ཚེ་ཐག་རིང་བའི་མན་ངག

    ལོ་ན102ལ་སོན་པའི་ཨ་ཁུ་བཟོད་པ་ད་ལོའི་ཟླ2པར་ཚེ་ལས་འདས་སོང་། ཁོང་ནི་ང་ཚོའི་སྡེ་བའི་ཚེ་ཐག་ཆེས་རིང་བའི་རྒན་པ་དེ་ཡིན་ལ། ཆུང་དུས་ནས་ཕྱུགས་ཟོག་འཚོ་རྒྱུར་དགའ་བས་མི་ཚེ་གང་བོར་ཕྱུགས་ཟོག་གི་རྗེས་སུ་བརྩོན་པའི་ལས་ལ་འབད་པ་རེད།

    ལོ་ན90ལ་སོན་ནའང་ཆར་རླུང་གང་ལའང་མི་འཛེམ་པར་སྔར་བཞིན་གོམ་པ་བརྟན་ཞིང་ལྡེམ་མྱུར་ལྡན་པའི་སྒོ་ནས་ཕྱུགས་ཟོག་གི་རྗེས་སུ་ཡར་རྒྱུག་མར་རྒྱུག་བྱེད་ཀྱིན་ཡོད་པས།ལོ་ཚོད་ནི་ཁོ་ལ་མཚོན་ན་གྲངས་ཀ་ཙམ་ལས་མ་འདས།ཁོའི་བདེ་ཐང་གི་ལུས་པོ་དང་ཚེ་ཐག་རིང་པོ་དེ་ནི་ཉིན་རྒྱུན་གྱི་བྲེལ་འཚུབ་དང་འབྲེལ་བ་དམ་པོ་ཡོད།

    དཔྱད་གཞིའི་ཡིག་ཆ་ལས་མངོན་པ་ལྟར་ན།ལོ་ན་ཇེ་མཐོར་སོང་བ་དང་བསྟུན་ནས་ཁོམ་དྲག་སྟེ་ལུས་པོའི་བདེ་ཐང་ལ་དོ་སྣང་ཚད་དྲག་བྱས་ན།སེམས་པ་སྟོང་བར་འགྱུར་པ་དང་འཚོ་བར་ངེས་འབྱུང་སྐྱེ་སླ་བས།ལུས་པོ་བདེ་ཐང་ཡོང་བར་ལྷག་ཏུ་མི་ཕན་པ་རེད། དེ་བས་དགའ་ཕྱོགས་ཤིག་སྐྱེད་སྲིང་བྱེད་དགོས་ལ། དགའ་ཕྱོགས་ཡོད་པའི་རྒན་པ་རྣམས་ལ་འཚོ་བའི་གོ་རིམ་ཡོད་པ་དང་བྲེལ་འཚུབ་ཆེ་བས།ཁོ་ཚོའི་འཚོ་བར་སྤྱིར་བཏང་གིས་སྤྲོ་སྣང་དང་སྐྱིད་སྣང་ལྡན་པ་རེད།

    “བྲེལ་བ་ཆེ་བའི་རྒན་པ་ཚེ་ཐག་རིང་།”ཞེས་པའི་ཁ་དཔེ་ཞིག་ཡོད་པ་དེ་ལ་ཚན་རིག་གི་གཞི་འཛིན་ས་མེད་པ་མ་ཡིན་ཏེ། བྲེལ་བ་ཆེ་བའི་ལས་ཀ་ཡིས་མི་རྣམས་ཀྱི་ཁེར་རྐྱང་གི་སྡུག་བསྔལ་དང་སུན་སྣང་སེལ་ཐུབ་པས།ལས་ཀ་འོས་འཚམ་ལས་ན་ཚེ་མཇུག་གི་ཉི་མ་འཁྱོལ་ཐུབ་པར་མ་ཟད། སེམས་ཁམས་སྐྱིད་པོ་ཡོང་བར་ཕན་ནོ། །