འཇོལ་ནས་ཁ་བ་དཀར་པོ་གནས་མཆོད་མཛད་སྒོ་སྐབས་དྲུག་པ་སྤེལ་བ།

    སེམས་ཀྱི་ཉི་ཟླ་བོད་ཡིག་དྲ་བ། ཟླ་5པའི་ཚེས་30ཉིན་གྱི་ཞོགས་པར། འཇོལ་རྫོང་རིག་གནས་དང་ཡུལ་སྐོར་ཅུས་ཀྱིས་གཙོ་གཉེར་བྱས་པ་དང་། རྫོང་མངོན་མིན་རིག་གནས་ཤུལ་བཞག་སྲུང་སྐྱོང་ལྟེ་གནས་ཀྱིས་སྒྲུབ་འགན་འཁུར་ནས། ལོ་ངོ་བརྒྱ་ཡི་ཡུན་དུ་གཟི་བརྗིད་ངོམས། གནས་ཆེན་མཆོད་འབུལ་བྱས་ཏེ་སྨོན་ལམ་བཏབ་ཞེས་པ་བརྗོད་གཞི་བྱས་ནས་འཇོལ་རྫོང་གི་ཁ་བ་དཀར་པོ་གནས་མཆོད་མཛད་སྒོ་སྐབས་དྲུག་པ་དགོན་པ་སྟེང་ནས་སྤེལ་བ་རེད།

    རྒྱུས་ལོན་བྱུང་བ་ལྟར་ན། འཇོལ་རྫོང་གི་གནས་མཆོད་མཛད་སྒོ་དེ་2014ལོའི་ཟླ་12པར་རྒྱལ་སྲིད་སྤྱི་ཁྱབ་ཁང་གིས་རྒྱལ་ཁབ་རིམ་པའི་མངོན་མིན་རིག་གནས་ཤུལ་བཞག་གི་མཚོན་བྱེད་རང་བཞིན་གྱི་རྣམ་གྲངས་མིང་གཞུང་ནང་བཅུག་པ་རེད། 2016ལོའི་ཟླ་5པའི་ཚེས་13ཉིན་འཇོལ་རྫོང་སྐབས་བཅུ་གསུམ་པའི་མི་དམངས་སྲིད་གཞུང་གི་རྒྱུན་ལས་ཚོགས་འདུ་ཐེངས་23པའི་ཐོག་ལོ་ལྟར་སྤྱི་ཟླ་5པའི་ཚེས་30ཉིན་དེ་ཁ་བ་དཀར་པོའི་གནས་མཆོད་ཉིན་མོར་གཏན་འཁེལ་བྱ་རྒྱུའི་རྩ་དོན་ལ་མོས་མཐུན་བྱས་པ་རེད།

    འཇོལ་རྫོང་གི་ཁ་བ་དཀར་པོ་གནས་མཆོད་མཛད་སྒོ་ནི་སྲོལ་རྒྱུན་གྱི་དམངས་སྲོལ་བྱེད་སྒོ་ཞིག་ཡིན་པ་དེ་ཐོག་ནས་མི་དང་རང་བྱུང་ཁམས་ཞི་མཐུན་མཉམ་གནས་དང་མི་དམངས་ཀྱིས་མཛེས་སྡུག་ལྡན་པའི་འཚོ་བར་བསྔགས་བརྗོད་དང་སྨོན་ལམ་འདེབས་པ་མཚོན་པ་དང་།བྱེད་སྒོའི་ཁྲོད་དུང་སྒྲ་དང་། རྔ་སྒྲ  ཆོས་སྒྲ་སོགས་གངས་རི་དང་གྲོག་རོང་དུ་ཁེངས་བ་དང་། བོད་ཀྱི་ཕོ་གསར་རྣམས་ཀྱིས་ལུས་ལ་གཟབ་ཤོས་ཀྱི་གྱོན་ཆས་སྤྲས་ནས་ལག་ཏུ་གྲི་རིང་པོ་ཐོགས་ཏེ་གྲི་བཤད་བྱས་པ་དང་། སྲོལ་རྒྱུན་གྱི་རིག་གནས་ཀྱིས་ཡུལ་སྐོར་བ་མི་ཉུང་བ་ཞིག་གི་ཡིད་དབང་བཀུག་པས། ལྟད་མོ་ལྟ་མཁན་དང་པར་རྒྱག་མཁན་ཧ་ཅང་མང་བ་རེད།