མནའ་བསྐྱལ་རྒྱུར་དགའ་བའི་རྔོན་པ།༼གཏམ་རྒྱུད་ཐུང་ཡང་གནས་ལུགས་ཟབ།༽

 ལོ་མང་པོའི་རིང་ལ་སྦྱོང་བརྡར་བྱས་པ་བརྒྱུད།ན་གཞོན་བཀྲ་ཤིས་ཀྱི་མདའ་རྩལ་ནི་ཀུན་ལས་ཁྱད་དུ་འཕགས་ཤིང་།  མདང་སྟོང་འཕངས་ནའང་གཅིག་ཀྱང་མི་འཆོར་བར་འབེན་ལ་ཕོག་པའི་རྩལ་ཤུགས་དང་ལྡན་པར་གྱུར།     ཀུན་གྱིས་ཁོ་ལ་མདའ་བའི་བུ་རྒྱུད་ཅེས་བསྔགས་བརྗོད་ཀྱི་མེ་ཏོག་ཡང་ཡང་སྟོར།   ཡིན་ནའང་ཁོ་ལ་གོམས་གཤིས་ངན་པ་ཞིག་ཡོད་དེ།   ཁོ་ནི་གང་འདོད་དུ་མནའ་བསྐྱལ་བར་དགའ།  

        ཉིན་ཞིག      བཀྲ་ཤིས་རྩྭ་ཐང་དུ་རི་དྭགས་རྔོན་པར་སོང་།   ལམ་ཁ་ནས་ཁོ་བོས་སྤོབས་པ་དང་བཅས་ང་དེ་རིང་ཤྭ་བ་བཅུ་གསོད་རྒྱུ་ཡིན་ཞེས་མནའ་བསྐྱལ།   ཡིན་ནའང་ཉིན་དེར་ཁོས་རི་བོ་འགའ་ལས་མ་མཐོང་བས་ལག་སྟོང་མཆན་ལ་བཙིར་ནས་ཡོང་རྒྱུ་ལས་ཐབས་མ་བྱུང་།    ཡང་ཕྱི་ཉིན་རི་ལ་འགྲོ་དུས་ཁོས་ཞེ་སྡང་དང་བཅས་ངས་དེ་རིང་རི་བོང་བཅུ་གསོད་མ་ཐུབ་ན་སྐྱེས་ཕོ་རབས་མིན་པའི་རྟགས་ཡིན་ཟེར་ནས་གང་སར་ཉུལ་ཡང་།   རི་བྱིའུ་འགའ་ལས་རི་བོང་གཅིག་ཀྱང་གསོད་མ་ཐུབ་པས་ཁོ་ཐག་ཆད་ནས་ཡུལ་དུ་ལོག     ཡང་ཉིན་གསུམ་པར་ལམ་དུ་ཆས་ཁར་ཁོ་བོས་ང་རྒྱལ་དང་བཅས་དེ་རིང་ཅིས་ཀྱང་ཝ་མོ་ཞིག་གསོད་དགོས་ཞེས་མནའ་བསྐྱལ་ནས་རི་ལ་སོང་ཡང་ས་རུབ་རེག་བར་ཏུ་རི་དྭགས་གཅིག་ཀྱང་གསོད་མ་ཐུབ་པར་ལག་སྟོང་ལ་ཕྱིར་ལོག་པ་ལས་ཐབས་མ་བྱུང་།   

     གལ་ཏེ་མདའ་རྩལ་ཕུལ་དུ་བྱུང་བའི་ན་གཞོན་བཀྲ་ཤིས་ཀྱིས་རྔོན་ཁོ་ན་བྱས་ཏེ་འཚོ་བ་རོལ་དགོས་པའི་དབང་དུ་བཏང་ན།རི་དྭགས་གཅིག་ཀྱང་མ་རྔོན་པའི་སྔོན་དུ་གང་འདོད་དུ་མནའ་བསྐྱལ་ནས་མཇུག་འབྲས་ལ་བསམ་གཞིགས་མི་གཏོང་བར་འདི་ལྟར་མུ་མཐུད་དུ་སོང་ཚེ་ལྟོགས་ནས་འཆི་རྒྱུ་ཁོ་ཐག་ཆོད།   རྔོན་པ་འདི་དང་འདྲ་བར་རྒྱུན་ལྡན་འཚོ་བའི་ཁྲོད་མི་མང་པོ་ཞིག་ལ་དོན་དག་མ་བསྒྲུབ་པའི་སྔོན་དུ་བྱུང་རྒྱལ་གྱིས་མནའ་བསྐྱལ་བའི་གོམས་གཤིས་ཤིག་ཆགས་ཡོད་པ་དང་།  དཔེར་ན་ཕྲུ་གུ་མ་སྐྱེས་པའི་སྔོན་ལ་མ་འོངས་པའི་དུས་ལ་ཕྲུ་གུ་སྐྱེད་བསྲིང་བྱས་ནས་ཡོན་ཏན་པ་ཆེན་པོ་ཆགས་སུ་འཇུག་རྒྱུའི་མནའ་བསྐྱལ་བ་དང་།   ཡང་ཚོང་ཁང་མ་ཕྱེས་པའི་སྔོན་ལ་མནའ་བསྐྱལ་ནས་ལོ་གཅིག་གི་ནང་དུ་སྒོར་མོ་ཁྲི་སྟོང་གསོག་རྒྱུའི་ཁ་ཤོམ་འཐེན་པའི་གོམས་གཤིས་ཡོད།   མི་ཞིག་ལ་དམིགས་འབེན་ཡོད་པ་དེ་ཤིན་ཏུ་བཟང་ཡང་།  ཡིན་ནའང་དམིགས་འབེན་དེ་ནི་རང་གི་དངོས་ཡོད་གནས་ཚུལ་དང་མཐུན་མིན་ལ་ཅིས་ཀྱང་བསམ་གཞིགས་ཞིབ་མོ་ཞིག་གཏོང་དགོས།   དྲང་མོར་བཤད་ན་ང་ཚོ་ནི་ནམ་ཡང་རང་ཉིད་ཀྱི་བདག་པོ་ཡིན་ཞིང་མནའ་བསྐྱལ་བ་ཙམ་གྱིས་མཇུག་འབྲས་ཡིད་ཚིམ་པ་ཞིག་འབྱུང་བའི་ངེས་པ་ཅི་ཡང་མེད།

          དེའི་རྐྱེན་གྱིས་རང་ཉིད་ཀྱི་ཁ་ཕྱོགས་ནི་མནའ་བསྐྱལ་བ་ཙམ་ལས་གཏན་འཁེལ་བྱེད་མི་རུང་།འཚོ་སྡོད་དང་མནའ་བསྐྱལ་བ་གཉིས་ནི་འཚོ་བའི་ཁྲོད་ཀྱི་འགལ་བ་ཆེ་ཤོས་གཉིས་ཡིན།    འགལ་བ་འདི་གཉིས་སེལ་དགོས་ན།   ངེས་པར་དུ་ཡིད་ལ་འཛིན་དགོས་པ་ཞིག་ནི།        མནའ་བསྐྱལ་བ་ཁོ་ན་གཞི་བཅོལ་ན་དོན་དག་དེ་འགྲུབ་པའི་ངེས་པ་མེད་པས།   དོན་དག་ངོ་མ་དེ་ལ་རྐང་ཚུགས་རྒྱུ་ནི་ཤིན་ཏུ་གལ་ཆེའོ།།