ཞིང་ཆེན་དམངས་ཆེན་རྒྱུན་ཨུས་བདེ་ཆེན་གྱི་ཡུལ་སྐོར་ལ་བརྟག་ཞིབ་གནང་།

        ཟླ10ཚེས9ནས་ཚེས10ཉིན་བར་ཞིང་ཆེན་དམངས་ཆེན་རྒྱུན་ཨུའི་ཀྲུའུ་རེན་གཞོན་པ་དབྱང་པའོ་ཅན་གྱིས་བརྟག་ཞིབ་ཚོགས་ཆུང་གི་སྣེ་ཁྲིད་དེ་བདེ་ཆེན་དུ་ཁུལ་ཡོངས་ཀྱི་ཡུལ་སྐོར་ལས་རིགས་ཀྱི་འཕེལ་རྒྱས་འགྲོ་ཚུལ་ལ་བརྟག་ཞིབ་གནང་བར་ཕེབས་པ་དང་འབྲེལ་ཚེས10ཉིན་གྱི་ཕྱི་དྲོར་བཞུགས་མོལ་ཚོགས་འདུ་འཚོགས་པ་རེད།

        ཁུལ་དམངས་ཆེན་རྒྱུན་ཨུའི་ཏང་ཙུའུ་ཡི་ཧྲུའུ་ཅི། ཀྲུའུ་རེན་ཡུས་ཧྲེང་ཞང་དང་ཁུལ་མི་དམངས་སྲིད་གཞུང་གི་ཁུལ་དཔོན་གཞོན་པ་ལི་ཆིང་ཕེ་བརྟག་ཞིབ་གནང་བར་ལྷན་དུ་ཕེབས་པ་དང་འབྲེལ་བཞུགས་མོལ་ཚོགས་འདུར་ཞུགས་པ་རེད།

        དེའི་རིང་བརྟག་ཞིབ་ཚོགས་ཆུང་གིས་སྔ་རྗེས་སུ་སུམ་རྩེན་གླིང་དགོན་དང་པོ་ཏ་མཚོ་རྒྱལ་ཁབ་སྤྱི་གླིང་། སྟག་མཆོང་གྲོག་རོང་སོགས་སུ་ཕེབས་ནས་ས་གནས་ས་ཐོག་ཏུ་གཟིགས་ཞིབ་གནང་བ་དང་ཁེ་ལས་ཀྱི་མིག་སྔའི་འཕེལ་རྒྱས་ཀྱི་གནས་ཚུལ་དང་ལྷག་པའི་དཀའ་ངལ་གྱི་གནད་དོན་བཀའ་འདྲི་ཞིབ་ཕྲ་གནང་བ་རེད། ཁུལ་མི་དམངས་སྲིད་གཞུང་གིས་བདེ་ཆེན་ཁུལ་རིག་གནས་དང་ཡུལ་སྐོར་ཐོན་ལས་འཕེལ་རྒྱས་འགྲོ་ཚུལ་སྐོར་གྱི་སྙན་ཞུ་ནན་ཏན་ངང་གསན་པ་དང་འབྲེལ་རང་ཁུལ་གྱི་ཡུལ་སྐོར་དང་འབྲེལ་བ་ཡོད་པའི་ཁེ་ལས་དང་ཡུལ་སྐོར་ལས་དོན་མི་སྣ་ཁག་གཅིག་དང་བཞུགས་མོལ་སྤེལ་རེས་ཀྱང་གནང་བ་རེད།

        བརྟག་ཞིབ་ཚོགས་ཆུང་གིས་ཁུལ་ཨུ་དང་ཁུལ་སྲིད་གཞུང་གིས་ཡུལ་སྐོར་ལས་རིགས་ཀྱི་འཕེལ་རྒྱས་ལ་ཚད་མཐོའི་མཐོང་ཆེན་བྱས་ཏེ། ཡུལ་སྐོར་གྱི་རྨང་གཞིའི་སྒྲིག་བཀོད་འཛུགས་སྐྲུན་ལ་རྒྱུན་ཆད་མེད་པར་ཤུགས་སྣོན་རྒྱག་པ་དང་ཡུལ་སྐོར་ཐོན་རྫས་ཀྱི་ལས་རྣམ་གསར་གཏོད་བྱེད་མགྱོགས་སུ་བཏང་ནས་ཡུལ་སྐོར་གྱི་ཐོན་ལས་སྦྲེལ་ཐག་དང་རིན་ཐང་སྦྲེལ་ཐག་སྣུར་སྲིང་བྱ་རྒྱུར་སྣང་ཆེན་བྱས་ཏེ་ཡུལ་སྐོར་ཞབས་ཞུའི་སྤུས་ཚད་ཁྱོན་ཡོངས་ནས་མཐོ་རུ་གཏོང་བ་དང་། རིག་གནས་ཡུལ་སྐོར་མཉམ་འདྲེས་ཀྱི་ས་ཁོངས་ཡོངས་ཀྱི་ཡུལ་སྐོར་འཕེལ་རྒྱས་ཀྱི་རྣམ་པ་ནུས་ཤུགས་ཡོད་རྒུས་བཏོད་པས་བདེ་ཆེན་གྱི་ཡུལ་སྐོར་ལས་རིགས་འཕེལ་རྒྱས་ལ་གྲུབ་འབྲས་ངེས་ཅན་ཐོབ་ཡོད་ཅེས་བསྟན་པ་རེད།

        བརྟག་ཞིབ་ཚོགས་ཆུང་གིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཡུན་ནན་ལ་རྟོག་ཞིབ་གནང་སྐབས་གནང་བའི་གསུང་བཤད་གལ་ཆེན་གྱི་དགོངས་དོན་ཐོག་མཐའ་བར་གསུམ་དུ་བློ་ལ་བརྟན་པོར་ངེས་ནས་ཞིང་ཨུ་དང་ཞིང་ཆེན་སྲིད་གཞུང་གིས་བདེ་ཆེན་ལ་བཏོན་པའི་ངེས་གནས་དང་བླང་བྱར་དམ་པོར་དམིགས་ཏེ་ཆབ་སྲིད་ཀྱི་འགན་འཁྲི་འཁུར་བ་དང་ཡིད་ཆེས་འཕེལ་བ། འགག་སྒྲོལ་དཀའ་སེལ་བྱས་ནས་ཡུན་ནན་ཡུལ་སྐོར་གྱི་གསེར་གྱི་བྱང་བུ་ལ་སྲུང་སྐྱོང་ཡག་པོ་བྱེད་དགོས། རྒྱལ་ཁབ་དང་ཞིང་ཨུ། ཞིང་ཆེན་སྲིད་གཞུང་གི་འཕེལ་རྒྱས་འཐབ་ཇུས་ནང་མཉམ་འདྲེས་གཏིང་ཟབ་བྱས་ཏེ་ས་ཁོངས་འཕེལ་རྒྱས་དང་ཡུལ་སྐོར་ལས་རིགས་འཕེལ་རྒྱས་སྐོར་གྱི་རྒྱལ་ཁབ་དང་ཞིང་ཨུ། ཞིང་ཆེན་སྲིད་གཞུང་གི་སྲིད་ཇུས་དང་བྱ་ཐབས་གལ་ཆེན་ལ་དམ་པོར་དམིགས་ནས་གོ་སྐབས་དམ་འཛིན་དང་ཐོན་ཁུངས་དེ་བས་ལེགས་པ་བརྩོན་ལེན་བྱས་ཏེ་འཕེལ་རྒྱས་ཀྱི་གོ་སྐབས་གཏོད་དགོས། བདེ་ཆེན་གྱི་ཕུན་སུམ་ཚོགས་པའི་མི་རིགས་ཀྱི་ཁྱད་ལྡན་རིག་གནས་ལ་གཞི་ཚུགས་ཏེ་འཆར་འགོད་ཀྱི་སྣེ་ཁྲིད་བྱེད་ཤུགས་ཆེ་རུ་གཏོང་བ་དང་གྲོང་གསེབ་ཡུལ་སྐོར། རིག་གནས་ཡུལ་སྐོར་ཁམས་གསོ་ཐོན་ལས་སོགས་ཕུན་སུམ་ཚོགས་པའི་ཡུལ་སྐོར་ལས་རིགས་ཀྱི་རྣམ་པ་སྟོབས་ཆེར་བཏང་ནས་རིག་གནས་ཡུལ་སྐོར་ཚད་མཐོའི་མཉམ་འདྲེས་འཕེལ་རྒྱས་ལ་སྐུལ་འདེད་གཏོང་དགོས། ནུས་ཤུགས་ཡོད་རྒུས་སྣེ་འདྲེན་ཁེ་ལས་སྐྱེད་སྲིང་དང་རྒྱབ་སྐྱོར་བྱས་ཏེ་གཞུང་ཕྱོགས་སུ་ཐོན་ལས་སྦྲེལ་ཐག་སྣུར་སྲིང་དང་ཡུལ་སྐོར་ལས་རིགས་ཀྱི་རྣམ་པ་ཕུན་སུམ་ཚོགས་སུ་བཏང་ནས་ཡུལ་སྐོར་འཕེལ་རྒྱས་ཀྱི་རྣམ་པ་དེ་ས་ཁོངས་ཐོན་ཁུངས་སུ་མཉམ་འདྲེས་དང་། ཐོན་ལས་མཉམ་འདྲེས། མཉམ་སྐྲུན་མཉམ་སྤྱོད་བཅས་ཀྱི་ས་ཁོངས་ཡོངས་ཀྱི་ཡུལ་སྐོར་འཕེལ་རྒྱས་ཀྱི་རྣམ་པར་བསྒྱུར་བ་ཇེ་མགྱོགས་སུ་གཏོང་ནས་ཡུལ་སྐོར་ལས་རིགས་འཕེལ་རྒྱས་འགྲན་རྩོད་ཀྱིས་སྤུས་ཚད་མཐོར་འདེགས་དང་རིམ་སྤར་ཕན་འཕར་ཡོང་བར་སྐུལ་འདེད་གཏོང་དགོས་ཞེས་ནན་བཤད་གནང་བ་རེད།