ཕ་ས་ཕ་ཡུལ།

ཕ་ས་ཕ་ཡུལ།

                 ཅོ་བྱང་སྐར།

མེས་པོ་ཨག་ཚོམ་རུས་པ་ཅན་པོས་བྱ་རྟ་སྔོན་མོ་རླུང་གཤོག་བཅིབས་ནས།

སྟོད་ཀྱི་ཨ་མྱེ་དཔའ་རྒོད་རི་ནས་རྐྱང་དང་རྒོ་བའི་རྨུག་རྗེས་འཚོལ་དུས།

སྐྱིད་སྡུག་ལ་མོའི་ཁིས་ག་མཐོ་རུང་། ཡུལ་ལུངས་འདི་ལ་དཔའ་སྐད་ཆེའོ།

དབྱངས་གསལ་སྙེགས་པའི་རྗེས་རབས་ང་ཚོ་ཀ་ཁ་ག་ངའི་ཕོ་བྲང་དཀར་པོ།

སློབ་གླིང་རིག་པའི་དགའ་ཚལ་འདི་ནས་འཛོམས་གསུམ་འཛོམས་པའི་སྐལ་བ་ཡག་སོང་།

ཀློག་པའི་གདངས་དབྱངས་གསལ་ཤིང་སྙན།

གྱེར་པའི་སྨྲ་བརྗོད་དག་ཅིང་འཇེབས།

ཡབ་ཡུམ་ཞི་དུལ་བློ་རྒྱ་ཅན་པོས་བྲེ་སེར་འབྲོང་མོའི་ཞབས་རྗེས་དེད་ནས།

དབུས་ཀྱི་ཚང་ཚིང་རྒྱ་རྫོང་ནགས་ནས་དམར་ཡག་སྟག་གི་མཆོངས་རྩལ་འཚོལ་དུས།

རེས་མོས་འཁོར་བའི་ལས་ཚེགས་ལྕི་རུང་། གཞིས་ཁྱིམ་འདི་ལ་དགོད་སྒྲས་ཁེངས་ཡོད།

རིགས་རུས་གཅིག་པའི་ཕྱི་རབས་ང་ཚོ་བྱམས་དང་སྙིང་རྗེའི་ཀུན་སྤྱོད་མངའ་བ།

གཡང་ལུང་ཆོས་ཀྱི་ཞིང་ཁམས་འདི་ནས་ལང་ཚོའི་གཉོམ་ལག་རྒྱས་པ་རྨད་དོ།

ལང་ཚོའི་སྟོབས་ཤུགས་བརྗིད་ཅིང་བརྟན།

གཞོན་པའི་དཔའ་རྩལ་རྒོད་ཅིང་འབར།

བཤེས་གཉེན་བློ་གྲོས་གཏོང་ཕོད་ཅན་གྱིས་བསམ་གཞིགས་སྟོང་གི་ལོ་ཟླའི་ཁྲོད་ནས།

སྨད་ཀྱི་དལ་འབབ་ཀླུ་ཆབ་འགྲམ་ནས་གསེར་མིག་ཉ་མོའི་འཁྱུད་རྩལ་འཚོལ་དུས།

མེ་ཏོག་ཚོམ་བུའི་གཅེས་སྐྱོང་སྡུག་རུང་། གནའ་མཁར་འདི་ལ་ཤེས་དཔལ་རྒྱས་ཡོད།

མ་འོངས་འཚོལ་བའི་སྤུན་ཟླ་ང་ཚོ་དུས་བཞིར་ས་ལ་དགེ་བཅུ་འཛོམས་ས།

ཤར་ཕྱོགས་ཅོ་ནེའི་སྐུ་མཁར་འདི་ནས་མཐུན་པའི་ལག་ཟུང་དམ་པ་བསྟོད་དོ།

བརྩེ་བའི་དུང་པ་གསེར་དང་དངུལ།

མཐུན་པའི་ཕྱི་ཐག་རིང་ཞིང་བརྟན།