རྒྱལ་གཅེས་ཆོས་གཅེས་ཀྱི་སྤྱོད་བཟང་མ་བོར་བའི་ཡོན་ཏན་དགོན།

▲ཡོན་ཏན་དགོན་གྱི་ཕྱིའི་བཀོད་པ།

        གངས་རི་གནམ་ལ་ཟུག་ཤིང་བཤོལ་ཆུ་ལྷུང་ལྷུང་འབབ་པའི་ལོགས་གཉིས་སུ་འཚོ་བའི་གཏེར་མ་རོང་ནི་གནའ་ནས་ད་བར་དུ་སྙིང་སྟོབས་ཅན་གྱི་སྐྱེས་ཆེན་དམ་པ་དང་རྒྱལ་ཁབ་དང་མི་རིགས་ཀྱི་ཆེད་དུ་རྨད་བྱུང་མཛད་རྗེས་བཞག་བའི་རྒྱལ་གཅེས་ཀྱི་དཔའ་བོ་འཁྲུངས་སའི་གནས་ཡུལ་ཁྱད་པར་ཅན་ཞིག་ཡིན་ཏེ།  དུས་ད་ལྟའང་གཏེར་མ་རོང་གི་སྙིང་སྟོབས་ཞེས་ཀུན་གྱི་བསྟོད་པའི་གཞི་ཞིག་ཏུ་གྱུར་ཡོད་པ་རེད། སེམས་ཀྱི་ཉི་ཟླ་གྲོང་ཁྱེར་ནས་སྤྱི་ལེ་180ཡས་མས་སོང་ན་ད་བཟོད་ཡོན་ཏན་དགོན་པར་ཐོན་ཐུབ། དགོན་པར་ཐོན་མ་ཐག་ཐོག་མར་ང་ཚོའི་མིག་ལ་ཐོགས་ཡོང་བ་ནི་བཤོལ་ཆུའི་ཕར་ཁའི་སྒང་ཁ་ན་བརྗིད་ཀྱིས་ཆགས་ཡོད་པའི་དགོན་པའི་ཕྱིའི་བཀོད་པ་ཡིན་ཏེ། མཐོ་ཞིང་བརྗིད་པའི་འདུ་ཁང་དང་གསར་འོད་ལམ་ལམ་གྱི་རྒྱབ་ཕིབས། དེ་མིན་དགོན་པའི་ར་སྐོར་གྱི་དཀྱིལ་ན་ཀྲོང་ངེར་ལངས་ཤིང་དྲོད་འཇམ་རླུང་གིས་དལ་གྱིས་བསྐྱོད་བཞིན་པའི་སྐར་ལྔའི་དར་དམར་སོགས་ཀྱི་བྱ་དངོས་དེ་དག་རེད།

        རི་ཁྲོད་ནས་དགོན་སྡེར་འཕེལ་རྒྱས་བྱུང་བའི་དགོན་པ།

        ཡོན་ཏན་དགོན་ནི་གཏེར་མ་རོང་དབུས་རྒྱུད་ཀྱི་བཤོལ་ཆུའི་འགྲམ་དུ་ཆགས་ཡོད་ལ། ཆོས་ལུགས་གྲུབ་མཐའ་ཕྱོགས་ནས་བཤད་ན་རྙིང་མ་བའི་དགོན་པ་ཞིག་ཡིན་པ་རེད། མིང་གོ་དུས་རབས་སུ་སྔགས་རྩ་པདྨ་བསྟན་འཛིན་རིན་པོ་ཆེ་སྐུ་ཕྲེང་བཞི་བ་དང་བྱང་ཚུལ་ཁྲིམས་རྒྱ་མཚོ་སྐུ་ཕྲེང་གསུམ་པ་གཉིས་ཀྱིས་གཏེར་མ་རོང་གི་ཡུལ་འདིར་ཆོས་ཀྱི་འཕྲིན་ལས་རྒྱ་ཆེར་སྤེལ་ཞིང་།1948ལོར་ཁོང་བུ་སློབ་གཉིས་ཀྱིས་དགོན་པ་རྒྱ་ཇེ་ཆེར་བཏང་ནས་སྔོན་གྱི་རི་ཁྲོད་ཅིག་ནས་དགོན་སྡེ་ཞིག་ཏུ་འཕེལ་རྒྱས་དང་གོང་འཕེལ་བཏང་ལ། 1982ལོར་རྒྱལ་ཁབ་ཀྱིས་སྔོན་གྱི་དགོན་སའི་སྟེང་སྤྱི་ཡོངས་ནས་ཞིག་གསོ་དང་བསྐྱར་སྐྲུན་བྱས་ནས་དུས་ད་ལྟའི་དགོན་སྡེ་ཆེན་པོ་འདི་འདྲ་ཞིག་ཏུ་བསྒྱུར་བ་རེད། ད་ལྟ་དགོན་པའི་རྒྱ་ཁྱོན་ལ་ས་མུའུ་6.5དང་བསྡོམས་པས་གྲྭ་བཙུན་82ཡོད་ལ། དེའི་ཁྲོད་ཇོ་མོ་12ཡོད་པ་རེད། དགོན་པའི་འཛུགས་སྐྲུན་ལ་སྲུང་མའི་ལྷ་ཁང་དང་བྱམས་པའི་འདུ་ཁང་། སྣེ་ལེན་ཁང་། སྨན་པ་གྲྭ་ཚང་། གྲྭ་ཤག་45བཅས་ཡོད།   

        དགེན་པདྨ་རྡོ་རྗེ་ནི་ཡོན་ཏན་དགོན་གྱི་ཀྲུའུ་རེན་ཡིན་ལ། ཁོང་གིས་ངོ་ཚོ་སྔ་ཕྱི་བྱས་ནས་དགོན་པའི་ཇ་ཁང་དང་གྲོས་ཚོགས་ཁང་། འདུ་ཁང་སོགས་སུ་ཁྲིད། ལོ་འདི་དག་རིང་རྒྱབ་ཁྱབ་ཀྱིས་དགོན་སྡེ་འཛུགས་སྐྲུན་ལ་ཤུགས་སྣོན་ཆེན་པོ་རྒྱབ་པས་ཡོན་ཏན་དགོན་པའི་འཚོ་བར་ཡང་འགྱུར་ལྡོག་ཆེན་པོ་བྱུང་ཡོད་དེ།  གཙང་ཞིང་གྲ་དག་ལ་དེང་རབས་ཀྱི་གྲོང་ཁྱེར་འཚོ་བའི་ཆ་རྐྱེན་འཛོམས་པའི་ཇ་ཁང་དང་མཐོ་ཞིང་བརྗིད་པའི་ཚོགས་ཆེན་འདུ་ཁང་། ཕྱེས་ན་ཤུར་ཤུར་བཞུར་བའི་རང་བབས་ཆུ། འདི་ལྟ་བུའི་འཚོ་བའི་ཆ་རྐྱེན་ལོ་ངོ་བདུན་བཅུའི་སྔོན་དུ་ཡིད་ལ་ཤར་ཐབས་མེད་པ་ཞིག་ཡིན་པ་རེད་ཅེས་བཤད།  དེ་རྗེས་ང་ཚོ་གྲོས་ཚོགས་ཁང་དུ་ཐོན་པ་ན་ཐོག་མར་མིག་ལ་ཟིན་ཡོང་བ་ནི་ཁང་བའི་ཕུག་གི་མཐོ་ཕྱོགས་ཀྱི་གྱང་ངོས་སུ་བཀལ་ཡོད་པའི་རྒྱལ་ཁབ་ཀྱི་རླབས་ཆེན་འགོ་ཁྲིད་དག་གི་སྐུ་པར་དང་ཕྱོགས་གཉིས་སུ་སྒྲེང་ཡོད་པའི་རྒྱལ་དར་ཡིན་པ་རེད། འདི་ལས་ཀྱང་དགོན་པས་རྒྱལ་ཁབ་ཀྱི་བཀའ་དྲིན་དྲན་པ་དང་བློ་བརྟན་འགྱུར་མེད་ཀྱིས་ཏང་གི་རྗེས་སུ་སྙེག་བཞིན་པ་ཤེས་ཐུབ་པ་རེད།

▲གསར་འགོད་པས་དགོན་པའི་ཀྲུའུ་རེན་པདྨ་རྡོ་རྗེར་བཅར་འདྲི་བྱེད་བཞིན་པ།

        རྒྱལ་གཅེས་ཆོས་གཅེས་གྱི་སྲོལ་རྒྱུན་རྒྱུན་འཛིན་བཟང་བའི་དགོན་པ།

        དགོན་པའི་ར་སྐོར་ནང་དུ་མེ་ཏོག་དང་སྡོང་བོ་སྣ་ཚོགས་བཙུགས་ཡོད་དེ་ལྗང་མདོག་དང་སྐྱེ་ཁམས་ཀྱི་སྣང་བ་ཞིག་གིས་ཁེངས་ཡོད་ལ། དེ་མིན་རྩལ་སྦྱོང་སྒྲིག་ཆས་དང་ངལ་གསོ་སྟེགས་བུ་སོགས་དེང་རབས་གྲོང་ཁྱེར་ནང་དུ་མཐོང་ཐུབ་པའི་སྤྱི་བའི་སྒྲིག་ཆས་སྣ་ཚོགས་ཀྱང་ཡོད། ངལ་གསོའི་སྟེགས་བུའི་སྟེང་དུ་གྲོང་ཚོའི་ནང་གི་ལོ་ལོན་འགའ་རེས་སྐོར་ར་བརྒྱབ་ཚར་རྗེས་ངལ་གསོ་བྱེད་བཞིན་པ་མཐོང་ཞིང་། དྲོད་འཇམ་གྱི་ཉི་འོད་ཁྲོད་ན་ཨ་མྱེ་འགའ་རེས་འགྱིག་རྩེད་བཞིན་ཡོད་ལ། ལོགས་སུ་ཨ་ནེ་འགའ་རེས་ཁ་བརྡ་སྣ་ཚོགས་བྱེད་བཞིན་ཉི་མའི་དྲོད་ལ་རོལ་ནས་སྡད་ཡོད།  མཐོང་སྣང་འདི་དག་ལས་དགོན་པས་ས་གནས་མང་ཚོགས་ལ་ལྷོད་གཡེང་དང་ཞི་མཐུན་གྱི་ཁོར་ཡུག་བཟང་བོ་ཞིག་སྐྲུན་ཡོད་པ་རྟོགས་ཐུབ་ལ། འདི་ལས་ཀྱང་ཆོས་ལུགས་ལས་དོན་གྱིས་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིགས་ལུགས་དེང་རབས་ཅན་གྱི་བྱ་བཞག་ལ་ཞབས་ཞུ་སྒྲུབ་བཞིན་པ་མཚོན་ཡོད་དེ། ཡོན་ཏན་དགོན་གྱིས་ཐོག་མཐའ་བར་གསུམ་གྱིས་བོད་བརྒྱུད་ནང་བསྟན་ཀྲུང་གོ་ཅན་གྱི་ཁ་ཕྱོགས་ལ་འབད་པ་ལྷོད་མེད་བྱེད་བཞིན་པ་མཐོང་ཐུབ།

        གཏེར་མ་རོང་གི་ཡུལ་ལུང་གི་གནའ་མོ་ནས་བཟུང་རྒྱལ་གཅེས་རིང་ལུགས་ཀྱི་སྐྱེས་བུ་དམ་པ་འཁྲུངས་སའི་གནས་ཤིག་ཡིན་ཏེ། དཔེར་ན་གངས་རིའི་གླག་རྒོད་ཚེ་རིང་དབང་ལྡན་དང་བྱང་ཚུལ་ཁྲིམས་རྒྱ་མཚོ་འདི་ལྟ་བུའི་བློ་བརྟན་འགྱུར་མེད་ཀྱིས་ཏང་གི་རྗེས་སུ་འབྲང་ནས་མི་དམངས་དང་རྒྱལ་ཁབ་ལ་ཞབས་ཞུ་བསྒྲུབ་པའི་སེམས་འགུལ་ཐེབས་ལ་རྗེས་རབས་པས་ཡི་རངས་བྱེད་འོས་པའི་མི་རིགས་ཀྱི་དཔའ་བོའི་ལོ་རྒྱུས་ཡོད་ལ། འདི་ལྟ་བའི་ལོ་རྒྱུས་ཀྱི་རྒྱབ་ལྗོངས་དང་ཤུགས་རྐྱེན་ཡོད་པས་དུས་ད་ལྟའང་སྔོན་རབས་དག་གི་སྤྱོད་བཟང་མཐོང་རྒྱུ་ཡོད་པ་རེད། རྒྱུས་ལོན་བྱུང་བ་ལྟར་ན། དགོན་པས་རང་འགུལ་གྱིས་གྲྭ་བ་རྩ་འཛུགས་བྱས་ནས་རྒྱལ་གཅེས་ཆོས་གཅེས་དང་ཀྲུང་དབྱང་གི་སྐབས་བདུན་པའི་བོད་ལྗོངས་བྱ་བའི་བཞུགས་མོལ་ཚོགས་འདུའི་སྙིང་སྟོབས་ལ་སློབ་སྦྱོང་གཏིང་ཟབ་བྱས་ནས། ཏང་གི་ལམ་ཕྱོགས་དང་སྲིད་ཇུས་ཀྱི་ལམ་ཕྱོགས་ལ་ཐོག་མཐའ་བར་གསུམ་དུ་རྒྱུན་འཁྱོངས་བྱེད་བཞིན་ཡོད་ལ། དགོན་པའི་གྲྭ་བ་ཡོངས་ཀྱིས་ལངས་ཕྱོགས་གསལ་བོས་རྒྱལ་གཅེས་ཆོས་གཅེས་ཀྱི་སྲོལ་རྒྱུན་བཟང་བོ་རྒྱུད་འཛིན་བྱས་ནས་བློ་བརྟན་འགྱུར་མེད་ཀྱིས་ཏང་གི་རྗེས་སུ་འབྲང་བའི་སྲོལ་བཟང་རྒྱུད་འཛིན་བྱེད་བཞིན་ཡོད་པ་རེད།

        ཡང་དགེན་པདྨས་རྒྱལ་ཁབ་ཀྱིས་ལོ་འདི་དག་རིང་ཕྱོགས་ཡོངས་ནས་དགོན་པར་རོགས་སྐྱོར་དང་མཐུན་རྐྱེན་གང་མང་སྐྲུན་ལ། གནའ་སྔ་མོའི་ཆ་རྐྱེན་དང་བསྡུར་ན་དུས་དེ་རིང་ཕྱོགས་གང་ཐད་ནས་གནམ་ས་བླ་འོག་གི་འགྱུར་ལྡོག་ཆེན་པོ་བྱུང་ཡོད། དེ་ཕྱིར་ཡོན་ཏན་དགོན་པའི་གྲྭ་བ་མང་ཚོགས་ཀྱིས་ཐོབ་དཀའ་བའི་ད་ལྟའི་ཚོ་བ་འདིར་གཅེས་སྤྲོས་བྱེད་ལ། ནམ་ཡང་ཏང་གི་དྲིན་ལན་དྲན་བཞིན་ཡོད་ཅེས་བཤད།

▲དགོན་པའི་ར་སྐོར་ནང་གི་རྣམ་པ།