བྱིས་དུས་ཀྱི་རྩྭ་ཐང་།

     རོང་མ་འབྲོག་གི་ས་ཆ་ནས་འཚར་ལོངས་བྱུང་བའི་རང་ཉིད་ནི།་ངོ་མ་བཤད་ན་རྩྭ་ཐང་གི་འཚོ་བ་ལ་དེ་འདྲ་ཆ་རྒྱུད་མེད།ཆུང་ཆུང་ཡིན་དུས་ཕ་ཡུལ་དུ་དུད་ཚང་སོ་སོའི་ནང་ངལ་རྩོལ་མི་སྣ་གཙོ་བུ་རྣམས་གཞིས་ནས་ས་ཞིང་འདེབས་མཁན་ཡིན་ལ།རོང་པ་ལ་མཚོན་ན་ནོར་ཟོག་གསོ་སྐྱོང་བྱེད་པ་ནི་ཞོར་ལས་ཙམ་ཡིན་པས།ལོ་ན་རྒན་པོ་དང་བྱིས་པ་རྣམས་ནི་རི་འགོ་མཐོ་སའི་རྩྭ་ཐང་དུ་ནོར་ལུག་སྐྱོང་མཁན་གྲལ་དུ་བཞག      སྦྲ་གུར་རེ་རེའི་ནང་གྲོང་པ་གཅིག་པ་ཡིན་པའི་དུད་ཚང་འགའ་མཉམ་དུ་འཆམ་མཐུན་གྱི་འབྲོག་ལས་འཚོ་བ་སྐྱེལ།ང་ཡང་སློབ་གྲྭར་མ་འགྲོ་གོང་ལ་ལོ་གསུམ་ལྷག་དང་སློབ་གྲྭར་ཞུགས་རྗེས་ཀྱི་གུང་གསེང་འགའ་རྩྭ་ཐང་དེའི་རུམ་ནང་བྱིས་དུས་ཀྱི་འཚོ་བ་རོལ་མྱོང་ཡོད།དེ་བས་རྩྭ་ཐང་འདི་ལ་གཞན་དང་མི་འདྲ་བའི་ཞེན་ཆགས་དང་བརྩེ་བ་ཞིག་ཡོད་པ་སྨྲ་མི་དགོས་ལ།རྩྭ་ཐང་གི་ཕྱོགས་བཞི་མཚམས་བརྒྱད་ཀྱི་རི་ཀླུང་ཁག་དང་ཆུ་མིག་སོགས་ཕྱི་སྣོད་ཀྱི་ཁམས་ལ་གོམ་པ་སྤོས་མ་མྱོང་ས་མེད།

    ངས་བཤད་པའི་རྩྭ་ཐང་འདི་ནི་བྱིས་པའི་དུས་ཀྱི་མུ་མཐའ་མེད་པའི་རྩྭ་ཐང་དེ་རང་ཡིན་སྣང་ཤར་མྱོང་ལ།ཨ་མྱེས་རྒས་པོ་ཚོས་རྐུ་མ་ཞིག་གིས་རྟ་གཉིས་བརྐུས་ཏེ་རྩྭ་ཐང་འདི་བརྒྱུད་རིང་ཉིན་ཞག་གསུམ་འགོར་ནའང་ལམ་ནོར་ནས་ཕྱིར་མ་ཐོན་བའི་སྒྲུང་དེའང་ཐེངས་མང་པོ་ཐོས་མྱོང་ཡོད།དོན་དངོས་སུ་རྩྭ་ཐང་འདི་ཡི་རྒྱ་ཁྱོན་ནི་དེ་འདྲ་ཧ་ལས་དགོས་པ་ཞིག་མ་ཡིན་ཏེ་ད་ལྟར་དེར་སོང་ན་ཉིན་ལམ་གཅིག་གི་ས་ཙམ་རེད།བྱིས་པའི་དུས་སུ་རྒན་པོ་ཚོས་ཟངས་སྡེ་སྒང་ལ་བཞི་ལུང་བརྒྱད་རེད།འབྲི་སེང་ཐར་ལ་བཞི་བསྐོར་ཞིང་འོངས་ཟེར་དུས།ལ་བཞི་ལུང་བརྒྱད་ནི་བློ་ཡུལ་དུ་ཤོང་ཐབས་བྲལ་བའི་འཇིག་རྟེན་ཆེན་མོ་ཡིན་སྣང་འཆར།རྩྭ་ཐང་གི་དཀྱིལ་ལ་རི་འབུར་འབུར་ཕྱོགས་བཞི་ལ་ནགས་ཀྱི་བསྐོར་བ་ཞིག་ཡོད་པ་དེ་ངག་རྒྱུན་དུ་གཞི་བདག་ཡིན་ཚུལ་བཤད་སྲོལ་ཡོད་ལ།ང་ཚོ་བྱིས་པ་རྣམས་རྒྱུན་དུ་དེ་རུ་བསང་མཆོད་བྱེད་སར་འགྲོ་རྒྱུ་དགའ།རྩྭ་ཐང་གི་མཐའ་སྐོར་རུ་ཤིང་ནགས་ཀྱིས་བརྒྱན་ཡོད་ལ་ཤིང་སྡོང་རེ་རེ་ནི་མཐའ་མཚམས་སྲུང་བའི་དམག་མི་དང་གཉིས་སུ་མེད་ཞིང་ནམ་ཡང་ཀྲོང་ངེར་ལངས་ཀྱིན་ཡོད།    

    དབྱར་མཇུག་དང་སྟོན་འགོ་ཚུགས་པའི་དུས་ལ་སླེབས་དུས།བྱིས་པ་ཚོ་ནགས་ཀྱི་གསེང་ནས་ཤ་མོ་འཐུ་པ་ནི་ལོ་གཅིག་ནང་དུས་བཟང་དགའ་ཤོས་ཡིན།ད་ལྟ་ཡང་བཤད་མི་ཤེས་པའི་དོན་དག་གཅིག་ནི་རྩྭ་ཐང་འདིའི་ཐོག་གེ་སར་སྒྲུང་བཤད་ཤེས་མཁན་ཁྱོན་ནས་མེད་ལ།འདིར་འཚོ་བ་རོལ་མཁན་ཚོས་གེ་སར་སྒྲུང་ཟེར་བ་རྣ་བར་ཐོས་ཀྱང་མ་མྱོང་།གྲོགས་པོ་མང་པོས་འདིའི་རྒྱུ་མཚན་འདྲི་ཡོད་ཀྱང་ལན་གསལ་བོ་མ་ཐོབ་ནའང་ང་རང་གི་སེམས་སུ་ཕལ་ཆེས་ས་གནས་འདི་ན་གཉའ་གནོད་མེད་པ་དང་འཐབ་རྩོད་མེད་པ་ཡིན་མདོག་ཆེ་བསམ་པ་ལས་རྒྱུ་མཚན་གཞན་གང་ཡང་དྲན་རྒྱུ་མེད།ཡིན་ནའང་རྩྭ་ཐང་འདིར་མི་རོ་རྩེད་སྒྲུང་དང་ཨ་ཁུ་བསྟན་པའི་སྒྲུང་།ལྕང་རྒན་ཨ་ཕོའི་གཏམ་ཟེར་བ་སོགས་བྱིས་པའི་བློ་སྒོ་འབྱེད་བའི་ལྡེའི་མིག་ལྟ་བུའི་དམངས་སྒྲུང་གི་རིགས་ཤིན་ཏུ་མང་།ང་དང་ང་ལྟ་བུའི་ཕ་ཡུལ་གྱི་བྱིས་པ་ཚོ་སྒྲུང་དེ་དག་ཉན་རྒྱུ་ལ་ཤིན་ཏུ་དགའ།དེ་དུས་ང་རང་ཚོ་བཤད་ཅི་ལོ་ལོན་རྒན་པོ་རྣམས་ཀྱིས་ཀྱང་སྒྲུང་དེ་དག་གི་མིང་ཆ་ཚང་མ་ཤེས་ཀྱང་ངའི་དྲི་མེད་ཡིད་ཀྱི་གཤིན་ས་རུ་རིག་རྩོམ་གྱི་ས་བོན་ཐོག་མ་འདེབས།རྗེས་མར་ང་རང་གིས་ཡིག་ངོ་ཆོད་དེ་སྒྲུང་ཡིག་འདི་དག་བལྟས་དུས་གཞི་ནས་ཆུང་བྱིས་པའི་དུས་སུ་རྣ་ཐོས་ཡོད་པའི་སྒྲུང་མགོ་རྔ་མི་ཚང་བ་དེ་དག་ནི་སྒྲུང་སྐད་གྲགས་ཅན་འདི་དག་ཡིནན་པ་གཞི་ནས་ཤེས་བྱུང་།

    ང་རང་རྩྭ་ཐང་འདི་རུ་་གོམ་ཁ་སྤོ་བའི་སྐལ་བ་མ་ཐོབ་ནས་ཏག་ཏག་ལོ་ཉི་ཤུ་འཁོར་བའི་དུས་སུ།གོང་རིམ་གྱིས་བཤམས་སྟོན་ཁང་ལས་དགོས་པ་དང་རང་ཉིད་ཀྱི་འབྲོག་པའི་སྤྱོད་ཆས་རྣམས་ཀྱི་ཐ་སྙད་ལ་རྒྱུད་ལོན་བྱེད་འདོག་ཆེ་བས།ང་དང་གྲོགས་པོ་འགའ་དང་འགྲོགས་ཏེ་སླར་རྩྭ་ཐང་འདི་ལ་སོང་བ་ཡིན།སྔོན་བྱིས་དུས་འཚོ་གནས་བྱེད་མྱོང་བའི་རྩ་ཐང་གི་ཕྱོགས་བཞིའི་ས་རྟགས་རྡོ་རྟགས་རྣམས་ཀྱི་མིང་ཚང་མ་བློ་ལས་ཡལ་ཚར་འདུག  ང་ཚོ་ལ་ལུང་མང་པོ་བརྒལ་ནས་འགྲོ་ནའང་རྩྭ་ཐང་གི་མུ་ཏིག་ལྟ་སྣང་བའི་་གཡང་དཀར་ལུག་ཁྱུ་རིག་མ་སོང་།འབྲི་གཡག་ཁྱུ་གཅིག་གི་རི་མགོ་ལ་རྩྭ་ཟ་འདུག་ལ།རྩྭ་ཐང་གི་ཕ་ཁྱིམ་སྦྲ་ནག་ནི་རྩྭ་ཐང་འདི་ན་མིང་ཙམ་ཡང་ཡོད་ས་མ་རེད།ཕྱོགས་གཅིག་ནས་བཤད་ན་ཅ་ལག་འདི་དག་དུས་ཀྱི་འགྲོས་དང་མི་མཐུན་པ་རྗེས་ལུས་ཀྱི་མཚོན་བྱེད་ཡིན་ཡང་།གཞན་ལས་ང་དང་ང་ལྟ་བུ་འཁྱམ་པོ་དག་གི་བློ་ཡུལ་སུ་སྦས་པའི་དྲན་ཤེས་ཤིག་མེད་དམ།ངས་རྩྭ་ཐང་སྟེང་གི་ནོར་ལུག་འཚོ་སྐྱོང་བྱེད་པའི་རྫི་བོ་འབོད་ནས་བཅའ་འདྲི་བྱེད་སྐབས།བློ་ཡུལ་ལས་འདས་པ་ནི་ཁོ་ཚོས་བཤད་པའི་སྐད་ཆ་དང་ངའི་སྙིང་གཏིང་རུས་པའི་གསེང་དུ་ལུས་པའི་སྔོན་བྱིས་དུས་ཀྱི་འབྲོག་པའི་སྤྱོད་ཆས་ཀྱི་ཐ་སྙད་རྣམས་ཁ་ཁ་སོ་སོ་ཆགས་འདུག   ཐ་ན་ཁོ་ཚོའི་ཁྲོད་གཡག་འདི་ད་ལོ་ལོ་བཞི་རེད་་ཟེར་མཁན་ཡང་འདུག   དེ་ལས་ཡ་མཚན་བའི་གནད་དོན་ཞིག་ནི་ང་ཚོ་བྱིས་པའི་དུས་སུ་སྦྲ་ནག་གྲུ་བཞི་གཅིག་ནང་དུ་དུད་ཚང་གཉིས་གསུམ་མཉམ་དུ་འཚོ་བ་རོལ་ནས་མཚན་མོར་གླུ་དང་བྲོ། སྒྲུང་དང་ཁེད་སོགས་མཉམ་རྩེད་བྱས་ནས་སྐྱིད་པའི་སྣང་བ་རྩྭ་ཐང་ཡོངས་ལ་ཁེབས། ད་ལྟ་ནི་རས་དཀར་གྱི་གུར་ཆུང་ཆུང་རེ་རེའི་ནང་དུ་དུད་ཚང་རེ་རེ་དང་ཡང་ན་མི་གཅིག་ཁེར་སྡོད་བྱས་ཏེ་མི་དང་མི་བར་ཡིད་ཆེས་མེད་མདོག་ཆེ་བའི་སྣང་ཚུལ་དེའོ། ད་རུང་དེ་དང་དེ་བཞིན་རྩྭ་ཐང་ཁོ་རང་དང་དེ་རུ་གནས་པའི་འབྲོག་པ་རྣམས།གཞན་ཡང་རང་དང་འདྲ་བའི་རྩྭ་ཐང་དང་ཡུན་གྱིས་བྲལ་བའི་མི་བུ་དག་གནའ་བོའི་རྣམ་པ་ཚང་མ་མེད་པ་སྐྱུར་སོང་བས་དུས་རབས་ཀྱི་སྐྱོན་དང་འཇིག་རྟེན་གྱི་ཆོས་ཉིད་གང་ཡིན་པ་བརྗོད་དཀའ།