འཇོལ་རྫོང་གི་རྒུན་འབྲུམ་ཆུང་ངུས་ཐོན་ལས་ཆེན་པོ་གསོ་སྐྱོང་བྱས་པ།

        ཉེ་བའི་ལོ་ཤས་རིང་འཇོལ་རྫོང་གིས་“རྫོང་གཅིག་ལ་ལས་རིགས་གཅིག་”གི་རྒུན་འབྲུམ་ཐོན་ལས་དཔེ་སྟོན་རྫོང་ནུས་ཤུགས་ཡོད་རྒུས་བཏོད་དེ་བཀོད་པ་ས་ཁོངས་ཅན་དང་། གཉེར་སྐྱོང་གཞི་ཁྱོན་ཅན། ཐོན་སྐྱེད་ཚད་ལྡན་ཅན། ཐོན་ལས་གྲངས་གཞི་ཅན། ཚོང་གཉེར་ཁྲོམ་ར་ཅན་བཅས་ཀྱི་སྦྲེལ་ཐག་ཧྲིལ་པོའི་ཐོན་ལས་རགས་ཙམ་ཆགས་ཡོད་རེད།

        འཇོལ་རྫོང་གིས་སྔ་རྗེས་སུ་སེམས་ཀྱི་ཉི་ཟླ་དང་། སྨན་རི་འཁྱགས་ཆང་། མིང་ཡུའེ་ཞོན་ཉི་ཧྲི། ཡུན་ནན་རུང་ཧྲེང་ཡུང་ཧེང་སོགས་རྩེར་སོན་རྒུན་ཆང་ཁེ་ལས་4ནང་འདྲེན་བྱས་པ་དང་། བོད་རྒྱ། ཧྲན་ཅང་། ཚོ་དྲུག་སོགས་སྤུས་ལེགས་ཆང་ཁང་7བཙུགས་ཡོད། རྫོང་དེའི་གཙོ་ཁྲིད་ཐོན་ལས་གཉེར་མཁན་ཁྱིམ་ཚང་ཞིང་ར་དང་ཞིང་པའི་ཆེད་ལས་མཉམ་ལས་ཁང་ཁྱོན་44ཡོད་པ་དང་རྒུན་ཆང་གི་ཚོང་རྟགས་ཁེ་ལས་24ཐོ་འགོད་བྱས་ཡོད།

        2022ལོའི་ལོ་མཇུག་བར་འཇོལ་རྫོང་གིས་རྒུན་འབྲུམ་འདེབས་ཁྱོན་མུའུ་14057ཚད་ལྡན་དུ་བཏང་བ་དང་ལོའི་ཐོན་ཚད་ཏུན་4711ཟིན་པ་དང་བཟོ་ལས་ཀྱི་ལོ་རེའི་ཐོན་རྫས་རིན་ཐང་སྒོར་དུང་ཕྱུར་1.5ཟིན་ཡོད། ཤང་གྲོང་6དང་སྲིད་འཛིན་གྲོང་ཚོ་19ཞིང་དུད་2778ལ་ཁྱབ་འགྱེད་བྱས་པར་དུད་ཚང་རེའི་ཆ་སྙོམས་ཡོང་འབབ་སྒོར་ཁྲི་1.38ལྷག་ཙམ་ཟིན་ཡོད་པ་རེད།

        ཉེ་བའི་ལོ་ཤས་རིང་འཇོལ་རྫོང་ཧྲེང་ཕིང་གྲོང་རྡལ་ཨ་གདོང་གྲོང་ཚོས་རྒུན་ཆང་ཁེ་ལས་གྲགས་ཅན་མིང་ཡུའེ་ཞོན་ཉི་ཧྲི་སེམས་ཀྱི་ཉི་ཟླ་(འཇོལ་རྫོང) ཨ་རག་ལས་རིགས་ཚད་ཡོད་ཀུང་སི་དང་མིང་དབྱི་རྒུན་འབྲུམ་འདེབས་འཛུགས་(འཇོལ་རྫོང) ཚད་ཡོད་ཀུང་སི་ཞིག་ནང་འདྲེན་བྱས་ཏེ་“ས་ཞིང་འཁོར་རྒྱུག་+རྟེན་གཞིའི་གླ་ཕོགས་”ཀྱི་རྣམ་པའི་ཐོག་ནས་མུའུ་རེར་བོགས་དངུལ་སྒོར་2250བཏང་སྟེ་ས་ཞིང་བོགས་མར་བཏང་བ་དང་གྲོང་ཚོ་ཡོངས་ཀྱི་ཞིང་དུད་87དེའི་ནང་ཞུགས་ནས་ཨ་གདོང་གྲོང་ཚོའི་འཁོར་རྒྱུག་ས་ཞིང་ཁྱོན་མུའུ་238.98བོགས་མར་བཏང་བ་དང་། ལོ་རེར་གྲོང་མིར་བོགས་དངུལ་སྒོར་ཁྲི་48.13སྤྲད་པ་རེད། དེ་དང་ཆབས་ཅིག་ཀུང་སིས་ད་དུང་རིན་མེད་ངང་ལག་རྩལ་མཛུབ་ཁྲིད་དང་ཆེད་ལས་ཅན་གྱི་འདེབས་འཛུགས་སྒྲིག་ཆས། ཞིང་སྨན་སོགས་ཀྱི་བྱ་ཐབས་སྤྱད་དེ་མཐའ་འཁོར་གྱི་ཞིང་དུད་121རྒུན་འབྲུམ་འདེབས་འཛུགས་ནང་ཞུགས་རྒྱུར་སྐུལ་ཁྲིད་བྱས་པ་རེད།

        ཀུང་སིས་ས་གནས་དེ་གའི་སྐལ་བཟང་མེ་ཏོག་རྒུན་འབྲུམ་འདེབས་འཛུགས་ཆེད་ལས་མཉམ་ལས་ཁང་དང་མཉམ་ལས་བྱས་ཏེ་“བོགས་གཏོང་+ལས་གཉེར་”གྱི་རྣམ་པ་སྤྱད་དེ་ས་ཞིང་མུའུ་རེར་ལས་མི་30བོགས་གཏོང་བྱས་པ་དང་ལས་མི་རེར་སྒོར་120སྤྲོད་པའི་བྱེད་ཐབས་ལ་བརྟེན་ནས་ས་གནས་དེ་གའི་གྲོང་མིར་ཡལ་བཞུར་རྒྱག་པ་དང་འཐུ་བ། ཆང་སྙོལ་བ་སོགས་ལས་ཞུགས་ལས་གནས་སྣ་ཚོགས་མཁོ་འདོན་བྱས་པ་རེད། དེའི་རྨང་གཞིའི་ཐོག་གྲོང་ཚོའི་ཏང་སྤྱི་ཁྱབ་ཀྲི་པུས་སེམས་ཀྱི་ཉི་ཟླ་ཨ་རག་ལས་རིགས་མ་རྐང་ཚད་ཡོད་ཀུང་སི་དང་འབྲེལ་བ་ཧུར་ཐག་བྱས་ཏེ་མངགས་ཐོ་ཉོ་སྒྲུབ་བྱེད་སྟངས་བརྒྱུད་2012ལོ་ནས་ད་བར་ལོ་ལྟར་སྤྱི་རྒྱ་རེར་སྒོར་3.6བྱས་ནས་ཉོ་སྒྲུབ་བྱས་པས་དུད་ཚང་རེར་ཆ་སྙོམས་ཡོང་འབབ་སྒོར་12910ཟིན་ཡོད་པ་རེད།