རྒྱལ་ཐང་བ་དང་ཆུ་ཚན་གྱི་འབྲེལ་བ།

    གོ་ལ་འདི་རུ་འཚོ་ཞིང་གནས་པའི་མི་རྣམས་ཀྱིས་སྤྱི་ནས་ལུས་སེམས་གཉིས་ཀྱི་བདེ་ཐང་ལ་གཙིགས་མཐོང་ནན་ཏུ་བྱེད་ཅིང་།   བདེ་ཐང་གི་རྨང་གཞི་ཡོད་པ་ན།  ད་གཟོད་རིག་གནས་འཕེལ་རྒྱས་དང་དཔལ་ཡོན་དར་སྤེལ་ལ་ནུས་པ་བླ་ལྷག་ཏུ་འདོན་ཐུབ་ཀྱི་ཡོད།   དེའི་རྐྱེན་གྱིས་བདེ་ཐང་ནི་ནམ་ཞིག་གི་ཚེའང་མིའི་རིགས་ཀྱིས་ངེས་པར་དོ་སྣང་དང་མཐོང་ཆེན་བྱེད་དགོས་པའི་བརྗོད་གཞི་གལ་ཆེན་ཞིག་ཡིན།            

    ཁམས་བདེ་ཆེན་ཡུལ་ནི་བོད་ཀྱི་ཡུལ་གྲུ་ཕལ་མོ་ཆེ་དང་འདྲ་བར།  དུས་བཞིའི་ཁྱད་པར་གསལ་ཞིང་།  ས་མཐོ་རི་གཙང་གི་ཡུལ་ཞིག་ཡིན།   འདིར་ཁོ་ར་ཁོར་ཡུག་ཀུན་དུ་སྔོ་ལྗང་ནགས་ཚལ་གྱིས་བརྒྱན་པས་སྐྱེ་དངོས་ཀྱི་སྣ་ཁ་མང་ཞིང་།   རྟ་ནོར་ལུག་གསུམ་དང་བོད་ཕག་གཙོས་པའི་ཕྱུགས་རིགས་འཚོ་སྐྱོང་བྱེད།   མཐོ་སར་ནས་དང་ཡུངས་མ།   དམའ་སར་འབྲས་དང་མ་རྨོས་ལོ་ཏོག་འདེབས།   གངས་རི་གྲགས་ཆེ་བ་ལ་ཁ་བ་དཀར་པོ་དང་།  ཆུ་ལ་གྲགས་ཆེ་བ་གཙང་གསུམ་མཉམ་བཤིབ་ཀྱི་རྣམ་པ་ངོ་མཚར་བ་གྲུབ་ཡོད།  པོ་ཏ་མཚོ་དང་རྡོ་མཁར་རྫོང་།  སུན་རྩེན་གླིང་ལ་སོགས་པའི་ལྗོངས་གནས་མང་དུ་ཡོད།   མི་རྣམས་ཀྱིས་ཞིང་འབྲོག་གཉིས་ཆར་གྱི་ལས་བགྱི་བཞིན་བདེ་སྐྱིད་ཀྱི་འཚོ་བ་རོལ་བཞིན་ཡོད།      

    ཡུལ་འདི་ནི་ས་མཐོ་ཞིང་བརླན་གཤིས་ཆེ་ལ།   ལྷག་པར་དགུན་གྱི་དུས་ལ་འཁྱགས་གྲང་ཆེ་བས་གྲུམ་བུའི་ནད་པ་ཅུང་མང་ཞིང་།   དེ་དང་བསྟུན་ནས་འཚོ་སྡོད་ཀྱི་གོ་རིམ་ཁྲོད་ཡུལ་འདིའི་མི་རྣམས་ལ་རང་བྱུང་ཆུ་ཚན་བསྟེན་པའི་གོམས་གཤིས་ཆགས་ཡོད།    རྒྱལ་ཐང་ས་ཆར་མཚོན་ན་ལོ་རེའི་དཔྱིད་ཀ་དང་སྟོན་ཁར་ཁྱིམ་ནང་གི་ལས་ཀ་བཞག་ནས་ཆུ་ཚན་སྦང་འགྲོ་བའི་སྲོལ་ཡོད་ཅིང་།   དཔྱིད་ཀར་ཆུ་ཚན་སྦང་འགྲོ་བ་ལ་དཔྱིད་ཚ་ཞབས་ཞེས་ཟེར་བ་དང་སྟོན་ཁར་ཆུ་ཚན་སྦང་འགྲོ་བ་ལ་སྟོན་ཚ་ཞབས་ཞེས་ཟེར།  གྲགས་ཆེ་བའི་ཆུ་ཚན་ལ་རྡོ་ཟམ་ཚྭ་ཁ་དང་བྲག་དཀར་ཆུ་ཚན། ཡང་ཐང་ཆུ་ཚན་བཅས་ཡོད།   དགུན་དུས་དང་ལོ་གསར་གྱི་སྐབས་ལ་བདེ་ཆེན་དུ་ཁ་བའི་འདབ་མ་འཐོར་བའི་དུས་ལ་འཁེལ་ཡང་།  ཏཱ་ལི་དང་ཞི་ཧྲོང་པན་ན་ལ་ཾམཚོན་ན་དབྱར་བཞིན་མེ་ཏོག་བཞད་པའི་དུས་ཡིན་པས་རྒྱལ་ཐང་བས་བཟའ་མི་ཆེ་ཆུང་ཀུན་འཁྲིད་དེ་ཏཱ་ལིས་སོགས་སུ་སོང་ནས་བདུན་ཕྲག་འགའ་དང་ཡང་ན་ཟླ་འགའ་རེར་ཆུ་ཚན་ལ་འདུག་པའི་སྲོལ་ཡོད།  རང་གི་ས་གནས་ལ་མཚོན་ན་ཡང་ཐང་ཆུ་ཚན་གྱིས་རྐང་ལག་ན་བ་དང་། པགས་ནད་ཀྱི་རིགས་དང་། ལུས་ཟུངས་ཉམས་པ་དང་། མཆིན་ཚད་རྒྱས་པ་དང་། ཕོ་བ་ན་བ་དང་། མཁལ་ནད་བཅས་ལ་ཧ་ཅང་ཕན་པར་བཤད་ཅིང་ནམ་སོང་བའི་ཚེའང་ནད་པ་མང་པོ་ཞག་འདུག་བྱས་ཡོད་པ་མཐོང་ཐུབ།  ང་རང་ཉིད་ལ་མཚོན་ན་རྡོ་ཟམ་ཚྭ་ཁར་འགྲོ་དགའ་ཞིང་།   ཆུ་ཚན་ལ་བསྡད་ན་རྐང་ཚིགས་ལག་ཚིགས་མི་ན་བར་ཕན་ཐོགས་ཅུང་ཆེ།   དེའི་ཞོར་ལ་ནགས་ཀློང་འགྲིམས་ནས་ལྷིང་འཇགས་ཀྱི་འཚོ་བ་ཞིག་ཀྱང་རོལ་ཆོག         

    ཡུལ་ལུང་མང་པོའི་ཆུ་ཚན་ནང་དུ་རང་བྱུང་གི་བ་བླ་དང་། བྲག་ཞུན་དང་། ཅོང་ཞི་དང་། ལྡོང་རོས་དང་། བ་ཚྭ་དང་། ཟེ་ཚྭ་དང་། མུ་ཟི་སོགས་ཡོད་པ་གསར་དུ་གསལ་རྟོགས་བྱུང་ཡོད་པ་དང་།  བདེ་ཆེན་ཡུལ་གྱི་ཆུ་ཚན་འདི་དག་ནང་དུའང་ངེས་པར་རང་བྱུང་གི་རྫས་སྣ་མང་པོ་ཞིག་ཚང་ཡོད་པར་འདོད།  ལྷག་པར་ཆུ་ཚན་འདི་དག་གི་ཉེ་འཁོར་དུ་གསོམ་སྡོང་དང་།  ལྷ་ཤིང་ཤུག་པ།  སྟག་མ་སོགས་རི་ཐམས་ཅད་ལ་ཤིང་རིགས་སྣ་ཚོགས་སྐྱེས་ཡོད་པས་ཁོར་ཡུག་ཉམས་དགའ་བ་ཞིག་ཀྱང་མ་བཅོས་ལྷུན་གྱིས་གྲུབ་ཡོད།     

    《ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པའི་ཚིག་གི་དོན་གྱི་ཟླ་ཟེར་ཞེས་བྱ་བ་》ལས།“ཆུ་ཚན་དྲོད་སྐྱེད་ཟས་འཇུ་ཞིང་། ། མགུལ་བདེ་ལུས་ཡང་གཅིན་ནད་སེལ། །སྐྱིགས་བུ་ལྟོ་སྦོས་རླུང་བད་ཀན། །རིམས་སར་འཕྲལ་དུ་ཟློག་བྱེད་ཅིང་། །ལུད་པ་ཆམ་སར་དབུགས་མི་བདེ། །རྩིབ་ལོགས་ཟུག་ལ་བསྔགས་པ་ཡིན། །  ཞེས་བཀོད་ཡོད་པ་ལྟར།  ཆུ་ཚན་བསྟེན་ན་ལུས་པོའི་བདེ་ཐང་ལ་མངོན་གསལ་གྱི་ཕན་པ་མང་པོ་ལྡན་པ་གསོ་རིག་གི་གཞུང་དུ་མ་ལས་གསུང་ཡོད་པས་ལྷག་པར་ས་མཐོ་སར་འཚོ་ཞིང་གནས་པའི་མི་རྣམས་ཀྱིས་དུས་ངེས་མེད་དུ་ཆུ་ཚན་བསྟེན་པའི་དགོས་པ་ཤིན་ཏུ་ཆེ།  འདིར་ཉིན་འགའི་སྔོན་རྒན་ཚངས་དབང་གིས་རེབ་གོང་བློན་ཆོས་ཀྱི་ཆུ་ཚན་ངོ་སྤྲོད་ཀྱི་རྩོམ་ཡག་ཅིག་མཐོང་བ་དང་ལས་གྲོགས་ཚེ་རིང་སྒྲོལ་མས་ས་གནས་འདི་གའི་ཆུ་ཚན་ལ་འདུག་སྲོལ་སྐོར་གྱི་རྩོམ་ཞིག་མཐོང་བ་གཞི་བྱས་ཏེ་གུང་གསེང་གི་དུས་ཚོད་ནང་ཆུ་ཚན་ལ་ཐེངས་ཤིག་བསྡད་པའི་བར་གསེང་ནས་གནད་ཆེ་བའི་ཚིག་རྣམས་བཤུས་ཏེ་འདིར་བཀོད་ཅིང་།  བདེ་ཐང་ལ་ནན་ཏན་དུ་འཛིན་དགོས་པའི་སྐུལ་མ་ཞིག་གི་ཆེད་དུ་བསྐྱར་ཟློས་འདི་ཙམ་བྱས་པའོ།།