གུང་གསེང་གཏོང་ཡང་རིམས་ནད་སྔོན་འགོག་ལྷོད་མི་རུང་།

        ཟླ9པའི་ཚེས12ཉིན་དང་13ཉིན་ནི་བདེ་ཆེན་ཁུལ་གྱི་མི་རིགས་མཐུན་སྒྲིལ་ཡར་ཐོན་དུས་ཆེན་དང་བདེ་ཆེན་ཁུལ་བཙུགས་ཉིན་མོ་ཡིན་པས།ཁུལ་ཡོངས་སུ་ཉིན་གཉིས་ཀྱི་གུང་གསེང་བྱིན་པ་དང་།དེ་ཡང་གཟའ་མཇུག་དང་མཐུད་ཡོད་པས།ད་ལོར་ཁྱོན་བསྡོམས་ཉིན་བཞི་ལ་ངལ་གསོ་བྱེད་ཆོག   དེ་ནས་ཉིན་འགའ་འགོར་རྗེས་རང་རྒྱལ་གྱི་དུས་ཆེན་གཉིས་སྟེ།ཟླ་མཆོད་དུས་ཆེན་དང་རྒྱལ་སྟོན་དུས་ཆེན་ཡང་ཐོན་ལ་ཉེ།

        མི་འགའ་རེས་དུས་ཆེན་གྱི་སྐབས་སུ་བཟའ་མི་མཉམ་འཛོམས་བྱས་ནས་དགའ་བའི་ཟས་ལ་སྤྱོད་པ་དང་།ཡང་མི་འགའ་ཞིག་གིས་རང་གི་ཉེ་འཁོར་རམ་ཡང་ན་རྒྱང་རིང་གི་གྲོང་ཁྱེར་ཞིག་ན་འགྲུལ་བཞུད་དུ་སོང་ནས་གུང་གསེང་སྐྱིད་པོ་གཏོང་ཚུལ་ཡང་ཡོད།ལོ་རེར་རྒྱལ་སྟོན་དུས་ཆེན་རིང་ས་གནས་གང་དུ་སོང་ནའང་ཡུལ་སྐོར་བ་ཆེས་མང་བའི་དུས་ཡིན་ལ།ལྷག་པར་དུ་ན་ནིང་དང་ད་ལོར་ཏོག་གསར་གློ་ཚད་ཀྱི་རིམས་ནད་ཀྱི་རྐྱེན་པས་ཡུལ་སྐོར་ཐད་ལ་ཤུགས་རྐྱེན་ཆེན་མོ་ཐེབས་ཡོད།

        བདེ་ཆེན་ལ་མཚོན་ན་མིག་སྔའི་བར་དུ་ཏོག་གསར་གློ་ཚད་ཀྱི་ནད་དཔེ་གཅིག་ཀྱང་བྱུང་མེད་ལ། སྲིད་པའི་ཁམས་སུ་ལྷ་ཡུལ་གྱི་ཞིང་མཆོག་གམ་ཡང་ན་འཛམ་གླིང་གི་སེམས་ཀྱི་ཉི་ཟླ་ཞེས་སྙན་པའི་བ་དན་ཕྱོགས་བཞིར་ཁྱབ་ཡོད།མི་རེ་རེའི་སེམས་སུ་སེམས་ཀྱི་ཉི་ཟླ་ནི་ལྷ་ཡུལ་དང་ཆེས་ཉེ་སར་བཅར་བའི་འཇིག་རྟེན་གྱི་ཞིང་མཆོག་ཡིན་པས།གནས་འདིར་ཡོང་མཁན་གྱི་ཡུལ་སྐོར་བ་ནི་གནམ་མཁའི་སྐར་ཚོམས་ལྟར་བགྲང་གིས་མི་ལངས། དེ་བས་དུས་ཆེན་རིང་སྤྱི་དམངས་རེ་རེའི་རང་ཉིད་ཀྱི་བདེ་འཇགས་ལ་འགན་སྲུང་གང་ལེགས་བྱེད་རྒྱུ་གལ།

        ཀྲུང་གོ་ནད་ཡམས་སྔོན་འགོག་ཚོད་འཛིན་ལྟེ་གནས་རིམས་འགོག་འཆར་འགོད་ཀྱི་དབུ་བཞུགས་རིགས་གཅིག་མཁས་པས་གུང་གསེང་རིང་ཡར་མར་ལ་འགྲོ་སྐྱོད་བྱེད་སྐབས་རིམས་ནད་སྔོན་འགོག་ཚོད་འཛིན་གྱི་རྩ་བ་དེ་དམ་པོར་བཟུང་ནས་དོགས་ཟོན་བྱེད་དགོས་ཞེས་དྲན་སྐུལ་བྱས་ཡོད་ལ།བདེ་ཆེན་ཁུལ་ནད་ཡམས་སྔོན་འགོག་ཚོད་འཛིན་ལྟེ་གནས་ཀྱིས་ཀྱང་ཚན་རིག་དང་མཐུན་པའི་སྒོ་ནས་རིམས་ནད་སྔོན་འགོག་ཚོད་འཛིན་དང་རིམས་ནད་ནང་འདྲེན་ནན་འགོག་སྐོར་གྱི་དྲན་སྐུལ་གནང་ཡོད་པ་རེད།

        དེ་བས་སྤྱི་དམངས་རེ་རེས་སྲིད་གཞུང་གི་དྲན་སྐུལ་ལྟར་གུང་གསེང་རིང་འདུ་འཛོམས་དང་འདུ་ཚོགས་མི་བྱེད་པ་དང་།རང་གི་ས་གནས་སུ་གུང་གསེང་གཏོང་བ།ཕྱིར་ངེས་པར་དུ་འགྲོ་དགོས་ཚེ་ཕྱིར་མ་བསྐྱོད་གོང་འགྲོ་ས་དེའི་རིམས་ནད་སྔོན་འགོག་ཚོད་འཛིན་གྱི་རིམ་པ་ཤེས་རྟོགས་བྱེད་དགོས་པ་དང་།གལ་སྲིད་ཉེན་ཁ་འབྲིང་བ་དང་ཆེ་བའི་ས་ཁུལ་ཞིག་ཡིན་ཚེ་དེར་བསྐྱོད་མི་རུང་བ། ཚང་མས་འགྲོ་སྐྱོད་བྱེད་པའི་བརྒྱུད་རིང་ནང་ཁ་རང་གྱོན་པ་དང་ལག་པ་བཀྲུ་པ།མི་དང་མི་བར་གྱི་བར་ཐག་སྲུང་འཛིན་དང་འདུ་འཛོམས་སོགས་སུ་མི་ཞུགས་པ་སོགས་བྱས་ནས་རང་ཉིད་ཀྱི་རིམས་ནད་སྔོན་འགོག་གི་ལས་ཀ་ཡག་པོ་སྒྲུབ་སྟེ་ཚན་རིག་དང་མཐུན་པའི་སྒོ་ནས་རིམས་ནད་སྔོན་འགོག་བྱེད་རྒྱུ་ནི་ཤིན་ཏུ་གལ་ཆེའོ།