སེམས་ཀྱི་ཉི་ཟླའི་གྲོང་མིས་རང་འབབ་ཆུ་མཁོ་འདོན་རྒྱུན་ལྡན་མིན་པ་ཡར་ཞུ་བྱས་པ་ལ་ཆུ་ཕྱིར་གཏོང་ཀུང་སིས་འདི་ལྟར་ལན་བཏབ་འདུག

        སེམས་ཀྱི་ཉི་ཟླ་བོད་ཡིག་དྲ་བའི་འཕྲིན། ཉེ་བའི་ཉིན་ཤས་རིང་།   སེམས་ཀྱི་ཉི་ཟླ་གྲོང་ཁུལ་གྱི་ཡུག་ཁུལ་མང་པོའི་མང་ཚོགས་ཀྱིས་སྡོད་གནས་བྱས་ཡོད་པའི་ཡུག་ཁུལ་གྱི་རང་འབབ་ཆུ་མཁོ་འདོན་རྒྱུན་ལྡན་མིན་པས་དུས་རྒྱུན་གྱི་འཚོ་བ་ལ་ཤུགས་རྐྱེན་ཐེབས་ཡོད་པ་ལ་འབྲེལ་ཡོད་སྡེ་ཚན་གྱིས་ཐག་གཅོད་བྱེད་རོགས་ཟེར་འདུག

        སེམས་ཀྱི་ཉི་ཟླ་གྲོང་ཁྱེར་སློབ་འབྲིང་དང་པོའི་འགྲམ་དུ་སྡོད་ཡོད་པའི་ཨ་ཅག་ཧོ་ཡིས་ཟེར་བ་ལྟར་ན།  ད་ལོའི་ཚུན་དུ། སློབ་འབྲིང་དང་པོ་དང་འབྲི་ཆུ་ལམ་གྱི་ཡུག་ཁུལ་དུ་རང་འབབ་ཆུ་མཁོ་འདོན་རྒྱུན་ལྡན་མིན་པས་དུས་རྒྱུན་གྱི་འཚོ་བ་ལ་སྟབས་མི་བདེ་བ་མང་པོ་བཟོས་ཡོད་དེ།  ཁོ་ཚོ་སྡོད་གནས་བྱས་ཡོད་པའི་ཡུག་ཁུལ་གྱི་རང་འབབ་ཆུ་དུས་རྒྱུན་གནོན་ཤུགས་ཆུང་པ་དང་ ཐོག་ཁང་གཉིས་པའི་སྟེང་གི་ཉི་ནུས་ཆུ་འཐེན་འཕྲུལ་འཁོར་ནང་དུ་གནོན་མི་ཐུབ། དེའི་ཕྱིར་ གྲོང་མི་མི་ཉུང་བ་ཞིག་གིས་ཁྱིམ་དུ་གནོན་སྣོན་ཕུམ་སྒྲིག་སྦྱོར་བྱས་ཡོད།  ཁྱད་པར་དུ་གཟའ་མཇུག་སླེབས་སྐབས་ཡུག་ཁུལ་དེར་རྟག་ཏུ་ཆུ་ཆད་པས་ཕྱིར་རོལ་ནས་ཆུ་ལེན་བར་འགྲོ་དགོས་པ། ཡུག་ཁུལ་དེར་སྐྲ་བཞར་ཁང་བདག་གཉེར་བྱས་ཡོད་པའི་ཚོང་དཔོན་ཐུང་གིས་ཀྱང་ཆུ་མཁོ་འདོན་རྒྱུན་ལྡན་མིན་པས་ཚོང་ལ་ཤུགས་རྐྱེན་ཐེབས་ཡོད་ཞེས་ཟེར་འདུག

        གསར་འགོད་པས་ཡུལ་དངོས་སུ་བཅར་འདྲི་བྱས་པ་ལས་ཤེས་གསལ་བྱུང་དོན།  ཡུག་ཁུལ་དེར་ད་ལོའི་ཚུན་དུ་ཆུ་མཁོ་འདོན་རྒྱུན་ལྡན་མིན་པ་དང་གྲོང་མི་རྣམས་ཀྱིས་རང་འབབ་ཆུ་ཀུང་སི་དང་ཆུ་ཚོད་བཤུས་ནས་ཆུ་རིན་བསྡུ་མཁན་ལས་བྱེད་མི་སྣར་ཡར་ཞུ་ཐེངས་མང་བྱས་ཡོད་ཀྱང་ཐག་གཅོད་བྱེད་ཐུབ་མེད།

        ཆུ་དཀོན་པའི་གནད་དོན་འཕྲད་པ་ད་དུང་འོ་མ་མཚོ་ཡུག་ཁུལ་དང་གྱང་མཁར་ལམ་ཡུག་ཁུལ་གྱི་གྲོང་མི་དག་ཡོད་དེ།  ཚང་མས་ཡུག་ཁུལ་དེ་དག་ཏུ་ཉིན་མོར་ཆུ་ཧ་ལམ་མེད་པ་དང་།  དགོང་མོའི་ཆུ་ཚོད་11ཡས་མས་ཆུ་མཁོ་འདོན་རྒྱུན་ལྡན་ཙམ་ཡོང་གི་ཡོད།  གྱང་མཁར་ཡུག་ཁུལ་དུ་སྡོད་ཡོད་པའི་སྐུ་ཞབས་མཱ་ཚང་གི་སྒོ་རའི་ནང་ཆུ་བླུགས་ཡོད་པའི་ཆུ་ཟོ་མང་པོ་བཞག་ཡོད་པ་དང་།  ཁོ་ཡིས་ངའི་ཚང་གིས་དགོང་མོའི་ཆུ་ཚོད་གཉིས་གསུམ་ཐོག་ཡར་ལངས་ཏེ་ཆུ་གསོག་ཉར་བྱས་པ་དང་། ཉིན་མོར་ཆུ་འདི་དག་ལ་བརྟེན་ནས་རྒྱུན་ལྡན་གྱི་འཚོ་བར་ཆུ་བཀོལ་བར་ཁག་ཐེག་བྱེད་ཀྱིན་ཡོད། གཟའ་མཇུག་སླེབས་དུས་གོས་ཕྱིར་བཀྲུ་དགོས་པ་དང་ཆུ་མཁོ་འདོན་རྒྱུན་ལྡན་མིན་པས་འཚོ་བ་ལ་སྟབས་མི་བདེ་མང་པོ་བཟོས་འདུག་ཞེས་ཟེར་འདུག

        མང་ཚོགས་ཀྱི་ཡར་ཞུས་བྱས་པའི་གནད་དོན་ལ་དམིགས་ནས་གསར་འགོད་པས་སེམས་ཀྱི་ཉི་ཟླ་གྲོང་ཁྱེར་ཆུ་མཁོ་འདོན་དང་ཕྱིར་གཏོང་ཀུང་སིར་གནས་ཚུལ་རྒྱུས་ལོན་བྱུང་བར་སོང་སྐབས།  སེམས་ཀྱི་ཉི་ཟླ་གྲོང་ཁྱེར་ཆུ་མཁོ་འདོན་དང་ཕྱིར་གཏོང་ཀུང་སིའི་སྤྱི་ཁྱབ་ཅིང་ལི་གཞོན་པ་བདེ་ཆེན་གྱིས་གྲོང་མི་དག་གི་ཡར་ཞུས་བྱས་པའི་གནད་དོན་ནི་ཀུང་སིས་རྒྱུན་ལོན་བྱས་ཡོད་པ་དང་ཐོག་མཐའ་བར་གསུམ་དུ་གྲལ་བཤེར་དང་ཐག་གཅོད་ཧུར་ཐག་བྱེད་བཞིན་ཡོད་ཞེས་ཟེར།

        བདེ་ཆེན་གྱི་ཟེར་བ་ལྟར་ན། གོང་གི་ཆུ་མཁོ་འདོན་གནད་དོན་བྱུང་བ་ལ་རྒྱུ་མཚན་མང་པོ་ཡོད་སྲིད་དེ།  འོ་མ་མཚོ་ཡུག་ཁུལ་གྱི་རང་འབབ་ཆུའི་ཆུ་སྦུག་གི་འགག་སྒོ་དང་སྦུག་ལམ་ལ་གནད་དོན་བྱུང་བས། ཆུ་གནོན་ཆུང་བ་དང་ཆུ་ཆད་པའི་གནད་དོན་བྱུང་ཡོད།  ཀུང་སིས་ཐོག་མཐའ་བར་གསུམ་དུ་གྲལ་བཤེར་བྱེད་བཞིན་ཡོད་ལ། སྔོན་དཔག་བྱས་ན་གཟའ་འཁོར་གཅིག་གི་ཡས་མས་སུ་ཉམས་གསོ་བྱེད་དེ་རྒྱུན་ལྡན་ལྟར་ཆུ་མཁོ་འདོན་བྱེད་ཐུབ་རྒྱུ་རེད།

        གྱང་མཁར་ཡུག་ཁུལ་དང་སློབ་འབྲིང་དང་པོའི་ཡུག་ཁུལ་དུ་བྱུང་བའི་ཆུ་ཆད་པ་དང་ཆུ་མཁོ་འདོན་རྒྱུན་ལྡན་མིན་པའི་རྒྱུ་མཚན་ལ་ ཕྱོགས་གཅིག་ནས་གྲོང་ཁུལ་གྱི་ས་ཁུལ་ཁ་ཤས་ཀྱི་ཆུ་འདོན་ཆུ་ཁུངས་ལེགས་སྒྲིག་བྱས་ཡོད་པ་དང་། ཆུ་སྦུག་བསྒྱུར་བཅོས་བྱེད་བཞིན་ཡོད་པས་སྦུག་དྲ་གསར་རྙིང་འབྲེལ་མཐུད་བྱེད་མི་ཐུབ་པས་བར་མཚམས་རང་བཞིན་གྱི་ཆུ་ཆད་པ་དང་ཆུའི་གནོན་ཤུགས་མི་འདང་བ་སོགས་ཀྱི་གནས་ཚུལ་བྱུང་བ་རེད།  དེ་དང་ཆབས་གཅིག་གྲོང་ཁུལ་གྱི་བགྲོད་ལམ་དང་འོད་འཁྲིད་ཚི་སྐུད་འདིང་བ་སོགས་ཀྱི་རྣམ་གྲངས་ཁ་ཤས་ཀྱིས་རང་འབབ་ཆུ་ཀ་ལ་དྲ་བ་འབྲེལ་མཐུད་བྱེད་པའི་མྱུར་ཚད་ལའང་ཤུགས་རྐྱེན་ངེས་ཅན་ཐེབས་ཡོད། འབྲེལ་ཡོད་སྡེ་ཚན་གྱིས་རང་འབབ་ཆུ་ཀ་ལ་སྦུབས་ལམ་བསྒྱུར་བ་དང་སྦུག་དྲ་འབྲེལ་མཐུད་བྱེད་ཚད་མགྱོགས་སུ་གཏོང་བཞིན་ཡོད་ལ། གྲོང་མིའི་རྒྱུན་ལྡན་གྱི་ཆུ་མཁོ་འདོན་གང་མགྱོགས་སླར་གསོ་བྱ་རྒྱུ་རེད།  ཕྱོགས་གཞན་ཞིག་ལ་ཉེ་དུས་ཆར་ཆུ་མང་དུ་ཕྱིན་ནས་ཆུའི་འབྱུང་ཁུངས་ཅུང་ཉོག་རྫོབ་ཡིན་ཏེ་སེམས་ཀྱི་ཉི་ཟླའི་ཆུའི་བཟོ་གྲྭ་དང་པོ་དང་གཉིས་པའི་ཆུ་སྤུས་ཐག་གཅོད་བྱེད་པར་ནམ་རྒྱུན་ལས་དུས་ཚོད་མང་པོ་དགོས་པས། ཆུ་སྤུས་ལ་ཁག་ཐེག་བྱེད་ཆེད། ཆུ་མཁོ་འདོན་བྱེད་ཚད་ཇེ་ཉུང་དུ་སོང་ནས་ཆུ་གནོན་ཇེ་དམའ་རུ་འགྲོ་སྲིད། མིག་སྔར་ཀུང་སིས་གྲོང་ཁུལ་གྱི་ཆུ་མཁོ་འདོན་བཀོད་གཏོང་ཐབས་བྱེད་བཞིན་ཡོད་པ་དང་གང་ཐུབ་ཀྱིས་གྲོང་ཁུལ་གྱི་ཡུག་ཁུལ་ཁག་གི་ཆུའི་གནོན་ཤུགས་བལྟོས་བཅས་ཀྱི་དོ་མཉམ་རྒྱུན་འཁྱོངས་བྱེད་དུ་འཇུག་རྒྱུ།

         བདེ་ཆེན་གྱིས་མང་ཚོགས་ཀྱི་ཡར་ཞུས་བྱས་པའི་གནད་དོན་དག་ཀུང་སིས་ནུས་ཤུགས་ཡོད་རྒུས་རྩད་ཞིབ་ཐག་གཅོད་བྱེད་བཞིན་ཡོད་པ་དང་རང་འབབ་ཆུ་དང་འབྲེལ་བའི་གནད་དོན་འཕྲད་ན་ཁ་པར་ཨང་གྲངས་8222150དང་8227006རྒྱབ་ནས་ཡར་ཞུས་བྱེད་ཆོག་ཞེས་བསྟན་འདུག