བདེ་ཆེན་མཐོ་སྒང་དུ་སྟོན་གྱི་ལོ་ལེགས་བྱུང་བ།

ད་ནི་ཏག་ཏག་བདེ་ཆེན་མཐོ་སྒང་དུ་སྟོན་གྱི་འབྲས་བཟང་ལེན་པའི་དུས་ལ་འཁེལ་ཡོད། རྒྱལ་ཐང་གྲོང་རྡལ་བཅིངས་འགྲོལ་གྲོང་ཚོའི་གྲོང་མིས་ཉེ་ཆར་གནམ་གཤིས་ཡག་པོའི་གོ་སྐབས་དམ་དུ་བཟུང་ནས།  ནས་བརྔ་བསྡུ་དང་།  ཤོག་རྒྱག་པ།  སྐྱེལ་འདྲེན། བསིལ་སྐམ་བྱེད་པ་སོགས་གང་སར་བྲེལ་འཚུབ་ཀྱི་རྣམ་པ་ཆེ་ནའང་སྟོན་ལེན་པའི་ངལ་རྩོལ་གྱི་སྣང་བ་འདི་ཇི་འདྲའི་གསོན་ཉམས་ལྡན་ཞིང་རླབས་ཆེ་བ་ཞིག་རེད་ཨང་།   ལས་ལ་བརྩོན་ཞིང་བབ་ཆགས་པའི་ཞིང་པ་ཚོས་གསེར་ཞིང་གྲུ་བཞིའི་ནང་ན་ཕན་ཚུན་ལ་རོགས་རམ་དང་འབྲས་བཟང་ཐོབ་པའི་སྤྲོ་སྣང་མངོན་པ་དེ་སྐྱིད་ཀྱི་གཞི་མར་མཐོང་། 

      སེམས་ཀྱི་ཉི་ཟླ་གྲོང་ཁྱེར་ཡང་ཐང་གྲོང་རྡལ་མཉམ་འབྲེལ་གྲོང་ཚོའི་ཞིང་ས་ཀུན་དུའང་ནས་བརྔ་བསྡུ་བྱེད་པའི་ཉམས་དགའི་སྣང་བ་ཞིག་གིས་ཁྱབ་ཡོད་ལ།བདེ་བླག་ངང་སྟོན་གྱི་འབྲས་བཟང་བླངས་པ་ན་ད་ནི་ལོ་གཅིག་གི་འགན་འཁུར་ལྗིད་མོ་ཞིག་ཡོངས་སུ་ལེགས་འགྲུབ་བྱུང་ཞིང་སེམས་བདེ་མོ་བྱས་ཆོག་པ་མཚོན་ཡོད།    

     ཤེས་རྟོགས་བྱུང་བར་གཞིགས་ན། ཉེ་བའི་ལོ་ཤས་རིང་། བདེ་ཆེན་ཁུལ་གྱིས་ཞིང་ལས་ཀྱི་ཕན་འབྲས་ཆེར་གཏོང་དང་ཞིང་པའི་འབབ་འཕར་དམིགས་ཚད་ལ་དམ་པོར་དམིགས་ནས་ས་གནས་དེ་གའི་ས་ཆའི་ཐོན་ཁུངས་དང་གནམ་གཤིས་ཀྱི་ལེགས་ཆ་གང་ལེགས་སྤྱད་དེ་ས་མཐོའི་ཁྱད་ལྡན་ཐོན་ལས་ཧུར་ཐག་བཏོད་པས་ས་གནས་དེ་གའི་ཞིང་ལས་དེང་རབས་ཅན་གྱི་འཕེལ་རིམ་ལ་སྐུལ་འདེད་ཐེབས་པ་མ་ཟད། མང་ཚོགས་འབབ་འཕར་ཕྱུག་འགྱུར་ཡོང་རྒྱུར་ཐབས་ལམ་གསར་པ་ཞིག་ཀྱང་བཏོད་ཡོད།