མཚོ་བོད་ས་མཐོའི་མི་ཚོཊ་ཐད་ཞིབ་འཇུག་གྲུབ་འབྲས་གསར་པ་ཞིག་ཐོན་འདུག

རྩོམ་པ་པོ།     ཡིག་བསྒྱུར།       དུས་ཚོད།   2023-05-08   རྩོམ་ཁུངས།    ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན།

        འཛམ་གླིང་ཡང་རྩེར་འབོད་པའི་མཚོ་བོད་ས་མཐོར་གྲང་ངར་ཆེ་ལ་གསོ་རླུང་དཀོན་པས་འཚོ་གནས་ཀྱི་ཆ་རྐྱེན་ཧ་ཅང་ཞན། དེང་རབས་ཀྱི་མི་ནི་ནམ་ཞིག་ལ་མཚོ་བོད་ས་མཐོར་ཡོང་ནས་གཏན་སྡོད་བྱས་པ་ཡིན་ནམ། དེ་ནས་རྒྱུད་འཛིན་གྱི་འཕེལ་འགྱུར་གང་འདྲ་ཞིག་བརྒྱུད་ཡོད་དམ་ཞེ་ན། རང་རྒྱལ་གྱི་ཚན་རིག་པས་མཚོ་བོད་ས་མཐོའི་མི་ཚོགས་ལ་དམིགས་བསལ་དུ་ཡོད་པའི་རྒྱུད་འཛིན་གྲུབ་ཆ་དེ་ལོ་5100ཡི་གོང་ནས་གྲུབ་ཟིན་པ་དང་དུས་མཚུངས་སུ་ལོ་ངོ་སྟོང་ཕྲག་ནང་མཚོ་བོད་ས་མཐོའི་གནའ་བོའི་མི་ཚོགས་ཀྱི་ནང་ཁུལ་དང་ཕྱི་ཕྱོགས་ས་ཁུལ་དབར་སྤེལ་རེས་དང་མཉམ་འགུལ་ཟབ་མོ་བྱུང་ཡོད་པ་ཞིབ་འཇུག་བྱས་ནས་ཤེས་རྟོགས་བྱུང་ཡོད། 

图片

        གོང་གསལ་གྱི་གྲུབ་འབྲས་ནི་ཀྲུང་གོ་ཚན་རིག་ཁང་གནའ་བོའི་སྒལ་ཚིགས་སྲོག་ཆགས་དང་གནའ་བོའི་མིའི་རིགས་ཞིབ་འཇུག་སུའོ་ཡི་ཧྥུའུ་ཆའོ་མའེ་ཚོགས་པས་བོད་རང་སྐྱོང་ལྗོངས་རིག་དངོས་སྲུང་སྐྱོབ་ཞིབ་འཇུག་སུའོ་དང་སི་ཁྲོན་སློབ་ཆེན་གནའ་རྫས་རྟོག་ཞིབ་ཚན་རིག་ལྟེ་གནས། ནུབ་བྱང་སློབ་ཆེན་རིག་གནས་ཤུལ་བཞག་སློབ་གླིང་སོགས་དང་མཉམ་ལས་བྱས་ཏེ་སྤེལ་བའི་མཚོ་བོད་ས་མཐོའི་གནའ་བོའི་མི་ཚོགས་ལ་དམིགས་པའི་གཞི་ཁྱོན་ཆེ་ལ་བརྒྱུད་རིམ་ལྡན་པའི་གནའ་བོའི་གཞི་རྒྱུའི་ཚོགས་པར་ཞིབ་འཇུག་བྱས་འབྲས་ཤིག་ཡིན་ཞིང་། ཉིན་ཤས་གོང་དྲ་ཐོག་ནས་རྒྱལ་སྤྱིའི་རིག་གཞུང་དུས་དེབ《ཚན་རིག་གི་འཕེལ་རིམ》ཐོག་སྤེལ་ཡོད་པ་རེད། 

图片

        གནའ་རྫས་རྟོག་ཞིབ་པ་ཚོ་དང་མཉམ་ལས་བྱས་པ་བརྒྱུད་ཧྥུའུ་ཆའོ་མའེ་ཚོགས་པས་མཚོ་བོད་ས་མཐོའི་ས་ཁོངས་མི་འདྲ་བའི་གནའ་ཤུལ་30ཡི་ཁྲོད་ནས་མཚོ་བོད་ས་མཐོའི་གནའ་བོའི་མིའི་རིགས་ཁེར་རྐྱང་གི་ཉིང་རྒྱུད་རྒྱུ་ཁག་97རྙེད་པ་དང་། མ་དཔེ་དེ་རྣམས་མཚོ་བོད་ས་མཐོའི་ས་ཁོངས་ཧྲིལ་པོར་ཁྱབ་ཅིང་ད་བར་ལོ་5100ནས་ལོ་100བར་ཡོད། དེ་ནི་ད་ལྟའི་བར་མཚོ་བོད་ས་མཐོའི་མ་དཔེ་འཚོལ་བསྡུའི་གཞི་ཁྱོན་ཆེ་ཤོས་དང་ས་ཁམས་ཀྱི་ཁྱབ་རྒྱ་ཆེ་ཤོས་ཀྱི་གནའ་བོའི་གཞི་རྒྱུ་གྲུབ་ཆའི་ཞིབ་འཇུག་ཅིག་རེད། 

图片

        ད་ལྟའི་མཚོ་བོད་ས་མཐོར་རྒྱུན་སྡོད་གྲོང་མི་གཙོ་བོ་ནི་བོད་རིགས་ཡིན། ཞིབ་འཇུག་ལས་ཤེས་རྟོགས་བྱུང་བར་གཞིགས་ན། དེང་རབས་བོད་ཀྱི་མི་ཚོགས་ལ་དམིགས་བསལ་དུ་ཡོད་པའི་རྒྱུད་འཛིན་གྲུབ་ཆ་དེ་ཉུང་མཐར་ཡང་ད་བར་ལོ་5100ཡི་གོང་མཚོ་བོད་ས་མཐོའི་ས་ཁོངས་ཁག་གི་གནའ་བོའི་མི་ཚོགས་ཁྲོད་གནས་པ་མ་ཟད། རྒྱུད་འཛིན་གྱི་རྒྱུན་མཐུད་རང་བཞིན་ཡང་ཡག་པོ་ལྡན་ཡོད། དེ་ལས་ད་ལྟའི་བར་ལོ་5100ཡོད་པའི་རྫོང་རི་གནའ་ཤུལ་གྱི་མ་དཔེ་ནི་མིག་སྔའི་བར་མཚོ་བོད་ས་མཐོའི་དམིགས་བསལ་གྱི་རྒྱུད་འཛིན་གྲུབ་ཆ་ཡོད་པའི་ཆེས་གནའ་བོའི་མི་ཚོགས་ཀྱི་བྱེ་བྲག་ཅིག་ཡིན་པ་ཤེས་རྟོགས་བྱུང་ཡོད། 

图片

        ཞིབ་འཇུག་འདིས་དམིགས་བསལ་གྱི་རྒྱུད་འཛིན་གྲུབ་ཆ་དེ་དག་གི་འབྱུང་ཁུངས་སྔར་བས་གསལ་སྟོན་བྱས་ཡོད། དེ་དག་ནི་རྒྱུད་འཛིན་གྲུབ་ཆ་མི་འདྲ་བ་གཉིས་མཉམ་བསྲེས་བྱས་ནས་གྲུབ་ཅིང་། དེའི་ཁྲོད་ཀྱི་80%ཡི་རྒྱུད་འཛིན་གྲུབ་ཆ་ནི་ཨ་ཤེ་ཡ་ཤར་མའི་བྱང་ཕྱོགས་ཀྱི་ལོ་9500ནས་ལོ་4000བར་གྱི་མི་ཚོགས་དང་འབྲེལ་བ་ཡོད་པ་དང་།  20%ཙམ་གྱི་རྒྱུད་འཛིན་གྲུབ་ཆ་ནི་ཤེས་རྟོགས་ཐུབ་མེད་པའི་གནའ་རབས་ཀྱི་མི་ཚོགས་ནས་བྱུང་བ་རེད། ཀྲུང་གོ་ཚན་རིག་ཁང་གནའ་བོའི་སྒལ་ཚིགས་སྲོག་ཆགས་དང་གནའ་བོའི་མིའི་རིགས་ཞིབ་འཇུག་སུའོ་ཡི་ཞིབ་འཇུག་པ་ཧྥུའུ་ཆའོ་མའེ་ཡིས།  གྲུབ་འབྲས་དེ་ལས་མཚོ་བོད་ས་མཐོའི་མི་ཚོགས་ཀྱི་གྲུབ་ཆ་གཙོ་བོ་ནི་རྡོ་ཆས་གསར་པའི་དུས་རབས་ཀྱི་ཨ་ཤེ་ཡ་ཤར་མའི་བྱང་ཕྱོགས་ཀྱི་མི་ཚོགས་རྒྱ་བསྐྱེད་པ་དང་དེ་བཞིན་དེ་ལས་སྐུལ་བའི་མི་ཚོགས་གནས་སྤོ་མཉམ་བསྲེས་བྱས་པ་དང་འབྲེལ་བ་ཡོད་པ་གསལ་བཤད་ཐུབ་ཡོད་ཅེས་གསུངས་ཡོད། 

图片

        རྒྱུད་འཛིན་ལ་དབྱེ་ཞིབ་དང་ཞིབ་འཇུག་བྱས་པ་ལས་ད་དུང་མངོན་པ་ལྟར་ན། ད་ལྟའི་བར་ལོ་ངོ་2700ཚུན་དུ་མཚོ་བོད་ས་མཐོའི་ནང་ཁུལ་གྱི་དུས་ཚོད་མི་འདྲ་བ་དང་ས་ཁོངས་མི་འདྲ་བའི་ནང་གནའ་བོའི་མི་ཚོགས་ཀྱི་རྒྱུད་འཛིན་གྲུབ་ཆར་འགྱུར་ལྡོག་ཧ་ཅང་ཆེན་པོ་བྱུང་ཡོད། འགྱུར་ལྡོག་དེ་དག་ནི་དེ་སྔ་གནས་མྱོང་བའི་སྔ་དུས་ཀྱི་ས་ཁོངས་རང་བཞིན་གྱི་ཆབ་སྲིད་དངོས་ཚན་དང་བཙན་པོའི་རྒྱལ་རབས་དར་རྒུད་དང་འབྲེལ་བ་དམ་ཟབ་ཡོད། ཉེ་བའི་ལོ་5000ལྷག་ཙམ་རིང་ས་མཐོའི་གནའ་བོའི་མི་ཚོགས་ཁག་གཅིག་དང་ས་མཐོའི་ཕྱི་རོལ་ས་ཁུལ་གྱི་གནའ་བོའི་མི་ཚོགས་དབར་འབྲེལ་བ་དམ་ཟབ་ཡོད་པའི་ནང་ཨ་ཤེ་ཡ་དབུས་མའི་ས་ཁུལ་དང་ཨ་ཤེ་ཡ་ཤར་མའི་ལྷོ་རྒྱུད་ཀྱི་གནའ་བོའི་མི་ཚོགས་དབར་སྤེལ་རེས་བྱུང་ཡོད། རྒྱུད་འཛིན་རིག་པའི་དཔང་རྟགས་དེ་དག་གིས་གསལ་སྟོན་བྱས་པའི་ས་མཐོའི་ཕྱི་ནང་གི་རྙོག་འཛིང་ཆེ་བའི་མི་ཚོགས་དབར་གྱི་སྤེལ་རེས་ལོ་རྒྱུས་དེ་གནའ་རྫས་རྟོག་ཞིབ་ཞིབ་འཇུག་གིས་དངོས་པོའི་རིག་གནས་ཐད་ནས་གསལ་སྟོན་བྱས་པའི་ཧི་མ་ལ་ཡ་བརྒལ་བའི་སྤེལ་རེས་དང་ས་མཐོའི་དར་གོས་ལམ་བུའི་ཐོག་གི་དོན་དངོས་དང་ཡང་གཅིག་མཚུངས་བྱུང་ཡོད་པ་རེད།


分享到：QQ空间新浪微博腾讯微博人人网微信