སེམས་ཀྱི་ཉི་ཟླའི་རང་བྱུང་ཁོར་ཡུག་གི་གསང་བ།

        སེམས་ཀྱི་ཉི་ཟླ་ལ་མི་ཡུལ་གྱི་དག་ཞིང་ཞེས་སུ་བསྔགས་ཏེ།   དོན་དུ་ཡང་འདི་ལྟར་སྣང་བར་སེམས།   གང་ལྟར་ཀྱང་ཡུལ་འདི་རུ་གཞིས་ཆགས་པའི་མི་རྣམས་ནི་སྔར་ནས་རང་བྱུང་ཁམས་དང་འཆམ་མཐུན་མཉམ་ཀྱིས་འཚོ་སྡོད་བྱེད་ཅིང་།   ཡུལ་འདིའི་ཕྱོགས་ཀྱི་མུ་ཁྱུད་ཐམས་ཅད་ལ་སྔོ་ལྗང་ནགས་ཚལ་གྱིས་ཡོངས་སུ་བརྒྱན་ནས་སྔོ་ལྗང་གི་འཇིག་རྟེན་ཞིག་ཏུ་གྲུབ་ཡོད་པ་མ་ཟད།    ཡུལ་འདི་ནི་སྐྱེ་དངོས་སྣ་མང་གི་འཇིག་རྟེན་དང་།   སྲོག་ཆགས་སྣ་ཚོགས་ཀྱི་འདུ་གནས་སུ་ཡང་རང་བཞིན་གྱིས་གྲུབ་ཡོད།  

        མི་རེ་རེའི་སེམས་ཁོངས་ན།    རྣམ་པ་མི་གཅིག་པའི་སེམས་ཀྱི་ཉི་ཟླ་རེ་ཡོད་པར་གླེང་།    ང་ལ་མཚོན་ན་ཡུལ་འདི་ནི་ཆེས་ཐོག་མའི་རྨི་ལམ་མངོན་དུ་འགྱུར་སའི་ས་ཆ་ཡིན།   དེའི་རྐྱེན་གྱིས་ང་ནི་ས་ཆ་གང་ལ་སོང་ཡང་གནས་འདིའི་ཕྱོགས་ལ་དཀར་གཙང་གི་འོ་མ་ཕུ་གང་འདྲེན་པའི་གོམས་གཤིས་ཆགས་ཡོད།    མི་ལོ་བཞི་བཅུ་ཁད་ཀྱིས་སོན་པའི་དུས་ཡུན་ནང་ང་ཡང་ཡུལ་ལུང་མང་པོ་ཞིག་ལ་བགྲོད་པའི་བགོ་སྐབས་བྱུང་བ་དང་།    ཡུལ་ཕྱོགས་རེ་རེར་རང་གི་རིག་གནས་དང་།   དད་མོས།    ལོ་རྒྱུས་ཀྱི་རྒྱབ་ལྗོངས།   སྣོད་བཅུད་ཀྱི་བཀོད་པ་སོགས་འདྲ་མིན་མང་དུ་མཆིས་ཀྱང་།   ང་ནི་སེམས་ཀྱི་ཉི་ཟླའི་རང་བྱུང་ཁོར་ཡུག་གི་མཛེས་སྡུག་ལ་ཤིན་ཏུ་ཆགས་ནས་ནམ་ཞར་བསྔགས་བརྗོད་ཀྱི་ཡུལ་དུ་འདྲེན་པའི་ལན་གྲངས་ཇེ་མང་དུ་ཕྱིན།     གལ་ཏེ་གྲོང་ཁྱེར་གྱི་འཚོ་བས་ཁྱོད་ལ་གནོན་ཤུགས་དང་ཟང་ཟིང་གི་ངར་ཁ་སློང་སྲིད་ན།    ཁྱོད་རང་རྫོང་པ་ནགས་ལྕོག་རི་བོར་འགོས་ཆོག་ལ་ལྷིང་འཇགས་ཀྱི་ནགས་ཀློང་ནས་ཉིན་གཅིག་གི་བདེ་སྐྱིད་འཚོལ་ཆོག      ཡང་གྲོང་ཁྱེར་གྱི་སུན་སྣང་གིས་ཁྱེད་ཀྱི་ནང་སེམས་ལ་གཙེ་བྱུང་ན་ཁྱོད་ཀྱིས་ནགས་ཕག་མཚོའི་མཐའ་བསྐོར་ནས་རྟ་ནོར་ལུག་གསུམ་གྱི་བག་ཕེབས་པའི་རྣམ་པ་ལ་བལྟ་ཆོག་པ་མ་ཟད།     རྣང་ཞིང་གྲུ་བཞིའི་བར་དང་།   རྫ་རིའི་བར་གསེང་ནས་མཐོ་སྒང་གི་ཉི་འོད་དང་བསིལ་རླུང་འཇམ་པོ་ལོངས་སུ་སྤྱད་ཆོག    དེ་ཡང་དེ་ལས་ལྷག་པའི་དུས་ཚོད་ཀྱིས་འདང་ན།    ཁྱོད་རང་སེམས་ཀྱི་ཉི་ཟླའི་རྫོང་པ་ནགས་ལྕོག་རི་བོའི་ཉག་ཁའི་མཆོད་རྟེན་ནས་རྒྱལ་བ་རིགས་ལྔ་དགོན་དུ་ཉིན་གཅིག་གི་རྐང་བཞུད་ལ་ཕེབས་ཆོག    ཁྱོད་རང་ཐེངས་གཅིག་ལ་ཡང་ཕེབས་མ་མྱོང་བའི་གདོད་མའི་ནགས་ཀློང་དུའང་བསྐྱོད་ཆོག་སྟེ།    རི་རྩེ་ཕྱིན་པ་དང་བསྟུན་ནས་ཁྱོད་ཀྱིས་ཅིས་ཀྱང་རྩེ་མོ་དགུང་ལ་ཟུག་ཅིང་ལོ་ངོ་སྟོང་གི་ལོ་རྒྱུས་ལྡན་པའི་གསོམ་སྡོང་དང་ཤུག་སྡོང་སོགས་མིང་མ་ཐོགས་པའི་སྐྱེ་དངོས་སྣ་ཚོགས་ལ་མཇལ་ཐུབ།    གལ་ཏེ་གོ་སྐབས་འགྲིག་ན་བྱིའུ་སྣ་ཚོགས་ཀྱིས་དབྱངས་སྙན་སྒྲོག་པའི་དུས་ཀྱང་འཁེལ་དུས་ཡོད།   ལྷང་ལྷུང་བཞུར་བའི་ཆུ་ཕྲན་ནི་སྐྱེ་འགྲོའི་སྐོམ་གདུང་སེལ་བའི་རྒྱན་དུ་བྱོན་ཞིང་།    ནགས་གསེང་ནས་རྒྱང་རིང་གི་ཕྱོགས་ལ་མགོ་བོ་བསྙེས་པའི་ཚེ།    རྔམ་བརྗིད་ལྡན་པའི་གངས་རི་ཞིག་ཀྱང་མཐོང་རེ་དོགས།     

        དུས་ཚིགས་རེ་རེར་སེམས་ཀྱི་ཉི་ཟླ་ལ་ཁྱད་ཆོས་རེ་རེ་ཡོད།    དགུན་གྱི་གྲང་རེག་གིས་ཡོངས་སུ་གཙེས་པའི་དུས་ན་ཡང་སྔོ་ལྗང་གི་ཁོར་ཡུག་ལ་ཁ་དོག་གི་འགྱུར་བ་ཅི་ཡང་མེད།    པོ་ཏ་མཚོ་ལ་ཐེངས་གཅིག་བསྐྱོད་ན་སེམས་ལ་འཆར་སྣང་ཅི་རིགས་སྐྱེས་ཡོང་སྟེ།    མི་ཡུལ་ན་འདི་ལྟ་བུའི་མ་བཅོས་ལྷུན་གྱིས་གྲུབ་པའི་རང་བྱུང་མཛེས་ལྗོངས་ཡོད་པར་ཡིད་མི་ཆེས་པའི་ཚོད་དུ་འགྲོ་ཞིང་སྨྲ་བརྗོད་ཀྱི་ཡུལ་ལས་འདས།    དུས་ཡུན་རིང་བོའི་ནང་དུ་ཡུལ་འདིའི་མི་རྣམས་ཀྱིས་རང་གི་ཡུལ་གཞིས་དྲོན་མོ་ལ་སྲུང་སྐྱོང་དང་དགའ་མགུ་བཅངས་པ་ནི་རྨད་དུ་བྱུང་བ་ཞིག་རེད་ཨའང་།     མྱི་ཟུར་ཉེ་འཁོར་གྱི་ཁོར་ཡུག་ཡིན་ནའང་འདྲ།    གདོད་མའི་ནགས་ཀློང་དང་ཡངས་པའི་སྤང་གཞོང་ནས་མི་ནི་ཇི་འདྲའི་ཉམས་ཆུང་བ་ཞིག་རེད་ཨང་སྙམ་པའི་བློ་སྐྱེས་དུས་ཡོད།    ཕྱོགས་ཀྱི་མུ་ཁྱུད་ལ་གངས་རི་དང་རྫ་རི།   ནགས་རིས་ཡོངས་སུ་བརྒྱན་པའི་ཡུལ་འདི་ལྟ་བུ་ནི་བོད་ཁམས་སུ་ཤིན་ཏུ་ཉུང་ཉུང་ཡིན་ཚུལ་ནི་ཁོ་བོས་སྨྲ་བར་སྤོབས།    གང་ལྟར་ཀྱང་།    གདོད་མའི་ནགས་ཀློང་ནས་ཁྱེད་ལ་མི་འདོད་པའི་ཚིག་ངན་སྨྲ་མཁན་མེད་ལ།    ས་འཛིན་ཨ་མའི་པང་ན་ངོ་མཚར་དང་བརྗིད་ཆགས་ཀྱིས་འཁྲུངས་པའི་སྐྱེ་དངོས་སྣ་ཚོགས་ཀྱིས་ཁྱེད་ཀྱི་སུན་སྣང་དང་སྐྱོ་སྣང་ཡོད་ཚད་ལ་བཟོད་སྒོམ་དང་དང་ལེན་བྱེད་ངེས་ཡིན།     གལ་ཏེ་ཁྱོད་ལ་སེམས་ཞིབ་མོ་ཞིག་ཡོད་ན།   ཁྱོད་ཀྱིས་ཡིད་དུ་འོང་བའི་ལོ་མ་སེར་བོ་དེ་དང་།     གར་གྱི་སྟངས་སྟབས་རྩེན་པའི་ཕྱེ་མ་ལེབ།   ལྷང་ལྷུང་བཞུར་བའི་ཆུ་ཕྲན་སྔོན་མོ།   མཐོ་སྒང་གི་སྟག་མའི་མེ་ཏོག   ད་དུང་ཉི་འོད་དང་བསིལ་རླུང་།   ཐ་ན་ཁ་མི་གྲགས་པའི་རྡོ་བ་ལེབ་མོ་དེ་ལ་ཡང་ལ་ཁ་བརྡ་དང་སེམས་གཏམ་གློད་ནས་སེམས་ཀྱི་ཉི་ཟླའི་རང་བྱུང་མཛེས་སྡུག་གིས་ཁྱེད་དང་ང་ཚོ་ལ་གསང་བ་ལྐོག་གྱུར་གྱི་གཏམ་རྒྱུད་ཅི་ཞིག་འཆད་བཞིན་པ་ཤེས་རྟོགས་དང་རྒྱུས་ལོན་བྱ་ཆོག་ཆོག་ཡིན།