ང་ཚོས་ཁྲུང་ཁྲུང་དཀར་མོར་སློབ་སྦྱོང་བྱེད་དགོས།

  ཁྲུང་ཁྲུང་དཀར་མོ་ནི་གཤིས་ཀ་འཇམ་པའི་བྱ་ཞིག་རེད། ཁྲུང་ཁྲུང་དཀར་མོ་ཕན་ཚུན་བཟའ་ཚོ་བསྒྲིགས་རྗེས། ཚེ་གང་ལུས་དང་གྲིབ་མ་ཇི་བཞིན་མཉམ་འགྲོ་མཉམ་འདུག་གིས་རང་ཉིད་ཀྱི་བརྩེ་བ་དང་དུང་བ་རྣལ་མ་ཕན་ཚུན་ལ་བཅངས་ནས་དུས་ཀྱི་འགྱུར་བག་ཅི་འདྲའི་རྒོད་ཀྱང་། འཚོ་བའི་སྐྱིད་སྡུག་ཅི་འདྲ་བྱུང་ཡང་། སྐྱིད་ལ་ཁའི་རྩྭ་ལ་མཉམ་ཟ་དང་། སྡུག་སྔོན་མོའི་ཆུ་ལ་མཉམ་འཐུང་ཞེས་པ་ལྟར་ནམ་འཚོའི་བར་དུ་ཕན་ཚུན་ཁ་མི་འབྲལ་བར་སྡོད་ཀྱི་ཡོད།

     ཤོད་སྲོལ་འདི་འདྲ་ཞིག་ཡོད་པ་སྟེ། ཁ་བ་བུ་ཡུག་འཚུབ་པའི་ཉིན་ཞིག་ལ། ཁྲུང་ཁྲུང་ཞིག་གི་གཤོག་པར་རྨས་སྐྱོན་ཕོག་ནས་འཕུར་མ་ཐུབ་པར་ཁ་བའི་ཀློང་དུ་ལྷུངས་པ་དང་། མི་ཁ་ཤས་ཀྱིས་དེ་མཐོང་ནས་བྱ་ཚང་དུ་བཅུག་སྟེ་སྲོག་སྐྱོབ་སྨན་བཅོས་བྱས། གློ་བུར་དུ། ཁྲུང་ཁྲུང་གཞན་ཞིག་འཕུར་ཡོང་ནས་གང་ལའང་མི་འཛེམ་པར་བྱ་ཚང་གི་གམ་དུ་བབས་ནས་ཕར་རྒྱུག་ཚུར་རྒྱུག་བྱེད་ཅིང་། དེའི་རྗེས་སུ་ཉིན་འགའི་རིང་བསྟུད་མར་བྱ་ཚང་གི་བར་སྣང་མཐོངས་སུ་ལྡིང་སྐོར་བརྒྱབ་ནས་སྐད་ཡང་ཡང་རྒྱག་པ་མ་ཟད། མཐར་རྨས་སྐྱོན་ཕོག་སྟེ་བྱ་ཚང་དུ་ལུས་པའི་ཁྲུང་ཁྲུང་ཡོད་སར་མཆོངས་ནས་མཉམ་འཛོམས་བྱས་པ་རེད་ཟེར།

     སེམས་ཅན་དུད་འགྲོ་ཡིན་ཡང་འདི་ལྟ་བུའི་ཕན་ཚུན་ལ་ལྷག་བསམ་རྣམ་དག་གིས་འགྱུར་མེད་ཀྱི་བརྩེ་བ་ཟབ་མོ་འཆང་བཞིན་ཡོད་པ་ནི་ངོ་མ་ཅི་འདྲའི་ཧ་ལས་དགོས་པ་ཞིག་དང་ཡིད་སེམས་འགུལ་བ་ཞིག་མ་རེད་དམ།

    ང་ཚོ་གདགས་གཞི་ཕུང་པོ་ལྔ་ཚང་ཞིང་སྨྲ་ཤེས་དོན་གོ་བའི་རྐང་གཉིས་མི་ཡི་རིགས་སུ་གྲུབ་པའི་ཚོགས་པ་འདིར། འདི་ལྟ་བུའི་འགྱུར་མེད་རྟག་བརྟན་གྱི་བརྩེ་བ་དང་དུང་བ་རྣལ་མས་སྐྱིད་ལ་སྡུག་པའི་མི་ཚེའི་རྐང་ལམ་ཕྲ་མོར་གོམ་པའི་འདེགས་འཇོག་མཉམ་དུ་བསྒྱུར་ཏེ་ལམ་གྱི་མཐའ་ལ་སླེབས་མཁན་གྱི་ཁྱོ་ཤུག་ཡང་སྙིང་ཇི་ཙམ་ཡོད།

     ཁྲ་ཁྲ་སིལ་སིལ་གྱི་མི་ཚོགས་འདུས་པའི་སྤྱི་ཚོགས་ཀྱི་འཁྲབ་ར་ཆེན་པོ་འདི་རུ་ཨ་གསར་རྟ་ལས་མགྱོགས་པ་དང་། གཞུ་གུ་ལུག་ལས་ཐུང་བའི་དཔེ་ཡིས་ཁ་སང་མི་ཚེ་མཉམ་སྐྱེལ་གྱི་སྙིང་གཏམ་རྡོ་བརྐོས་རི་མོ་དེ། ད་ལྟ་སྐད་ཅིག་ཉིད་ལ་མཁའ་ཡི་འཇའ་ཚོན་གྱི་དཔེ་ཟླར་གྱུར་པ་དང་། ཁ་སང་ཤ་འདྲེས་རུས་འདྲེས་ཀྱི་བརྩེ་བ་ཟབ་མོ་དེ། ད་ལྟ་སྐད་ཅིག་ཉིད་ལ་ཕ་མ་གསོད་མཁན་གྱི་ཤ་འཁོན་ལྟ་བུར་འཛིན་མཁན་ཡང་ཉུང་ཉུང་མིན་ལ། གནས་སྐབས་ཀྱི་ཐོབ་དང་གོ་ས། ནོར་དང་ལོངས་སྤྱོད། ཁ་སྒོ་སྐྱེ་འབྲས་སོགས་ཀྱི་ཆེད་དུ་ཟོལ་གྱི་བརྩེ་བ་དང་དུང་བ་བཅོས་མ་བཅངས་པས། མཐའ་རང་སྡུག་མི་སྡུག་དང་། རང་མགོ་རང་བསྐོར་བྱས་ནས། རྣོ་པོའི་མཚོན་དང་དམར་པོའི་ཁྲག་གིས་མི་སྡུག་རི་མོ་སྣ་ཚོགས་བྲིས་ཏེ། སྲིད་པ་འཇིག་རྟེན་ཁམས་ཀྱི་གར་སྟེགས་ཆེན་པོ་འདིར་སྐྱོ་གར་གྱི་འཁྲབ་སྟོན་སྣ་ཚོགས་པ་འཁྲབ་བཞིན་ཡོད་པའང་། མིག་ལྡན་སྐྱེ་འགྲོ་ཀུན་གྱི་མིག་གི་མཐོང་ཆོས་སུ་གྱུར་དང་འགྱུར་བཞིན་མཆིས།

     དེར་བརྟེན། ང་ཚོ་རྐང་གཉིས་འགྲོ་བ་ཀུན་གྱིས་ཁྲུང་ཁྲུང་དཀར་མོ་ལ་སློབ་སྦྱོང་གིས་སྐྱིད་ལ་སྡུག་པའི་མི་ཚེ་འདིར་ཁྱོ་ཤུག་ཕན་ཚུན་དབར་ལྷག་བསམ་རྣམ་དག་གིས་བརྩེ་བ་འཆང་སྟེ། ལུས་སེམས་ལ་དཀའ་སྡུག་འཕྲད་སྐབས་གཅིག་ཕན་གཅིག་རོགས་ཀྱིས་དཀའ་ངལ་སེལ་རོགས་དང་། མི་འདོད་ནད་ཀྱི་ཟུག་རྔུས་མནར་སྐབས་ནད་ཀྱིས་གདུང་བའི་བུ་ལ་མ་ཡི་འདུ་ཤེས་འཛིན་ནས། རྟག་ཏུ་ཕན་ཚུན་དབར་ལ་བསམ་ཤེས་དང་། བརྩི་བཀུར། དཀྱེལ་ཡངས། བཟོད་སྒོམ་བཅས་བྱ་རྒྱུ་ཤིན་ཏུ་གལ་ཆེ་ཞིང་། ལག་གདང་མཉམ་སྦྲེལ་གྱིས་སྐྱིད་ལ་སྡུག་པའི་མི་ཚེའི་བཤུལ་ལམ་རིང་མོར་མཛའ་བརྩེའི་ལག་གདང་མ་ལྷོད་པར། མགོ་སྐྱེས་ཁ་བའི་མདངས་ལ་འགྲན་ཞིང་། དུང་སོ་མུ་ཏིག་གི་ཕྲེང་བ་ས་ལ་འཐོར་ཡང་། རྒས་ཤིང་འཁོགས་པའི་ལུས་ཕུང་འཁར་བར་འཁེན་ཏེ། དགུན་གྱི་དུས་སུ་ཉི་མ་མཉམ་དུ་ལྡེ་ཞིང་། བཞུད་ཁའི་ཉི་འོད་ཀྱི་ཁྲོད་དུ་མིག་མདངས་གཉོམ་པོས་ཕན་ཚུན་ལ་སེམས་དང་སེམས་པས་འཚོས་ན། དེ་ལས་ལྷག་པའི་བདེ་བ་ཞིག་དང་དེ་ལས་འགོངས་པའི་བརྩེ་བ་ཞིག་འཇིག་རྟེན་སྲིད་པའི་ཁམས་འདིར་བཙལ་ཀྱང་ཡོད་མི་སྲིད་དོ།

སྤེན་ཚེ་གཞོན་པ།