བདེ་ཆེན་ནས་པེ་ཅིང་དུ་བསྐྱོད་པའི་མཁའ་ལམ་ཤར་གཏོང་བྱས་པ།

        སེམས་ཀྱི་ཉི་ཟླ་བོད་ཡིག་དྲ་བའི་འཕྲིན།ཟླ10པའི་ཚེས་1ཉིན།ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དབུ་བརྙེས་ནས་ལོ་འཁོར་72ལོན་པའི་དུས་བཟང་འདིར།བདེ་ཆེན་སེམས་ཀྱི་ཉི་ཟླ་གནམ་ཐང་དུ་རྒྱལ་ས་པེ་ཅིང་ནས་གངས་ལྗོངས་ས་མཐོར་འཕུར་བའི་དུས་གཏན་གནམ་གྲུ་བབས་པ་རེད།དེས་ཁྲུང་ཆིང་མཁའ་འགྲུལ་གྱི་པེ་ཅིང་（ཏ་ཞིན་）ནས་ཁྲུང་ཆིང་དང་།དེ་ནས་སེམས་ཀྱི་ཉི་ཟླའི་མཁའ་ལམ་དངོས་སུ་ཤར་གཏོང་ཐུབ་པ་མཚོན་ཡོད།

        རྒྱུས་ལོན་བྱུང་བ་ལྟར་ན། པེ་ཅིང་（ཏ་ཞིན་）ནས་ཁྲུང་ཆིང་དང་།དེ་ནས་སེམས་ཀྱི་ཉི་ཟླའི་མཁའ་ལམ་ཤར་གཏོང་བྱས་རྗེས།ཉིན་རེར་ཐེངས་གཅིག་འཕུར་བསྐྱོད་བྱེད་རྩིས་ཡོད་པས།བདེ་ཆེན་གྱིས་པེ་ཅིང་དང་ཧྲང་ཧའེ།ཀོང་ཀྲོའུ།ཧྲེན་ཀྲེན་སོགས་རིམ་པ་དང་པོའི་གྲོང་ཁྱེར་དུ་མཁའ་ལམ་ཤར་གཏོང་ཐུབ་པའི་དམིགས་ཚད་མངོན་འགྱུར་ཡོང་རྒྱུ་རེད།བདེ་ཆེན་སེམས་ཀྱི་ཉི་ཟླ་གནམ་ཐང་གི་མཁའ་ལམ་དྲ་བ་སྔར་བས་འཐུས་ཚང་དུ་ཕྱིན་པ་དང་ཆབས་ཅིག་བདེ་ཆེན་སེམས་ཀྱི་ཉི་ཟླ་གནམ་ཐང་ཡང་རྒྱལ་ཡོངས་བོད་འབྲེལ་ས་ཁུལ་གྱི་གནམ་ཐང་ཁྲོད་པེ་ཅིང་དང་།ཧྲང་ཧའེ།ཀོང་ཀྲོའུ།ཧྲེན་ཀྲེན་བཅས་ཀྱི་གྲོང་ཁྱེར་གྱི་མཁའ་ལམ་དྲ་རྒྱ་ཡོངས་སུ་ཁྱབ་པའི་ཡན་ལག་གནམ་ཐང་གཅིག་པུ་དེར་གྱུར་ཡོད།  

        གནམ་ཐང་གི་འགན་འཁུར་བས་ངོ་སྤྲོད་བྱས་པར་གཞིགས་ན།གོམ་སྟབས་རྗེས་མར་བདེ་ཆེན་སེམས་ཀྱི་ཉི་ཟླ་གནམ་ཐང་གིས་རྒྱལ་ནང་གི་ཁྲོམ་རའི་འཁོར་སྐྱོད་ཆེན་པོ་དང་། ས་གནས་ཀྱི་དཔལ་འབྱོར་གོང་དུ་སྤེལ་བར་ཞབས་འདེགས་ཞུ་བར་དམིགས་ཏེ། བདེ་ཆེན་ཁུལ་གྱི་མྱུར་བགྲོད་གཞུང་ལམ་ལེགས་གྲུབ་བྱུང་ནས་རླངས་འཁོར་ཤར་གཏོང་ཐུབ་པ་དང་མྱུར་བགྲོད་ལྕགས་ལམ་ཤར་གཏོང་ཐུབ་ཉེར་ཡོད་པ་དང་ཟུང་འབྲེལ་བྱས་ནས། བདེ་ཆེན་གྱི་མཁའ་འགྲུལ་ཚོང་རའི་འཕེལ་རྒྱས་ཀྱི་རྣམ་པ་གསར་པ་གང་མགྱོགས་འཛུགས་པ་དང་། ཁྲོམ་རའི་གསོན་ཤུགས་ཟམ་མི་ཆད་པར་སྔོག་འདོན་དང་འཕེལ་བ་བྱས་ནས་བདེ་ཆེན་གྱི་མཁའ་འགྲུལ་དང་ཡུལ་སྐོར་མཉམ་འདྲེས་འཕེལ་རྒྱས་ལ་ཁྱོན་ཡོངས་ནས་སྐུལ་འདེད་གཏོང་བ་དང་ཕན་ཚུན་གཉིས་ཕན་གྱི་ཁྲོམ་རའི་མཐུན་སྦྱོར་ལམ་སྲོལ་བཙུགས་ཏེ། བདེ་ཆེན་ཁུལ་གྱིས་མི་རིགས་མཐུན་སྒྲིལ་ཡར་ཐོན་དཔེ་སྟོན་ཁུལ་གྱི་ཚད་ཤིང་དང་འཛམ་གླིང་གི“སེམས་ཀྱི་ཉི་ཟླ”སྐྲུན་པར་རང་འགུལ་ངང་ཞུགས་ནས་དེར་ཞབས་འདེགས་ཞུས་ཏེ་བདེ་ཆེན་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཆེད་འགན་ལེན་བྱེད་རྒྱུ་ཡིན་པ་རེད།