སེམས་ཀྱི་ཉི་ཟླ་གྲོང་ཁྱེར་གྲོང་ཁུལ་ལི་སུའུ་རིགས་ཀྱི་སྤུན་ཟླས“ཁོ་ཧྲི”དུས་ཆེན་དགའ་གཏོང་བྱས་པ།

ཟླ12པའི་ཚེས25ཉིན་གྱི་ཕྱི་དྲོར། 2024ལོའི་སེམས་ཀྱི་ཉི་ཟླ་གྲོང་ཁྱེར་གྱི་གྲོང་ཁུལ་གྱི“ཁོ་ཧྲི”དུས་ཆེན་གྱི་ཇོ་སྟོན་ཚོགས་འདུ་དེ་སེམས་ཀྱི་ཉི་ཟླ་མགྲོན་ཁང་ཆེན་མོར་འཚོགས་པ་དང་། སེམས་ཀྱི་ཉི་ཟླ་གྲོང་ཁྱེར་གྲོང་ཁུལ་གྱི་ལི་སུའུ་རིགས་ཀྱི་སྤུན་ཟླ་དང་མི་རིགས་ཁག་གི་གཅེན་གཅུང་ཚོ་མཉམ་འཛོམས་བྱས་ནས་མཉམ་དུ་དུས་ཆེན་དགའ་གཏོང་བྱས་ཡོད།

  ཁུལ་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་ཡུས་ཧྲེང་ཞང་ཚོགས་འདུར་ཕེབས་པ་དང་འབྲེལ་ཤིས་ཚིག་ཀྱང་གསུངས་པ་རེད། ཁུལ་ཨུའི་རྒྱུན་ཨུའམ་ཁུལ་མི་དམངས་སྲིད་གཞུང་གི་རྒྱུན་ལས་ཁུལ་གཞོན་པ་རྒྱ་མཚོ་ཚོགས་འདུར་ཕེབས་པ་དང་འབྲེལ་གསུང་བཤད་ཀྱང་གནང་ལ་ཁོང་གིས་ཁུལ་ཨུ་དང་། ཁུལ་མི་དམངས་འཐུས་ཚོགས་རྒྱུན་ཨུ། ཁུལ་མི་དམངས་སྲིད་གཞུང་། ཁུལ་སྲིད་གྲོས་བཅས་ཀྱི་ཚབ་ཞུས་ནས་ཁུལ་ཡོངས་ཀྱི་ལི་སུའུ་རིགས་ཀྱི་སྤུན་ཟླར་དུས་ཆེན་གྱི་འཚམས་འདྲི་གནང་བ་རེད།
      བྱེད་སྒོའི་ཐོག་2023ལོར་ཁུལ་ཡོངས་ཀྱི་གོང་འོག་ཚང་མས་སེམས་པ་གཅིག་མཐུན་དང་མཐུན་སྒྲིལ་འབད་འཐབ་བྱས་ནས་སྤྱི་ཚོགས་ཞི་མཐུན་བརྟན་ལྷིང་དང་། དཔལ་འབྱོར་བརྟན་པོའི་ངང་འཕར་བ། དམངས་འཚོ་རྒྱུན་ཆད་མེད་པར་ལེགས་སུ་འགྲོ་བ། སྣོད་བཅུད་དེ་བས་ལེགས་པ་བཅས་ཀྱི་རྣམ་པ་རྒྱུན་འཁྱོངས་བྱས་ཡོད། ཁུལ་ཡོངས་ཀྱི་ལི་སུའུ་རིགས་ཀྱི་སྤུན་ཟླ་ཚོས་བློ་བརྟན་འགྱུར་མེད་ངང་ཀྲུང་ཧྭ་མི་རིགས་ཀྱི་གཅིག་མཐུན་འདུས་གྲུབ་ཀྱི་འདུ་ཤེས་བརྟན་པོ་འཛུགས་པ་དང་། མི་རིགས་ཁག་གི་མཐུན་སྒྲིལ་ཆེན་པོར་ཤུགས་སྣོན་རྒྱག་པ་དང་སྲ་བརྟན་དུ་གཏོང་བ། ལི་སུའུ་རིགས་ཀྱི་ཕུལ་བྱུང་སྲོལ་རྒྱུན་རིག་གནས་རྒྱུན་འཛིན་དང་དར་སྤེལ་ཧུར་ཐག་གཏོང་བ་བཅས་བྱས་ནས་ཁུལ་ཡོངས་ཀྱི་མི་རིགས་ཁག་གི་མི་དམངས་མང་ཚོགས་དང་མཉམ་དུ་བདེ་ཆེན་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་ཐུན་མོང་ཐོག་སྐུལ་འདེད་གཏོང་དགོས་ཞེས་བསྟན་ཡོད།
  བྱེད་སྒོ་སྤེལ་རིང་ཁུལ་ཡོངས་ཀྱི་མི་རིགས་ཁག་གི་མང་ཚོགས་ཚོས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱ་རྒྱུ་མཐའ་འཁྱོངས་ཀྱིས་ཏང་གི་ཚོགས་ཆེན་ཉི་ཤུ་པའི་དགོངས་དོན་དང་མི་རིགས་ལས་དོན་ལ་ཤུགས་སྣོན་དང་ལེགས་སུ་གཏོང་རྒྱུའི་སྐོར་གྱི་དགོངས་པ་གལ་ཆེན་ཕྱོགས་ཡོངས་ནས་ལག་བསྟར་དོན་འཁྱོལ་བྱས་ཏེ་མཐུན་སྒྲིལ་རྡོག་རྩ་གཅིག་སྒྲིལ་དང་བཀའ་དྲིན་ཚོར་ནས་མདུན་སྐྱོད་བྱས་ཏེ་མི་རིགས་མཐུན་སྒྲིལ་ཡར་ཐོན་གྱི་དཔེ་སྟོན་ཁུལ་གྱི་ཚད་ཤིང་དང་འཛམ་གླིང་གི“སེམས་ཀྱི་ཉི་ཟླ”བསྐྲུན་ཆེད་སྟོབས་ཤུགས་ལེགས་སྐྱེས་སུ་འབུལ་དགོས་པའི་བླང་བྱ་བཏོན་པ་རེད།

དུས་ཆེན་གྱི་བར་སྐབས་སུ་ད་དུང་གསོན་ཉམས་ལྡན་པའི་རིག་རྩལ་འཁྲབ་སྟོན་བྱས་ཤིང་། རྫོང（གྲོང་ཁྱེར）གསུམ་ནས་ཡོང་བའི་ལི་སུའུ་རིགས་ཀྱི་སྤུན་ཟླ་དང་མི་རིགས་ཁག་གི་གཅེན་གཅུང་མིང་སྲིང་གིས་ལག་གདང་སྦྲེལ་བ་དང་དགའ་སྤྲོའི་ཞབས་བྲོ་འཁྲབ་ནས་དགའ་སྤྲོ་འཆམ་མཐུན་གྱི་དུས་ཆེན་ཞིག་མཉམ་དུ་བཏང་བ་རེད།