ཁྱིམ་ཚང་གི་སློབ་གསོ་དང་སློབ་གྲྭའི་སློབ་གསོ་བར་གྱི་འབྲེལ་བའི་སྐོར་ལ་རགས་ཙམ་གླེང་བ།

        སློབ་གསོ་ཞེས་པ་ནི་རྒྱ་ཆེ་ཞིང་གཏིང་ཟབ་ལ་ནང་དོན་རྙོག་འཛིང་ཆེ་བ་ཞིག་ཡིན་པས་སྤྱི་ཚོགས་དང་སློབ་གྲྭ་ཁྱིམ་ཚང་ཕྱོགས་ཚང་མའི་ཕྱར་བ་གྲུ་འདེགས་ཀྱི་ནུས་པ་བླ་ལྷག་གཅིག་བཏོན་ཏེ་བྱིས་པའི་མ་འོངས་ལ་ཁ་ཕྱོགས་དགོས་པའི་ཚན་རིག་རང་བཞིན་ལྡན་པའི་ལས་དོན་ཞིག་རེད།  ཕྲུ་གུ་འཇིག་རྟེན་གྱི་ཐོག་སླེབས་པའི་ཐོག་མའི་སློབ་ཁང་དེ་ཁྱིམ་ཚང་ཡིན་པ་དང་། སློབ་གྲྭའི་སློབ་གསོ་ནི་རྨང་གཞི་ཡིན་ལ་གལ་ཆེན་ཡང་ཡིན།  ཁྱིམ་ཚང་གི་སློབ་གསོ་དང་སློབ་གྲྭའི་སློབ་གསོ་དབར་ཁ་བྲལ་ཐབས་མེད་པའི་འབྲེལ་བ་ཡོད།  དེར་བརྟེན་དགེ་རྒན་དང་ཁྱིམ་བདག་ཚང་མས་སློབ་གྲྭའི་སློབ་གསོ་དང་ཁྱིམ་ཚང་གི་སློབ་གསོ་ལ་དོ་ཁུར་བྱ་དགོས།

        དང་པོ། ཁྱིམ་ཚང་སློབ་གསོའི་གལ་ཆེའི་རང་བཞིན།

        བསྒྱུར་བཅོས་སྒོ་འབྱེད་བར་མ་ཆད་པར་གཏིང་ཟབ་ཏུ་འགྱུར་བ་དང་ཆབས་ཅིག་ཏུ་ཀྲུང་གོའི་མང་ཚོགས་ཀྱི་འཚོ་བ་བདེ་སྐྱིད་ཆེན་པོ་ཡོང་བ། ཁྱིམ་བདག་གིས་སློབ་གྲྭའི་སློབ་གསོ་ལ་མཐོང་ཆེན་བྱེད་བཞིན་ཡོད་པ་མ་ཟད། རྒྱུ་ནོར་དང་དུས་ཚོད་མང་པོ་བེད་སྤྱོད་བཏང་ནས་སློབ་གྲྭ་བཟང་ཤོས་དང་ཁྱད་འཕགས་ཀྱི་དགེ་རྒན་སོགས་ལ་བརྩོན་ལེན་བྱས་ཏེ་ཕྲུ་གུ་ལ་ཡག་ཤོས་ཀྱི་སློབ་གསོ་ཐོབ་པའི་རེ་བ་བཅོལ་བཞིན་ཡོད། འོན་ཀྱང་མི་རྣམས་སྤྱི་ཚོགས་ཐོག་ལས་འབྲེལ་ཆེ་བས་ཁྱིམ་བདག་མང་ཤས་ཀྱི་སློབ་གསོ་ནི་སློབ་གྲྭ་གཅིག་པུའི་ལས་འགན་ཡིན་པ་ལས་ཁྱིམ་ཚང་དང་འབྲེལ་བ་མེད་པར་སྙམ་ནས་སློབ་གསོའི་ལས་འགན་ཡོད་ཚད་སློབ་གྲྭ་དང་དགེ་རྒན་ལ་བཅོལ་ཡོད།   

        ཡིན་ན་ཡང་ཁྱིམ་བདག་ནི་བུ་ཕྲུག་གི་དགེ་རྒན་ཐོག་མ་ཡིན་པས། ཁྱིམ་ཚང་སློབ་གསོས་བུ་ཕྲུག་གི་མ་འོངས་པའི་བདེ་སྡུག་དང་ཁྱིམ་ཚང་དེའི་དར་རྒུད་སོགས་ལ་ཤུགས་རྐྱེན་གལ་ཆེན་པོ་ཐེབས་ལ།  རྒྱུན་དུ་ཁྱིམ་བདག་ཚོས་ཁྱིམ་ཚང་ནང་བུ་ཕྲུག་ལ་སློབ་གསོ་གཏོང་རྒྱུ་དེ་སྣང་མེད་དུ་འགྲོ་བཞིན་ཡོད།  མི་རིགས་གཞན་དང་ཁྱིམ་ཚང་གཞན་ལ་བསྡུར་ན་ང་ཚོའི་སློབ་གསོ་དེ་ཏོག་ཙམ་འཐུས་ཤོར་སོང་ཡོད་པ་འདྲ། ལྷག་པར་དུ་ཁྱིམ་ཚང་གི་སློབ་གསོ་འདི་སློབ་གསོ་ཐམས་ཅད་ཀྱི་རྩ་བའམ་རྨང་གཞི་ཡིན་ཕྱིར།  མི་ཞིག་ནང་བསམ་པ་དང་ཕྱིའི་བྱ་སྤྱོད་མཐའ་དག་ཡ་རབས་བཟང་སྤྱོད་ཀྱི་ཕྱོགས་སུ་ཁ་སྒྱུར་བྱེད་དགོས་ན། དང་ཐོག་ཁྱིམ་ཚང་གི་སློབ་གསོ་ལ་བརྟེན་དགོས།

        གཉིས་པ། སློབ་གྲྭའི་སློབ་གསོའི་རྨང་གཞི་དེ་ལ་ཁ་གསབ་རྒྱག་མཁན་ནི་ཁྱིམ་ཚང་གི་སློབ་གསོ་ཡིན།

        ཕྲུ་གུ་སྐྱེས་ནས་ལོ་དྲུག་བར་དུས་ཚོད་མང་ཆེ་བ་ནི་ཁྱིམ་ཚང་དུ་སོང་ཡོད། ཁྱིམ་ཚང་གིས་ཕྲུ་གུ་ལ་འཚོ་བ་དང་བསམ་བློའི་ཐོག་བག་ཆགས་ཟབ་མོ་བཞག་པ་མ་ཟད། ཁྱིམ་བདག་གིས་བུ་ཕྲུག་ལ་སྨྲ་བརྗོད་དང་། སྤྱོད་ལམ། ཤེས་རིག་བཅས་ཀྱི་བྱང་ཚད་གསུམ་གཙོ་བོར་བཟུང་ནས་མིག་དཔེ་སྟོན་པ་དང་སྐུལ་སློང་བྱེད་རྒྱུ་དེ་རྒྱུན་གཏན་དུ་འགྱུར་བ།   དམིགས་ཡུལ་ལྡན་པའི་སྒོ་ནས་ཕྲུ་གུ་སློབ་གྲྭར་སོང་བ་དང་རིག་པའི་གཞུང་ལུགས་དང་མཐུན་པའི་སློབ་གསོ་དང་ལེན་བྱེད་པ། འདིའི་སྐབས་སུ་སློབ་གྲྭའི་སློབ་གསོས་གཙོ་ཁྲིད་ཀྱི་གོ་གནས་འཛིན་ན་ཡང་། ཕྲུ་གུའི་ནར་སོན་གྱི་དུས་རིམ་དུ་ཁྱིམ་ཚང་སློབ་གསོ་ནི་མེད་དུ་མི་རུང་བ་ཞིག་ཡིན།  སློབ་གྲྭའི་སློབ་གསོ་ནི་ཁྱིམ་ཚང་གི་སློབ་གསོའི་རྒྱབ་སྐྱོར་རམ་རམ་འདེགས་དང་བྲལ་ཐབས་མེད།  དོན་དུ་ཁྱིམ་ཚང་སློབ་གསོ་ནི་སློབ་གྲྭའི་སློབ་གསོ་དང་འདྲ་བར་རིག་ཚན་ཞིག་ཡིན་ཏེ་སློབ་མའི་རྒྱུན་གཏན་གྱི་བྱ་སྤྱོད་ཐད་མིག་དཔེའི་ནུས་པ་ཐོན་ཐུབ་པའི་གནས་བབ་གལ་ཆེན་ཞིག་བཟུང་ཡོད།

        གསུམ་པ། སློབ་གྲྭའི་སློབ་གསོས་ཁྱིམ་ཚང་གིས་སློབ་གསོ་ལ་སློབ་སྟོན་གྱི་ནུས་པ་ཐོན་ཡོད།

        ཁྱིམ་ཚང་སློབ་གསོས་གཞོན་རབས་ཚོའི་ནར་སོན་དུས་རིམ་ཁྲོད་དུ་གལ་ཆེའི་ནུས་པ་ཐོན་ཡོད་པ་ནི་སྨོས་མི་དགོས། འོན་ཏེ་ཁྱིམ་ཚང་སློབ་གསོ་ནི་ཕ་མ་རྣམས་ཀྱི་སེམས་དཀར་གཞུང་དྲང་གི་གཤིས་ཀ་དང་། བག་ཆགས་བརྟན་བརླིང་གི་གོམས་སྲོལ། གནས་ལུགས་གོང་བཀུར་གྱི་མི་གཤིས། དཔའ་ཞིང་ལས་ལ་བརྩོན་པའི་སྙིང་སྟོབས་སོགས་ལ་རགས་ལས་པས། བཀག་རྒྱའི་རང་བཞིན་ལྡན་ཡོད། དེར་བརྟེན་ཁྱིམ་ཚང་སློབ་གསོ་ལ་སློབ་གྲྭའི་སློབ་གསོས་མཛུབ་ཁྲིད་བྱ་དགོས། དགེ་རྒན་གྱིས་སློབ་མ་འགའ་རེ་དང་དམིགས་བསལ་གྱི་ཁྱིམ་ཚང་ཁག་ལ་དམིགས་ཏེ་ཁོང་ཚོ་ལ་སློབ་གསོས་སློབ་་སྟོན་བྱེད་དགོས་ལ།  ཁྱིམ་བདག་གིས་ཀྱང་སློབ་གྲྭ་དང་དགེ་རྒན་སོགས་ལ་འབྲེལ་གཏུག་ཟམ་མི་ཆད་པར་བྱས་ཏེ་རྟག་དུ་ཕྲུ་གུའི་བྱ་སྤྱོད་ལ་དོ་སྣང་བྱེད་དགོས། ཁྱིམ་ཚང་གི་སློབ་གསོས་སློབ་གྲྭའི་སློབ་གསོའི་ཚབ་བྱེད་མི་ཐུབ་པས་གནས་ལུགས་ངོ་མར་ངོས་འཛིན་བྱས་པ་ཤིན་ཏུ་མི་འདང་བར་བྱིས་པའི་ཤེས་ནུས་རྩལ་གསུམ་གྱི་རེ་བ་ཡོད་ཚད་སློབ་གྲྭའི་སློབ་གསོ་ལ་བཅོལ་ཡོད།

        མདོར་ན།  སློབ་གསོའི་དམིགས་ཡུལ་ཐོག་ནས་བཤད་ན།སློབ་གྲྭའི་སློབ་གསོ་དང་ཁྱིམ་ཚང་གི་སློབ་གསོ་གཉིས་ཀྱི་དམིགས་ཡུལ་ནི་གཅིག་གྱུར་ཡིན་དགོས།ཁྱིམ་བདག་གིས་ཕྲུ་གུ་སློབ་གྲྭར་བཏང་ནས་སློབ་གྲྭས་ཕྲུ་གུ་ཕན་ནུས་ལྡན་པའི་མི་སྣ་ཞིག་གསོ་སྐྱོང་ཐུབ་པའི་རེ་བ་ལྷད་མེད་དུ་བཅངས།སློབ་གྲྭ་ཡང་ངེས་པར་དུ་སློབ་མའི་སློབ་གསོ་ལ་འགན་ཁུར་བྱེད་དགོས།ཁྱིམ་ཚང་དང་སློབ་གྲྭ་གཉིས་ནི་ཕྲུ་གུ་ནར་སོན་གྱི་དུས་རིམ་ཁྲོད་དུ་སློབ་མའི་སེམས་ཁམས་ལ་བག་ཆགས་འཇོག་པའི་ཕྱིའི་རྒྱུ་རྐྱེན་གཙོ་བོ་ཡིན།དེར་བརྟེན་དེ་གཉིས་ཀྱིས་སློབ་མ་ལ་རེ་འདུན་མགྲིན་གཅིག་ཏུ་འདོན་དགོས།

        མི་ཞིག་གི་ངོས་ནས་བཤད་ན་རང་གཤིས་ནི་བསྒྱུར་ཐབས་དཀའ་བ་ཞིག་ཡིན་ཞེས་པ་ནི་ང་ཚོས་ཁས་ལེན་བྱས་ཆོག་པ་ཡིན་མོད། འོན་ཀྱང་མི་དེའི་བྱང་ཚད་དང་ཤེས་ཚད་སོགས་ནི་སྐྱེས་དུས་ནས་དེ་ལྟ་བུ་རེད་ཅེས་བརྗོད་ན་ཕལ་ཆེར་མི་འཐད་པར་སེམས། དེས་ན་ང་ཚོས་སློབ་གསོའི་ཐོག་ནས་མི་དེའི་བྱང་ཚད་དང་ཤེས་ཚད་སོགས་ལ་བསྒྱུར་བཅོས་བྱེད་ཐུབ་པ་ཡིན། འོ་ན་གཙོ་བོའི་སློབ་གསོ་ནི་གང་ལ་འཛིན་དགོས་ཤེ་ན། ཁྱིམ་ཚང་གི་སློབ་གསོ་དང་སློབ་གྲྭའི་སློབ་གསོ་གཉིས་གཙོ་བོར་འཛིན་དགོས། དེ་གཉིས་འབྲེལ་འདྲིས་དམ་པོ་དང་ཕན་ཚུན་འབྲེལ་སྦྱོར་བྱས་ནས་ཕྲུ་གུ་ལ་སློབ་གསོ་ལེགས་པོ་ཞིག་སྦྱིན་དགོས་པ་མ་ཟད། ཕྱོགས་གང་ཐད་ནས་ཕྲུ་གུ་ལ་གཤིས་བཟང་གི་སྤྱོད་ཡོན་ལྡན་པ་ཞིག་གསོ་སྐྱོང་བྱ་དགོས་སོ།