ང་ཚོས་སློབ་གསོ་གླེང་ཤེས་དགོས།

        སློབ་གསོ་གླེང་ཤེས་དགོས།སློབ་གསོ་གླེང་མ་ཤེས་དུས་རང་ཉིད་ཀྱི་སློབ་གསོ་དེ་ནི་དོན་ལ་སློབ་གསོ་མ་ཡིན་པར་མི་རིགས་དང་སྤྱི་ཚོགས་ཡར་རྒྱས་ལ་གནོད་པ་འབྱུང་སླ་བར་འགྲོ་ཉེན་ཆེ།དེ་བས་སློབ་གསོ་གླེང་མཁན་གྱིས་ཐོག་མར་རང་ཉིད་ཀྱི་ཤེས་ཡོན་གྱི་རྨང་དང་སྤྱི་ཚོགས་མཐོང་བྱེད་ཀྱི་དཔྱོད་པ་བཅས་ལ་ཕྱིར་རྟོག་བྱ་དགོས་ཏེ།དེ་དག་གིས་སྟོང་ན་ཁྱོད་ཀྱི་སློབ་གསོ་ནི་སྤྱི་ཚོགས་འཕེལ་རྒྱས་ཀྱི་བཀག་རྡོ་རུ་འགྱུར་ངེས།

        སྤྱིར་བཏང་ཕ་མ་དང་བུ་ཕྲུག་དགེ་རྒན་དང་སློབ་མ་གང་ཞིག་ནི་ཕན་ཚུན་ཡར་རྒྱས་སུ་འགྲོ་མིན་དེ་སློབ་གསོ་ལ་རག་ལས་པ་དང་སློབ་གསོ་ནི་ཁོ་བོ་དག་མི་ཚེ་ལ་གོམ་ཁ་སྤོ་བྱེད་ཀྱི་རྐང་ལག་ལྟ་བུ་ཡིན།འོན་ཀྱང་སློབ་གསོ་དེ་ནི་ཁྱོད་ཉིད་ཀྱི་ལུས་སེམས་ལ་མནར་གཅོད་གཏོང་བྱེད་ཙམ་དང་ཁྱོད་ཀྱི་བསམ་གཞིག་གི་བཀག་རྡོ་རུ་གྱུར་པ་ཞིག་ཡིན་ཕྱིན།དེ་འདྲའི་སློབ་གསོ་ཡོད་པ་ལས་མེད་ན་བཟང་རྒྱུ་རེད་སྙམ།དེ་བས་ང་ཚོ་འགྲོ་བ་མིའི་རིགས་ཀྱི་སྤྱི་ཚོགས་འཕེལ་འགྲུབ་ཀྱི་བྱ་བ་ལས་ཚང་མ་སློབ་གསོའི་སྣེ་འཁྲིད་ཀྱི་བཟང་ངན་ལ་རག་ལས་པ་དང་ང་ཚོས་ཕ་མས་བུ་ཕྲུག་ལ་སློབ་གསོ་གཏོང་བ་དང་དགེ་རྒན་གྱིས་སློབ་མར་སློབ་གསོ་གཏོང་བ་སོགས་གང་ཡིན་ན་ཀུན་སློང་གཙང་བ་ཙམ་གྱིས་ཁྱོད་ཀྱི་སློབ་གསོའི་ལས་དོན་དེ་སྨན་ལྟར་འགྱུར་བའི་ངེས་པ་མེད་པ་ཡིན།  དེའི་ཕྱིར་རང་ཉིད་ལ་ངེས་པར་དུ་བསམ་གཞིག་གི་ལོ་ལེགས་ཡག་པོ་ཞིག་ལྡན་དགོས་སྙམ།གཙོ་བོ་རང་ཉིད་ཀྱིས་མདུན་གྱི་སྤྱི་ཚོགས་མཐོང་དགོས་པ་དང་སྤྱི་ཚོགས་ཀྱི་ལས་རིགས་གང་ཞིག་གིས་མིའི་རིགས་ཀྱི་འཕེལ་རྒྱས་ཀྱི་སྒོ་མོ་འབྱེད་ངེས་པ་དང་ཡང་ན་དེ་ལས་ལྡོག་སྟེ་སྤྱི་ཚོགས་མར་འགྲུབ་ཀྱི་རྐྱེན་ངན་གང་ཞིག་ལ་ཇི་ལྟར་ཟློག་པའི་ཐབས་ལམ་གང་འདྲ་དགོས་པ་སོགས་ལ་མ་དཔྱོད་པར་རང་དགར་སློབ་གསོ་རྒྱག་རྒྱུ་ཡིན་པ་དེ།སློབ་གསོའི་ལས་དོན་ལ་འབད་ངེས་ཡིན་ཟེར་བ་ཁ་ལ་ཅི་ཡོང་ཞིག་དང་ལག་ནས་གང་འཁྱོངས་འབྲི་རྒྱུ་མ་ཡིན་པར་སྤྱི་ཚོགས་ལ་རྒྱུས་ལོན་ཡག་པོ་བྱ་རྒྱུ་གལ་ཆེ་སྙམ།དེའི་ཕྱིར་རང་རེ་མི་རིགས་ཀྱི་སློབ་གསོ་བ་དག་དང་དགེ་རྒན་དག་གི་ཁྲོད་དུ་ཀུན་སློང་གཙང་མའི་ངོས་ནས་སློབ་གསོ་གླེང་མཁན་མང་ན་ཡང་།ངེས་པར་དུ་རང་རིགས་ཡར་རྒྱས་ལ་ཕན་པའི་སློབ་གསོ་གླེང་མཁན་ནི་ཉུང་ཙམ་དུ་ཟད།

        ང་ཚོའི་སློབ་གསོ་གཏོང་མཁན་མང་ཤོས་ནི་དབང་བསྒྱུར་དང་སྒེར་གཅོད་ཕྱོགས་སུ་ཤུགས་ཆེ་ཚོད་འདུག    ཚད་ངེས་ཅན་ཞིག་ནས་བཤད་ན།སློབ་གསོ་ནི་འགྲོ་བ་མིའི་རིགས་མདུན་སྐྱོད་བྱེད་སྤྱད་ཀྱི་རྐང་ལག་ལྟ་བུ་ཡིན་ཅིང་།ཡིན་ན་ཡང་སློབ་གསོའི་ལས་དོན་བྱེད་སྟངས་ནོར་བ་ཡིས་རང་ཉིད་ཀྱི་རྐང་ལག་རང་ཉིད་ཀྱིས་གཅོད་པ་མང་ཚོད་འདུག  རང་རེའི་མི་རིགས་ལ་མཚོན་ན་ཡང་དེ་ལྟར་ལམ་ལོག་པ་དང་ནོར་བའི་ཆ་མང་བོ་མཐོང་རྒྱུ་འདུག སྤྱིར་བཏང་ང་ཚོས་སློབ་གསོའི་ལས་དོན་སྤེལ་རྒྱུ་གལ་ཆེན་པོ་ཞིག་ཡིན། ང་ཚོའི་སློབ་གྲྭ་དང་དགོན་སྡེ་མང་པོ་ན་སློབ་གསོའི་ལས་དོན་སྤེལ་མཁན་མེད་པས་རང་རིགས་མང་ཆེ་བས་རིག་གཞུང་ཆིག་རྐྱང་བ་ཞིག་ལ་སྦྱང་བ་ལས་དམིགས་རྒྱང་རིང་བའི་བསམ་གཞིག་གི་སྤྱི་ཚོགས་ལ་རྒྱང་འབོད་བྱེད་མཁན་ཉིན་མོའི་སྐར་མ་ལྟར་མཐོང་དཀའ་བའི་གནས་སུ་གྱུར་ཡོད།མི་རིགས་དང་རྒྱལ་ཁབ་ཆེས་སྔོན་ཐོན་གྱི་གྲས་སུ་གཏོགས་པ་དག་དང་དེ་ལས་ལྡོག་པའི་ཡོད་ཚད་ཆེས་དབུལ་ཕོངས་སུ་འདུག་པ་དག་ལ་དེ་འདྲའི་ཁྱད་ཅིག་ཅི་ལ་ཤོར་བ་རེད་ཅེ་ན།དེ་ནི་སློབ་གསོའི་ལས་དོན་སྤེལ་མཁན་ཏེ་མང་ལ་སྣེ་འཁྲིད་ལམ་སྟོན་གནང་མཁན་ཡོད་མེད་ཀྱིས་སོ། སྤྱིར་ན་སློབ་གྲྭ་དང་དགོན་སྡེ་གང་ཞིག་ཡིན་ན་ཡང་ཤོག་རྒྱུག་གི་སྐར་གྲངས་ཙམ་དང་བློ་འཛིན་ཙམ།དེ་ལས་བསྟན་བཅོས་ག་གེ་མོར་འགྲེལ་པ་ཞིག་རྒྱག་ཐུབ་པ་ཙམ་མ་གཏོགས།རང་སྒེར་ལ་གཏོགས་པའི་འདས་མ་གསུམ་ལ་དཔྱོད་པའི་བསམ་གཞིག་ཉུང་དྲགས་པ་དེ་ནི་ཡོད་ཚད་ནས་ཡོད་ཚད་ཉམས་རྒུད་དུ་འགྲོ་བྱེད་ཅིག་མ་ཡིན་ནམ།དེ་བས་སློབ་གསོ་ནི་སྤྱི་ཚོགས་ལེགས་ལམ་ལ་འགྲོ་བྱེད་ཅིག་ཡིན་དུས།གང་ན་སློབ་གསོ་དབེན་པ་དེ་ན་ཤིན་ཏུ་ཉམ་ཐག་པའི་མྱ་ངན་ཆེ་བ་དང་།གང་ན་སློབ་གསོ་ཕྱུག་པ་དེ་ན་དགའ་སྤྲོ་ཡི་བགྲོ་གླེང་མོད་དོ།།དེའི་ཕྱིར་ང་ཚོའི་སྤྱི་ཚོགས་ལེགས་ལམ་དང་ལོག་ལམ་གང་འགྲོ་མིན་གྱི་ཚད་སློབ་གསོ་ལ་རག་ལས་པ་བསྟན་ཡོད། སྤྱིར་བཏང་ང་ཚོའི་ཁྲོད་དུ་སློབ་གསོ་སྤེལ་སྟངས་མང་ཤོས་ནི་ལུས་པོ་མནར་གཅོད་ཀྱི་སློབ་གསོ་ཡིན་ཅིང་།དེ་ནི་ང་ཚོའི་གོང་རིམ་གྱི་བཀའ་ཟེར་བས་ཡོད་ཚད་ཀྱི་སྨྲ་སྒོ་བསྡམས་པས་དེ་དག་གི་ཤུགས་རྐྱེན་ངན་པའི་དབང་གིས་ང་ཚོ་ཧྲིལ་བོ་ལ་ནང་བསམ་གཞིག་གི་སློབ་གསོ་སྤེལ་རྒྱུ་ལས་ཕྱི་ལུས་པོ་མནར་གཅོད་ཀྱི་སློབ་གསོ་སྤེལ་རྒྱུར་གོམས་ཡོད།དེས་ནི་རང་རིགས་ཚང་མ་ཉམས་རྒུད་དང་ཐུར་དུ་འཕངས་ཏེ་ཕན་ཚུན་བར་ནམ་ཡང་འཇིགས་སྐྲག་ཤུགས་ཆེ་བའི་ལམ་ལ་བསྐྱོད་དང་སྐྱོད་བཞིན་པ་མ་ཡིན་ནམ།དེའི་ཕྱིར་རང་རིགས་ཀྱི་ཕ་མ་དང་དགེ་རྒན་སུ་དང་གང་ཡིན་ན་ཡང་ཆུང་བྱིས་པ་དག་གི་མི་ཚེ་དང་མདུན་ལམ་ལ་ངེས་པར་དུ་བསམ་གཞིགས་གཏོང་དགོས།ཡིད་ཕངས་པ་ཞིག་ལ་རང་རེའི་སློབ་གྲྭ་དང་དགོན་སྡེ་དག་གི་ཁྲོད་དེ་འདིའི་མི་སྣ་ཉུང་ཙམ་དུ་ཟད་པ་ནི་ཤིན་ཏུ་སྐྱོ་དགོས་པ་ཞིག་རེད་ཨང་།དེ་བས་ང་ཚོས་མདོ་དོན་སློབ་གསོ་བྱེད་ཕྱོགས་ཡར་རྒྱས་གཏོང་ཐབས་ལ་འབད་དགོས་ཏེ།དེ་ཡང་ལུས་པོ་མནར་གཅོད་ཀྱི་སློབ་གསོ་ལས་ལྡོག་པ།དབང་བསྒྱུར་དང་གཉའ་གནོན་དམིགས་འབེན་དུ་མི་འཛིན་པ།རང་དབང་དང་དམངས་གཙོའི་འདུ་ཤེས་ལ་གོང་བཀུར་བཅས་ཀྱིས་ངེས་དོན་སློབ་གསོའི་བྱེད་ཕྱོགས་ཤིག་ལག་ཏུ་བསྟར་ཐུབ་པར་སྨོན།།