ལོ་༣ནས་༡༡བར་གྱི་བྱིས་པར་སྨན་ཁབ་རྒྱག་སྐབས་དོ་སྣང་བྱ་དགོས་པ་བརྒྱད།

        སྔར་ལས་ལྷག་པའི་སྒོ་ནས་ཏོག་གསར་གློ་ཚད་ནད་ཡམས་ཀྱི་འགོག་སྨན་རྒྱག་ཚད་མཐོ་རུ་གཏོང་ཆེད། ལོ་༡༢ཡན་སླེབས་པའི་མི་སྣར་སྨན་ཁབ་བརྒྱབ་པའི་ལས་དོན་སྤེལ་བའི་རྨང་གཞིའི་འོག ཉེ་ཆར། བོད་ལྗོངས་ཀྱིས་ལོ་༣ནས་༡༡བར་གྱི་མི་ཚོགས་ལ་ཏོག་གསར་གློ་ཚད་ནད་ཡམས་ཀྱི་འགོག་སྨན་རྒྱག་པའི་ལས་དོན་ཕྱོགས་ཡོངས་ནས་སྤེལ་ཡོད་པ་རེད།

        ལོ་༣ནས་༡༡བར་གྱི་མི་ཚོགས་ནི་གཙོ་བོ་བྱིས་པ་ཡིན་པས། སྨན་ཁབ་རྒྱག་པའི་རྒྱུད་རིམ་ཁྲོད། དོ་སྣང་བྱ་དགོས་པའི་དོན་ཚན་ག་ཚོད་ཡོད་པ་དང་། ཁྱིམ་བདག་གིས་ཤེས་བྱ་གང་དག་རྒྱུས་ལོན་བྱ་དགོས་མིན་ཐད། གཤམ་ནས་རྒྱུས་ལོན་ཞིག་གནང་རོགས།

        སྨན་ཁབ་མ་བརྒྱབ་གོང་། ཁྱིམ་བདག་ཚོས་སྨན་ཁབ་དང་ནད་ཡམས་ཀྱི་ཤེས་བྱ་རྒྱུས་ལོན་བྱ་དགོས་པར་མ་ཟད། སྨན་ཁབ་རྒྱག་པའི་རྒྱུད་རིམ་དང་། རང་ཉིད་ཀྱི་ཕྲུ་གུའི་བདེ་ཐང་གནས་ཚུལ་ཤེས་དགོས།

        བྱིས་པའི་སྨན་ཁབ་ནི་སྔོན་དུ་མངགས་ནས་བརྒྱག་དགོས་པས། ཁྱིམ་བདག་ཚོས་སྔོན་མངགས་ལས་དོན་ཡག་པོ་བསྒྲུབ་དགོས་པ་དང་། སྨན་ཁབ་རྒྱག་པར་འགྲོ་སྐབས། བྱིས་པའི་སྨན་ཁབ་ལག་ཁྱེར་དང་། ཐོབ་ཐང་ལག་ཁྱེར། ཐེམ་ཐོ་སོགས་འབྲེལ་ཡོད་ལག་ཁྱེར་འཁྱེར་དགོས།

        སྨན་ཁབ་རྒྱག་སར་སླེབས་རྗེས། བྱིས་པའི་བདེ་ཐང་གནས་ཚུལ་དང་། དུས་རྒྱུན་སྨན་ཁབ་རྒྱག་སྐབས་འཛེམ་བྱ་གང་ཡོད་མེད་ཚང་མ་སྨན་པར་ཇི་མ་ཇི་བཞིན་བརྗོད་དགོས།

        བྱིས་པར་སྨན་ཁབ་མ་བརྒྱབ་གོང་། ཁྱིམ་བདག་མོས་མཐུན་བྱུང་རྗེས་གཞི་ནས་ཏོག་གསར་གློ་ཚད་ནད་ཡམས་ཀྱི་རིམས་འགོག་སྨན་ཁབ་བརྒྱབ་ཆོག

        གལ་སྲིད་བྱིས་པར་དངངས་སྐྲག་ཆེན་པོ་ལང་ཚེ། ཁྱིམ་བདག་གིས་ངེས་པར་དུ་སློབ་གསོ་ཡག་པོ་བརྒྱག་དགོས། རྒྱུ་མཚན་ནི་ལོ་༥ཡན་གྱི་བྱིས་པར་སེམས་རང་བཞིན་གྱི་གནད་དོན་འགའ་ཐོན་སྲིད་པས། ཁྱིམ་བདག་གིས་དེར་དོ་སྣང་བྱ་དགོས།

        སྨན་ཁབ་རྒྱག་པའི་རྒྱུད་རིམ་ཁྲོད། ཁྱིམ་བདག་དང་བྱིས་པ་སུ་ཡིན་རུང་། རང་ཉིད་ཀྱི་འགོག་སྲུང་ཡག་པོ་བྱ་དགོས་པ་དང་། ཡུལ་དེ་གའི་འགོག་སྲུང་ལས་དོན་ལ་གཞོགས་འདེགས་བྱ་དགོས།

        སྨན་ཁབ་བརྒྱབ་ཚར་རྗེས། ལྟ་ཞིབ་སྐར་མ་༣༠བྱ་དགོས་པ་དང་། ཤུགས་དྲག་པའི་ལུས་རྩལ་རིགས་རྩེད་རྒྱུ་མེད་ཅིང་། གལ་སྲིད་སྨན་ལོག་དང་འབྲེལ་བའི་དོགས་གཞི་ཡོད་པའི་ནད་རྟགས་ཐོན་ཚེ། དུས་ཐོག་ཏུ་སྙན་སེང་ཞུ་དགོས།

        ཏོག་གསར་གློ་ཚད་ནད་ཡམས་ཀྱི་རིམ་འགོག་སྨན་ཁབ་དང་དེ་མིན་གྱི་སྨན་ཁབ་རྒྱག་པའི་དབར་ངེས་པར་དུ་ཉིན་༡༤ཡན་ཟིན་དགོས་པའི་གཏན་འབེབས་བརྩི་སྲུང་ཞུ་དགོས་པ་དང་། ཁྱི་སྨྱོན་གྱི་རིམས་འགོག་སྨན་ཁབ་དང་འཛུམ་བུ་ལྟག་དགྱེའི་རིམས་འགོག་སྨན་ཁབ་རྒྱག་པར་དུས་ཚོད་ཀྱི་བླང་བྱ་འདིར་ལྟ་མི་དགོས།      

        དྲན་སྐུལ་ཆུང་ཆུང་། གསར་འགོད་པས་ཤེས་རྟོག་བྱུང་བར་གཞིགས་ན། མིག་སྔར། ལྗོངས་ཡོངས་སུ་ལོ་༣ནས་༡༡བར་གྱི་མི་ཚོགས་ལ་པེ་ཅིང་ཁོའོ་ཤིན་ཀྲུང་ཝེ་སྐྱེ་དངོས་ལག་རྩལ་ཚད་ཡོད་ཀུང་སིས་ཐོན་སྐྱེད་བྱས་པའི་ཏོག་གསར་ནད་དུག་སེལ་བྱེད་ཀྱི་སྨན་ཁབ་རྒྱག་བཞིན་ཡོད་པ་དང་། སྨན་ཁབ་འདི་ཁྱོན་ཐེངས་གཉིས་བརྒྱག་དགོས་ཤིང་། ཐེངས་དང་པོ་བརྒྱབ་རྗེས་གཟའ་འཁོར་གསུམ་མམ་གཟའ་འཁོར་གསུམ་ཡན་སོང་རྗེས་ཐེངས་གཉིས་པ་དེ་བརྒྱག་དགོས་ཀྱི་ཡོད། ཐེངས་གཉིས་པ་དེ་ཡག་ཤོས་བྱུང་ན་གཟའ་འཁོར་བརྒྱད་ཀྱི་ནང་ཚུན་དུ་བརྒྱག་དགོས་ཀྱི་ཡོད། ཐེངས་འདིའི་ལོ་༣ནས་༡༡བར་གྱི་མི་ཚོགས་ལ་རྒྱག་པའི་སྨན་ཁབ་འདིའི་གྲུབ་ཆ་དང་། རིམས་འགོག་ནུས་ཤུགས་སོགས་ཚང་མ་དར་མའི་སྨན་ཁབ་ཀྱི་ཚད་གཞི་དང་གཅིག་མཚུངས་ཡིན་ལ། སྔར་བཞིན་རིན་མེད་སྲིད་ཇུས་ལག་བསྟར་བྱ་རྒྱུ་རེད།

   ལོ་༣ནས་༡༡བར་གྱི་མི་ཚོགས་ཀྱིས་ས་ཁོངས་དོ་དམ་ལམ་ལུགས་གཞིར་བཟུང་། སོ་སོ་སྡོད་སའི་ཉེ་འཁོར་དུ་སྨན་ཁབ་བརྒྱབ་ཆོག་པ་དང་། སློབ་གྲྭ་དང་བུ་བཅོལ་ཁང་ན་ཡོད་པའི་སློབ་མ་རྣམས་གཙོ་འདོམས་ཚན་པ་དང་། སློབ་གྲྭ། བུ་བཅོལ་ཁང་བཅས་ཀྱི་བརྡ་ཐོ་ལྟར། སློབ་གྲྭ་དང་བུ་བཅོལ་ཁང་དུ་གཅིག་བསྡུས་ཐོག་སྨན་ཁབ་བརྒྱབ་ཆོག་ལ། ཡང་ན་རང་གནས་སའི་ཏོག་གསར་གློ་ཚད་ནད་ཡམས་ཀྱི་འགོག་སྨན་རྒྱག་ས་རུ་བརྒྱབ་ནའང་འགྲིག སློབ་གྲྭར་སྐྱོད་མེད་པའི་བྱིས་པ་ཡིན་ཚེ། ལྟ་སྐྱོང་མི་སྣས་སྔོན་དུ་མངགས་རྗེས། རང་གནས་སའི་ཏོག་གསར་གློ་ཚད་ནད་ཡམས་ཀྱི་འགོག་སྨན་རྒྱག་སར་ཕྱིན་ནས་བརྒྱབ་ན་འགྲིག

   གལ་སྲིད་བྱིས་པར་ཚ་བ་རྒྱས་པ་དང་། གློ་རྒྱག་པ། ཡང་ན་དོས་དྲག་རང་བཞིན་གྱི་ནད་ཕོག་ཡོད་ཚེ། གནས་སྐབས་རིང་སྨན་ཁབ་རྒྱག་མི་དགོས་པ་དང་། ནད་གཞི་དྲག་སྐྱེད་བྱུང་རྗེས། སྨན་ཁབ་བརྒྱག་དགོས། གཞན་ཡང་། ཏོག་གསར་གློ་ཚད་ནད་ཡམས་ཀྱི་འགོག་སྨན་བརྒྱབ་ཟིན་རུང་། སྔར་བཞིན་མི་སྒེར་གྱི་བདེ་ཐང་འགོག་སྲུང་ཡག་པོ་བྱ་དགོས།