རིག་པ་གསལ་བའི་སྦལ་བ། ༼གནའ་གཏམ་ཐོས་པ་དགའ་བསྐྱེད།༽

མི་ཉག་རྡོ་ར་དཀར་མོ་སློབ་གྲྭ།   (བརྒྱད་ཅིག)

    གནའ་སྔ་མོ་ཞིག་ལ། རྒྱ་མཚོའི་འགྲམ་གྱི་རྩྭ་ཐང་སྟེང་ཏུ་སྦལ་བ་ཞིག་གིས་ཉི་མ་ལྡེ་བཞིན་ཡོད། ཁོ་རང་རྡོ་རྒན་ཞིག་གི་ཐོག་ཏུ་བུད་ནས་ཆུ་ནང་དུ་མཆོང་གྲབས་བྱེད་པའི་སྐབས་སུ། ཕོ་རོག་ཅིག་གིས་ཁོ་བཟུང་ནས་སྐད་ཅིག་དེ་ཉིད་ལ་ཐག་རིང་དུ་འཕུར་སོང་།

    ཕོ་རོག་དེ་ས་སྐམ་ས་ཞིག་ཏུ་བབས་ནས་སྦལ་བ་ཟ་གྲབས་བྱེད་པ་ན། རིག་པ་གསལ་བའི་སྦལ་བས་ཁོ་ལ། ཨ་ལ་ལ། ཅི་འདྲའི་ཕོ་རོག་གླེན་པ་ཞིག་རེད། ཁྱོད་ཀྱིས་འདི་འདྲའི་ས་སྐམ་ཞིག་དུ་ངའི་ཤ་ཟོས་ན་བྲོ་བ་སྤུ་ཙམ་མེད། དེ་ལས་ཁྱོད་རང་ཆུ་མིག་ཅིག་གི་འགྲམ་དུ་སོང་ནས་ངའི་ཤ་ཟོས་ན་ཤ་ཟ་ཆོག་ལ་ཆུ་ཡང་འཐུང་ཆོག་ཅེས་ཟེར་བ་ན། ཕོ་རོག་གིས་འདང་ཞིག་རྒྱབ་རྗེས་ངོ་མ་བདེན་པ་རེད་སྙམ་ནས་སྦལ་བ་ཁ་ནང་དུ་བཟུང་སྟེ་གནམ་ལ་འཕུར་ནས་ཆུ་མིག་ཅིག་འཚོལ་དུ་སོང་།

    ཁོ་རང་མཁའ་དབྱིངས་སུ་ལྡིང་སྐོར་རྒྱག་བཞིན་ས་གཞིའི་ངོས་སུ་བལྟས་པ་ན་ཆུ་མིག་ཅིག་ཡོད་པ་མཐོང་། ཁོ་རང་དམའ་སར་འཕུར་ནས་ཐང་ཐོག་གི་རྡོ་བའི་སྟེང་བབས་ཏེ་སྦལ་བ་ཟ་གྲབས་བྱས་ཚེ། རིག་པ་གསལ་བའི་སྦལ་བ་དེས་ཡང་ཁོ་ལ། སྙིང་ཉེ་བའི་ཕོ་རོག་ལགས། ཁྱོད་ལྟ་བུའི་བྱ་རླབས་ཆེན་ཞིག་གིས་ཆུ་མིག་ཆུང་ཆུང་འདི་ཙམ་འཐུང་ན་ཕོ་བ་གཏན་ནས་མི་རྒྱགས་པས། ཆུ་མིག་འདི་ལས་ཆེ་བའི་ཆུ་ཕྲན་དང་ཆུ་ཀླུང་གང་རུང་ཞིག་གི་འགྲམ་ནས་ངའི་ཤ་ཟོས་ན་ད་ངོ་མ་བློ་སེམས་དགའ་བ་ཞིག་ཡིན་ངེས། ཞེས་བཤད་པ་ན། གླེན་པ་ཁ་ནག་གི་ཕོ་རོག་དེས་ངོ་མ་བདེན་པ་རེད་སྙམ་ནས་ཡང་བསྐྱར་སྦལ་བ་དེ་ཁ་ནང་དུ་བཟུང་ནས་བར་སྣང་དབྱིངས་སུ་འཕུར་ཚེ། ཨ་ཁ་ཁ། གན་ན་རྒྱ་མཚོ་ཆེན་པོ་ཞིག་ཡོད་འདུག ངེད་གཉིས་དེ་ལ་འགྲོ། སྦལ་བས་གློ་བུར་དུ་དེ་ལྟར་བཤད་པ་ན། ཕོ་རོག་ཀྱང་དགའ་སྟེ། ངོ་མ་རེད། ངེད་གཉིས་དེ་ལ་འགྲོ་ཞེས་བཤད་པས། ཁ་ནང་གི་སྦལ་བ་སར་ལྷུང་ནས་སྐད་ཅིག་ཉིད་ལ་རྒྱ་མཚོའི་ནང་དུ་བྲོས་སོང་ངོ།།