ཡུན་བོད་ལྕགས་ལམ་ལས་ས་དམ་ནས་སེམས་ཀྱི་བར་གྱི་ལྕགས་ལམ་ཞིབ་བཟོ་སྙོམས་སྒྲིག་བྱེད་བཞིན་པ།

     ཉེ་ཆར། ཀྲུང་གོ་ལྕགས་ལམ་ཁུན་མིང་ཅུས་ཚོགས་པ་ཚད་ཡོད་ཀུང་སི་ནས་ཤེས་རྟོགས་བྱས་པར་གཞིགས་ན། ཟླ་10པའི་ཚེས་20ཉིན་རང་རྒྱལ་གྱིས་བཟོས་པའི་ལྕགས་ལམ་བདག་སྐྱོང་འཕྲུལ་འཁོར་ཆེ་གྲས་གཉིས་ཡུན་བོད་ལྕགས་ལམ་ལས་ས་དམ་ནས་སེམས་ཀྱི་ཉི་ཟླའི་ལྕགས་ལམ་དུམ་བུའི་སེམས་ཀྱི་ཉི་ཟླའི་ས་ཚིགས་སུ་དུང་བརྡ་སྒྲོག་ཞོར། སྒུལ་བྱེད་འཕྲུལ་འཁོར་གྱིས་ཨར་འདམ་གྱི་སྒྲིག་ཆས་འཁོར་བསྐྱོད་བྱས་སུ་བཅུག་ནས་གོམ་པ་རེ་རེ་བཞིན་མདུན་ཕྱོགས་སུ་སྒུལ་ནས་ཨར་ལས་བྱེད་བཞིན་ཡོད་ཅིང་། ལམ་ཐིག་ཞིབ་བཟོའི་ལས་སྒྲུབ་རིམ་པ་བཞིན་སྒྲུབ་ནས་ཡུན་བོད་ལྕགས་ལམ་ལས་ས་དམ་ནས་སེམས་ཀྱི་ཉི་ཟླའི་ལྕགས་ལམ་དུམ་བུའི་འཛུགས་སྐྲུན་གྱི་ལམ་ཐིག་ཞིབ་བཟོ་སྙོམས་སྒྲིག་གི་དུས་མཚམས་སུ་སླེབས་ཡོད་པ་རེད།

    ཤེས་རྟོགས་བྱུང་བར་གཞིགས་ན། ཡུན་བོད་ལྕགས་ལམ་ལས་ས་དམ་ནས་སེམས་ཀྱི་ཉི་ཟླ་ལྕགས་ལམ་དུམ་བུ་དེ་ཡུན་ནན་ཞིང་ཆེན་གྱི་ནུབ་བྱང་རྒྱུད་དུ་གནས་པ་དང་། ས་དམ་གྲོང་ཁྱེར་དང་བདེ་ཆེན་བོད་རིགས་རང་སྐྱོང་ཁུལ་གཉིས་སྦྲེལ་ཡོད། དེ་ནི་རང་རྒྱལ་གྱི《དུས་ཡུན་རིང་འབྲིང་གི་ལྕགས་ལམ་དྲ་བའི་འཆར་འགོད》ཁྲོད་ཡུན་བོད་ལྕགས་ལམ་གྱི་གྲུབ་ཆ་གལ་ཆེན་ཞིག་རེད། ས་བབ་མཐོ་ཚད་སྨི་2400ཟིན་པའི་ས་དམ་གཤོངས་སའི་ལམ་བུ་ནས་བྱང་དུ་འབྲི་ཆུའི་སྟག་མཆོང་གྲོག་རོང་བར་དང་དེ་ནས་ས་བབ་སྨི་3400ཟིན་པའི་སེམས་ཀྱི་ཉི་ཟླའི་གཤོང་སར་སླེབས་ནས་མཐོ་སྒང་གི་གངས་རིའི་ས་ཁུལ་བརྒྱུད་དགོས་པ་དང་།  ལམ་བར་གྱི་ས་གཤིས་གྲུབ་ཆ་རྙོག་འཛིང་ཆེ་བ་དང་དུས་ཚིགས་དང་ཉིན་མཚན་དབར་དྲོད་ཚད་ཀྱི་དྲོད་ཚད་ཧེ་བག་ཆེ་བས་ལམ་ཐིག་ཞིབ་བཟོ་སྙོམས་སྒྲིག་གི་ལས་ཀ་དཀའ་ཚེགས་ཅུང་མང་པོ་ལྡན། 

　“ས་བབ་མཐོ་སར་མཁའ་རླུང་དཀོན་པ་དང་དམིགས་བསལ་གྱི་ཕུག་ལམ་མང་བ་སོགས་ཀྱི་དཀའ་གནད་ལ་དམིགས་ཏེ་ང་ཚོས་ཉིན་ལྟར་ས་ཁོངས་མི་འདྲ་བའི་བརྟན་གཏོང་ཞུགས་གྲངས་སྔ་སྣུར་དུ་གཏན་འཁེལ་བྱས་ནས་ས་བབ་མི་འདྲ་བའི་ལས་ཀའི་ཚད་གཞིའི་བླང་བྱ་དང་འཚམ་པ་བྱས་ཏེ་ཨར་སྐྲུན་མཇུག་འགྲིལ་རྗེས་ཤུགས་འགྲེམས་མེ་འཁོར་གྱིས་དུས་ཐོག་ཏུ་འཕྲུལ་འཁོར་ཆེ་གྲས་ལ་བདག་སྐྱོང་དང་སྲུང་སྐྱོང་བྱས་ནས་ལམ་སྐྱོང་འཕྲུལ་འཁོར་ཆེ་གྲས་ཀྱི་ལྷུ་ཚིགས་ཞན་པ་དང་སྐྱོན་ཕོག་ཚད་ཅུང་མཐོ་བའི་ལྷུ་ལག་ལ་ཞིབ་བཤེར་བྱས་ཏེ་དུས་ཐོག་ཏུ་སྒྲིག་ཆས་ཀྱི་གནད་དོན་ཤེས་རྟོགས་དང་ཐག་གཅོད་བྱས་ནས་ཡུན་བོད་ལྕགས་ལམ་ལས་ས་དམ་ནས་སེམས་ཀྱི་ཉི་ཟླའི་ལྕགས་ལམ་དུམ་བུའི་ཨར་ལས་ལ་འཆར་གཞི་ལྟར་སྐུལ་འདེད་གཏོང་རྒྱུའི་འགན་ལེན་བྱེད་ཀྱི་ཡོད་ཅེས་རྒྱལ་ཁབ་ལྕགས་ལམ་ཁུན་མིང་ཅུས་ཁུན་མིང་བཟོ་དོན་འཕྲུལ་ཆས་ཚན་པའི་ལམ་ཐིག་ཉམས་བཟོ་འཁོར་ཁང་གི་འགན་འཁུར་བ་དབྱང་ཅ་ཧྥུའུ་ཡིས་དེ་ལྟར་བཤད་བྱུང་། 

　  འགྲུལ་པ་རླངས་འཁོར་ནང་སྡོད་སྐབས་བརྟན་པོ་དང་བདེ་པོ་ཡོང་བར་སྔོན་ཐོན་དང་རིག་ནུས་ལྡན་པའི་ཤུགས་འགྲེམས་མེ་འཁོར་དགོས་པ་མ་ཟད། ལྕགས་ལམ་ལམ་ཐིག་གི་བདེ་འཇགས་དང་བདེ་བླག་ཡོང་ཐུབ་དགོས། ལྕགས་ལམ་གསར་དུ་བསྐྲུན་རྗེས་ལྕགས་ལམ་གྱི་བར་ཐག་དང་། ཆུ་ཚད། མཐོ་དམའ། ལྕགས་ལམ་སོགས་མཁྲེགས་པོའི་དམིགས་ཚད་སྤྱིར་ན་མཐོ་པོ་མེད་པས་མེ་འཁོར་མྱུར་བགྲོད་གཞུང་ལམ་ཐོག་སྐྱོད་པའི་ཆ་རྐྱེན་གྱི་དགོས་མཁོ་སྐོང་ཐུབ་ཀྱི་མེད།

      ས་གནས་ས་ཐོག་གི་ལྕགས་ལམ་ཉམས་གསོའི་འཁོར་ཁང་གི་ཀྲུའུ་རེན་ལི་ཧྥེ་ཡིས་ངོ་སྤྲོད་བྱས་པར་གཞིགས་ན།རྒྱལ་ཁབ་ལྕགས་ལམ་ཁུན་མིང་ཅུས་ཀྱིས་རང་རྒྱལ་གྱིས་བཟོས་པའི་ལམ་གསོའི་སྒྲིག་ཆས་ཆེ་གྲས་ཀྱི་ལག་རྩལ་ལེགས་ཆ་འདོན་སྤེལ་གང་ལེགས་བྱས་ནས་ཤུགས་འགྲེམས་མེ་འཁོར་9སྒྲིག་འཛུགས་བྱས་ཏེ་རྡོ་ཟེགས་དང་ཁ་གསབ་དང་། རྣོ་ལྕགས་ལེགས་སྒྲིག ལ་ངོས་ཁོད་སྙོམས་བྱས་ཡོད།  ལྕགས་ལམ་སྤུས་ཚད་ཀྱི་ཕྱོགས་བསྡུས་དམིགས་ཚད（TQI）དེ་3.0mmམན་དུ་ཚོད་འཛིན་བྱས་ནས་ཤུགས་འགྲེམས་མེ་འཁོར་ཆུ་ཚོད་རེར་མྱུར་ཚད་སྤྱི་ལེ་140ཡི་ཐོག་ནས་ས་གཤིས་ཁོར་ཡུག་མི་འདྲ་བར་བསྐྱོད་རྒྱུ་ཐུབ་པ་བྱས་ཏེ་ལྕགས་ལམ་ཧྲིལ་པོའི་སྤུས་ཚད་འགན་ལེན་གྱི་སྒྲིག་ཆས་སྤྱོད་རྒྱུ་དང་། ལམ་ཐིག་ཧྲིལ་བོར་བདེ་འཇགས་ཡིན་ལ་སྤུས་ཀ་ལེགས་པའི་སྒོ་ནས་ཤར་གཏོང་ཐུབ་པའི་འགན་ལེན་བྱ་རྒྱུ་ཡིན་ཟེར།    

      ཡུན་བོད་ལྕགས་ལམ་ལས་ས་དམ་ནས་སེམས་ཀྱི་ཉི་ཟླའི་ལྕགས་ལམ་དུམ་བུ་ཤར་གཏོང་ཐུབ་རྗེས་བདེ་ཆེན་བོད་རིགས་རང་སྐྱོང་ཁུལ་དུ་ལྕགས་ལམ་ཤར་གཏོང་མི་ཐུབ་པའི་ལོ་རྒྱུས་མཇུག་འགྲིལ་རྒྱུ་དང་ཡུན་ནན་ནུབ་བྱང་བོད་རིགས་ས་ཁུལ་གྱི་མི་དམངས་ཀྱིས“ཤུགས་འགྲེམས་མེ་འཁོར་གྱི་དུས་སྐབས”བསུས་ནས་ཡུན་ནན་ནུབ་བྱང་ས་ཁུལ་གྱི་ལྕགས་ལམ་དྲ་བ་དང་སྐྱེལ་འདྲེན་ཞབས་ཞུའི་ཞན་ཆ་གསབ་རྒྱུ་ཡིན་ལ། ས་ཁོངས་ཀྱི་ཐོན་ཁུངས་གསར་སྤེལ་གཏིང་ཟབ་དང་ཡུན་ནན་ནུབ་བྱང་མི་རིགས་ས་ཁུལ་གྱི་ཡུལ་སྐོར་དཔལ་འབྱོར་འཕེལ་རྒྱས་ལ་སྲུང་སྐྱོང་དང་སྐུལ་འདེད་གཏོང་རྒྱུ་དང་དེ་བཞིན་ཡུན་ནན་མཐའ་མཚམས་མི་རིགས་འདུས་སྡོད་ཁུལ་གྱི་གྲོང་གསེབ་དར་རྒྱས་གཏོང་རྒྱུར་ནུས་པ་གལ་ཆེན་ཐོན་རྒྱུ་རེད།