བདེ་ཆེན་བོད་ཡིག་སློབ་འབྲིང་གིས་ཕ་སྐད་གཙང་མའི་གཏམ་བཤད་འགྲན་བསྡུར་སྤེལ།

    ཐེངས་འདིའི་གཏམ་བཤད་འགྲན་བསྡུར་ནི་དམའ་འབྲིང་དང་མཐོ་འབྲིང་གི་ཚོ་ཆུང་གཉིས་སུ་བགོས་ཡོད་ལ། བསྡོམས་པས་སློབ་མ་36ཐེངས་འདིའི་འགྲན་བསྡུར་ལ་ཞུགས་འདུག  དེའི་ཁྲོད་དུ་དམའ་འབྲིང་གི་སློབ་མ་16དང་མཐོ་འབྲིང་གི་སློབ་མ་20ཡོད་པ་རེད། དེ་ཡང་སློབ་མ་རྣམས་ཀྱིས་བདེ་ཆེན་ཁུལ་གྱི་མངོན་མིན་རིག་གནས་ཤུལ་གྱི་ནང་དོན་ནས་དམིགས་ནས་གཏམ་བཤད་ཀྱི་བརྗོད་བྱ་དེ་དར་བཤད་དང་སྐོར་བྲོ། ཉི་ཤར་བྱམས་གླུ། ཐང་ག  སྐད་ཡིག་སོགས་ནང་དོན་འདུས་ཡོད།

དཔྱད་བདེམས་པས་ནན་ཏན་གྱིས་གཏམ་བཤད་ལ་གསན་བཞིན་པ།

    ཐེངས་འདིའི་གཏམ་བཤད་འགྲན་བསྡུར་དེ་ཡང་གོ་རིམ་ལྡན་ལ་ཧ་ཅང་ཚད་ལྡན་ཡིན་ཏེ། ས་གནས་ཀྱི་བོད་རང་གི་སྐད་དང་ཡི་གེ  སྲོལ་རྒྱུན་རིག་གནས་བཅས་ལ་རྒྱུས་ལོན་གཏིང་ཟབ་ཡོད་པའི་མཁས་པ་དང་རིག་གཞུང་ཞིབ་འཇུག་པ། དགེ་རྒན་སོགས་མི་སྣ་གྲགས་ཅན་འགའ་དཔྱད་འདེམས་པར་གདན་འདྲེན་ཞུས་ཡོད་ལ། དཔྱད་འདེམས་པ་རྣམས་ཀྱིས་འགྲན་ཞུགས་སློབ་མ་རེ་རེའི་གཏམ་བཤད་ཀྱི་ནང་དོན་དང་གྱོན་གོས། ཕྱི་ལུས་ཀྱི་ཉམས་འགྱུར། སྐད་གདངས་ཀྱི་མཐོ་དམའ། སྨྲ་ལྕེ་དག་མིན་སོགས་ཕྱོགས་བསྡུས་ཀྱི་སྒོ་ནས་སྐར་མ་རྒྱག་པ་རེད།

ཡུན་ནན་བོད་བརྒྱུད་ནང་བསྟན་སློབ་གླིང་གི་རྒྱུན་ལས་ཡོན་ཀྲང་གཞོན་པ་ཨ་པ་ལགས་ཀྱིས་དཔྱད་བརྗོད་གནང་བ།

བདེ་ཆེན་ཉིན་རེའི་ཚགས་པར་ཁང་གི་སྤྱི་ཁྱབ་རྩོམ་སྒྲིག་གཞོན་པ་པདྨ་ཚེ་རིང་གིས་དཔྱད་བརྗོད་གནང་བ།

     འགྲན་ཞུགས་སློབ་མ་སོ་སོས་གཏམ་བཤད་བྱས་ཚར་རྗེས་དཔྱད་འདེམས་པའི་ཚབ་བྱེད་མི་སྣ་སྟེ་ཡུན་ནན་བོད་བརྒྱུད་ནང་བསྟན་སློབ་གླིང་གི་རྒྱུན་ལས་ཡོན་ཀྲང་གཞོན་པ་ཨ་པ།བདེ་ཆེན་ཉིན་རེའི་ཚགས་པར་ཁང་གི་སྤྱི་ཁྱབ་རྩོམ་སྒྲིག་གཞོན་པ་པདྨ་ཚེ་རིང་གིས་སྤྱིའི་ཆ་ནས་འགྲན་ཞུགས་སློབ་མ་ཚོའི་གཏམ་བཤད་བྱེད་པའི་སྐབས་ཀྱི་མི་འདང་ས་དང་མཉམ་འཇོག་བྱ་དགོས་སར་ཕྱོགས་བསྡོམས་རང་བཞིན་གྱི་དཔྱད་བརྗོད་བྱས་པར་མ་ཟད།ཞོར་དུ་བོད་མི་རིགས་ཀྱི་སྲོལ་རྒྱུན་རིག་གནས་རྒྱུན་འཛིན་གྱི་གལ་ཆེའི་རང་བཞིན་དང་དགོས་ངེས་རང་བཞིན་སྐོར་གྱི་གཏམ་བཤད་གལ་ཆེན་གནང་པས་སློབ་མ་རྣམས་ཀྱིས་དགའ་བསུ་ཆེན་པོ་ཐོབ་པ་རེད།