འཇོལ་ཡུལ་གྱི་གཞས་མོ།

  བོད་མི་དམངས་ཀྱི་འཚོ་བ་ནི་གླུ་གར་སྒྱུ་རྩལ་དང་འབྲལ་ཐབས་མེད་ཅིང་།   དེ་བཞིན་བདེ་ཆེན་རྫོང་ངམ་འཇོལ་མི་དམངས་ཀྱི་འཚོ་བ་ཡང་གཞས་མོ་དང་འབྲེལ་བ་ངེས་ཅན་ཆགས་ཡོད་པ་མ་ཟད།   གཞས་མོ་ནི་འཇོལ་མི་དམངས་ཀྱི་བསམ་པའི་དཔལ་ཡོན་དང་རིག་གནས་འཚོ་བའི་ཁྲོད་མེད་དུ་མི་རུང་བའི་གྲུབ་ཆ་གལ་ཆེན་ཞིག་ཏུ་གྱུར་ཡོད་པས་ཀུན་གྱིས་དགའ་ཞེན་བཅངས་བཞིན་ཡོད་པའི་སྒྱུ་རྩལ་གྱི་ནང་དོན་ཞིག་ཡིན།    གཞས་མོ་ནི་པི་ཝང་གིས་རམ་འདེགས་དང་།    སྐྱེས་པ་སྐྱེས་མ་བར་གཞས་ལེན་རེས་བྱེད་པའི་མང་ཚོགས་རང་བཞིན་དང་། རོལ་རྩེད་ཀྱི་རང་བཞིན་གཅིག་ཏུ་འདུས་པའི་དམངས་ཁྲོད་གླུ་གར་གྱི་རིགས་ཤིག་ཡིན།  བདེ་ཆེན་ཁུལ་ལ་མཚོན་ན་འཇོལ་རྫོང་གི་ཤང་གྲོང་བརྒྱད་དང་།   དེ་མིན་འབའ་ལུང་རྫོང་གི་འབའ་སྡེ་ཤང་།   ཡེ་ཀྲི་གྲོང་རྡལ།   ཁམས་ཕུ་ཤང་། མཐའ་ཆུ་གྲོང་རྡལ་དང་དེ་བཞིན་སེམས་ཀྱི་ཉི་ཟླ་གྲོང་ཁྱེར་གྱི་ལྔ་ཤོག་ཤང་དང་ཉི་ཤར་ཤང་སོགས་སུའང་གཞས་མོ་དར་ཁྱབ་ཆེ་བ་རེད།

     གཞས་མོ་ནི་འཇོལ་རྫོང་གི་མངའ་ཁོངས་ཡོངས་སུ་དར་ཁྱབ་བྱུང་ཡོད་པ་སྟེ།  དེ་དང་ཞོར་དུ་འཇོལ་མངའ་ཁོངས་ནང་ན་འཚོ་སྡོད་བྱས་ཡོད་པའི་འཇང་རིགས་དང་། ལི་སུའུ་རིགས།ཧུའེ་རིགས། རྒྱ་རིགས་སོགས་ཀྱི་འཚོ་བའི་ཁྲོད་དུའང་དར་ཁྱབ་ཆེ།   དཔེར་ན་འཇོལ་རྫོང་གི་བྲག་ཞབས་དང་ཐང་སྟེང་ཤང་དང་།  ཡུན་ལིང་ཤང་གི་ཡུང་ཀྲི་ཡུལ་ཚོ་གསུམ་པའི་ལི་སུའུ་རིགས་དང་།  ཧྥོ་ཧྲན་ཤང་གི་བག་སྨད་གྲོང་ཚོའི་འཇང་རིགས་གྲོང་ཚོ།   ཧྲིན་ཕིང་གྲོང་རྡལ་ཨ་ཏུན་ཙི་སྡེ་ཁུལ་གྱི་ཧུའེ་རིགས་དང་།   འབའ་ལུང་དང་སེམས་ཀྱི་ཉི་ཟླ་གྲོང་ཁྱེར་གྱི་གྲངས་ཉུང་མི་རིགས་འགའ་ཤས་ཀྱིས་ཀྱང་གཞས་མོ་གཏོང་ཞིང་།  བོད་རིགས་གཙོ་བྱས་ནས་མི་རིགས་གཞན་པ་ཡང་ཟབ་ཞུགས་བྱེད་པའི་དམངས་ཁྲོད་ཀྱི་གླུ་གར་རིག་གནས་ཤིག་ཆགས་ཡོད་ལ།    མི་རིགས་དང་མི་རིགས་བར་རིག་གནས་བརྗེ་རེས་དང་།  མཐུན་སྒྲིལ་ཡར་རྒྱས།    མཛའ་བརྩེ་ཇེ་ཟབ་ཏུ་གཏོང་བའི་ནུས་པ་ཐོན་བཞིན་ཡོད།  

     གཞས་མོ་ནི་སྤྱིར་བཏང་དམངས་སྲོལ་དུས་ཆེན་དང་གྲོགས་པོ་འདུ་འཛོམས་ཀྱི་སྐབས་སུ་འཁྲབ་ཀྱི་ཡོད། འབྲི་ཆུ་དང་རྫ་ཆུའི་འབབ་རྒྱུད་དུ་གནས་པའི་འཇོལ་རྫོང་གི་གཞས་མོ་ནི་གཞས་ཀྱི་འགྱུར་ཁུག་དང་།  ཞབས་བྲོའི་འཁྲབ་སྟངས།  གྱོན་ཆས་བཅས་ལ་རང་གི་ཁྱད་ཆོས་མངོན་པར་གསལ་ཞིང་ཁྱད་ཆོས་འདི་དག་ཀྱང་ས་ཁམས་ཁོར་ཡུག་དང་འགྲིམ་འགྲུལ།   ཚོང་དོན། འཚོ་བའི་གོམས་གཤིས་སོགས་ལས་ཚུར་སྣང་བྱས་པ་ཞིག་རེད།   

       གཞས་མོའི་གླུ་ཚིག་གི་རྣམ་གྲངས་ཧ་ཅང་མང་ཞིང་ནང་དོན་ཡང་ཁྱབ་རྒྱ་ཤིན་ཏུ་ཆེ།    གླུ་ཚིག་ནང་དུ་བོད་ཀྱི་སྲོལ་རྒྱུན་རིག་གནས་ཀྱི་གནས་ཚུལ་མཐའ་ཡས་པ་ཞིག་བསྡུས་ཡོད།    2009ལོའི་ཟླ8པར་འཇོལ་རྫོང་གི་གཞས་མོ་ནི་ཞིང་ཆེན་རིམ་པའི་མངོན་མིན་རིག་གནས་ཤུལ་བཞག་གི་མཚོན་བྱེད་རང་བཞིན་གྱི་རྣམ་གྲངས་སྲུང་སྐྱོབ་ཁག་གཉིས་པའི་མིང་གཞུང་ནང་བཅུག་པ་དང་མངོན་མིན་རིག་གནས་ཤུལ་བཞག་གི་རྒྱུན་འཛིན་པ་འབོར་ཆེན་ཞིག་ལ་སྔ་རྗེས་སུ་མིང་བཏགས་པ་དང་སྲུང་སྐྱོབ་ཐོབ་ཡོད།2019ལོའི་ཟླ་10པར་འཇོལ་རྫོང་བོད་ཀྱི་གཞས་མོ་དེ་རྒྱལ་ཁབ་རིམ་པའི་མངོན་མིན་རིག་གནས་ཤུལ་བཞག་གི་མཚོན་བྱེད་རང་བཞིན་གྱི་རྣམ་གྲངས་ཁག་ལྔ་པའི་འོས་སྦྱོར་མིང་ཐོའི་ནང་ཚུད་ཡོད་པ་རེད།

གཞས་མོ་རྒྱུན་འཛིན་པས་གུང་གསེང་ནང་སློབ་མ་རྣམས་ལ་པི་ཝང་དཀྲོལ་སྟངས་འཁྲིད་པ།