རས་པའི་རིག་གནས་སྒྱུ་རྩལ་ལ་བརྟེན་ནས་དམངས་སེམས་ལ་དྲོ་སྣང་བསྩལ་བ།

    ཉེ་བའི་ལོ་ཤས་རིང་བདེ་ཆེན་ཁུལ་གྱིས་ཏན་ཏིག་ངང་རིག་གནས་དམངས་ཕན་འདུ་འགོད་ལས་དོན་སྤེལ་ནས་རིག་གནས་ཞབས་ཞུ་དང་རིག་གནས་དམངས་ཕན་ཆུ་ཚད་མུ་མཐུད་མཐོ་རུ་བཏང་སྟེ་སྣ་མང་ཕུན་སུམ་ཚོགས་པའི་རིག་གནས་བྱེད་སྒོ་མི་དམངས་ཀྱི་སྒོ་འགྲམ་དུ་སྤེལ་ནས་མང་ཚོགས་ཀྱི་ཉིན་བཞིན་ཆེ་རུ་འགྲོ་བའི་བསམ་པའི་རིག་གནས་འཚོ་བའི་དགོས་མཁོ་ཟམ་མི་ཆད་པར་བསྐངས་ཡོད། “རས་པའི་སྒྱུ་རྩལ་གྱི་ཕ་ཡུལ”ཞེས་འབོད་པའི་མཐའ་ཆུ་གྲོང་རྡལ་གྱིས་རས་པའི་སྒྱུ་རྩལ་དུས་ཆེན་སོགས་གཉེར་བ་བརྒྱུད་ནས་བསམ་པའི་རིག་གནས་འཚོ་བ་ཇེ་བཟང་དུ་གཏོང་བའི་རྨང་གཞིའི་ཐོག་རས་པའི་རིག་གནས་བརྒྱུད་སྤེལ་ནུས་པ་དང་ཤུགས་རྐྱེན་ཐེབས་ཤུགས་ཆེ་རུ་ཧུར་ཐག་བཏང་བ་དང་ཆབས་ཅིག་གྲོང་གསེབ་དར་རྒྱས་གཏོང་རོགས་བྱས་ཏེ། རིག་གནས་ལ་བརྟེན་ནས་མི་དམངས་སྐྱོང་བ་དང་། རིག་གནས་ལ་བརྟེན་ནས་མི་དམངས་ལ་བདེ་སྐྱིད་བསྐྲུན་པ། རིག་གནས་ལ་བརྟེན་ནས་མི་དམངས་ཕྱུག་འགྱུར་ཡོང་བ་བཅས་དངོས་འབྲེལ་མངོན་འགྱུར་བྱུང་ཡོད།