མི་འཁྱམ་རབ་རྒྱས། བྱམས་པ་གཡུའི་མེ་ཏོག

བྱམས་པ་གཡུའི་མེ་ཏོག

མི་འཁྱམ་རབ་རྒྱས།

རབ་དཀར་སྲིད་པ་ཆགས་པའི་གངས་རྒན་ལ།།

ཉི་འོད་ཕོག་པས་འབྱུང་བཞི་ཆུ་གཏེར་འབབ།།

དྭངས་གསལ་ཡིད་ཀྱི་ངོས་སུ་ཆུང་འདྲིས་ཀྱིས།།

འཛུམ་དཀར་ལེན་གཅིག་བསྟན་པས་སྤྲོ་སྣང་རྒྱས།།

དཔྱིད་ཀྱི་དཔལ་ཡོན་གཡུ་ཡི་སྤང་ལྗོངས་ཐོག།

མེ་ཏོག་སྣ་བརྒྱ་བཞད་དེ་མིག་གིས་མཆོད།།

འཇིག་རྟེན་མཐར་ཡས་སྐྱེས་བུ་གྲངས་མེད་པ།།

ཆུང་འདྲིས་ཉམས་ཤིག་བསྟན་པས་སེམས་ཀྱི་སྨན།།

དུས་ཀྱི་ཁུ་བྱུག་ལ་ལུང་ཀུན་ལ་གྲགས།།

འཇིག་རྟེན་ཡོངས་ལ་རེ་བའི་བརྡ་སྤྲོད་པ།།

དབྱངས་ཅན་ངག་དང་འགྲན་པའི་ཆུང་འདྲིས་གསུངས།།

ཐོས་པ་ཙམ་གྱིས་དགའ་བའི་གནས་སུ་ལྷུང་།།

དབྱར་གྱི་མཚོ་ནང་ཆུ་སྐྱེས་མེ་ཏོག་ནི།།

བསིལ་གྱི་བདག་པོ་ཟླ་འོད་བཞད་ནུས་ལ།།

དགའ་སྐྱོ་གང་ཡང་མེད་པའི་འཁྱམ་པོ་ཡང་།།

འཚོ་གནས་བདག་པོ་ཆུང་འདྲིས་སྐྱིད་སྡུག་སྦྱིན་།།

གངས་སྟོད་སེང་གེ་དཀར་མོ་འོ་མ་ནི།།

གསེར་གྱི་ཕུར་བ་མེད་ན་ལེན་ཐབས་བྲལ།།

ཆུང་འདྲིས་ང་ལ་གནང་བའི་བརྩེ་བ་ཡང་།།

རིན་ཆེན་སེམས་ཤིག་མེད་ན་འཛིན་ཐབས་མེད།།

ཁུ་བྱུག་གསུངས་སྙན་སེང་ཆེན་མེ་ཏོག་གཉིས།།

དབྱར་སྟོད་ཟླ་གསུམ་ནང་ནི་འཕྲད་སྲིད་ལ།།

ང་དང་ལས་ཀྱི་བཀོད་པའི་ཆུང་འདྲིས་གཉིས།།

ལོ་གསུམ་ཞག་གསུམ་ནང་ལ་འཛོམས་རོགས་དགོས།།

བླ་སློབ་དམ་ཚིག་དམ་པོ་གསངས་སྔགས་ཆོས།།

ཁྲོམ་ནང་བསྒྲགས་ན་དམ་ཉམས་དམྱལ་བར་ལྷུང་།།

ཆུང་འདྲིས་ང་ལ་བཤད་པའི་གསང་གཏམ་རྣམས།།

ནམ་མཁའ་རླུང་གིས་གོ་ཡང་ཐན་རྟགས་ཡིན།།