ཧྲུའུ་ཅི་བཟང་བོ་བཀྲ་ཤིས་ནོར་བུ།

    བཀྲ་ཤིས་ནོར་བུ་ནི་ཧྥོ་ཧྲན་ཤང་ལྕགས་ཕུགས་གྲོང་ཚོའི་ཏང་སྤྱི་ཁྱབ་ཀྲི་པུའུ་ཧྲུའུ་ཅི་ཡིན། ཧྥོ་ཧྲན་ཤང་གི་དབུལ་སྒྲོལ་འགག་སྒྲོལ་དང་གཞི་རིམ་ཏང་འཛུགས་སྐྱོང་། ཕྱོགས་བསྡུས་བཅོས་སྐྱོང་དང་བརྟན་ལྷིང་སྲུང་སྐྱོང་སོགས་ཀྱི་ཐད་དགེ་མཚན་ལྡན་པའི་ལེགས་སྐྱེས་ཕུལ་ཡོད། ལྕགས་ཕུགས་གྲོང་ཚོའི་ཏང་སྤྱི་ཁྱབ་ཀྲི་པུའུ་ཧྲུའུ་ཅི་འགན་འཁུར་རྗེས་བཀྲ་ཤིས་ནོར་བུས་ཉིན་མཚན་མེད་པར་5+2དཔེ་དབྱིབས་ལ་བརྟེན་ནས་ལས་དོན་སྤེལ་བ་ཞིང་ཉིན་ལྟར་འབྲེལ་ཡོད་སྲིད་ཇུས་སློབ་སྦྱོང་བྱེད་པ་ཕུད་རྟག་ཏུ་གྲོང་ཚོའི་ཨུ་ལྷན་གཉིས་ཀྱི་ལས་བྱེད་པ་དང་སློབ་སྦྱོང་སྤེལ་རེས་བྱས་ཏེ། དུས་དང་རྣམ་པ་ཀུན་ཏུ་དུད་ཚང་དུ་བཅར་འདྲི་བྱས་ནས་གནས་ཚུལ་ཤེས་རྟོགས་བྱས་ལ། དུས་ཚོད་ཐུང་ཤོས་ནང་གྲོང་ཚོའི་གནས་ཚུལ་དང་དུད་ཚང་གི་གནས་ཚུལ་ཁོང་དུ་ཆུད་པ་བྱས།

    ལོ་རྒྱུས་ཐོག་ལུས་པའི་གནད་དོན་ཐད་འགལ་བ་དང་རྩོད་གཞི་སྣ་ཚོགས་བཀྲ་ཤིས་ནོར་བུས་ཏང་འཛུགས་སྐྱོང་ལ་དམ་འཛིན་གྱི་སྒོ་ནས་རྩོད་གཞི་སེལ་རྒྱུར་སྐུལ་འདེད་གཏོང་བའི་ལས་ཀའི་བྱེད་སྟངས་སྤྱད་དེ། ཏང་སྤྱི་ཁྱབ་ཀྲི་པུའུ་ཡིས་ཡན་ལག་པུའུ་ལ་དོ་དམ་དང་།གྲོང་ཚོའི་ཨུ་ལྷན་གཉིས་ཀྱི་ཚན་ཁག་གཞན་དག་དང་དེ་བཞིན་འབྲེལ་ཡོད་མི་སྣ་དང་འབྲེལ་གཏུག་ཞིབ་འཇུག་ཧུར་ཐག་བྱས་ཏེ། འགལ་བ་དང་རྩོད་གཞི་ཐེངས་70ལྷག་ཙམ་མཐུན་སྦྱོར་ཐག་གཅོད་བྱས་ལ། ཐེངས་67འགྲིག་མཐུན་བྱུང་དུ་བཅུག་ཅིང་། ལེགས་གྲུབ་བྱུང་ཚད་96%ཟིན་པ་རེད།ཁམ་སྡོང་ར་བ་ནས་མདའ་རྩེད་འགྲན་ཞེས་པའི་མདའ་རྩེད་དུས་ཆེན་སྐབས་3གཉེར་ཞིང་། མདའ་འཕེན་འགྲན་བསྡུར་དང་པི་ཝང་འགྲན་བསྡུར་ཀྱི་བྱེད་སྒོ་སྤེལ་བརྒྱུད་ཕྱི་ནས་ཡོང་བའི་མི་སྣ་འབོར་ཆེན་ཞིག་བཀུག་པ་དང་གྲོང་ཚོ་དེའི་འཛད་སྤྱོད་ལ་སྐུལ་མ་ཐེབས་ནས། ཞིང་དུད་ཀྱི་ཡོང་འབབ་མང་དུ་ཕྱིན་ཡོད་པ་རེད།  

    ཐོན་ལས་དབུལ་སྐྱོར་དེ་དབུལ་སྒྲོལ་འགག་སྒྲོལ་གྱི་དམ་འཛིན་བྱ་གཞི་གཙོ་ཆེ་ཤོས་དང་གཞི་རྩའི་ཐབས་ཇུས་ཡིན་ལ།  ཁྱད་ལྡན་འདེབས་འཛུགས་དང་གྲོང་གསེབ་ཡུལ་སྐོར་གྱིས་གཙོ་བོ་བྱས་པའི་དབུལ་སྐྱོར་ཐོན་ལས་འཕེལ་རྒྱས་མགྱོགས་སུ་བཏང་ནས་འདེབས་འཛུགས་ལས་རིགས་དང་ཁྱད་ལྡན་གསོ་སྤེལ་ལས་རིགས་ཁྱབ་གདལ་ཧུར་ཐག་བཏང་བྱས་པ་རེད། རིམ་རྩིས་བྱས་པ་ལྟར་ན་ཡིག་ཚགས་དང་གཱ་བཟོས་པའི་དུད་ཚང་གི་ཐོན་ལས་ལ་ཁ་གསབ་མ་དངུལ་སྒོར་ཁྲི་95.3775སྤྲད་པ་དང་། གྲོང་ཚོ་རིམ་པའི་མཉམ་སྡེབ་དཔལ་འབྱོར་འཕེལ་རྒྱས་དང་སྟོབས་ཆེར་བཏང་ནས་རིམ་རྩིས་བྱས་ན་ཆེད་དོན་དབུལ་སྐྱོར་མ་དངུལ་སྒོར་ཁྲི་200བཏང་སྟེ་2018ལོའི་མཉམ་སྡེབ་དཔལ་འབྱོར་ཡོང་འབབ་ཁྱོན་སྒོར་ཁྲི་14ཟིན་པ་དང་།2020ལོར་སྨན་རི་ཞའོ་ཏ་ཧུའུ་གསར་སྤེལ་ཚད་ཡོད་ཀུང་སིར་མ་དངུལ་སྒོར་ཁྲི་100བཏང་ལ། གཏན་འཇགས་ཡོང་འབབ་སྒོར་ཁྲི་10བྱུང་། དེ་མིན་རྫོང་གི་ཀུང་སི་གཅིག་དང་བཟོ་གྲྭ་ལྔའི་ཁེ་སྤོགས་སྒོར་ཁྲི་2.5བགོས་པ་རེད། ལྕགས་ཕུགས་གྲོང་ཚོར་ཚ་ཚ་འུར་འུར་གྱི་འགྱུར་ལྡོག་བྱུང་ནས་མང་ཚོགས་ཀྱི་དངུལ་ཁུག་ཇེ་འཐུག་དང་ངོ་གདོང་གི་འཛུམ་མདངས་ཀྱང་སྔར་ལས་རྒྱས་པ་རེད།

    ཉེ་བའི་ལོ་5ཡི་རིང་བཀྲ་ཤིས་ནོར་བུ་བསྟུད་མར་ལོ་4ལ་"ཕུལ་བྱུང་"ལ་བདམས་ཤིང་། 2019ལོར་"བདེ་ཆེན་གྱི་ཐོན་ལས་ཕྱུག་འགྱུར་སྣེ་ཁྲིད་པ་ཡག་ཤོས་དང་། བདེ་ཆེན་གྱི་ཏང་སྤྱི་ཁྱབ་ཀྲི་པུའུ་ཡི་ཧྲུའུ་ཅི་བཟང་བོ་ལ་བདམས། 2021ལོར་ཞིང་ཆེན་རིམ་པའི་ཕུལ་བྱུང་ཏང་ཡོན་བཅས་ལ་བདམས་པ་རེད།ལྕགས་ཕུགས་གྲོང་ཚོར་2017ལོར་ཁུལ་རིམ་པའི་སྣོད་བཅུད་ཤེས་དཔལ་གྲོང་ཚོའི་མཚན་རྟགས་ཐོབ་ལ། 2019ལོར་རྫོང་རིམ་པའི་ཤེས་དཔལ་གྲོང་ཚོའི་མཚན་རྟགས་ཐོབ། 2020ལོར་ཡིད་རྟོན་གྲོང་ཚོར་བདམས་པ། 2020ལོར་ཁུལ་རིམ་པའི་ཤེས་དཔལ་གྱི་གྲོང་ཚོའི་མཚན་རྟགས་བཅས་ཐོབ་པ་རེད།