སྙན་རྩོམ། ༼ནགས་ཕག་མཚོ།༽

ནགས་ཕག་མཚོ།

                   རྡོ་ལུང་རིན་ཆེན་གྱིས་བྲིས།

ནགས་ཚང་ཚང་ཀླུང་གི་འདབས་རོལ་ན།།

མཚོ་ཆེན་པོ་ནགས་རིའི་ཕག་ན་ཡོད།།

འདིའི་རྒྱབ་རི་ཤྭ་ཁ་རི་བོ་རེད།།

རི་ལྷུན་པོ་མཚོ་མོའི་ནང་ན་བརྗིད།།

རི་འབའ་འབུར་གཏེར་གྱི་ནང་རྫོང་ཅན།།

འདི་མ་བརྩིགས་མཚོ་མོ་རང་སྐོར་རེད།།

རི་རིན་ཆེན་སྤུངས་པ་མིན་ན་ཡང་།།

མཚོ་ཆར་ཆུས་རྒྱས་པ་རི་བོའི་དྲིན།།

སྤང་སྔོ་ལྗང་རྟ་ནོར་འཛོམས་ས་རེད།།

སྤང་རྩྭ་ཆུ་བཟང་བས་ཤ་ཤེད་རྒྱས།།

མཚོ་སྔོན་པོ་རླབས་རིས་འཁྱུག་འཁྱུག་རེད།།

རླབས་རི་མོ་སྤང་འདིའི་སྟེང་ན་མཛེས།།

མཚོ་ཟབ་ས་རང་སྡེའི་མཐའ་ཁ་རེད།།

ཉ་གསེར་མིག་མཐའ་ན་རང་འཁོར་རེད།།

མཚོ་ཆེ་ས་གཟིག་རིའི་ཐང་འདབས་རེད།།

ཞིང་འབྲུ་རིགས་ཐོགས་དུས་ལྷག་ཏུ་ཆེ།།

བྱ་ཁུ་ལོ་རྒྱ་རྫོང་ནགས་ནས་གྲགས།།

དཔྱིད་མགོ་མ་ཚེས་པའི་རྟེན་འབྲེལ་རེད།།

བྱ་ངང་བ་མཚོ་མོའི་མཐའ་ནས་གྲགས།།

ཆུ་འགྲམ་དར་ཞུ་བའི་རྟགས་མཚན་རེད།། 

ལོར་མྱུ་གུ་འབུས་དུས་དྲོད་དཔྱིད་རྒྱས།།

མཚོར་སྨུག་པ་འཐིབས་དུས་མཚོ་བྱ་རྩེད།།

འདི་རྩེད་བཞིན་རྩེད་བཞིན་མཁའ་ལ་འཕུར།།

ངག་མགྲིན་གླུ་ལེན་བཞིན་བྱང་ལ་འཕུར།།

 དབྱར་མེ་ཏོག་བཞད་དུས་མཚོ་མཐའ་ན།།

འདི་ཁྲུང་ཁྲུང་མེད་པས་ཡིད་རེ་ཕངས།།

ཉ་གསེར་མིག་མཁའ་རུ་ལྡིང་དུས་ན།།

བྱ་ཁྲུང་ཁྲུང་འཕུར་རུང་ཡིད་རེ་དགའ།།

ཆར་ཟིམ་མ་འབབ་དུས་མཚོ་ཆུ་རྒྱས།།

རླབས་དཀར་པོ་འཕྱུར་ན་སྣང་བ་སྐྱིད།།

སྤང་གཡང་དཀར་ལུག་གིས་བརྒྱན་པ་ན།།

ཤར་རྒྱལ་ཐང་ལུང་བ་ལྷག་ཏུ་སྐྱིད།།

འདི་གསེར་ལྡན་སྟོན་ཀ་སླེབས་པ་ན།།

སྟོད་རྫ་རི་ཚོན་མདོག་སྣ་ལྔ་རེད།།

ཚོན་སྣ་ལྔ་མཚོ་མོར་རང་གསལ་རེད།།

མཚོ་མེ་ལོང་སྣུམ་ཚོན་རི་མོ་རེད།།

རྫ་སྨུག་པོར་སྟོན་ཆུ་རྒྱས་པ་ན།།

གསེར་ལོ་མ་འཁུར་ནས་མཚོ་ལ་བབས།།

ཆུ་བསིལ་མོ་ཉ་རིགས་འཁོར་ས་རེད།།

རྫ་མཐོན་པོ་མཚོ་འདིའི་དྲིན་ཆེན་རེད།།

སྡོང་ལོ་མ་ལྷུང་དུས་མཚོ་རླུང་རྒོད།།

དགུན་རྒྱ་སྟག་ཐོན་པའི་རྟགས་མཚན་རེད།།

ཆུར་འགྲམ་དར་ཆགས་དུས་མཚོ་བྱ་འཁོར།།

བྱ་མཚོ་བྱ་དུས་ཀྱི་ཕོ་ཉ་རེད།།

ས་སྐྱོད་པོ་རྒྱལ་ཐང་ལུང་བ་རེད།།

མཚོ་ནགས་ཕག་མཐོང་ན་རང་སྐྱིད་རེད།།

འདི་སྲོག་ལྡན་སྟོང་གི་རྟེན་ས་རེད།།

མཚོ་ནགས་ཕག་ཕ་མའི་ཁ་མ་རེད།།