པ་དང་། དེ་མིན་ཁུལ་བོད་སྨན་ཁང་གི་སྨན་དོན་རྐང་འཛིན་པ་རྩ་འཛུགས་བྱས་ནས་འགན་ཁུར་དབུལ་སྐྱོར་གྲོང་ཚོ་སྟེ་གནམ་གསལ་གྲོང་ཚོར“བདེ་ཐང་དབུལ་སྐྱོར་ལ་རོགས་རམ་བྱས་ནས་དམངས་ལ་ཞབས་འདེགས་ཞུ་བའི་འོས་འགན་སྨན་བཅོས་བྱེད་པའི་བྱེད་སྒོ་སྤེལ་བ་རེད། 

འོས་འགན་སྨན་བཅོས་ཀྱི་བྱེད་སྒོའི་ཡུལ་དངོས། 

        ད་ཐེངས་ཀྱི་འོས་འགན་སྨན་བཅོས་དུས་ཡུན་ཉིན་གསུམ་ཡིན་ལ། གནམ་གསལ་གྲོང་ཚོའི་གྲོང་ཚོ་ཡོངས་ཀྱི་གྲོང་མིའི་ཚོགས་ཆུང་12ལ་ཡོངས་ཁྱབ་བྱས་ཡོད་ལ། ནད་བརྟག་སྨན་བཅོས་ཀྱི་ཁྱབ་ཁོངས་ནང་ཁོག་ནད་ཚན་ཁག་དང་།  ཕྱི་ནད་ཚན་ཁག  གྲུམ་ནད་ཚན་ཁག  མྱུར་ནད་ཚན་ཁག   རུས་ནད་ཚན་ཁག  ནད་བཅོས་ཚན་ཁག་སོགས་ས་མཐོའི་མང་ཚོགས་ལ་ཕོག་སླ་བའི་རྒྱུན་ཐོན་ནད་གཞི་འདུས་པ་རེད། འོས་འགན་སྨན་བཅོས་བྱ་ཡུལ་དུ་སྨན་དོན་མི་སྣས་གྲོང་མིའི་གཟུགས་པོའི་གནས་ཚུལ་དང་མི་འཕྲོད་པའི་གནས་ཚུལ་རྒྱུས་ལོན་ཞིབ་ཕྲ་བྱེད་བཞིན་ཡོད་ལ། ནན་ཏན་གྱིས་ཁོ་ཚོའི་ཁྲག་ཤེད་ལ་ལྟ་བ་དང་ལུས་ཕུང་ལ་བརྟག་དཔྱད་བྱེད་པ་མ་ཟད། ནད་རྟགས་ལྟར་རིན་མེད་བོད་སྨན་སྟེར་བ་དང་། རྩ་རླུང་དང་རྐེད་པ། རྐང་བ་ན་བའི་ནད་པར་ཁབ་བཙའི་གསོ་བཅོས་བྱས་པ་རེད། དེ་མིན་དམིགས་ས་ཡོད་པའི་སྒོ་ནས་བདེ་ཐང་སློབ་གསོ་བྱས་ཤིང་། རྒྱུན་ཐོན་ནད་གཞི་དང་ཕོག་སླའི་ནད་རིགས་སྔོན་འགོག་ཤེས་བྱ་དང་། དོ་སྣང་བྱ་ཡུལ། བོད་ལུགས་གསོ་རིག་དང་བོད་སྨན་གྱི་ཤེས་བྱ་བཅས་ཁྱབ་གདལ་བཏང་ནས་གྲོང་མིར་གོམས་གཤིས་བཟང་པོ་འཇགས་དགོས་པའི་དྲན་སྐུལ་བྱས་ཏེ། སྦྱོང་བརྡར་ལ་ཤུགས་སྣོན་བརྒྱབ་ནས་གཟུགས་པོའི་བྱང་ཚད་མཐོ་རུ་གཏོང་བ་དང་བདེ་ཐང་གི་འཚོ་བ་སྐྱེལ་སྟངས་རྒྱུན་འཁྱོངས་ཀྱིས་སྨན་བཅོས་ཞབས་ཞུ་དོན་དངོས་ཐོག་མང་ཚོགས་ཀྱི་སེམས་ནང་ལ་ཆགས་པ་བྱས།

རིན་མེད་བོད་སྨན་སྟེར་བཞིན་པ།

སྨན་པས་མང་ཚོགས་ལ་བདེ་ཐང་མཛུབ་སྟོན་བྱེད་བཞིན་པ།

        གྲོང་མི་སྐལ་བཟང་གིས་ཉེ་བའི་ལོ་ཤས་རིང་སྨན་རྩིས་ཁང་གིས་རྒྱུན་དུ་འོས་འགན་སྨན་བཅོས་བྱེད་པ་དང་། ང་ཚོར་སྨན་རིན་མི་དགོས་པར་སྨན་བཅོས་བྱས་པས། ང་ལྟ་བུའི་ལོ་70ལ་སོན་པའི་བགྲེས་སོང་ལ་མཚོན་ན་ཐག་རིང་ལ་སོང་ནས་སྨན་བཅོས་བྱེད་མི་དགོས་ཏེ་ངོ་མ་སྟབས་བདེ་རེད། དེང་སང་འཚོ་བ་ཡང་ཇེ་བཟང་ནས་ཇེ་བཟང་རེད་ཅེས་གདོང་ལ་འཛུམ་གྱིས་ཁེངས་ནས་བཤད།