སེམས་ཀྱི་ཉི་ཟླའི་ཁ་བའི་མཛེས་ལྗོངས་ནི་མིག་གི་ལོངས་སྤྱོད་ཅིག་ཡིན།

  ཉེ་ཆར། སེམས་ཀྱི་ཉི་ཟླར་དགུན་འགོ་ཚུགས་རྗེས་ཀྱི་ཁ་བ་ཐོག་མ་བསུས་ཡོང་ལ། རྒྱལ་ཐང་ལུང་བ་རེ་ཞིག་དངུལ་དཀར་གྱི་འཇིག་རྟེན་ཞིག་ཏུ་བཏང་།

    ཞོགས་པའི་ཉི་ཟེར་ཁྲོད་ན་གསེར་འོད་ལམ་ལམ་གྱི་དགའ་ལྡན་སུམ་རྩེན་གླིང་དང་། དྲོད་འཇམ་ཉི་འོད་ཁྲོད་ན་རླངས་པ་ལང་ལོང་འཁོར་བའི་ནགས་ཕག་མཚོ། དེ་མིན་ནམ་རྒྱུན་ང་ཚོའི་དགོད་སྒྲ་དང་འཛུམ་པ་བསྐྱུར་སའི་ཤམྦྷ་ལ་སྤྱི་གླིང་བཅས་ཀྱིས་སེམས་ཀྱི་ཉི་ཟླའི་ཁ་རྗེས་ཀྱི་མཛེས་རིས་ཤིག་གྲུབ་འདུག

    ཉིན་འདིར། རྗིད་ཆགས་ཀྱི་ཤྭ་ཁ་རི་བོ་ཡང་དེ་སྔོན་ཚོན་མདོག་གི་མཛེས་པ་ལ་ཆགས་འདྲའི་གཞོན་སྐྱེས་དང་མི་འདྲ་བར་ཁ་རྗེས་ཀྱི་ཉི་འོད་ཁྲོད་ན་ཞི་དུལ་དང་བགས་ཕབ་ཀྱི་བགྲོས་པོ་ཞིག་གིས་ཉི་འོད་ཀྱི་དྲོད་ཁོལ་ལ་རོལ་བཞིན་པ་དང་གཉིས་སུ་མ་མཆིས། རི་བོའི་འདབས་རོལ་ན་ལྷིང་འཇགས་ཀྱིས་ཡོད་པའི་གྲོང་ཚོ་དག་དུ་ཨ་མས་ནངས་ཇ་བསྐོལ་བའི་དུ་བ་དང་ཨ་ཕས་བཏང་བའི་ལྷ་བསང་གི་བསང་དུད་ལྷོད་ཀྱིས་མཁའ་རུ་མཆེད་བཞིན་པ་མཐོང་ལ། སླས་ར་ནས་བཏང་བའི་མཛོ་དང་མཛོ་མོ་དག་ཀྱང་སྙན་པའི་ཁྲོལ་སྒྲ་སིལ་སིལ་གྱིས་རྩྭ་རིའི་ཕྱོགས་སུ་དལ་གྱིས་རྒྱུ་བཞིན་པ་མཐོང་། དེ་མིན་ཁྱུ་དང་ཁྱུ་བྱས་ནས་ཡོད་པའི་མཚོ་བྱ་དང་དུས་བྱ་དེ་དག་གིས་ཡང་ཉི་འོད་འཇམ་པོའི་ཁྲོད་ན་སྒྲོ་སྤུ་སྤུར་སྤུར་དང་གཤོག་ཟུང་ལྡེབ་ལྡེབ་ཙམ་བྱས་ནས་ཉིན་གཅིག་གི་རྒུན་འབུ་འཐུ་བར་གྲ་སྒྲིག་བྱེད་བཞིན་ཡོད། འདི་དག་ནི་སེམས་ཀྱི་ཉི་ཟླའི་དགུན་འགོའི་གྲང་ངར་ཆེ་བའི་ཞོགས་པ་འདིའི་དྲོད་ཁོལ་གྱི་སྣང་བ་ཐེངས་ཤིག་ཡིན་ལ། ལྷག་ཏུ་སེམས་ཀྱི་ཉི་ཟླའི་ཁ་རྗེས་ཀྱི་མིག་དབང་འཕྲོག་པའི་རང་བྱང་བྱུང་གི་མཛེས་རིས་ཡུག་གཅིག་ཡིན།