ཁྲག་རྩ་འགག་པའི་ནད་སྔོན་འགོག་བྱེད་ཐབས།

 གཅིག ཆུ་མང་དུ་འཐུང་བ།ལུས་པོར་ཆུ་མི་འདང་བའི་སྐབས་སུ།ཁྲག་གི་གར་ཚད་ཇེ་མཐོར་སོང་སྟེ།ཁྲག་གི་འཁོར་རྒྱུག་ཚད་ཇེ་དལ་དང་ཁྲག་གི་དཀག་ཚད་ཇེ་མཐོར་འགྲོ་བས།ཁྲག་རྩ་འགག་པའི་ཉེན་ཁ་ཇེ་ཆེར་འགྲོ་བར་མ་ཟད།ཀླད་སྙིང་ཁྲག་རྩའི་ནད་འབྱུང་ཚད་ཀྱང་ཇེ་མཐོར་འགྲོ་བ་རེད།སྔ་དྲོའི་དུས་ཚོད6ནས9བར་ནི་ཀླད་སྙིང་ཁྲག་རྩའི་ནད་འབྱུང་ཚད་ཆེས་མཐོ་བའི་དུས་ཡིན་པས།ཀླད་སྙིང་ཁྲག་རྩའི་ནད་པས་སྔ་མོར་མལ་ལས་ལངས་མ་ཐག་དུས་ཐོག་ཏུ་ཆུ་ཁོལ་དྲོད་འཇམ་ཕོར་བ་གང་འཐུང་དགོས་ལ།དགོང་མོ་ཉལ་ཁར་ཆུ་ཕོར་བ་གང་སྔས་མགོར་བཞག་སྟེ།ནམ་གུང་ཁ་སྐོམ་པའི་སྐབས་སུ་འཐུང་དགོས།ཉིན་དཀར་རྔུལ་ཆུ་བཞུར་ནའང་མྱུར་དུ་ཆུ་ཁ་གསབ་བྱེད་དགོས་ལ།སྙིང་གི་ནུས་ཤུགས་ཉམས་པ་དང་སྦྲགས་ཏེ་མཁལ་མའི་བྱེད་ནུས་ཇེ་ཞན་དུ་འགྲོ་བའི་སྐབས་སུ།ཉིན་རེའི་ཆུ་འཐུང་ཚད་ཀྱང་སྨན་པའི་ངག་ལྟར།འཐུང་ཐེངས་ཇེ་མང་དང་འཐུང་ཚད་ཇེ་ཉུང་དུ་བཏང་ནས་དལ་གྱིས་འཐུང་དགོས།

    གཉིས། བཟའ་བཏུང་ལ་མཉམ་འཇོག་དགོས།སྣུམ་དང་ཚྭ་དང་ཀ་ར་མང་བའི་ཟས་རིགས་མང་དུ་ཟོས་ན།ཁྲག་གི་གར་ཚད་ཇེ་མཐོར་འགྲོ་བ་དང་ཁྲག་གི་འཁོར་རྒྱུག་ལ་བཀག་འགོག་ཐེབས་ངེས་པས།དུས་རྒྱུན་གྱི་འཚོ་བའི་ཁྲོད་དུ་ཟས་རིགས་དོ་མཉམ་ཡོང་བར་མཉམ་འཇོག་དགོས།རླངས་བཙོས་ཟས་རིགས་མང་དུ་བསྟེན་དགོས་ལ།མི་དར་མས་ཉིན་རེའི་ཚྭ་བཟའ་ཚད་ཁེ6ལས་མི་བརྒལ་བ་དང་།ཟ་མ་གཡོས་སྦྱོར་བྱེད་སྐབས་སྣུམ་ཁེ25ནས30ལས་མི་བརྒལ་བར་བྱེད་པ་དང་།ཀ་རའི་བཟའ་ཚད་ཁེ25ལས་མི་བརྒལ་བ་བྱེད་དགོས།ཤ་བཟའ་སྐབས་གཙོ་བོ་ཉ་ཤ་དང་ཤ་སྣག་བསྟེན་དགོས།དུས་རྒྱུན་དུ་མོག་རོ(木耳)དང་སྒ་རློན། སྒོག་པ། ཙོང་རིལ་སོགས་དང་།དེ་མིན་ད་རུང་ཏུང་ཀྭ་དང་ཚོད་དཀར་ཆུང་བ།ཧའེ་ཏའེ(海带)། ཀྲོ་མ་ཀྲུ་སོགས་འཚོ་བཅུད་འདུས་ཚད་མཐོ་བའི་ཟས་རིགས་བསྟེན་ན།ཁྲག་རྒྱུན་ཁྲོད་ཀྱི་གད་སྙིགས་གཙང་སེལ་བྱས་ཏེ།ཁྲག་གི་གར་ཚད་ཇེ་དམའ་རུ་འགྲོ་བ་དང་།ཁྲག་རྩ་འགག་པའི་ཉེན་ཁ་ཇེ་ཆུང་དུ་གཏོང་ཐུབ།

    གསུམ། ཁྲག་ཤེད་བརྟན་པོ་ཡོང་བ།ཁྲག་ཤེད་ལ་འགྱུར་ལྡོག་བྱུང་བ་ནི་ཁྲག་རྩ་འགག་པའི་རྒྱུ་རྐྱེན་གཙོ་བོ་ཡིན།ཁྲག་ཤེད་མཐོ་བའི་ནད་པས་ཁྲག་རྩ་བརྟན་པོ་ཡོང་བར་འབད་དགོས་པ་ལས།གློ་བུར་སྨན་འཐུང་མཚམས་འཇོག་པ་དང་ཡང་ན་སྨན་འཐུང་ཚད་ཇེ་མང་དུ་གཏོང་བ་སོགས་བྱེད་མི་རུང་།

    བཞི། མཚན་བརྒལ་ཏེ་མི་གཉིད་པ། མཚན་བརྒལ་ཏེ་མ་གཉིད་ན་མིའི་ལུས་སྟེང་གི་སྐྱེ་དངོས་དུས་ཚོད་དཀྲུགས་སྲིད་པ་དང་།མཁལ་སྟེང་གཤེར་རྨེན་རྒྱུ་མང་པོ་ཟགས་ཐོན་དང་མཁལ་སྟེང་གཤེར་རྨེན་ཀ་པ་མང་པོ་དོར་ཏེ།ཁྲག་གི་གར་ཚད་ཇེ་མཐོར་གཏོང་སྲིད།དེ་བས་ཉིན་རེར་དུས་ཚོད་ལྟར་ངལ་གསོ་བ་དང་དགོང་མོའི་དུས་ཚོད11གི་སྔོན་ལ་ངེས་པར་དུ་ཉལ་དགོས།

    ལྔ། དུ་བ་དང་ཆང་གཅོད་པ།དུ་ཆང་ནི་ཁྲག་རྩའི་དགྲ་བོ་ཡིན།ཞིབ་འཇུག་ལས་མངོན་པ་ལྟར་ན།རྒྱུན་པར་དུ་ཆང་ལ་རོལ་མཁན་གྱི་ཁྲག་གི་གར་ཚད་ནི་དུ་ཆང་ལ་མི་རོལ་བའི་མི་ལས་ལྡབ8ཀྱིས་མཐོ་བ་རེད།དེ་བས་དུ་ཆང་གཅོད་པ་ནི་ཁྲག་རྩ་བདེ་ཐང་ཡོང་བའི་གནད་འགག་རེད།

    དྲུག སེམས་ཁམས་སྐྱིད་པོ་ཡོང་བ།བགད་ན་སེམས་ཀྱི་གནོན་ཤུགས་འདོར་ཐུབ་ལ།ཁྲག་རྩའི་ནང་སྐྱི་ལ་སྲུང་སྐྱོབ་ཐོབ་སྟེ་ཁྲག་གི་འཁོར་རྒྱུག་ཇེ་ལེགས་སུ་གཏོང་ཐུབ།སེམས་ཁམས་སྐྱིད་པའི་སྐབས་སུ་ཁྲག་ཤེད་ཀྱང་བརྟན་བརླིང་ཡིན།

    བདུན། རྐང་ཐང་དུ་འགྲོ་བ།ལུས་སྦྱོང་བྱས་ན་སྙིང་གི་བྱེད་ནུས་ཇེ་དྲག་ཏུ་གཏོང་ཐུབ།ལུས་ཡོངས་ཀྱི་ཁྲག་གི་འཁོར་རྒྱུག་ལ་སྐུལ་འདེད་གཏོང་བའི་དམིགས་ཡུལ་འགྲུབ་དགོས་ན།ཆེས་བཟང་བའི་གདམ་ཀ་ནི་རྐང་ཐང་ལ་འགྲོ་རྒྱུ་དེ་རེད།རྐང་ཐང་ལ་འགྲོ་བ་ནི་དབྱང་ལྡན་ལུས་སྦྱོང་དུ་གཏོགས་པས།དེས་སྙིང་དང་གློ་བའི་བྱེད་ནུས་ཇེ་དྲག་ཏུ་བཏང་ནས།ཁྲག་རྩའི་ནང་དུ་ཁྲག་ཚིལ་བསོག་པ་དང་ཁྲག་རྡོག་གྲུབ་པ་སྔོན་འགོག་བྱེད་ཐུབ།ཉིན་རེར་སྐར་མ30ཡི་རིང་ལ་མྱུར་འགྲོ་བྱས་ཏེ།ལུས་ནས་རྔུལ་ཆུ་ཉུང་ཙམ་བཞུར་དུ་འཇུག་པ་ནི་ཆེས་བཟང་པའི་ལུས་སྦྱོང་གི་རིགས་ཤིག་ཡིན། །