རྒྱལ་ཡོངས་བོད་ཡིག་སྨྱན་སྦྱོར་ཚོགས་འདུ་སྐབས20པ་མཚོ་ལྷོ་ནས་འཚོགས།

རྩོམ་པ་པོ།   པད་ཚེ། པདྨ་མཚོ།  ཡིག་བསྒྱུར།       དུས་ཚོད།   2020-08-03   རྩོམ་ཁུངས།    སེམས་ཀྱི་ཉི་ཟླའི་བོད་ཡིག་དྲ་བ།

     ཟླ་8པའི་ཚེས3ཉིན་གྱི་སྔ་དྲོའི་ཆུ་ཚོད་9：00ཐོག   རྒྱལ་ཡོངས་བོད་ཡིག་སྨྱན་སྦྱོར་མཐུན་སྦྱོར་ལྷན་ཚོགས་ཀྱིས་གཙོ་སྒྲུབ་གནང་ཞིང་།མཚོ་ལྷོ་ཚགས་པར་ཁང་དང་། མཚོ་ལྷོ་ཁུལ་རྒྱང་སྒྲོག་བརྙན་འཕྲིན་ཁང་།མཚོ་ལྷོ་ཁུལ་བོད་ཡིག་ཆ་འཕྲིན་ལག་རྩལ་ཞིབ་འཇུག་ལྟེ་གནས།མཚོ་ལྷོ་ཁུལ་མི་རིགས་སྐད་ཡིག་བྱ་བའི་ལྟེ་གནས་བཅས་ཀྱིས་འགན་སྒྲུབ་པའི་2020ལོའི་རྒྱལ་ཡོངས་བོད་ཡིག་སྨྱན་སྦྱོར་མཐུན་སྦྱོར་ཚོགས་འདུ་སྐབས་ཉི་ཤུ་པ་མཚོ་སྔོན་ཞིང་ཆེན་མཚོ་ལྷོ་བོད་རིགས་རང་སྐྱོང་ཁུལ་གསེར་ཆེན་རྫོང་ཆབ་ཆ་གྲོང་རྡལ་ཁུལ་བོད་ཡིག་ཆ་འཕྲིན་ལག་རྩལ་ཞིབ་འཇུག་ལྟེ་གནས་སུ་འཚོགས་པ་རེད།ཐེངས་འདིའི་ཚོགས་འདུ་ལ་པེ་ཅིང་དང་ཁྲེན་ཏུའུ།  དེ་བཞིན་བོད་ལྗོངས་དང་བོད་འབྲེལ་ལས་དོན་གཙོ་གནད་ཞིང་ཆེན་གྱི་བོད་ཡིག་ཚགས་པར་ཁང་དང་།  རྒྱང་སྒྲོག་བརྙན་འཕྲིན་ཁང་།  གསར་འགྱུར་དྲ་ཚུགས་བཅས་ཀྱི་མི་100ཡས་མས་གདན་ཞུས་ལྟར་གྲོས་ཚོགས་སུ་ཞུགས།

ཚོགས་རའི་ཡུལ་དངོས།      

    ཚོགས་འདུ་རུ་མཚོ་ལྷོ་ཁུལ་ཁུལ་ཨུའི་ཧྲུའུ་ཅི་གཞོན་པའམ་ཁུལ་དྲིལ་བསྒྲགས་པུའུ་ཡི་པུའུ་ཀྲང་ཝེ་ཞིན་ཧྭ་དང་།བོད་ལྗོངས་ཉིན་རེའི་ཚགས་པར་ཁང་གི་ཏང་ཨུའི་ཨུ་ཡོན། སྤྱི་ཁྱབ་རྩོམ་སྒྲིག་པ་གཞོན་པ་བཀྲ་ཤིས་དཔལ་ལྡན་གྱིས་གསུང་བཤད་གནང་། མཚོ་ལྷོ་ཁུལ་སྲིད་གཞུང་གི་ཁུལ་དཔོན་གཞོན་པ་དཔལ་འབུམ་ཐར་གྱིས་ཚོགས་འདུ་གཙོ་སྐྱོང་གནང་། 

     མ་འོངས་ཉིན་བཞིའི་རིང་ཚོགས་ཐོག་ནས་ཚགས་པར་དང་དུས་དེབ། བརྙན་འཕྲིན་སོགས་ཀྱི་གསར་འགྱུར་བརྩམས་ཆོས་དང་ལེ་ཚན་ཁག་ལ་དཔྱད་བསྡུར་དང་སྨྱན་སྦྱོར་མཉམ་འདྲེས་འཕེལ་རྒྱས་སྐོར་གྱི་ཉམས་མྱོང་སྤེལ་རེས་བྱ་རྒྱུ།བརྡ་ཆད་གསར་པ་ཞིབ་དཔྱད་གཏན་འབེབས་བྱ་རྒྱུ་ཡིན་པ་རེད། གཞན་མཚོ་ལྷོ་ཁུལ་གསེར་ཆེན་རྫོང་ཅང་ཤེས་གྲོང་རྡལ་རྨོག་རུ་སྡེ་བ་དང་། མཚོ་ལྷོ་ཁུལ་དབུལ་སྐྱོར་ཐོན་ལས་གླིང་། མཚོ་ལྷོ་ཁུལ་གཞི་གྲངས་ཆེན་མོའི་ཐོན་ལས་གླིང་།མཚོ་ལྷོ་ཁུལ་ཉི་འོད་ནུས་པའི་གླིང་། ཁྲི་ཀ་རྫོང་ཅོག་རོང་སྡེ་བ་སོགས་སུ་སོང་ནས་ཡུལ་དངོས་བཅར་འདྲི་བྱ་རྒྱུ་རེད།  

    ཚོགས་ཞུགས་མི་སྣས་མཚོ་ལྷོ་ཁུལ་བོད་ཡིག་ཆ་འཕྲིན་ལག་རྩལ་ཞིབ་འཇུག་ལྟེ་གནས་སུ་གཟིགས་ཞིབ་གནང་བཞིན་པ།      

   གཞན་ཉིན་འདིའི་སྔ་དྲོར་ཡོངས་འཛིན་APPཔར་གཞི་གསར་པ་དང་ཡོངས་འཛིན་གཏག་ཐབས་ཀྱི་ཁྱབ་སྒྲོག་ཚོགས་འདུ་འཚོགས་པ་རེད།

      རྒྱུས་ལོན་བྱུང་བ་ལྟར་ན། རྒྱལ་ཡོངས་བོད་ཡིག་སྨྱན་སྦྱོར་མཐུན་སྦྱོར་ཚོགས་འདུ་ནི་བོད་ལྗོངས་ཉིན་རེའི་ཚགས་པར་ཁང་དང་མཚོ་སྔོན་ཉིན་རེའི་ཚགས་པར་ཁང་གིས་གྲོས་མགོ་བཏོན་ཞིང་།1998ལོ་ནས་ཕལ་ཆེར་ལོ་རེར་ཐེངས་རེར་འཚོགས་ཀྱིན་ཡོད་ལ།བོད་ལྗོངས་དང་མཚོ་སྔོན། ཀན་སུའུ། ཡུན་ནན་སོགས་ལྗོངས་ཞིང་ལྔས་རེས་སྐོར་ནས་གཙོ་སྒྲུབ་བྱེད་བཞིན་ཡོད།ཚོགས་འདུའི་ནང་དོན་གཙོ་བོ་ནི་བོད་སྐད་ཡིག་གི་ཐ་སྙད་གསར་པ་གཅིག་གྱུར་དང་ཚད་ལྡན་ངང་ཞིབ་དཔྱད་གཏན་འཁེལ་བྱ་རྒྱུ་དེ་ཡིན་ལ།བོད་སྐད་ཡིག་གི་ཕུལ་བྱུང་གསར་འགྱུར་བརྩམས་ཆོས་དཔྱད་འདེམས་དང་།སྨྱན་སྦྱོར་གྱི་ཆེད་དོན་བཅར་འདྲི་རྩ་འཛུགས་བྱེད་པ། ལྗོངས་ཞིང་ལྔའི་བོད་ཡིག་སྨྱན་སྦྱོར་བར་གྱི་མཉམ་འབྲེལ་ཉམས་མྱོང་བརྗེ་རེས་ལ་སྔར་ལས་ཤུགས་སྣོན་དང་།བོད་ཡིག་གཙོ་རྒྱུགས་སྨྱན་སྦྱོར་གསར་གཏོད་འཕེལ་རྒྱས་ཀྱི་ལམ་བུ་འཚོལ་ཞིབ། ཧུར་ཐག་གིས་ཏང་དང་རྒྱལ་ཁབ་ཀྱི་གཏམ་རྒྱུད་བརྒྱུད་སྒྲོག་དང་སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་དར་སྤེལ་གང་ལེགས་བྱས་ཏེ།བོད་ཁུལ་གྱི་བཅོས་སྒྱུར་འཕེལ་རྒྱས་ལ་གླེང་ཕྱོགས་ཀྱི་ཁོར་ཡུག་ལེགས་པོ་བསྐྲུན་ཡོད། 

      མཚོ་ལྷོ་བོད་རིགས་རང་སྐྱོང་ཁུལ་ནི་མདོ་སྨད་ཁྲི་ཤོར་རྒྱལ་མོའི་ལྷོ་ཕྱོགས་སུ་ཆགས་ཡོད་པས་མཚོ་ལྷོ་ཞེས་བཏགས་ཤིང་།མཚོ་སྔོན་ཞིང་ཆེན་གྱི་ཤར་རྒྱུད་དུ་ཆགས་ཡོད་པ་རེད།   ཁུལ་འདིའི་མངའ་ཁོངས་སུ་གསེར་ཆེན་རྫོང་དང་ཁྲི་ཀ་རྫོང་། བྲག་དཀར་རྫོང་། མང་རྫོང་། འབའ་རྫོང་བཅས་རྫོང་ཁག་ལྔ་ཡོད་ལ། ཁུལ་སྲིད་གཞུང་ནི་གསེར་ཆེན་རྫོང་གི་ཆབ་ཆ་གྲོང་རྡལ་དུ་ཆགས་ཡོད། 

     ཤེས་གསལ་ལྟར་ན།  གྲོས་ཚོགས་འདི་ཟླ་8པའི་ཚེས་6ཉིན་མཇུག་བསྡུ་རྒྱུ་རེད།

ཡོངས་འཛིན་འཚོལ་བཤེར་གནས་ས། 


分享到：QQ空间新浪微博腾讯微博人人网微信