ས་དམ་ནས་སེམས་ཀྱི་ཉི་ཟླའི་ལྕགས་ལམ་ལས་འབྲི་ཆུའི་ཟམ་ཆེན་གྱི་ངར་ལྕགས་གདུང་མ་བསྐྲུན་ཟིན་པ།

  ཟླ་6པའི་ཚེས་15ཉིན། འཛུགས་སྐྲུན་བྱེད་བཞིན་པའི་ས་དམ་ནས་སེམས་ཀྱི་ཉི་ཟླ་བར་གྱི་ལྕགས་ལམ་གྱི་གཙོ་གནད་ཚོད་འཛིན་རང་བཞིན་གྱི་ལས་གྲྭ་སྟེ་འབྲི་ཆུའི་ཟམ་ཆེན་འཛུགས་སྐྲུན་ལ་གྲུབ་འབྲས་གལ་ཆེན་ཐོབ་པ་དང་། ཟམ་ཆེན་གྱི་བར་བརྒལ་ངར་ལྕགས་གདུང་མ་དེ་བདེ་བླག་ངང་བསྐྲུན་ཚར་ཡོད།   དཔྱང་སྒྲིག་བྱས་པའི་ལྕགས་གདུང་གི་རིང་ཚད་ལ་སྨི་24.4དང་། མཐོ་ཚད་ལ་སྨི་12   ལྗིད་ཚད་ལ་ཏུན་640བཅས་ཡོད།   འབྲེང་ཐག་དཔྱང་འདེགས་འཕྲུལ་ཆས་ཀྱིས་ཏུན་640ཅན་གྱི་ངར་ལྕགས་ལྕགས་གདུང་འདེགས་ཚུལ་འདི་ནི་རང་རྒྱལ་གྱི་ལྕགས་ལམ་འཛུགས་སྐྲུན་ཐོག་ཐེངས་དང་པོ་བྱུང་བ་ཡིན་འདུག

  འབྲི་ཆུའི་ཟམ་ཆེན་གྱི་བར་བརྒལ་ངར་ལྕགས་གདུང་མ་ལེགས་འགྲུབ་བྱུང་བ་དེས་ཡུན་ནན་ལྕགས་ལམ་གྱི་བར་ཐག་རིང་པོ་དང་གྲོག་རོང་མཐོན་པོའི་རྒྱུད་ཀྱི་ཟམ་པ་འཛུགས་སྐྲུན་ཐད་རྩ་ཆེའི་ཉམས་མྱོང་བསགས་ཡོད་ལ། ས་དམ་ནས་སེམས་ཀྱི་ཉི་ཟླའི་བར་གྱི་ལྕགས་ལམ་སྔ་ཙམ་བསྐྲུན་ཟིན་ནས་མེ་འཁོར་ཤར་གཏོང་ཐུབ་རྒྱུར་རྨང་གཞི་བརྟན་པོ་བཏིང་ཡོད།

    འབྲི་ཆུའི་ཟམ་ཆེན་དེ་ས་དམ་གྲོང་ཁྱེར་དང་སེམས་ཀྱི་ཉི་ཟླ་གྲོང་ཁྱེར་འབྲེལ་མཚམས་ཀྱི་སྟག་མཆོང་གྲོག་རོང་མཛེས་ལྗོངས་ཁུལ་དུ་གནས་ཡོད།   འབྲི་ཆུ་འཕྲེད་ཀྱིས་བརྒལ་ཡོད་ཅིང་སྤྱིའི་རིང་ཚད་ལ་སྨི་882.5ཡོད།  2015ལོར་ལས་འགོ་བཙུགས་པ་དང་ཟམ་པ་གཙོ་བོར་འདེགས་འཇོག་རྣམ་པའི་ལྕགས་གདུང་དཔྱངས་ཟམ་སྤྱད་ཡོད། ཟམ་ཆེན་གྱི་སྣེ་གཉིས་ཚང་མ་ཕུག་ལམ་དང་སྦྲེལ་མཐུད་བྱས་ནས་བཟོ་བསྐྲུན་བྱས་ཚར་རྗེས་ལྕགས་ལམ་འཛུགས་སྐྲུན་གྱི་བརྒལ་ཚད་ཆེ་ཤོས་ཀྱི་ལྕགས་གདུང་དཔྱང་ཟམ་སོགས་རྒྱལ་ནང་དང་འཛམ་གླིང་གི་ཟིན་ཐོ་མང་པོ་གཏོད་ཐུབ་རྒྱུ་རེད།

    ས་དམ་ནས་སེམས་ཀྱི་ཉི་ཟླ་བར་གྱི་ལྕགས་ལམ་གྱི་སྤྱིའི་རིང་ཚད་ལ་སྤྱི་ལེ་139ཡོད།   Iརིམ་པའི་ལྕགས་ལམ་གྱི་ཆུ་ཚོད་རེར་སྤྱི་ལེ་120རྒྱུག་ཐུབ་པའི་ཇུས་འགོད་བྱས་ཡོད།    མེ་འཁོར་ཤར་གཏོང་ཐུབ་རྗེས་ཁུན་མིང་ནས་སེམས་ཀྱི་ཉི་ཟླ་བར་ཆུ་ཚོད་4ཙམ་གྱིས་སླེབས་ཐུབ་པའི་རེ་བ་ཡོད་པ་དང་། ས་དམ་ནས་སེམས་ཀྱི་ཉི་ཟླ་བར་ཆུ་ཚོད་གཅིག་ཙམ་ལས་མི་འགོར་བ་རེད།