གུང་གསེང་རིང་འབའ་ལྷག་དཀར་རྫོང་གིས་སྤ་སེའི་རིན་གོང་མར་བཅག་འདུག

    སེམས་ཀྱི་ཉི་ཟླ་བོད་ཡིག་དྲ་བའི་འཕྲིན། ད་ལོའི“ལྔ་གཅིག”གུང་གསེང་རིང་།བདེ་ཆེན་ཁུལ་གྱི་ལྗོངས་ཁུལ་ཁག་གིས་རིམས་ནད་སྔོན་འགོག་ཚོད་འཛིན་གྱི་འབྲེལ་ཡོད་བླང་བྱ་དོན་འཁྱོལ་ནན་པོ་བྱས་ནས་སྔོན་མངགས་དང་།བདེ་ཐང་ཨང་རྟགས་བཤེར་བ།གཟུགས་པོའི་དྲོད་ཚད་ཚགས་བཤེར་སོགས་ཀྱི་སྔོན་འགོག་ཚོད་འཛིན་བྱེད་ཐབས་ལག་བསྟར་བྱས་ཡོད།འབའ་ལྷག་དཀར་རྫོང་ལྗོངས་ཁུལ་གྱིས་རིམས་ནད་སྔོན་འགོག་ཚོད་འཛིན་གྱི་བྱ་ཐབས་ཁག་དོན་འཁྱོལ་ནན་པོ་བྱས་ནས་དུས་ཆེན་རིང་སྒོ་འཛིན་དང་རོལ་རྩེད་རྣམ་གྲངས་ཀྱི་གཟིགས་སྐྱོང་སྲིད་ཇུས་བཏོན་ཡོད་པ་རེད།

   ཟླ4པའི་ཚེས་30ཉིན་ནས་ཟླ་5པའི་ཚེས་5ཉིན་བར་འབའ་ལྷག་དཀར་རྫོང་ལྗོངས་ཁུལ་གྱིས་སྐྱེ་ཁུངས་བདེ་ཆེན་ནས་ཡིན་པའི་ཡུལ་སྐོར་བར་སྤ་སེའི་རིན་གོང་ཕྱེད་ཀ་བཅག་པའི་གཟིགས་སྐྱོང་སྲིད་ཇུས་ལག་བསྟར་བྱེད་ཀྱི་ཡོད་དེ།ལྗོངས་ཁུལ་གྱི་སྤ་སེའི་ཐོག་མའི་རིན་གོང་མི་རེར་སྒོར་110ཡིན་པ་དང་།སྐྱེ་ཁུངས་བདེ་ཆེན་ཁུལ་ནས་ཡིན་པའི་སྤྱི་དམངས་ཀྱིས་རང་ཉིད་ཀྱི་ཐོབ་ཐང་ལག་ཁྱེར（གནས་སྐབས་སྡོད་ཆོག་པའི་ལག་ཁྱེར་ཚུད་པ）ལ་སྤ་སེའི་རིན་པ་སྒོར་55ལས་སྤྲོད་དགོས་ཀྱི་མེད་པ་རེད།

ལྗོངས་ཁུལ་ནང་གི་མཁའ་དབྱིངས་ཀྱི་འདྲེད་ཐག་རྣམ་གྲངས་ནི་མི་རེར་སྒོར་120ནས་མི་རེར་སྒོར་80བར་ཡིན་པ་དང་། ལྗོངས་ཁུལ་གྱི་མགྲོན་ཁང་དུ་སྡོད་སྐབས་ཁང་བ་རེར་ཡུལ་སྐོར་མཛེས་ལྗོངས་ཁུལ་གྱི་སྤ་སེ་གཅིག་སྟེར་རྒྱུ་ཡིན་པ་རེད།（ཤམ་བྷ་ལ་མཆོད་རྟེན་མཛེས་ལྗོངས་ཁུལ་ཚུད་མེད）